https://chat.whatsapp.com/IjxFRcWjnmiGgG8IA7PggD

F&B Operations Club, Cairo (2026)

24/04/2026

أول خطوة وأهم خطوة وأعظم خطوة في أول سلمة من سلالم الإدارة :

ياعباس بيه !!

أيوه، أنت أول واحد لازم يصدق انه مدير.

لو انت صدقت، وعندك الثقة كاملة غير منقوصة انك تستحق المنصب ده وان عندك كل المؤهلات المطلوبة للوظيفة وعندك المعلومة اللي مش عند اي حد من الناس اللي انت هاتقودهم، وان عندك الشخصية القيادية.
الكل هيحترم ده، وهيصدق انك فعلا مدير.

لو ماعندكش الثقة دي !!
أو عارف ان في ناس كانوا أحق بيها منك.
هتبدأ تحاول تثبت للجميع انك مدير وهتحلف ايمانات الله انك مدير.
وده مش هيكون بالكلام للأسف،
هي حاجات عقلك الباطن والظاهر هيبدأوا يعملوها وهتكون علي شكل من الأشكال الاتية.. :

أول حاجة،
هتلاقي نفسك عصبي من أول ماتدخل الشيفت.

ثاني حاجة،
هاتلاقي تصرفاتك مش ماشية مع المواقف اللي هتكون فيها.

يعني هتاخد قرارات أكبر من الحدث بكتير،
جزاءات وخصومات وقرارات انفعالية مالهاش أي تلاتين لازمة.

ثالث حاجة،
هاتبدأ تعين عصافير، مش لأنك بتحب الطيور لا، لانك عايز تعرف بيتقال عليك ايه من ورا ضهرك وفي غيابك.

ودي بقي ياسيدي الفاضل بداية نهايتك كمدير.
ومش لازم تكون النهاية فعلية لكن ممكن تفضل مدير لعشرين سنة بس انت وأنا وكل اللي اشتغلوا معاك عارفين إنك بلح.

بعد ال ٣ حاجات دول.،
هتخش علي مرحلة خطيرة وفظيعة وهتقضي علي مستقبلك نهائي اه والله زي مبقولك كدا !!

وهي مرحلة الظلم، وفقدان العدل!!

عصافيرك بالطبع مش هيكونوا من أفضل الناس اللي عندك مهنيا ولا هيكونوا من العيال اللي أخلاقهم ممتازة ابسلوتلي مستر عباس،
في الغالب الأعم، عصافيرك هايبقوا أسوأ ناس موجودين في التيم كله، بالتالي حضرتك هتبدأ تميزهم عن الناس المحترمة الشغيلة، بس هما مش عصافيرك !!!!

طيب الناس المحترمة اصحاب الكفاءات هتعمل ايه!!!!!!!!؟

هيحصل لهم حاجة من اتنين !!
مجموعة هتفقد الولاء والانتماء ليك وللشركة،
وهتبقى مش فارقة معاهم يشتغلوا كويس ولا يعكوا ماهو في النهاية كله محصل بعضه، طالما شايفين بعنيهم المسخرة اللي بتحصل.

ومجموعة هتنط من المركب في اول نص فرصة،مش حتي فرصة كاملة..ط

وهتلاقي نفسك عمال تعين في ناس ميشبهوش اللي مشيوا، لانك مش عايز النوعية دي، أنت عايز عيال بتعرف تصوصو...

خلي بالك يامستر عباس افندي ..

شخصيتك القيادية، أهم من معرفتك
لأن المعرفة سهل تكتسبها،

إنما الشخصية القيادية، سهل تنميها لو عندك الأساس، والثقة في النفس.

مفيش أي علاقة تربط من بعيد او من قريب بين كفاءتك كمدير وبين انك شديد أوووي مع موظفينك يا عباس بيه...

ولا حاجة تربط بين كفاءتك كمدير وبين عدد العصافير اللي بتصوصو جوا المكان...

خليك مدير شاطر عشان

#القنصل

!

