Dr.Tamer Salah - د/تامر صلاح

Home
Egypt
Cairo
Dr.Tamer Salah - د/تامر صلاح

Regional Corporate Trainer -Digital Marketing Consultant . "Marketing Inside The Box" Book Author Marketing Instructor & Digital Marketing Strategist
(367)

31/08/2026

بقالي فترة بقابل إعلانات في الشارع بفكرة مستهلكة أو غريبة أو سيئة التنفيذ و شاركت بعضها هنا .

ظهرت قدامي في البوستات القديمة من ٢٠١٩ فكرة حلوة من بنك أبو ظبي الأول، قلت أشاركها معاكوا تاني عشان عندي كام إعلان غريب عايز أنزلهم و مش عايز أبقى سلبي علطول 😃

25/08/2026

أسهل تعريف للتسويق في دقيقة ✔️

22/08/2026

يا رب ال ليلى دي تعدي على خير 😃
---
أتوقع هتطلع حاجة مش حلوة كفكرة و لا ليها علاقة بالمنتج أو الخدمة.
---
ليه .. لإن - تاني- الطريقة دي كانت حلوة من ١٠ سنين كدة و لكن دلوقتي عفا عليها الزمن و مجرد استسهال و تكرار و تقليد، فأتوقع إن اللي هيستخدمها صعب تطلع منه فكرة حلوة
---
و أخيراً ..لأ الفكرة مش ناجحة عشان الناس بتتكلم عنها، الناس بتتكلم عشان الميزانية المهولة المدفوعة.
---
و يارب أطلع غلط و تكملة الحملة تطلع فيها فكرة حلوة و مختلفة.

19/08/2026

🔹️تعرف Nike و Adidas؟

أكيد.

🔹️طيب أول ما أقولك أحذية رياضية… إيه أول اسم بييجي في بالك؟

غالبًا بتكون الإجابة Nike .

🔹️طيب لو شغلك بيخليك واقف 12 ساعة في اليوم، وعايز حذاء مريح تقف بيه طول الوقت… هتشتري ايه؟

غالبًا هتفكر في سكتشرز Skechers.

▪️وهنا بالظبط بيبان الفرق المهم:

إن الناس تعرفك حاجة، وإنها تختارك في لحظة احتياجها حاجة تانية خالص.
========

🔹️الفرق ده قايم على 3 مفاهيم أغلبنا بيتلخبط بينهم:

1. Brand Awareness (الوعي بالبراند)
إن العميل يعرف إنك موجود وسط المنافسين. عارف اسمك، ومفيش أكتر من كده.

2. Top of Mind (أول اسم يحضر في الذهن)
إن اسمك يكون أول براند يخطر في باله لما تُذكر الفئة بشكل عام، زي Nike في الأحذية الرياضية.

3. Brand Salience (بروز البراند وقت الاحتياج)
إن اسمك يقفز في ذهنه في لحظة احتياج محددة (Category Entry Point)، مش لمجرد ذكر اسم الفئة.

وده الفرق اللي بيصنع المبيعات.

ولو لسه الفكرة مش واضحة… خليني أديك مثال تاني.

🔹️أول ما أسألك عن المشروبات عموماً، غالبًا هتقول كوكاكولا أو بيبسي.

🔹️لكن لو قلتلك: مسافر بالعربية بالليل، والنوم بدأ يغلبك… هتجيب إيه؟

غالبًا هتقول: Red Bull.

ريد بول مش أول اسم في فئة المشروبات، لكنه أول اسم في اللحظة دي. و عمل فئة كاملة جديدة كمان و هي مشروبات الطاقة.

وده هو Brand Salience.

البراند مش لازم يكون أول اسم في الفئة… المهم يكون أول اسم في لحظة الاحتياج.
=======
🔹️مثال و تجربة من الواقع🔹️

▫️في تسويقنا لخدمات الرعاية المنزلية (Home Care) في جدة، كان تركيزنا في البداية كله على إن الناس تعرفنا، وإننا نبقى أول اسم يخطر في بالها لما تحتاج رعاية طبية في البيت.

▫️حققنا انتشار كويس… لكن حاسين النتائج مش مناسبة للإنتشار.

▫️اكتشفنا مشكلة مهمة

▪️الناس بقت عارفاك… لكنها مش عارفة إمتى تطلبك.

الرسالة كانت عامة جدًا.

▪️لما بدأنا نبني Brand Salience وربطنا الخدمة بلحظات احتياج حقيقية، النتيجة بدأت تختلف بشكل ملحوظ.

▪️بدل ما في كل تواصلنا بنقول:
رعاية طبية في بيتك و خلاص

▪️بقينا نرسم الموقف كله كمثال مثلا نقول:
"والدك كبير في السن وصعب عليه ينزل العيادة؟ دكتور الأسنان هيجيله البيت بأجهزته ويعالجه وسط أسرته.

▪️في اللحظة دي، العميل ما بقاش فاكر اسم الخدمة و البراند بس…
بقى عارف إمتى يحتاجها.

لو لسه بتطلق براند جديد، طبيعي تبدأ بحملات هدفها Brand Awareness.

لكن لو هدفك مبيعات فعلية، لازم تنتقل بسرعة لربط البراند بمواقف استخدام واضحة ولحظات احتياج حقيقية يعيشها عميلك.

