Essam Eldeen - بــيــنَ الــسُّــطُــورِ

  • Home
  • Egypt
  • Cairo
  • Essam Eldeen - بــيــنَ الــسُّــطُــورِ

Essam Eldeen - بــيــنَ الــسُّــطُــورِ كُـلُّ فِـكْرَةٍ تَسْتَحِـقُّ أَنْ تُكْتَـبَ، وَكُـلُّ شُعُـورٍ يَسْتَحِـقُّ أَنْ يُرْوَى.

11/07/2025

"عود نفسك ما تتعلقش"

مش كل اللي بيبدأ بيكمل،
ومش كل اللي وعد هيفضل،
ومفيش فكرة تفضل صح طول العمر،
ولا شخص يفضل على حاله مهما حاول.

لأن الدنيا مش ماشية بقوانينك،
ولا هتستناك،
اللي بتحبه ممكن يبعد،
واللي مطمن ليه، ممكن في لحظة يخذلك،
واللي كنت شايفه أمان.. ممكن يبقى أول سبب فى عدمه.

اتعلم تحب من غير ما تعتمد،
واتعود تدي من غير ما تربط روحك،
خد من كل حاجة حلوة لحظتها،
بس ما تديش لحد مفتاح سلامك الداخلي.

مافيش حاجة اسمها ثابت إلا اللي جواك،
قوتك، كرامتك، نضجك، وعقلك اللي بيتعلم مع كل وقعة.
فـ مهما الدنيا لفت،
خلي دايما رجلك ثابتة، وقلبك واعي، وعينك شايفة.

04/07/2025

في لحظات كده بنعدي بيها،
نضحك وسط الناس ونقول "انا بخير الحمد لله"،
بس جوانا في حاجة مش مريحة،
مكان شكله مناسب، بس إحساسنا فيه مش حقيقي.

عارف ليه بتحس كده؟
علشان جواك كبر، بس لسه عايش بنفس الطريقة القديمة.
لسه بتحاول تناسب شكل ما بقاش يشبهك،
وبتحاول ترضي ناس، على حساب صوتك اللي جواك.

ربنا بيوصلنا للحظة دي علشان نسأل:
هو أنا فعلاً في مكاني؟ دي النسخة اللي المفروض أكونها؟
وهنا يبدأ التغيير.

ف متخافش من التغيير،
حضنه، تقبله، خليه خطوة لقدام.
التغيير مش معناه إنك اتغيرت للاوحش،
لكن معناه إنك قررت تبقى أوضح، أنضج، وأقرب نسخة لنفسك.

لأن كل يوم جديد هو فرصة،
فرصة إنك تتخلص من شكلك القديم،
وتبني ملامح نفسك الجديدة.

ف بلاش تحبس نفسك في نسخة ما بقتش تليق بيك،
وخليك دايما أقرب لـ "نسخة أحسن منك".

05/02/2025

الفرص لا تمنح كثيراً

مش كل حد يغلط فيك يستحق فرص تانية، خاصة لو كان عارف إنه ب يضر ومع ذلك كمل.

في ناس ب تعتبر التسامح ضعف، وبتشوف الفرص الجديدة كدعوة لإيذاء جديد، لأنهم ببساطة مش بيتغيروا، لكن بيكرروا نفس الأفعال بطرق مختلفة.

مش قسوة إنك تحمي نفسك، ومش غلط انك تبعد عن اللي استباح جرحك.

الكرامة مش عناد، لكنها وعي ب قيمتك، وإدراك إن بعض العلاقات لازم تقف لحد هنا.

وكمان، قبل ما تدخل أي علاقة سواء صداقة أو ارتباط لازم تكون مرتاح، والأهم إن الاهل يكونوا مرتاحين.

راحة الأهل لبعض مؤشر مهم، لأن العلاقات مش بين شخصين بس، دي دائما ب تمتد لأهلهم وحياتهم كلها ف ولا تكبر ولا عناد ولا مين هيشوف نفسه على التاني هينفع حد.

اتعلم من التجربة، وخد خطوة ل وراء مش خوف، لكن احترام لذاتك.

لأن اللي بيكرر وجعك، مش من حقه يكون جزء من حياتك مرة تانية.

26/12/2024

الجمعة 27 ديسمبر 2024
بين الحلم والواقع

في أوقات في حياتنا بنحس إنها بقت مجرد معركة صامتة، معركة بين اللي نفسك تعيشه واللي مضطر تعمله.
بتحاول توازن بين أحلامك اللي شايفها بعيد، وبين الواجبات اللي شايلها فوق كتافك.

بتحاول تضحك رغم خوفك، تتمسك بالأمل رغم كل حاجة حواليك بتقولك مش هتنفع.
وفي نص اللحظات دي، بيجي عليك وقت بتحس إنك عايز تهرب.

تهرب من كل حاجة وأي حد، تدور على مكان تهدى فيه وتاخد نفس.
تبعد عن الزحمة والصوت العالي اللي مالي دماغك.
بس الغريب إنك حتى لما بتهرب، بتلاقي إن الحمل لسه معاك، يمكن أخف شوية، بس موجود.

الحياة مش سهلة، وكلنا عارفين كده التعب هيكون جزء من رحلتنا في الدنيا، لكن مع كل تعب في أجر، ومع كل صبر في ثواب، بس الأكيد إننا لازم نكمل.

