04/07/2020
عملاء كتير إشتروا المكنسة الفلاتر باعتبار إنها أفضل من الكيس أو تطور ليها وللأسف عانوا كتير بعد كدة خاصةً في تنضيفها المستمر أو توفير الفلاتر..
إشتري المكنسة الBagless (الفلاتر) لو عندك حد عنده مشكلة مع الأتربة (مسن، رضيع، أزمة ربو، جيوب أنفية) و كان بيتعب أو بيتخنق أثناء إستعمال المكنسة العادية.. لإن دور الفلاتر باختصار هو تنقية الهواء الخارج من دورة سحب التراب بعدد فلاتر أكتر وأدق من الفلترين الموجودين في المكنسة العادية..
لو إشتريت المكنسة اللي بالفلاتر إعرف إنك هتتعامل معاها معاملة حريصة ومختلفة كتير عن المكنسة العادية..
وأهم التوجيهات هي:
- تنضيف حاوية الفلاتر والفلاتر كلها بعد كل إستخدامين..
- كنس التراب بس بيها مش أي حاجة تقابلنا في الطريق نستسهل شفطها..
- راحة للمكنسة بين كل غرفة وغرفة أو كل 20 دقيقة تشغيل متواصل لمدة عشر دقايق لتجنب إهلاك الموتور..
- تغيير الفلاتر حال ضعف الشفط لو ماحصلش تحسن بعد تنضيفها، أو حال تكرار توقف المكنسة أثناء الإستعمال لإن ده معناه إن المكنسة بتفصل نتيجة كتم الفلاتر وخروجها عن صلاحيتها..
- إشتري ماركة سهل تتواصل مع وكيلها وإتطمن لجانب توفير قطع الغيار لإنك بتحتاج تغير الفلاتر متوسط مرة كل 4 شهور...
