ميزانيتك علي قد ايدك

ميزانيتك علي قد ايدك ميزانية علي قد ايدك 🤝❤️ هنساعد بعض في تحديد مزانية تناسبك وتناسب بيتك ونحوش منها كمان

01/05/2025

افكار كتير من ال ٢٠٠جنيه

الفكرة الأولي
٨٠ج علبة سمنة
٢٤ج كيلو رز
٣٠ج كيلو سكر
٤٥ج زجاجة زيت لتر الا ربع
١٨ج كيلو دقيق

الفكرة الثانية
١٠ج اتنين كيلو طماطم
٢٠ج اتنين كيلو بطاطس تحمير
٢٠ج اتنين كيلو بصل
٢٥ج كيلو مكرونة
٢٤ج كيلو رز
٦٥ج زجاجة زيت لتر
١٨ج كيلو دقيق

الفكرة الثالثة
١٠٠ نص كيلو بانيه
٢٤ج كيلو رز
١٠ج اتنين كيلو طماطم
٢٠ج اتنين كيلو بطاطس تحمير
٢٠ج اتنين كيلو بصل

الفكرة الرابعة
٣٠ج نص كيلو فول تدمييس
٢٠ج فول مدشوش
٢٠ج نص كيلو قمح بليلة
٣٠ج نص عدس اصفر
٢٤ج كيلو رز
٢٥ج كيلو مكرونة
١٠ج اتنين كيلو طماطم
١٠ج كيلو بصل
١٠ج كيلو بطاطس تحمير
٥ج ملح

الفكرة الخامسة
٦٠ج كيلو أجنحة
٢٤ج كيلو رز
١٠ج شعرية
١٠ج اتنين كيلو طماطم
١٠ج كيلو بصل
١٠ج كيلو بطاطس
٢٥ج كيلو مكرونة
١٠ج عدس بجبة
١٠ج قمح بليلة

01/05/2025

عارفه البطاطس الصغيرة هاتيها هنعمل منها وصفات كتير هتبهرك👌👌💯

البطاطس بصراحة جميلة جدا وبتستر البيت وبالنسبالى بتبقى موجودة على طول فى البيت .... بسلقها وبعمل منها وصفات حلوة قوى تنفع فطار غداء عشاء ننقع البطاطس ونغسلها ونحطها فى حلة ونغمرها بالميه ونحط معلقة صغيرة ملح ونحطها على النااااار لحد ما تستوى نحطها تحت الحنفية ونقشرها هتبقى سهلة التقشير قبل ما تبرد

👇

١_ بطاطس بالخضرة
فى طاسة نحط معلقتين زيت وننزل ببصلة مكعبات نقلب لحد ما تبقى ذهبى ننزل بالبطاطس المهروسة حوالى نص كيلو ونضيف ملح فلفل أسود كمون وجزمة بقدونس مفروم نقلب ونقفل النااااار وتقدم مع العيش والسلطة والمخلل

٢_ بطاطس بالكارى
فى طاسة نحط معلقتين زيت ومعلقة صغيرة كاري وكركم وبابريكا وكمون وفلفل اسود واول ما ريحتهم تطلع ننزل بالبطاطس المسلوقة متقشره وسليمة وفى الوصفة دى نقى أصغر بطاطس قلبى وفى الأخر رشة بقدونس مفروم

٣_ أقراص البطاطس
هنهرس نص كيلو بطاطس ونضيف بيضة ومعلقتين دقيق ونص كوب بقدونس مفروم وملح وفلفل أسود وكمون وبابريكا نقلب ونشكلها أقراص ونغلفها بالبقسماط ونقليها فى الزيت

٤_ البطاطس المقليه
بعد ما بسلقها واقشرها بقطعها صوابع أو حقات وبقليها فى الزيت بطلعها احط عليها ملح كمون فلفل أسود بابريكا أو بهارات البطاطس الجاهزة وبتبقى مقرمشة من بره وطريه من جوا تحفة بجد

٥_ البطاطس بدبابيس الفراخ
نغسل البطاطس كويس جدا ونحطها بقشرها وهى نيه فى صينية ونحط معاها دبابيس فراخ وعصير ليمون وملح وفلفل أسود وبابريكا ومرقة دجاج وندخلها الفرن تقدم مع الرز والسلطة

٦_ البطاطس المحشية
قشرى وقورى البطاطس واحشيها لحمة مفرومة متبلة بالبصل المبشور والملح والفلفل الأسود والبهارات ورصيها فى صينية وتقوير البطاطس افرديه فى ارضية الصينية وحطى عليها صلصة طماطم ودخليها الفرن وتقدم مع الأرز

