Dr. Moataz Abdulrahim

28/11/2025

ربنا ولك الحمد
انتهينا بفضل الله من تنظيم النسخة الثانية
2nd Perio Implant Summit
بمشاركة المحاضر العالمي Dr. Lorenzo Tavelli
لأول مرة في مصر و بحضور ما يقرب من 200 طبيب متخصص في مجال زراعة الأسنان و جراحة اللثة بمختلف الجامعات المصرية.
المختلف في النسخة الحالية هي اضافة ورشة عمل في اليوم الثاني للمؤتمر لتوفير التطبيق العملي للمحاضرات بناءا على طلب كتير من الأطباء المشاركين في النسخة الأولى.
نسخة تانية بفضل الله بتأكد النجاح اللي حققته النسخة الأولى و بتشجعنا نكمل لتنظيم نسخ قادمة.
شكراً د. محمد منير على ثقتك و تعاونك الدائم
شكراً د. حسام حمدي اخويا و صديق عمري
شكر خاص لكل الشركات الراعية اللي دعمت فكرتنا.
شكراً لفريق MedEx اللي دايما مصدر فخر ليا.
نراكم في نسخ قادمة لمؤتمر بيهتم بتقديم قيمة علمية حقيقية و بيقدر يستقطب الافضل على مستوى العالم

Just finished the 2nd edition of Perio-Implant Summit with a valuable contribution of Dr. Lorenzo Tavelli for the 1st time in Egypt and middle east.
I was proud to have around 200 guests all are specialists in Periodontology and Implants from many universities in Egypt.
Upon our audience request we added a practical workshop to apply all techniques discussed in lectures.
All the credit to dr. Mohamed Mounir for his passion, support and trust.
Thanks dr. Hossam Hamdy for your limitless efforts.
Thanks to our sponsors for believing in our project.
Thanks to my team for making me always proud.
See you next year and we promise to always focus on the quality and value of what we provide.

13/08/2025

13/10/2023

ربنا ولك الحمد و الشكر
تم اليوم بحمدلله توقيع اتفاقية تعاون بين اكاديمية BAF بسلطنة عمان و شركة MedEx Events لتنظيم العديد من الدورات التدريبية لأطباء الأسنان في سلطنة عمان مع تنظيم التدريب الاكلينيكي بمصر
دعواتكم بالتوفيق 😊😊
I'm honored to announce our new partnership with BAF Academy to organize dental courses in Oman and clinical attachment in Egypt.
🇪🇬🇴🇲🇪🇬🇴🇲🇪🇬🇴🇲🇪🇬🇴🇲🇪🇬🇴🇲🇪🇬🇴🇲🇪🇬
MedEx

12/05/2021

كل عام و أنتم إلى الله أقرب 🥰

08/05/2021

البوست رقم 2: مخصص لأي طبيب أسنان بيشتغل في عيادته الخاصة او اي عيادة تانية
سؤال اتكرر كتير جدا من زمايلنا بخصوص إقناع المرضى بخطة العلاج.... دكاترة كتير شاطرة جدا و بتعرف تشخص و تشتغل كويس جدا ولكن بيتكرر معاها الفشل في إقناع المرضى لأسباب مختلفة أهمها السعر و هنا ييجي دور دراسة ال consumer behavior اللي بيركز بشكل كبير على علم النفس .....و من أهم الاساليب الناجحة في إقناع العميل هو أسلوب الاسئلة بأنواعها و هنستعرضها في النقط دي:
و هيبقى المثال إقناع المريض إنه يعمل زراعة مكان ضرس مخلوع.....

1- تسأله سؤال توضيحي او استفساري والهدف انك هتخليه من خلال اجابته يبدأ يفكر في قناعاته و يراجعها بينه و بين نفسه .....يعني لو قالك (السعر غالي) السؤال يبقى ( وضحلي اكتر ليه شايفه غالي) و ده هيخليه يبدأ يبرر رأيه و يشك فيه و في نفس الوقت انت هتفهم دوافعه الحقيقية ورا قناعاته .

