08/10/2026
أصعب ابتلاء هيمر عليك، سببه الناس.
وأقسى حقيقة في الدنيا.. إن أغلب معاناة الناس من الناس.
في مُعادلة البشر هتستوعب حقيقة إن مش كل عداوات البشر منطقية أو مبررة..
هتقابل نظرة غل وكره في عيون ناس ، ما شفوش منك غير كل خير..
هتقابل ناس تكرهك بلا سبب، وتؤذيك بلا حق، وتستغل طيبتك كأنها ضعف...
وفي اللي هيحوّل أسرارك لسلاح، لمجرد إنك وثقت فيه زيادة.
وخلي بالك إن مش كل اللي أذاك ، كان عايز يكسب، بعضهم كان بس عايز يشوفك بتخسر..
النفوس دي غابة..
واللي يدخلها بقلب مكشوف زيادة ، بيطلع منها مجروح بزيادة..
والنجاة مش بالقسوة،
النجاة إنك تبقى واعي، وحدودك واضحة..
وهنا بيبدأ التحدي الحقيقي، إنك تصبر قدام أذى مالوش منطق..
الصبر هنا مش إنك تكون قليل الحيلة أو تقبل الإهانة،
الصبر هو إنك تترفع وتحافظ على نضافة قلبك، حتى لو اللي حواليك غرقانين في سوادهم.
وعلشان كده، الصبر على أذى البشر مش صبر عادي، ده أصعب اختبار للنفس
د. مصطفى محمود شرح النقطة دي بعبقرية لما فرق بين آيتين:
"و نجد مثل هذه الدقة الشديدة في آيتين متشابهتين عن الصبر تفترق الواحدة عن الأخرى في حرف اللام ..
- يقول لقمان لولده :
(( وَاصْبِرْ عَلَىٰ مَا أَصَابَكَ ۖ إِنَّ ذَٰلِكَ مِنْ عَزْمِ الْأُمُورِ )) لقمان
- وفي آية أخرى عن الصبر نقرأ :
(( وَلَمَن صَبَرَ وَغَفَرَ إِنَّ ذَٰلِكَ لَمِنْ عَزْمِ الْأُمُورِ)) الشورى
الصبر في الأولى "من عزم الأمور" وفي الثانية " لمن عزم الأمور".. وسر التوكيد باللام في الثانية أنه صبر مُضاعف ، لأنه صبر على عدوان بشري لك فيه غريم ، وأنت مطالب فيه بالصبر و المغفرة وهو أمر أشد على النفس من الصبر على القضاء الإلهي الذي لا حيلة فيه !! "..
التدافع ده حاصل مش عشان يغيّرك، لكن عشان يصنعك.
فلو خرجت منه لسه نضيف.. يبقى أنت نجحت، حتى لو اتوجعت
وخلي بالك أذاهم اختبار، بس اللي هتكونه بعد الأذى.. قرار.