06/04/2026

🎯 6 مهارات أساسية لأي قائد ناجح (LEADER)

القيادة مش منصب القيادة تأثير 👇

🔴 L – Lead with Candor
(الوضوح والصراحة)
لو في حاجة مش بتتعمل كويس ، قولها بشكل مباشر.
فريقك محتاج صدق، مش مجاملات مغلفة.

🟠 E – Empower Your Team
(تمكين الفريق)
إدي فريقك صلاحيات حقيقية وخليهم يقودوا.
القائد الشاطر مينفعش يخلي نفسه مش محور الكون.

🟡 A – Accountability Without Ego
(المحاسبة بدون غرور)
حط معايير واضحة وطبقها بعدل.
لما يحصل خطأ، ناقش الأداء مش الشخص.

🟢 D – Develop Decision Makers
(صناعة صناع القرار)
بدل ما تدي حلول اسأل:
"إنت شايف إيه؟"
"خطتك إيه؟"
كده بتبني ناس تعتمد على نفسها.

🔵 E – Evaluate Growth
(تقييم النمو)
تابع تطور كل فرد في فريقك، وساعده بخطة واضحة يوصل لأهدافه.

🟣 R – Remove Barriers
(إزالة العوائق)
دورك الحقيقي إنك تزيل العقبات من طريق فريقك، عشان يركزوا في النجاح مش المشاكل.

بص ياصديقي ،
القائد الحقيقي مش اللي الناس بتمشي وراه!
القائد الحقيقي هو اللي بيخلق قادة جدد.

#القنصل

05/04/2026

#القائد
مش لازم يكون عندك لقب رسمي علشان تبقى قائد…

القيادة الحقيقية بتبان في تصرفاتك وتأثيرك!

لو عندك الحاجات دي، فأنت قائد حتى لو من غير منصب:

1. الناس بتيجي لك تطلب نصيحتك.

2. بتحل المشاكل قبل ما حد يطلب منك.

3. بتلهم اللي حواليك إنهم يكونوا أفضل.

4. بتعرف تحافظ على هدوءك وقت الضغط.

5. بتمكن الناس وتساعدهم يكبروا.

6. بتقود بالفعل مش بالكلام.

7. بتتحمل المسؤولية، وبتعترف بالخطأ وبتدور على الحل.

8. الناس عندها ثقة فيك انها تعتمد عليه.

9. بتشرح الأفكار المعقدة بطريقة بسيطة ومفهومة.

10. بتفرح وتحتفل بنجاح غيرك.

القيادة مش كرسي!
القيادة تأثير!

#القنصل

02/04/2026

بص ياصديقي عاوز أقولك إن الولاء الوظيفي مش مجرد كلمة ده نتيجة !

مش نتيجة ضغط
ومش نتيجة عقود
ومش نتيجة رواتب بس،
دا نتيجه تطوير تدريب تقدير دعم تشجيع

الحقيقي بيتبني مش بيتطلب.

:

ليه الناس بتمشي؟!
لكن السؤال الأصح:
ليه حد يقعد أصلا؟

خليني أقولك الخلاصة من أرض الواقع :

#الموظف بينتمي للمكان لما يحس إنه:

- متقدر مش مستهلك
- مسموع مش مهمل ومنسي
- ليه مستقبل مش مجرد شيفت بيعدي

هتلاقيه بيتكرر:
إن الإدارة تفتكر إن الفلوس = ولاء.
والحقيقة؟
#الفلوس بتمنع الرحيل لكن ما تخلقش انتماء.

#الولاء بيتبني من 4 حاجات أساسية:

1. العدالة (مش المساواة)
2. التقدير الحقيقي (مش الشكلي)
3. التطوير المستمر
4. قائد يفهم مش بس يدير

#الشركات اللي بتفقد موظفينها بسرعة:
غالباً عندها مشكلة مش في الموظفين
لكن في الثقافة.

#الشركات اللي الناس بترفض تسيبها:
مش بتدفع أكتر
لكن بتفهم أكتر

ياصديقي ،
الولاء الوظيفي مش KPI يتحط في تقرير؛
ده نتيجة تجربة يومية بيعيشها الموظف.

لو التجربة صح ! الولاء هييجي لوحده.
ولو التجربة غلط ! ولا أعلى مرتب هينفع

#القنصل

01/04/2026

بص ياصديقي ..
خليني أقولك الحقيقة اللي ناس كتير مش بتقولها !