#افكاري #ماميز #فيسبوك #روتين #ميزانيه

29/04/2025

-الجبنه القريش ومعاها حبه لبن وربع كوب زيت وتوابل ونضربها في الخلاط عشان تبقي جبنه كريمي وطعمها جميل

-اي جبن نحفظها ازاي
نغلي حبه مايه ولما يبرد تدوب فيهم معلقتين لبن بودره ونضع فيهم الجبنه وعلي الثلاجة

-الكوارع هي اللحوم الوحيده التي توضع والماء بارد علشان نوفر في الغاز

اي بقوليات عدس او لوبيا او حمص نغليهم غلوة ونقفل الغطا والنار وبعد ساعه كدا نفتح عليهم تاني غلوة كدا وهتلاقيهم استووا خالص

-اللحمه والكوارع يغلي غلوتين ونقفل عليهم كام ساعه كدا بدون ملح وبعد كدا نولع عليهم شويه وهتلاقيهم استووا خالص

البشاميل نص لبن ونكمل بشوربه او مايه ومرقه دجاج

-الكاتشب يتعمل في البيت سهل جدا ،، اضربي 3طماطم وحطيها علي النار ومعلقتين سكر ومعلقه خل وذره ملح

مرقه الدجاج في البيت دقيق ومايه وتوابل وكركم ونقلب كويس لغايه الدقيق يدوب ونضع علي النار ونقلب وممكن معاها اربع مكعبات جاهزة ونضعها في التلاجه وكل طبخه بمعلقه

-اعملي دايما الفطير في البيت والمعجنات زي الرقاق والجلاش واللزانيا هتوفر كتير وخاصه الفطار والعشا

-الكيك اعمليه بالزيت احلي وبيبقي هش حطي معلقه زبده واحده بس ومعلقه خل

لو عندك لحم مفروم زياده حطيها في كيس وعلي الفريزر ينفعوا نجمعهم و نعمل بيهم بيتزا او نجمعهم ونعمل طبخه

- أو فاض عندك رز علي الفريزر ولما تطلعيه يفك وفي حله ومعلقه زبده وتوطي عليه هيبقي جميل ومش بيبان اانه مفرز او معجن لا خاااالص
او تعملي رز صابح وده حطيه فوق الوش ولا بيببان

-الفول اعمليه في البيت هيبقي احلي طعم واوفر كتير

الخضار يتخزن في الموسم بتاعه بارخص سعر الطماطم البصل والباميه القلقاس الفاصوليا

ورق العنب الكرنب البتنجان البسله البطاطس كدا هيبقي بيتك مليان اعملي حصاله للتخزين

-مش لازم المحشي يتسقي بشوربه فراخ او لحمه ممكن بشوربه بصل و الشوربه ممكن يتعمل عليها لسان عصفور وتنفع للملوخيه و الويكه

شوربه البصل ،،حطي شويه ميه علي نار ومعاها بصلتين وملح وفلفل وحبهان ورق لوري ومعلقه زبده

#افكاري #ماميز #فيسبوك #روتين #ميزانيه

صينية بطاطس بالكفتة المقادير:لتحضير الكفتة: • نص كيلو لحمة مفرومة • بصلة كبيرة مبشورة ومصفاة من الماء • ملعقة صغيرة مل...
26/04/2025

صينية بطاطس بالكفتة

المقادير:
لتحضير الكفتة:
• نص كيلو لحمة مفرومة
• بصلة كبيرة مبشورة ومصفاة من الماء
• ملعقة صغيرة ملح
• نص ملعقة صغيرة فلفل أسود
• نص ملعقة صغيرة بهارات لحمة
• نص ملعقة صغيرة بابريكا
• ملعقة كبيرة بقدونس مفروم (اختياري)

لتحضير البطاطس والصوص:
• ٣ حبات بطاطس مقطعة حلقات متوسطة السمك
• بصلة كبيرة مقطعة شرائح
• ٢ فص ثوم مفروم
• ٢ كوب عصير طماطم
• ملعقة كبيرة معجون طماطم
• ملعقة صغيرة ملح
• نص ملعقة صغيرة فلفل أسود
• نص ملعقة صغيرة بهارات
• ٢ ملعقة كبيرة زيت
• ١ كوب مرق لحمة أو ماء ساخن