✔️دلوقتي راجع حملاتك
و اتأكد إنك رابط البراند بتاعك عشان يكون هو أول اختيار في لحظة الاحتياج؟
======
📌مين هيساعدنا و يطلّع مثال تاني يوضح بيه الفرق بين الثلاث مسميات ؟

15/08/2026

حملة بعنوان: لو عرفت تقرأ اسمنا ليك خصم عندنا 😀

اقترح اسم جديد للحملة ؟

07/08/2026

قبل ما تنشر إعلانك ..هتعرف هينجح ولا لأ من دماغ العميل مباشرة.❗️

▪️في شغل التسويق و الإعلانات دايماً بنقول العبرة بالنتيجة، وده حقيقي،

بس النتيجة دي مش بتيجي صدفة. البحوث التسويقية و التجارب اللي بتتعمل بإستمرار هي اللي بتفهمنا إيه اللي بيأثر فعلاً في دماغ العميل وبيحركه.

▪️الشركات الكبيرة بقى بتاخد الموضوع ده لأقصى حد .
هما مش بيستنوا العميل يشوف الإعلان ويقول رأيه، أو يملأ استبيان وممكن يجامل أو يكسل. هما عايزين يشوفوا مخه نفسه بيشتغل إزاي وبينور فين وهو بيتفرج، لأنك لو فهمت العقل الباطن، هتعرف تبيع أي حاجة.

▫️الموضوع ده بدأ بأجهزة الرنين المغناطيسي الوظيفي fMRI في التسويق العصبي، واللي كانت بتستخدم في اختبار الإعلانات قبل ما تنزل السوق عشان يضمنوا نجاحها وتأثيرها.

▫️ومن أشهر استخداماتها كان في الصراع الأزلي بين بيبسي وكوكاكولا، لما اكتشفوا إن أدمغة الناس بتفضل طعم بيبسي في الاختبار الأعمى بدون معرفة البراند، بس أول ما بيشوفوا لوجو كوكاكولا، مناطق الذاكرة والمشاعر في المخ بتنور والقرار بيتغير فوراً.

▫️واكتشفوا بيها كمان مفاجآت صعبة التصديق، زي إن صور التوعية المرعبة على علب السجاير مابتخوفش المدخن، دي بالعكس بتحفز مراكز الاشتياق والمكافأة في مخه من غير ما يحس وبتخليه عايز يدخن أكتر.

▫️ وفي دراسات تانية استخدموها لشركات زي شيتوس واكتشفوا إن الناس بتستمتع جداً بتلويث صوابعها باللون البرتقالي وإحساس التمرد ده بيبسطهم، فبنوا إعلاناتهم على الأساس ده.

▫️بس المشكلة إن الأجهزة دي كانت تكلفتها عالية جداً، و محتاج تجربها على ناس كتير و دي شئ صعب جداً.

🔹️هنا بقى Meta فكرت ازاي تستغل ال Ai عشان تحل المشكلة دي ،
و أطلقت أداة TRIBE v2
ومن غير ما أدوشك بتفاصيل كتير، ميتا جابت أكتر من 720 متطوع، وصورت نشاط مخهم لأكثر من 1115 ساعة وهما بيتفرجوا على فيديوهات وبيقرأوا نصوص.

🔹️النتيجة؟ عملوا حاجة اسمها ... التوأم الرقمي للدماغ.

يعني الذكاء الاصطناعي بقى قادر ياخد الإعلان أو الفيديو بتاعك، ويتوقع دماغ العميل هتتفاعل معاه إزاي قبل ما تنشره! هيقولك الهوك hook ده هيشد انتباه الناس ولا الناس هتعدي الفيديو، وهل الفيديو ده عنده فرصة ينتشر ويبقى فايرال ولا لأ، كل ده من غير ما تحتاج أجهزة ولا متطوعين.

🔹️الجميل إنك تقدر تجرب ده بنفسك عملي!
الموضوع مش مجرد بحث و خلاص، الأداة دي السورس بتاعها متاح على موقع GitHub وتقدر تنزلها، بس خد بالك هتحتاج جهاز كمبيوتر بمواصفات وإمكانيات قوية جداً عشان تقدر تشغل الموديل ده عندك، و رأيي إنك تنتظر شوية و هتلاقي الأداة بقت متاحة اونلاين قريباً.

🔹️طيب ميتا بتعمل كل ده ليه؟
الهدف النهائي مش حب في العلم أكيد، الهدف النهائي فلوس طبعاً. ميتا أكيد هتدمج التقنية دي جوه منصة الإعلانات بتاعتها الفترة الجاية عشان تساعدك تختار أفضل نسخة من إعلانك وتساعدك في بناء محتوى أقوى. ولما إعلاناتك تنجح وتجيب نتائج أحسن، أنت هتدفع فلوس أكتر في الإعلانات، وميتا هتكسب أكتر وأكتر و هكذا.

❗️يا ترى ايه الخطوة اللي جاية ؟ ..فاضل بس الموبايل يطلع إشارات يتحكم في عقولنا بقى 😀

28/07/2026

شركات كثيرة بتعتقد إنها محتاجة Marketing Plan جديدة عشان تنجح !

✔️ في حين إن معظم الوقت المشكلة بتكون أوضح و أسهل .

27/07/2026

ما تنزلش ثاندر !

مع احترامي لجذب الإنتباه و التشويق و علم النفس العكسي reverse psychology و كل الكلام الحلو ده.

أنا شايف الطريقة دي أصبحت مستهلكة جداً و كانت حلوة من ١٠ ١٥ سنة فاتت لكن دلوقتي بعتبرها استسهال و تكرار .

انت رأيك ايه ؟

Address

Cairo

Website

http://www.Tamersalah.com/

Alerts

Be the first to know and let us send you an email when Dr.Tamer Salah - د/تامر صلاح posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Dr.Tamer Salah - د/تامر صلاح:

Want your business to be the top-listed Business in Cairo?