مش كل ترند يستاهل تجري وراه لكن كل ترند ممكن يكسبك فلوس لو لعبتها صح ؟!

خلينا ناخد أمثلة من اللي حاصل دلوقتي :

🐒 !
مطاعم كتير دخلت فيه عشان الضحك والشو والدعايه!
وفي منهم عمل مجسمات وحجات ل التصوير جوه الفروع .
والحقيقة؟
الناس راحت عشان تتصور مش عشان تاكل او تشرب.

🧸 !
لعب على المشاعر والـ cute factor
وشغال جدا مع العائلات والبنات
بس برضه!
مش دايمًا بيترجم لمبيعات حقيقية.

🍫
وده أخطر واحد فيهم ليه بقي ؟!
لأن أي حد يقدر يقلده
فبقى السوق مليان منتجات شبه بعضها ومفيش تميز

وهنا الشطاره اني افكر برا الصندوق ديما !!

بص ياصديقي!

الترند مش هو النجاح؛
طريقتك في استغلاله هي النجاح!

ولو هتدخل أي ترند اسأل نفسك 4 أسئلة:
1. هل يناسب البراند بتاعي؟
(مش كل حاجة تريند تنفع لكل مطعم)
2. هيجيب مبيعات ولا Views بس؟
(الـ Views لوحدها مش بتدفع إيجار)
3. فين الـ Twist؟
(لو شبه غيرك خلاص انتهيت)
4. هل أنا سريع كفاية؟
(الترند عمره قصير جدا)

خد من الترند ديما الفكرة مش “التقليد”
الترند زي الموجة، يا تركبها صح وتوصل!
يا تخبطك وتغرقك 🌊.

#القنصل

#الترند

29/03/2026

*مشروعك بيخسر ؟!*
*ومش عارف الأسباب.؟!*
*هتفتح مشروع جديد وخايف يخسر؟!*

هقولك انا علي ..

*10 اسباب يخلو مشروعك يخسر ... احذر منهم !!*

*1- النمو السريع

من اكتر الاخطاء اللى ممكن يقع فيها اى حد عنده بيزنس انه يتوسع و يكبر من مشروعه بسرعه بدون دراسة اهداف واضحه عشان يثبت للمنافسين انه بيكبر ده خطأ كبير جدا من الاخر ( لما تقرر انك تتوسع فلازم تتوسع بناء على احتياجات مش مجرد قرار فقط).

*2- الفشل فى الادارة المالية

اكتر حاجه ممكن توقع اى مشروع صغير او شركة كبيرة هى عدم متابعه العمليات الماليه الخاصه بالشغل و تقريبا بينتهى بيها الحال لديون كبيرة غير قادرة على تسديدها .. لازم تبقى صارم فى التعامل مع فلوسك و يكون عندك سجلات دقيقه لكل الفلوس اللى داخله و اللى خارجة !

*3- الاسراف فى الانفاق

معظم الناس اللى بيدأو مشاريع جديدة بيقولعوا فى مشكله المصاريف الزيادة .. ده بينتج من حماسهم الزائد لفكرتهم او مشروعهم .. نصيحة حاول تستشير حد فاهم في المجال وعنده خبره فيه قبل م تاخد قرار انك تصرف نفقات عاليه على مشروعك !

*4- نقص رأس المال الاحتياطى

يعنى ايه ؟
يعنى لازم يبقى عندك بند ممكن نسميه الطوارئ و ده بيكون مخصص لاى زيادة غير متوقعه فى تكاليف مشروعك زى ( المرافق، المواد، الايدي العاملة) و كمان هتبقى مفيدة جدا ليك فى اوقات السوق بيبقى نايم او فى الهدوء الموسمى للشغل وديما بننصح ان يكون عندك كاش يمشيك ٦ شهور ع الاقل بتعرف ازاي من خلال مصاريفك الشهريه وتعمل تقوقعك للرقم وتشيله ع جنب لأي ظرف.