طريقة التحضير:
تحضير الكفتة:
١/ في بولة اخلطي اللحمة المفرومة مع البصل المبشور و الملح والفلفل والبهارات والبابريكا والبقدونس
٢/ شكّلي الكفتة على هيئة صوابع او كرات ونضعها في الثلاجة 15 دقيقة لتتماسك

تحمير البطاطس والكفتة:
١/ سخني الزيت في طاسة ثم حمّري البطاطس نصف تحمير فقط.
٢/ في نفس الطاسة شوّحي الكفتة على نار عالية من جميع الجوانب حتى تحمر قليلاً دون تسويتها تمامًا

تحضير الصوص:
١/ في نفس الطاسة، ضيفي شرائح البصل وقلّبيها حتى تذبل
٢/ ضيفي الثوم المفروم وقلّبيه حتى تطلع رائحته
٣/ ضيفي عصير الطماطم، معجون الطماطم، الملح، الفلفل، والبهارات، واتركيها تتسبك لمدة ١٠ دقايق

التجميع والفرن:
١/ في صينية فرن، رصي طبقة من البطاطس، ثم ضيفي الكفتة فوقها.
٢/ اسكبي الصوص فوق الكفتة والبطاطس، ثم ضيفي كوب المرق أو الماء الساخن.
٣/ غطي الصينية بورق فويل، وادخليها فرن سخن على ١٨٠ درجة لمدة ٣٠ - ٤٠ دقيقة.
٤/ أزيلي الفويل، وشغّلي الشواية آخر ٥دقايق للتحمير.

#افكاري #ماميز #فيسبوك #روتين #ميزانيه

اكلات فحدود ٥٠ ل١٠٠ جنيه١/مسقعه.٢/رز وبطاطس محمره وبيض ٣ /شكشوكه وفول وطعميه ٤/مكرونه وبيض ٥/جلاش بالجبن او فراخ او لحمه...
26/04/2025

اكلات فحدود ٥٠ ل١٠٠ جنيه

١/مسقعه.
٢/رز وبطاطس محمره وبيض
٣ /شكشوكه وفول وطعميه
٤/مكرونه وبيض
٥/جلاش بالجبن او فراخ او لحمه مفرومه او سجق
٦ /ارز احمر بالبطاطس
٧/كشري اصفر
٨ /كشري مصري
٩ /محشي من غير فراخ ولحوم
١٠ /اي نوع خضار ورز وسلطه او مخلل
١١/رز معمر وبطاطس محمره
١٢ /قرنبيط
١٣ /شوربة عدس
١٤/كبد وقوانص
١٥ /بساريا ورز
١٦/ عجه
١٧/كريب بطاطس او سجق او كبده او فراخ
١٨/بيتزا بالخضار او لحمه او فراخ او سوسيس او زي ما تحبي
١٩ / لحمه مفرومه واعملي كفتة
٢٠/تونه وبطاطس محمره
٢١/ربع بانيه ويتفرم ويتعمل كفته او يتعمل شاورما او برجر مع مكرونه
٢٢/حواوشي بطاطس وخضار
٢٣/ حواوشي لحمه او فراخ وحطي فلفل وبصل وممكن فول صويا
٢٤/ كبده اسكندراني واعملي سندوتشات او مكرونه
٢٥/ اجنحه واعملي صنيه بطاطس بالاجنحه وشويه رز
٢٦/ ممكن كمان سجق ويتعمل صينيه بالبطاطس وشويه رز او عيش عادي
٢٧/ لحمه مفرومه وشويه برغل واعملي كفته او كفته داوود ورز ابيض
٢٨ / فته
٢٩/ بشاميل
٣٠/ بيض وبطاطس وجبنه ولانشون وجرجير

#افكاري #ماميز #فيسبوك #روتين #ميزانيه

23/04/2025

شوية حاجات هقولك عليها وإدعيلى

١/الفانيليا
يا سلام عليها لو ضيفناها على اي حاجة بتخليها خيال وعلى العصاير خصوصا لو اي حاجة فيها لبن زي بلح او جوافة اوموز أي عصير هتحسي طعمه زي اللي بتشربيه بره
وحطيها كمان على عجينة البيتزا طعمها بتكون زي بتاعت المطاعم وممكن نضيفها على الفيشار كمان

٢/أما بسيح السمن بضيفلها ورق لورا وحبهان
بيديلها ريحة حلوة أووووي ويتخزن لمدة سنة بنفس الريحة

٣/صلصة الكشري أما بعملها وتخلص بعملها طشة ثوم بكزبرة كتيير بتفرق في طعم الكشري كله

