MEGA Anti-Fraud خليك ايجابي ضد الاحتيال

04/12/2024

WhatsApp. With AI تحديث الواتساب بالذكاء الاصطناعي حد جرب يساله

10/10/2024

صحيح دي نكته بس واقعيا بتحصل للأسف مفيش أسهل من الكلام على السوشيال ميديا واختلطت الحقايق بالكذب ومحدش مستوعب حاجه حقيقة وواقع، كفاية شير على الفاضي والمليان ولو هتنشر حاجة ياريت تتأكد مليون مره قبل ما تنزل حاجه صحيح انت حر بس في النهاية نشر الفتن والأخبار المغلوطة لو ضرت حد انت محاسب عند رب العالمين.
كمية المعلومات والأخبار الغلط بقت مرعبه، والنصب والاحتيال من كتره مش لاقي حد يلمه

03/03/2024

بنسمع كتير جدا عن البيانات اللي اتسربت من الفيسبوك او لينكدن وغيرها من برامج السوشيال ميديا وبيكون التسريب لاسم المستخدم والباسورد في مواقع كتير تقدر تتحقق من ان بياناتك بأمان ولا اتسربت اللينك ده موقع من المواقع بتدخل الايميل وتعمل تحقق لو بياناتك اتسربت هيقولك فين ولو ده حصل لازم تغير الباسورد بتاعك وتتحقق من الأمان.
الصور لتوضيح شكل الصفحه ولاحصائية عاملها الموقع للبيانات اللي تم تسريبها من مصر خلال السنتين اللي فاتوا ومتنسوش انا ناس كتير عندها بدل الاكونت خمسه على حسب الابلكيشن والمواقع اللي بيستخدموها.

https://cybernews.com/personal-data-leak-check/

19/11/2023

هو بجد فين المنطق في الرسالة دي تأليف محض واي كلام

هو مش قبل لما ننسخ كلام او ننشره نفهم معناه ونتحقق منه الأول ندور ونسأل يعني ايه خوارزميه ونفهم الاسم ده ايه وايه وظيفته انا كتبت عنها قبل كده
بجد هم يضحك وهم يبكي

26/09/2023

تصميم أجهزة ال ATM المستخدم بقالة فترة اتعمل بطريقة عشان يبقى صعب إضافة أجهزة سرقة بيانات بطاقات البنك بس للاسف كالعادة بيجي وقت وبيتم تخطي الحماية من المحتالين، وعملوا أجهزة بشكل مختلف وده هيبان في فيديو هنزله منفصل عن الصور

05/03/2023

الكلام ده انا كتبته من فتره طويلة عشان الناس اللي بتتكلم على موضوع "هوج بول" يا جماعة الخير الموضوع مش محتاج ترند يطلع ولا مشاكل تحصل عشان نفهم ويكون عندنا وعي انشروا العلم الصحيح وعلموا بعض النصب والاحتيال والتزوير مبيتغيرش لكن اللي بيتغير طريقة وصولهم ليك، حذرت قبل كده كمان وشرحت العملات الرقمية من سنتين واكتر شوية وقولت بلاش حد يدخل فيها ياريت الناس تسمع عشان متندمش
ملحوظه انا لما كتبت كان في ناس بترد تقول هو احنا معانا عشان نعمل كده، صدقوني الناس بتبيع عشان تدخل في النوع ده من التجارة السريعة واللي هي مش تجارة اصلا على أمل أنهم يكسبوا
النوع ده من الاحتيال بيعتمد على النظام الهرمي وبيفضل يتوسع لغاية ما يتشبع ويقفل وانت وحظك

انشاء الله هنزل شوية نصايح تحت اسم ازاي تعرف النصاب بتوضح طرق النصب عشان نفهم اساليبهم

21/02/2023

شكرا مايكروسوفت غالبا انتي ناوية تعمليلنا فيلم terminator لايف 🤣🤣🤣🤣

15/12/2022

من فترة كتبت عن الموضوع ده والنهاردة هعيد الكلام بسبب الممثل الأمريكي كيفن هارت وكلامه اللي بيدعم الافروسنتريك الأسلوب بيختلف بس النتيجة واحدة
تزييف التاريخ
كان في مؤتمر اتلغى الحمدلله لان لو كان اتعمل كانت هتبقى وصمة عار المؤتمر ده ببساطة بيقول ان الحضارة المصرية مسروقة من الافارقة تخيل 🤔
واننا احنا المصريين اللي سرقناها وان الفراعنة كانوا سود
هو انا مش فاهم لون البشرة هيفرق في ايه الصراحة ما المصريين كل الالوان عادي يعني مفيش فرق ومش معنى ان في اهرامات في دول افريقية مجاورة ان ده معناه ان الحضارة المصرية طلعت من هناك