*5- سوء اختيار المكان

اوعى تخلى عقد ايجار رخيص يخليك تاخد موقع مش كويس .. حط فى اعتبارك المنافسين ( هل فى محلات مشابهه ليك فى نفس المنطقة؟) هل الموقع بتاعك محلك سهل الوصول ليه ؟ الطريق بيخدمه المواصلات ولا فى حته مقطوعه ؟

*6- عدم وضع خطة عمل

ليه خطة العمل مهمة ؟ خطة العمل الكويسة بتجبرك انك تفكر لقدام و للتحديات اللى ممكن يواجهها مشروعك و كمان بتجبرك انت تحط فى الاعتبار الاحتياجات الماليه المستقبليه و التسويق و ادارة خططك و المنافسين المحيطين بيك ودا طبعا لازم يعملهالك حد شاطر جدا في المجال اللي داخل فيه عشان كدا ناس كتير بتلجأ ل mentor يساعد في بدايه مشروعهم او شركة استشارات تقدملهم النصيحه وتوفر عليهم كتير لأنها كمان بتشرف ع المشروع قبل وأثناء وبعد انتهاءه ويتوفر عليك تعب كتير وفلوس اكتر..وحتي لو شركه قايمه يقدروا يدوك نصايح توفر عليك كتير..

*7- الفشل فى التغيير مع الزمن

من الاخر كدة المرونة فى التعامل مع المتغيرات اللى بتحصل حواليك عشان تعرف تكمل مشروعك .. اتعلم ازاى تغيير من مشروعك و تتطور فيه و تجرب خبرات جديدة! ولو مش عارف تعمل دا لازم تستعين ب متخصصين يقدمولك حلول تساعدك .

*8- سوء الخدمة

سوء خدمة العملاء و عدم كفاءه الموظف اللى شغال من الاسباب اللى هتوقع البيزنس بتاعك بسرعة .. لازم تتأكد من كفائته و تحط حوافز على الالتزام و الشغل الصح .. و تبتكر نظام داخلى لراقبة تصرفاتهم ورصدها ومن هنا هيجي دور التدريب اللي هيساعدك ان ترتقي بموظفيك وتستثمر فيهم لانهم هما اللس هيعلوا البزنس ويساعدوك تنجح بس اللي يدربهم لازم ناس اشتغلت ع الارض عارفه من أين تأكل الكتف مش مجرد حد قاري كلمتين وبيقولهم هي مش مدرسه...

*9- عدم التسويق الفعال

العملاء بتوعك مش هيتجاوبوا معاك من غير م يعرفوا انك موجود بفاعلية .. مش هيكلفك كتير لو قررت انك تعمل دعايه و تسوق لنفسك بطريقة صحيحة عن طريق طرق التسويق الموجودة مع شوية ابتكار منك !

ودا لازم تقوم بيه شركات متخصصه تعملك دا مش سعيد بورق اللي الي فاتح سايبر جمبك .

*10- التقليل من المنافسين

ولاء العملاء لمشروعك مش بيحصل من الهوا ده رد فعل مكتسب لشغلك و طريقتك ,, راقب منافسيك كويس و خليك متقدم عنهم بخطوة ,, و خلى بالك لو انت مهتمتش بعملاءك كويس و قدمتلهم خدمة مناسبه لاحتياجاتهم و على قد متطلباتهم .. منافسينك هيعملوا كدة !

ودا لازم من خلال اداره قويه ل ال customer experience ولازم حد فاهم جدا يساعدك في دا لان تجربه العميل بتبدا من اول الإعلان عن المنتج لحد ما العميل يجربه ويحكم عليه فلازم حد شاطر اوي وفاهم يتباعلك خبرات العميل و اراءه في كل خطوه ويدرس احتياجتهم ويقولك عليها ..