٤/اما تشتري اللبن وتحسي أو تشكي انه ممكن يكون رايب
او هيروب وهو بيغلي اول ماتحطيه عالنار ضيفيله معلقة بيكنج بودر كبيرة وقلبيها فيه
ان شاء الله مش هيروب

٥/حفظ الخضروات الورقية زي الشبت والبقدونس والجرجير
إغسليهم ونشفيهم في فوطة نظيفة بس مش يكون فيه نقطة مية واحدة ولفيها في ورق أبيض نظيف مش كيس علشان الكيس بيعمل بخار مية وينزل عالخضار يسوده ويبوظه

٦/لو عندك واقي كيك فتفتيه واعملي تورتة جيلي
بعمل في قالب جيلي واما يجمد بفتت عليه نص الكيك وبعدها طبقة كريم شانتي وبعد كده باقي فتافيت الكيك واصب باقي الجيلي واسيبه يبرد في التلاجة تانى

٧/الملوخية انا بضيفلها كزبرة خضرا وتتخرط معاها بتكون لذيذة أوى

٨/اما تخزني خضار أو فاكهة في الفريزر ما تنسيش تخرجي الهوا اللي في الكيس علشان الحاجة اللي جوا ما تسودش وتفضل محتفظة بلونها

٩/لو عاوزة تعملي أكلة شكلها شيك وموفرة في نفس الوقت ممكن تعملي الشيش طاووق وتضيفى مع الفراخ بطاطس مكعبات بتزودها وطعمها يجنن وشكلها جمييل

١٠/لو السويسرول اتكسر او اتفتت منك وانتي بتلفيه اعمليه تورتة مستطيلة اقسميها اتنين بالطول واعمليها زي ما بتعملي التورتة عادي احشيها كريم شانتي من النص وضيفي النص التاني وزوقيها على زوقك

١١/وإنتى بتعملى المحشى بعد ما تحطى الرز ع الصلصة والخضره وخلاص هتحشى بصلايه حلوه كدا مبشوره وطمطمايه كبيره حلوه برضو ومبشوره وحطي فلفل وتوابل المحشي وقلبيهم ع الرز وشوفى فرق الطعم وإدعيلى

١٢/اما بعمل شوربة لسان عصفور بحمرها واسيبها شوية علشان لو ضيفت عليها الشوربة على طول لسان العصفور بشقق كأنه مكسر

#افكاري #ماميز #فيسبوك #روتين #ميزانيه

23/04/2025

تعالي اقولك على شويه افكار من المطبخ

١/ المكرونه الباقيه حطيها فى الفريزر وفى اى يوم طلعيها فى صنيه وعليها معلقه صلصه ع الوش ودخليها الفرن وجنبها بطاطس محمره وسلطه

٢/ لو اللبن راب وقطع صفيه واعمليه بيه قرص طريه

٣/بواقى الجبنه اللى بتنشف اضربيها فى الكبه مع معلقه قشطه هتبقى جبنه كريمى ومع طماطم او فلفل اخضر او زيتون

٤/الطبيخ اللى بيتبقى جمعى كل نوع لوحده واخر الاسبوع اعمليه تورلى

٥/البرتقال هاتيه وتعصريه يدوى وتخزنيه مع جزر يبقه احلى عصير

٦/الفراوله هاتيه واغسليها وتخزينها حلوة اوى وبتسهل عليكى تعب كل يوم هتشربى عصير ايه

٧/جمعى الأجنحة والكبد والقوانص اعملي بيهم اكله

٨/توابلك قبل ما تطحنيها حمصيها عشان متسوسش وخصوصا في الصيف وكمان تحتفظ باالطعم بتاعها

٩/لما يجي موسم الخس ده هاتيه وتنظيفه ومتغسلهوش عشان ميسودش لفيه فى فوطة ولماتحبى تاكليه تطلعيه وانقعيه بماء وخل كأنه طازة

١٠/بواقى الفراخ او اللحمة قطعيها وممكن تعملى بيها شاورما اوتعملى بيها سندوتشات

١١/اعملى توابل للشوربة (فلفل-ورق لورا-حبهان -زعتر-روز مارى )وتطحنيهم مع بعض ولما تعملى شوربة حطى ربع معلقة صغيرة ودوقي احلي شوربه

