01/04/2020
كلنا بيدور في دماغنا أسئلة كتير حولين فيروس كورونا و ازاي نحمي نفسنا منه. علشان كدة, احنا جمعنالك اجابات للاسئلة اللي بتيجي في دماغ معظمنا:
-هو الكورونا بيتنقل من شخص للتاني ازاي؟
عن طريق السوايل اللي بتخرج من الفم و الانف, و بيدخل جوا جسمك برده من خلال فتحات الفم و الانف.
-يعني لو بعدت عن الناس مش هيجيلي كورونا؟
اكيد التباعد الاجتماعي هيفرق كتير, بس لازم تبقي عارف ان السوايل اللي بتخرج من الانسان دي, بتفضل علي الاسطح و الاجسام الصلبة. فلو حد مصاب عطس بايده و سند ايده دي بعد كدة علي ترابيزة, وانت جيت حطيت ايدك علي نفس الترابيزة, وارد جدا العدوة تتنقل لك حتي لو انت ماحتكتش بالشخص نفسه.
-يعني خلاص مفيش فايدة كدة كدة هاتعدي؟
لأ طبعا, الفيروس بيكون له عمر افتراضي علي الاسطح, بعدها لو ملقاش بني ادم يتكاثر جواه بيتحلل تلقائيا. دة غير ان التعقيم المستمر لكل الحاجات اللي بتلمسها زي الموبايلات و ادوات الاكل و غيرها, كفيل انه يقضي علي الفيروس.
-طيب افرض ماعنديش مطهرات و كحول للتعقيم, اتصرف ازاي؟
بالصابون
-هو الصابون فعلا بيقضي علي الفيروس؟
اه, لأن فيروس كورونا فيه في تكوينه دهون, و دي حاجة بيكون سهل علي الصابون ان يدوبها, و بالتالي الفيروس بيتدمر.
-اية المطلوب مني علشان احمي نفسي و الناس اللي باحبهم؟
أهم حاجة غسيل الايدين بالصابون كويس اوي او استخدام الكحول
طبعا نتجنب اننا نلمس وشنا لأن لا قدر الله انت ممكن تكون لقطت الفيروس و هو موجود علي ايدك فعلا.
لو بتكح او بتعطس لازم تستخدم منديل او علي الاقل تستخدم كوعك مش ايدك.
التباعد الاجتماعي, يعني بلاش نزول الا للضرورة, بلاش سلام و أحضان و بوس, بلاش مخالطة مع ناس كتير.
-طب بالنسبة للكمامة؟
مش عايز اصدمك بس هي فعلا مالهاش لازمة بالعكس دي ممكن تضر. انت تلبسها في حالة واحدة و هي لو ظهرت عليك أعراض علشان ماتعديش الناس اللي حواليك.
-بالنسبة للتوم و اللمون و الجنزبيل, بيعالجوا الكورونا فعلا؟
هاضطر اصدمك تاني و اقولك لأ. كل الحاجات دي دورها انها تقوي جهاز المناعة عندك علشان تقدر تتصدي لأي مرض. بس هما فعليا مش بيحمونا من الامراض.
-طب هما الشباب فعلا مش بيجيلهم الفيروس؟
دة مش صحيح, كلنا ممكن يجيلنا عادي. بس الفكرة انه بيكون خطر علي الاشخاص اللي مناعتها ضعيفة زي أهلنا اللي فوق 60 سنة, و الناس اللي بتعاني من أمراض السكر او القلب او الجهاز التنفسي.
-طب لو الاعراض ظهرت عليا اعمل اية؟
أول حاجة تعملها لازم تتصل فورا ب 105 و هما هيقولولك تعمل اية بالضبط.
لو انت عارف و بتنفذ كل الكلام دة, يبقي ماتخفش. انت كدة عامل اللي عليك و كل اللي فاضل بس تعمله هو ان انك تدعي ربنا انه يخرجنا سالمين من المحنة دي . و ماتقلقش كله هيعدي .
لو عايزين تعرفوا اكتر عن الفيروس دة و طرق الوقاية منه، تابعوا موقع منظمة الصحة العالمية و ارجوكوا بلاش ننشر أي معلومة قبل التأكد من صحتها و من وجود مصدر للكلام دة.
https://www.who.int/