*اللي هتصرفه ع تحسين شغلك وتدريب موظفينك هيجنبك مصاريف كتير جدا ملهاش لازمه هتروح عليك وخسارة ممكن تضيع منك البزنس بتاعك*

#مشروعك

28/03/2026

فاكر موقف حصل معايا في مطعم كان بيخسر بشكل مستمر وبدأت ادخل معاهم في التفاصيل،

لقيت أن أول قرار الإدارة خدته كان:
"نقلل الجودة عشان نوفر"

بعد فترة قصيرة جدا !
التقييم نزل بشكل مرعب
العملاء قلوا بشكل فظيع
والخسارة زادت أضعاف

لما دخلت أشتغل على المشروع عملت العكس تماما :

رجعت الجودة زي الاول وافضل
شلت كل المنتجات اللي بتخسر
اتفاوضت مع كل الموردين وحطيت بدائل
ظبطت التكلفة والمصروفات والهالك
راجعت الريسبي والزمتهم بيها بنظام صارم
وحجات تانيه كتير هقولها في بوست تاني .

وخلال 90 يوم المشروع بدأ يكسب

مش كل توفير بيعمل ربح وفر بذكاء .

#القنصل

#القنصل

26/03/2026

في ظل الازمه الحاليه ومشاكل الاستيراد وقله الخامات ادي الي ارتفاع المواد الخام لتشغيل المطاعم.

ف السؤال هنا !
تزود اسعار
تقلل جوده
ترفع منتجات من المنيو
ولا ايه الحل ؟!

بص ياصديقي السؤال ده مهم جدا وبيعكس أزمة حقيقية في تشغيل المطاعم في الوقت الحالي.

الإجابة الصح مش اختيار واحد لكن
Mix Strategy
حلول مركبة عشان تحافظ على الربحية بدون ما تضرب تجربة العميل.

🪙خليني أقولك تشتغل ازاي !!

الأفضل تعمل إيه بالترتيب:

🪙Menu Engineering
مش مجرد زيادة أسعار وخلاص
مش كل المنيو يتزود السعر

ركز على:

High demand + High margin
و زودها تدريجي.

Low margin
راجعها أو شيلها.

🪙Portion Control
ذكي جدا.
مش تقليل عشوائي.

اعمل:

Standardization
ستاندر ريسبي للوصفات.
فكر في تقليل الهدر قبل ما تقلل الكمية للعميل.

🪙Menu Optimization

رفع المنتجات اللي خاماتها غليت جدا (قرار مهم)

استبدالها ببدائل ذكية بنفس الـ perception

🪙 Supplier Negotiation

تفاوض مع الموردين

تنويع مصادر التوريد (مش تعتمد على مورد واحد)

🪙 Lean Cost
(الأهم)

شيل أي تكلفة مش بتضيف قيمة:
هدر

Over Staffing
سوء تخزين وخلافه.

🪙خلي بالك أخطر قرار ممكن تاخده هو :
تقليل الجودة لأن ده بيدمر البراند على المدى المتوسط حتى لو وفر فلوس على المدى القصير

#القنصل

09/03/2026

٩ نماذج لمديرين "بيبوظوا" الطبخة الإدارية!

بص ياصديقي الإدارة مش مجرد كرسي!

الإدارة هي ازاي تقود فريقك للنجاح بدون ما تخلق بيئة سامة وتحقق نتائج ممتازه من خلال الفريق دا .

تعالي نتعرف علي

٩ انواع لمديرين "بيبوظوا" الطبخة الإدارية!

القائد المختفي
(Ghost Leader):
بيعمل إيه؟
بيختفي وقت الجد وما تلاقيهوش لما الفريق يحتاج توجيه.

الشطارة بتقول: خليك حاضر، ادعم فريقك، وخلي التغذية الراجعة روتين يومي.

سارق الإنجازات
(Credit Taker):
بيعمل إيه؟
ينسب النجاح لنفسه وينسى الجنود المجهولين وراه.
الشطارة بتقول:
النجاح جماعي؛ وزع الأضواء على فريقك، الكشاف هيكبر بيهم مش بيك لوحدك.

المدير المتحكم
(Micromanager):
بيعمل إيه؟
بيتدخل في كل صغيرة وكبيرة، وبيخنق الإبداع.
الشطارة بتقول:
ثق في الناس اللي اخترتهم؛ وجههم للنتائج وسيب لهم حرية الحركة في التفاصيل.

المدير رامي اللوم
(Blame Shifter):
بيعمل إيه؟
أول ما تحصل مشكلة، يدور على كبش فدا ويهرب هو من المسؤولية.
الشطارة بتقول:
القائد الحقيقي هو اللي بيشيل الليلة وقت الفشل، وبيصلح الغلط قبل ما يدور على المخطئ.