#افكاري #ماميز #فيسبوك #روتين #ميزانيه

21/04/2025



1 ضعى باكو فانيليا فى الفيشار وشوفى الرائحه الجميله بجد

2-لاذابة الدجاج المجمد ضعيه فى وعاء به ماء عادى ورشة ملح

3--عند عمل الارز باللبن لتر اللبن عليه كوب ارز

4--عند عمل المهلبيه كوب اللبن عليه معلقه صغيرة نشا

5--عند عمل الكيك او المعجنات ضيفى معلقة كبيرة خل محسن طبيعى بيخليها هشه وطريه

6--عند تشكيل اللحمه المفرومه لعمل الكفته اوغيره كيلو اللحمه المفرومه الحمراء الصافى عليها ربع كيلو دهون وممكن فول صويا

7--لو هتقومى بتحضير المعجنات ضعى ليها خميره بيره اللى هى خميرة المخبوزات أفضل بكتير من الخميره البودر وياريت كمان تبقى تزوبيها فى القليل من الماء الدافىء علشان ميبقاش فى كتل فى العجين انتى وبتعجنيه او بعد السوى

8__لو هتقومى بتحضير معجنات فيها لبن او زبادى ياريت تضعى الاتنين زبادى ولبن وابقى شوفى الفرق عجينه هشه وجميله والطعم جميل كمان

9--لوعندك كميه كبيره من الجبنه البيضاء وخايفه عليها تفسد أغلى ماء وضعى فى الماء 2 معلقه كبيره لبن بودره ونقلبهم مع بعض ونضع فيهم الجبنه البيضاء ستعيش فى الثلاجه لمدة 3شهور دون أن تفسد

10--قبل أستعمال الحبهان فى الطهى قومى بالضغط عليها بالسكين حتى تنفتح وتخرج نكهتها الجميله فى الاكل

#افكاري #ماميز #فيسبوك #روتين #ميزانيه

21/04/2025

ازاي تنقي الخضار والفاكهة

- الفلفل من تحت اللي ب ٤ قواعد احسن من ٣
- الكرنب تطبل و مش مكتومه و خفيفه
- الكابوتشا مكتومه و تقيله
- القرنبيط الجالسه البيضاء من غير فراغات
- الموز الأخضر شويه عمره أطول
- الموز ابو نقطه أحلي طعم
- الملوخية ورقها من الظهر خشن
- ورق العنب الورقه الفاتحه الصغيره
- الثوم الاحمر للتخزين
- الخيار الخشن البلدي لون قاتم و مش معوج
- الباذنجان المحشي الصغير الطري مش معوج
- الكاكا الطريه
- الكيوي الناشفه
- الطماطم البلح احسن من المدوره
- البرتقال الناعم
- الباذنجان الرومي الخفيفه و بتلمع
- الكنتالوب الخشن
- الفراولة الصغيره البلدي
- اليوسفي الخشن
- البصل المقفول من عند الرأس وناشف
- الباميه الصغيره
- الكوسه الخشنه الخضراء
- الليمون الناعم
- القلقاس المدورة
- النعناع اللي عوده مضلع مش مدور
- الجزر الناعمه المفروده لون برتقالي غامق
- البنجر المدوره الصغيره (الكبيره بتكون شايخه)
- الجرجير الورقه العريضه و العود القصير

#افكاري #ماميز #فيسبوك #روتين #ميزانيه

فرخة كيلو ونص او ٢ كيلو٤ بصلاتفلفل رومي طماطم مكعبات الاول نضيف الملح والفلفل الاسود والسماق علي البصل ونخلطهم كويس جد...
20/04/2025



فرخة كيلو ونص او ٢ كيلو
٤ بصلات
فلفل رومي
طماطم مكعبات

الاول نضيف الملح والفلفل الاسود والسماق علي البصل ونخلطهم كويس جدا
ننزل بالفلفل والطماطم ونقلبهم
صينية عالنار نضيف معلقة سمنة مع معلقة سكر وورق لورا وحبهان وننزل بالفراخ تاخد لون بعدين نخرجها وننزل بخلطة البصل تشويحة بسيطة وننزل عليها بالفراخ
نزودها ربع كوب ماء ساخن ونغطيها وندخلها الفرن
وف نشغل عليها الشواية تاخد لون وممكن نطشها بفحم حسب الرغبة

#افكاري #ماميز #فيسبوك #روتين #ميزانيه

Address

Cairo

Website

Alerts

Be the first to know and let us send you an email when ميزانيتك علي قد ايدك posts news and promotions. Your email address will not be used for any other purpose, and you can unsubscribe at any time.

Shortcuts

Share

Category