2- تسأل على طول عن اختياره بين بديلين مش عن قبوله او رفضه للخدمة و هنا السؤال هتزرع الماني ولا ايطالي ولا كوري مع شرح مزايا كل نوع و ده بينقل المريض لحالة من القناعة انه خلاص هيزرع و متبقي فقط اختيار الزرعة نفسها.

3- سؤال افتراض الاقتناع....يعني هتفارض ان المريض وافق على انه يزرع و نبدأ نسأله على شكل التركيبة اللي هيعملها على الزرعة و هييجي امتى عشان ناخد المقاس و ازاي تركيبته الجديدة هتغير شكل ابتسامته للأفضل و ده بنعمله عشان يبدأ المريض يدخل في مود انه خلاص زرع و دلوقتي بيستمتع بمزايا الزراعة اللي عملها.

4- سؤال التركيز على المزايا قدام الاثار الجانبية....يعني هسأل المريض ( مش انت أكيد معايا انك لما تعمل زراعة و تصبر شوية لحد ما نعمل التركيبة النهائية أفضل من اننا نبرد الاسنان السليمة و اللي غالبا هنضطر نعملها حشو عصب عشان نعمل كوبري ممكن يتكسر بعد كام سنة؟) وهنا انت بتسأل سؤال ملوش الا اجابة واحدة انت عايزه يسمعها من بؤه هو و هنا انت دورك انتهى.

5- سؤال ابداء التفهم....يعني لو قال الزراعة غالية هيبقى سؤالنا ( انا متفهم وجهة نظرك و فعلا ممكن تكون الزراعة مكلفة لكن اكيد فرق التكلفة مش أهم من حفاظك على صحة اسنانك بتركيبة تعيش لمدة اطول) تفهمك ده هيخليه يقتنع بكلامك اكتر لإحساسه بحرصك عليه.

6- سؤال المدى القصير و البعيد ( انا معاك انك لو زرعت دلوقتي هتبقى تكلفته اوفر من الكوبري و لكن على المدى البعيد انت هتوفر فلوس اكتر لانك عملت تركيبة هتعيش فترة اطول بدون تأثير على اي اسنان مجاورة.

7- أسئلة متتابعة موحدة الاجابة بنعم....هنا هتخلي المريض يدخل معاك في مجموعة من الاسئلة البديهية كل اجاباتها ( نعم) و في نصها هنحط المعلومة اللي احنا عايزينها و في نهاية الاسئلة مش هيبقى في فرصة كبيرة للتراجع بعد كل ال ( نعم ) اللي اتقالت....الاسئلة زي....انت اكيد شكلك مهم بالنسبة لشغلك و حياتك.....اسنانك مهمة جدا في صورتك قدام اهلك و زمايلك..... انت مادام جيت العيادة يبقى مهتم بصحة اسنانك.....اكيد اولى لينا نشوف حل غير اننا نبوظ اسنان سليمة.... التكلفة عمرها ما هتبقى عائق قدام صحتنا....اي حد ممكن يوفر دلوقتي بس هيدفع اكتر قدام عشان كان بيوفر....انت جاي عشان تطلع بأفضل حل ممكن لأسنانك..... الزراعة اكيد احسن من كوبري هيبوظ اسنان سليمة و عمره الافتراضي اقل بكتير من الزرعة....

8- سؤال استنتاجي مستفز.....تسأل المريض ( انت كش فارق معاك الجودة عايز اي حاجة تقعد شوية و خلاص) و طبعا هيكون رده استنكاري لا طبعا انا يهمني الجودة و يهمني اني اعمل حاجة تعيش.....و هنا نعرض عليه حل الزراعة على طول و هو سخن كده و الجلالة واخداه.

دي بعض الافكار اللي ممكن نطبقها مع المرضى لاقناعهم بقبول اي خدمة في العيادة و اللي بتنجح بشكل كبير جدا....اهم حاجة انك تكون واثق في نفسك جدا طالما عندك القدرة العلمية و الفنية على اداء الخدمة دي بأفضل صورة...