المدير المتحيز
(Favoritist):
بيعمل إيه؟
بيكافئ اللي بيسمع الكلام مش اللي بينتج، والولاء عنده أهم من الأداء.
الشطارة بتقول:
المسطرة هي النتائج؛ عامل الجميع بإنصاف وخلي الكفاءة هي المعيار الوحيد.

مدير الأزمات الدائم
(Firefighter):
بيعمل إيه؟
عايش في فوضى دايمة، وما بيعرفش يشتغل إلا وهو بيطفي حرايق.
الشطارة بتقول:
التخطيط المسبق هو اللي بيمنع الحرايق؛ ابني نظام يخلي الشغل يمشي بهدوء وتركيز.

المدير المزاجي
(Mood-Driven Manager):
بيعمل إيه؟
الفريق بيمشي على حسب هو قايم من النوم عامل ازاي، العاطفة هي اللي بتسوق.
الشطارة بتقول:
الثبات الانفعالي هو سر الهيبة؛ حافظ على هدوئك عشان فريقك يحافظ على وتيرة شغله.

اللي بيوعد أكتر من قدرته
(Overpromiser):
بيعمل إيه؟
بيقول حاضر لكل حاجة فوق طاقة الفريق، وفي الآخر الكل بيقع.
الشطارة بتقول:
الالتزام أمانة؛ وافق على اللي تقدر تنفذه بجودة، وقول لا باحترافية لما يكون الحمل زايد.

المثالي بزيادة
(Perfectionist):
بيعمل إيه؟
بيدور على الغلطة بالمنقاش، وما بيعجبوش العجب، وده بيقتل الروح المعنوية.
الشطارة بتقول:
قدر المجهود والتطور؛ الكمال لله وحده، والتحسين المستمر أهم من البحث عن المثالية المستحيلة.

بص ياصديقي :
المدير الشاطر هو اللي بيعرف يخلي فريقه يشتغل بحب مش بأمر، عشان في الآخر
!

#القنصل

27/02/2026

حابب أوضح نقطه مهمه جدا ليها دخل كبير في
ordering & receiving & storing.
وهما
( Case per 1000 ) / ( Par level ).

1_( CASE PER 1000 )

الفكره ببساطه إنك بتعرف نسبة مبيعات منتج ما لكل 1000 جنيه من المبيعات .

> تستفاد ايه لما تفهمها وتطبقها..
- تعمل الطلبية من خلالها
- تضمن ان أعداد كميات الطلبية دقيقة بنسبه كبيره جدا.
-تقدر تعمل كنترول ع الكوست بتاعك.

> ازاى اعمل بيها طلبيه ؟
خلينا ناخد مثال بسيط وليكن ( بيبسى كانز ).
اولا تشوف مبيعات الايتم بتاعك وبيقول انك بعت 5000 كانز بيبسى خلال الشهر الماضى وتقرير مبيعاتك بيقول انك عامل صافى مبيعات لنفس الشهر 250000 جنيه.

> عاوز تعرف محتاج تطلب اد ايه بيبسى للشهر الحالى؟
هقولك
نسبة مبيعات البيبسى لكل ( 1000 ) = [5000 * 1000] \250000 = 20 كانز 🤔 حلو وبعدين

"سيادتك متوقع تعمل كام الشهر الحالى مبيعات ؟
وليكن (300,000 )

طيب زود عليهم نسبة أمان !

*دي نسبه بتحطها تحسبا لاي زياده متوقعه في المبيعات*

بص معاك من 10 % ل 20 % والموضوع برضوا مش اى كلام لا بيتقاس ع اكتر من عامل
يعني كدا ممكن نحط متوسط نسبة أمان 15 % يعنى كده توقعك للمبيعات زاد 45,000 و أصبح 345,000

>نرجع للمعادله تانى عاوز دلوقتى تعرف هتطلب اد ايه؟

اجمالى المطلوب = ( 345,000 \ 1000) *( 20 ) = 6900 كانز.
دا كدا إجمالي الكانز اللي يكفيك شهر ع حسب توقعك
اللي هو اسمه (sales forecasting)