ما الاوقع ان الدولة المصرية هي اللي كانت مسيطرة في افريقيا ده لغاية قريب كان الملك فاروق ملك مصر والسودان والحبشة حتى فلسطين كانت تحت الحكم المصري ولا هو اي تماحيك وخلاص 😆

طبعا كل شخص حاقد وعنده غل ناحية مصر وانا مش بعتبرهم مصريين لان اللي يفرح في بلده وميدافعش عن تاريخها ويقول وانا مالي ومال ناس ماتت من 7000 سنه ده خاين لان اللي يبيع تاريخة يبيع اي حاجه

الاحتيال موجود في كل حاجه
الاحتيال على التاريخ والاديان والفكر والثقافة
الاحتيال يقدر يهد افكار ومعتقدات عشان كده هدم الثقافة جريمة متكاملة الاركان وبطلها السوشيال ميديا والجهلاء

30/10/2022

فيديو مهم للاطفال فرجوا ولادكم عشان يعرفوا يحاربوا لصوص العصر وشاركوا مع عائلاتكم
التوعية هي السلاح اللي بنقاوم بيه واتمنى أنه يكون مفيد

25/10/2022

WhatsApp down
فجاه وبدون مقدمات الواتساب وقع حاليا اللي عنده مشكلة ميقلقش لانه مش لوحده

23/10/2022

الترند سرق عقولنا:
مش بحب اكتب في المواضيع دي بالرغم أن ليها ارتباط كبير بالتكنولوجيا وتأثيرها السلبي على المجتمع، وببساطة الخوارزميات اللي بتشغل البرامج بتختلف من مجتمع لمجتمع عشان ده السلاح الخفي اللي بيهد المجتمع لانه جوه كل بيت
التيك توك في الصين مختلف عن اي مكان تاني وده لأسباب كتير
حاله اللخبطه والتخبط واللا مبالاه اللي بقت في المجتمع وعدم الثقه دي منهجية اتسببت فيها التكنولوجيا وصدقوني أنهم بس دخلونا الطريق وسابونا احنا نعمل الباقي بغبائنا
طبقات المجتمع اتكسرت والثقافة والعلم بقى موضه قديمه
صورة الناجح المجتهد بالعلم اتدمرت بسبب حالات النصب اللي حصلت من شركات واللي بقى ناجح ومحقق الهلس والترند
التكنولوجيا بدل ما تساعد المجتمع دمرته وبقت البيوت مستباحه في كل مكان
كل حاجه بتتاخد هزار وفي الاخر الهزار بيقلب جد واللي بنتريق عليه بقى بيتجاب في أماكن التعليم والجامعات وبيتكرم في وسط طحنه الحياه وتحدياتها الهلس هو اللي بيكسب بسبب سلبيتنا وبنسال نفسنا الأجيال الجديدة بتضيع ليه
هو اصلا الأجيال القديمه حافظت على نفسها ولا هي شجعت وشاركت في جريمه هد الأسرة والمجتمع
ملعون ابو التكنولوجيا اللي في ايد الجاهل بيها لأنها اصعب في تأثيرها من السلاح اللي في ايد مجنون

22/10/2022

خدوا بالكوا
موقف اتعرضت ليه مرتين في شهر واحد، كنت طالب اوردر المهم لقيت رساله اتبعتت أن في رسوم محتاج ادفعها عشان الشحن، انا كنت عارف ان الكلام ده غلط بس اللي كنت مستغرب له أن الرسالة جاتلي في وقت فعلا يخدع
هي دي المشكلة اللي بنواجهها حاليا تسريب البيانات والمعلومات من داخل الشركات واللي بتتسبب في سرقة كروت البنك أو بيانات التليفون عن طريق استخدام اللينك اللي بيتبعت
لازم نركز دقيقة ونسأل نفسنا قبل ما ندوس على لينك أو ندخل بيانات الفيزا احسن ما نتسرق