مش علشان الحياة دايما تستاهل، لكن علشان إحنا نستاهل. نستاهل نعيش اللحظات اللي بنحلم بيها.
نستاهل نكافح علشان حاجة إحنا فعلاً عايزينها.
وفي الآخر، لما تلاقي نفسك واقف بين الحلم والواقع، افتكر إن الاتنين دول مش ضد بعض.
هما طريق واحد، بس المهم تعرف إزاي تمشيه من غير م تخسر نفسك.

21/12/2024

العلاقات في حياتنا مش مجرد كلام أو وقت بنقضيه مع الناس. هي أساس حياتنا سواء كانت علاقة صداقة، حب، أو حتى مع العيلة. كل علاقة في حياتنا ب تضيف لنا حاجة جديدة وبتعلم منها، فيها لحظات حلوة، ذكريات وتحديات كمان، بس اللي ب يميزها هو إننا ب نقدر نتعلم منها ونتطور.

لكن مش كل العلاقات صحية للاسف. في علاقات سامة ب تأثر علينا بشكل سلبي، منها العلاقات اللي فيها الكذب والخيانة والاهمال. لما نلاقي شخص كاذب، ب يخبي الحقيقة عننا أو حتى جزء منها أو بيقول حاجات مش صحيحة عشان يرضينا أو يحقق مصلحته أو حتى خايف من المواجهة، ب نحس إن الثقة دي تهدمت.

والخيانة، سواء كانت خيانة عاطفية أو صداقة، ب تدمر كل حاجة ب نبنيها مع الشخص ده، وب تخلينا نشك في كل حاجة وفي أن العلاقة دي ممكن تنجح اصلا في المستقبل.

كمان الإهمال، لما يبقى الشخص اللي في حياتنا مش مهتم بينا أو مش م قدرنا، ب يخلينا نشعر بالوحدة لأن وجوده وقتها زي عدمه.
في العلاقات السامة دي، إحنا ب نبذل مجهود كبير عشان نثبت إننا بنحب، بس في المقابل ما ب نلاقيش نفس الاهتمام أو التقدير. وكل م تكررت الخيانة أو الكذب أو الإهمال، كلما بدأنا نفقد الأمل في العلاقة دي، ولما نكتشف إننا مش قادرين نغير الواقع ده او نغير من الشخص للأحسن بسبب أن ده طبعه أو بسبب أسباب تانيه مجهولة، ف لازم وقتها نكون أقوياء ونمشي بعيد ننسحب بهدوء عشان نحافظ على صحتنا النفسية وده للطرفين ومن حقهم يعرفوا بعض الانسحاب ده كان بسبب اي وفي معظم الحالات بيكون واضح.

وفي المقابل بقى، العلاقات الصحية هي اللي فيها احترام متبادل، صدق، ودعم مستمر. لو لقينا علاقة فيها كل ده، ب نعرف إننا في المكان الصح، وب نقدر نعيش سوا بأمان وحب بنبقى مطمنين يعني.
من الاخر، لازم نختار الناس اللي في حياتنا ب عناية، عشان العلاقة تبقى مليانة بالصدق، الاحترام، والدعم، بعيدا عن الكذب والخيانة والاهمال.

12/12/2024

الجمعة 13 ديسمبر 2024
ثلاثة حاجات وصفها الله بالجمال

كل واحد فينا بيدور على الجمال في حياته، سواء في الشكل، في الكلام، أو في التصرفات.

عارفين إيه هو الجمال الحقيقي؟ الجمال اللي ربنا سبحانه وتعالى نفسه وصفه في القرآن الكريم، وهي الصبر الجميل، والهجر الجميل، والصفح الجميل.

الصبر الجميل هو إنك تصبر من غير ما تشتكي، تتحمل الشدة والخنقة وأنت راضي ومتأكد أن ربنا في يوم هيرزقك ويفتحها عليك وصدقني ده هيحصل مسألة وقت بس مش أكثر.

أما الهجر الجميل بقى ف ده حكاية لوحده هو إنك تبعد عن اللي بيؤذيك من غير ما تأذيه أو تنتقم، تنسحب بهدوء وتسيبها للايام.

وآخر حاجة، الصفح الجميل هو إنك تسامح من قلبك من غير عتاب أو نفكر الناس بالغلط، ولازم ناخد بالنا من نقطة هنا إننا نعرف نميز بين الي بيفكرك بالغلط علشان يحقق مكاسب شخصية ب أنه يبرز عيوبك و بين الي بيفكرك بالغلط علشان نفسه بجد انك تتغير للأحسن.

تخيل بقى لما تكون أخلاقك مبنية على الحاجات دي هتلاقي نفسك شخص مختلف، قلبك أنقى وروحك أهدى.

الجمال مش في المظاهر، الجمال في إنك تعيش بقلب نظيف وأخلاق طيبة ترضي ربك وتسعد الناس حواليك.

ف خليك جميل بأخلاقك، وعيش الجمال اللي وصفه ربنا.

Address

Cairo

Telephone

+201276038055

Website

Alerts

Be the first to know and let us send you an email when Essam Eldeen - بــيــنَ الــسُّــطُــورِ posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Essam Eldeen - بــيــنَ الــسُّــطُــورِ:

Shortcuts

Share