🏃‍♂️ حلو جدا فهمت هروح اجرب.
🗣️ استنى شويه لسه مخلصناش عندك اد ايه بيبسى فى رصيد اخر المده امممممم عندى 500 كانز.
تمام كدا اطرحهم بقي من 6900 يبقى سيادتك هتطلب 6,400 بس للشهر كله.
طب انا هطلبهم كلهم مره واحده واريح دماغي.
هقولك غلط !
ليه بقي ؟

لان انت كدا بتحط money on shelf لازم تقسم طلبياتك ع عدد الأسابيع وليكن طلبيه بيبسي مره كل اسبوع وهنا هيجي دور ال par level في ordering.

2_( Par level for ordering )

البار ليفل هو الخطوه التانيه اللي هتم بعد ما عملت الخطوه الاساسيه اللي هي
Case per 1000.

انت عرفت انك هتستهلك 6,400 كانز طول الشهر.
محتاج اعرف ايه تاني ؟
محتاج تعرف daily sales forecasting
وأي دا كمان ؟
انت زي ما بتعمل
sales for casting
للشهر بتعمل كمان
لكل يوم لوحده وتعرف توقع المبيعات يوم السبت متوقع مبيعات كم والأحد كم وهكذا.

انت خلاص عرفت مثلا انك هتعمل السبت ١٢ الف والأحد ١١ الف و الاتنين ١٤ الف والثلاثاء ١٥ الف تمام كدا
طب اعرف ايه تاني ؟
لازم تعرف طلبيه البيبسي كم مره في الأسبوع !
وليكن مرتين في الأسبوع

كدا انت عندك كل المعلومات اللي محتاج تعرفها.
نبدأ بقي نعمل طلبيه الاولي.
انا عرفت ان الطلبيه هتجيلي مرتين مره يوم الاربع الصبح ومره يوم الأحد الصبح
وانا لازم تطلب قبلها بيوم
هعمل الطلبيه الاولي يوم السبت( عشان تجيلي الأحد)
يبقي كدا هعمل طلبيه تكفيني
(الأحد والاثنين والتلات)
كدا هجيب مبيعات ال ٣ ايام مجتمعه وازود عليهم نسبه الامان اللي اتفقنا عليها 15% من الإجمالي
المبيعات فوق بتاع الايام اللي هي :
11+ 14 + 15 = 40 k
اجمالي المبيعات ل ٣ ايام
هنزود عليهم 15% نسبه الامان
40×15/100 = 6 k
كدا
sales forecasting
بتاعك 46 الف

واتفقنا انك بتستهلك 20 كانز لكل الف مبيعات..
يبقي استهلاك ل تلت ايام =
46,000×20÷1,000=
920 كانز.
في ٣ ايام تكفيك لحد طلبيه الاربع

وبكدا مخزنك طول الوقت منظم جردك مظبوط ومصاريفك معقوله و
first in first out
بتتعمل صح.

25/07/2025

#العميل #الزبون #المستهلك #المشتري

●كلها اسامي وتعبيرات مختلفه وليها معاني مختلفه ولكن كلهم بيدفعوا فلوس مقابل منتج نهائي تحت أي مسمي وتحت اي شكل..

●طيب لحد هنا تمام
الزبون دا بقي ديما ع حق حتي لو كان غلط

●هتقولي ازاي يعني؟!

لو ع حق ماشي نشوف ايه مشكلته ونحلها ونرضيه ونحسن الخبرات الي اخدها ..

انما لو غلطان يبقي ع حق إزاي ؟؟!!

●بص ياصديقي..

العميل غلطان وانت واجهته وعرفته انه غلطان ومبيفهمش و ع الله حكايته وبعدين..؟!

انت كدا خسرته وخسرت اي حد من دايرته لان
ال ego
بتاعه هيتعبوا وهيفضل يشردلك في كل مكان
word of mouth
وتلاقي نفسك ترند وسمعتك وسمعتك منتجك راحت في مهب الريح.