نكتفي بهذا القدر و نكمل في بوستات قادمة ان شاء الله .....دعواتكم و ربنا يتقبل منا و منكم

06/04/2021

امبارح عملنا لايف عن العلاقة بين الأطباء خصوصا حديثي التخرج و أماكن العمل المختلفة زي العيادات و المراكز و شركات المستلزمات و الكورسات و المعامل.....
ردود الأفعال كانت أكبر من كل توقعاتي الحقيقة و لأول مرة الناس اللي اتفرجت لايف بس غير التسجيل تخطوا 2000 مشاهد....واضح ان الموضوع كان شاغل شريحة كبيرة جدا من أطباء و أصحاب العيادات و المراكز....
حابب أوضح لأي حد اتفرج او متفرجش بعض النقاط
1- الطبيب المتخرج مينفعش يشيل عيادة منفردا طالما لسه معهوش ترخيص مزاولة المهنة.
2- أنصح اننا ننتظر من سنتين ل3 سنين بعد الترخيص عشان نفتح عيادتنا الخاصة.
3- فتح عيادتك يتطلب التمكن من امكانياتك الفنية و كمان الادارية...الشطارة في الشغل مش كفاية عشان تكون صاحب عيادة ناجح...
4- للطبيب الحق في الحصول على نسبته شهريا سواء حالات كاش او تعاقد....
5- المقابل المادي للادارة يختلف عن المقابل المادي للعمل كطبيب.
6- التدريب طالما بطلب من المتدرب و دون تحمل مسؤوليات وظيفية بيبقى بدون مقابل.
7- العمل كمساعد طبيب أسنان طالما بطلب من العيادة و بتفرغ جزئي او كلي لازم يكون بمرتب شهري
8-الطبيب اللي عايز يتدرب لازم يحترم خصوصية العيادة و أسرارها و نظامها و شروط التدريب فيها و اللي من أهمها الإلتزام بمواعيد التدريب...
9- من الخطأ التعليق او التساؤل عن خطة العلاج و الاجراءات في وجود المريض داخل العيادة.
10- مفيش حاجة اسمها تدريب بعقد لمدة سنة غير مدفوع الأجر مع تحمل مهام وظيفية....ده اسمه استرخاص و جلب عمالة مجانية عالية الكفاءة لتوفير مرتبات التمريض و المساعدين...
10- صاحب العيادة او الشركة او المركز لازم يحترم الطبيب اللي بيعمل معاه انترفيو للعمل..
11- من المهم الوضوح و الشفافية في عرض الوظائف المطلوبة بدون لف و دوران او كتابة عبارات مطاطة تحمل أكثر من معنى....
12- اي وظيفة غير واضحة في شرح التوصيف الوظيفي او لائحة العمل بالمكان.....(اهرب)
13- احترامك لمكان عملك و مواعيده و اسراره جزء من احترامك لنفسك....
14- لو هتمشي من مكان لازم تبلغ قبلها بشهر ع الاقل و لو انت صاحب عيادة و هتنهي عمل دكتور لازم برضه تبلغه ع الاقل قبلها بشهر و لو هيمشي حالا لازم يقبض ع الاقل مرتب شهر كامل.

الكلام ده عجب ناس كتير و زعل ناس كتير و لكن لازم نأكد ان الكلام مفيهوش اي هجوم على اي طرف او فئة بس ميتفعش نسيب مجال لعلاقة عمل فاسدة و نعتمد على ضمير كل واحد.

ياريت تقترحوا معايا موضوع اللايف الجاي

19/03/2021

مفيش مبرر يخليك تقدم service بمعايير متدنية باعتقاد ان ال customer بتاعك مش هيقدر الجودة العالية و ان قراره هيكون مبني على مقارنة سعرية بس....
غالبا المشكلة عندك انت ....اما انك مختار segment غلط تشتغل عليها او عندك خلل في الاعلان عن ميزاتك التنافسية (core competencies) اللي تقنع ال customer بمبرر ارتفاع سعرك عن منافسيك

05/03/2021

على الاكونت الشخصي ان شاء الله الساعة 10 بالظبط

04/03/2021

من الأمور المحزنة ان عدد كبير من الأطباء مش فاهمين معنى ال business entity وازاي يبقى عندهم ذمة مالية منفصلة عن الذمة المالية لعيادتهم