21/11/2024
شفت فيديو لعمر الشريف، بيقول انه بيتمني انه مكانش بقى نجم عالمي، وفضل نجم في مصر، وكون عيلة كبيرة، وخلف عيال كتير، وبقى سعيد ومبسوط، احسن من العالمية وانه اه عالمي ومعروف في اليابان والصين بس هو دلوقتي وحيد ومش سعيد..
تصريح عمر الشريف دا .. شيء معروف جدا .. فكرة انك تكون في حيرة بين امرين.. الاتنين بتحبهم .. وتختار واحد فيهم ومهما كان نجاحك فيه .. تفضل تحلم بالتاني .. يعني هو مثلا لو معملش لورانس العرب وكون عيلة كبيرة .. كان فيه جزء منه هيفضل يحلم بالعالمية وانه ياه لو عمل لورانس العرب.... الموضوع ليه علاقة بما يسمي الشوق لغير الموجود.
فيه فيلم حلو قوي لمحمد فوزي .. اسمه معجزة السماء .. الفيلم بيحكي عن موظف بيطمح للشهرة .. بيكون رايح اسكندرية علشان يبدأ طريق الغنا والشهرة .. لكنه بيروح راس البر غصب عنه مع صحابه .. وفي المصيف بيتعرف ببنت اتسببت في تعطيله عن السفر ... علشان اصيب بالبرد وهو بينقذها .. حبها واتجوزها .. وخلف منها عيال كتير قوي .. وكون اسرة كبيرة وعيلة .. بس كان فقير ومحيلتوش حاجة .. كره حياته .. وبقى اكبر من سنه بكتير .. فبيدعي ربنا يقوله يا رب خليني اروح اسكندرية.. فبتحصل المعجزة وان حياته بترجع تاني ويروح اسكندرية ويتشهر ويقابل مراته .. بس مبتحبوش .. فيعيش حياة تعيسة بنت كلب وتنتهي بنهاية ماسأوية.
العساكر اللي خلصوا جيش في سنة 1973 .. خيروهم بين قطعة ارض في الصحراء وبين وظيفة .. اللي اختار الوظيفة فضل طول عمره يحلم بقطعة الارض .. واللي خد قطعة الارض فضل طول عمره زعلان علشان مختارش الوظيفة.. (وإن كان فيه ناس بتنفي القصة دي)..
فيه الاقتصاد فيه حاجة اسمها تكلفة الفرصة البديلة.. يعني مش هشرحها زي بتوع الاقتصاد.. بس هي حاجة قريبة من المعنى دا.. محدش عاجبه حاله، ودايما بنبص للنص اللي ناقص مش النص اللي معانا، الحياة مش هتديلك كل حاجة دي قاعدة عامة، الدنيا مش دار بقاء... دي يا دوب ترانزيت .. مفيش ترانزيت بيبقى فيه كل حاجة...
الحل بتاع كل دا .. ان يبقى عندك مبدأ الرضا .. وحمدا الله على الموجود، وزي ما قال احد ابطال رواية منزل الرجل الاعمى .. لا تجعل حُزنك على المفقود يُفقدك الاستمتاع بالموجود..
الحمد لله على ما قضيت به وانعمت...