●وخد بالك العميل بيتعاطف مع العميل االي زيه وعمره ما هيغلطه وديما هيكون في صفه وهنا هيخرج التعاطف بره ديرته ويروح يخبط في دايرتك ومحبيك ومبيعاتك هتتاثر هتتاثر لا محاله!!..

●طب اعمل ايه لو عميل غلطان واحنا مش غلطانين؟!

●تكلفه هندله عميل أقل بكثير من التمن اللي هتدفعه لو دخلت معاه في سكة لا احنا مش غلطانين وانت اللي غلطان.. !!

●اعتبر اي سيناريو لعميل غاضب ان الغلط من عندك أو من عند فريقك او من منتجك وبكدا هتحل المشكله وتنهيها ع الهادي..

●تعالي اقولك مثال..

عميل دخل المطعم وطلب شوربه وسلطه ومقبلات وطبق رئيسي غالي جدا.

●اكل وتمام واول ما جاله الطبق الرئيسي حس انه شبع فقال للويتر لا انا مطلبتش الطبق دا أو اكل منه معلقه وقالك الطبق دا سئ جدا وغير اللي باخده كل مره الطعم في حاجه غلط شيله من الفاتوره !!

●وانت متأكد ان الويتر إعاد الطلب ع العميل وان التيست هو هو مختلفش.

●قدامك حلين

الزبون غلطان وانت هتواجهه وهتقوله مش هنقدر نشيل الطلب من الفاتوره وحضرتك هتدفعه والطعم هو هو متغيرش وهكذا وندخل بقي في صوت عالي من العميل وإصرار وكلمه من هنا وكلمه من هنا وبقت خناقه ..

●او انك بمنتهي الشياكه تشيله من الفاتوره وتدخل تاخد فيد باك ع الخدمه والأكل بشكل عام وتعرفه بشياكه انك شيلت الاوردر من الشيك وتوصله بطريقه اشيك ان رضا العملاء وأنهم يكونوا مبسوطين دا اهم حاجه عندك بالمطعم هو من جواه عارف ومتاكد انه غلطان وعمره ما هيتصرف كدا تاني لانه هيحس انك قريت تصرفه وقيس ع كدا بقي مواقف كتير..

●وطبعا نقدر نتجنب دا كله من البدايه اننا نقرأ العميل كويس ونحدد شخصيته وطريقه التعامل معاه من بدايه دخوله وهنتكلم في بوست مفصل بعد كدا عن كل عميل ونوعه وطريقه التعامل معاه.

●يبقي كدا احنا أكدنا ان العميل دايما صح حتي لو غلطان..
The guest always right even he is wrong.

●المبدا التاني ..

العميل دا تعبان مش فاهم حاجه لبسه ..

●الصح ان ..

دايما اتعامل مع العميل ع انه اذكي عنصر في المنظومه.

●هو قبل ما يجيلك سأل عليك كويس جدا
درسك كويس جدا
درس اسعارك كويس جدا
سقف توقعاته عالي جدا

●متجيش انت بقي تصدمه في مشاعره وتفاجئه بسوء خدمه وكواليتي واقعه
لان كدا بتقفله منك

●أو تتذاكي عليه،
انت بتبيع منتج ب ٥٠ دولار وهو تواصل معاك عشان ياخد الخدمه تقوم قايله الخدمه ب ١٠٠ دولار كدا انت لبست نفسك في الحيطه

●وافتكر ان عمليه البيع الناجحه هي الاستمرارية في البيع مش مجرد بيعه ونخلص

●المبدا التالت
العميل دا دفيع وبيسب تبس حلو !
اديله خدمه عاليه

●دا عميل كحيان فكك منه اخره اوردر تعبان زهقه خليه يمشي ومتدلوش اهتمام.

●كدا انت مع الوقت بتكتب شهاده وفاه مطعمك أو منتجك أو الخدمه اللي بتقدمها.

كل العملاء لازم ياخدوا نفس الاهتمام و الكواليتي و الخدمه.

F&B Operations Club

24/04/2026

06/04/2026

05/04/2026

02/04/2026

01/04/2026

29/03/2026

28/03/2026

26/03/2026

09/03/2026

27/02/2026

25/07/2025

Address

Website

Alerts

Contact The Business

Shortcuts

Share