29/01/2017
The power of Marketing
ازاي واحد مكروه من العالم كله وعنصري زي ده وكان في حملات ضده في امريكا نفسها من قبل الانتخابات ده غير المظاهرات ينجح بالشكل ده؟ ومش اي نجاح لكنه اكتسح بنسبة قربت من الـ ٨٠٪ !
التسويق هو لوحده اللي يقدر يجاوب على السؤال ده!
في نظرية كده في علم النفس بتقول ان الناس عمرهم ماكنوا احرار في اختياراتهم ولكنهم دايما موجهين من اشخاص تانيين ظاهرين او مخفيين، او وسائل اعلامية او تسويقية
بدون الدخول في تفاصيل كتير تخص سيكولوجية عقل الانسان، خلونا نشوف ازاي ترمب الملياردير وراجل الأعمال الناجح قدر يلعب في عقل الناس تسويقيا خلوهم يعطوه اصواتهم بارادتهم.. من وجهة نظرنا
١- اللعب على المشكلة وتقديم حلول
ترمب قدر يعرف كويس اوي المشاكل الداخلية اللي بيعاني منها اكتر المواطنين الامريكين في الوقت الحالي وركز عليها جامد اوي، واللي كانت بتتمثل في الارهاب اللي وصل امريكا والمخاوف الامنية اللي عند كل شخص والمهاجرين الغير شرعيين، ولعب عليها كويس اوي وقدر يدخل للأمريكيين من أكتر حتة حساسة عندهم بقوة وبصراحة وقدملهم حلول في حين ان المنافسين متطرقوش لحاجة زي كده وفضلو روتينيين.
٢- المعرفة الدقيقة لـ behavior الأمريكيين
علشان تسوق لعملاءك، لازم تكون عارف التارجت بتاعك ودارسه وحافظه كويس اوي اوي، بيحب ايه وبيكره ايه وبيخاف من ايه ومشاكله ايه وكل تفصيله عنه..
ترمب كان حافظ الامريكيين كويس اوي اوي، وكان عارف ازاي يدخل قلبهم وعقلهم .. كان عارف اللي جوه عقلهم مش اللي ظاهر للجميع من محاربة العنصرية والسلام وكل ده، علشان كده قدر ياخد اصواتهم
٣- الاحتياج والتغيير
بجانب ان ترمب قدر يعرف مشاكل الامريكيين ويقدملهم حلول، كان عارف وحافظ احتياجاتهم بالظبط زي التغيير، لأنهم كانوا شايفين من المنافس بتاعه هيلاري كلينتون انها زي اوباما بالظبط في نفس الاستراتيجيات والكلام وغالبا الوضع هيفضل كما هو عليه، وده هيخلي الحال يسوء بيهم زيادة
٤- اللعب على المشاعر
زي ماقولنا فوق الناس موجهين بالفطرة ومش احرار في اختياراتهم .. لو لاحظت في الفترة الأخيرة هتلاقي اغلب الاعلانات التسويقية اخدت اتجاه كسب عاطفة الجمهور واللعب على حتة emotional جواهم، زي اعلانات بيبسي وكوكاولا مؤخرا عن بطولة افريقيا..
ده لأن الناس بتميل ويتثق في اللي يقدر يوصل لقلبهم .. وده نفس اللي عملته حملة ترمب التسويقية انهم لعبوا على طمأنة الامريكيين من القضاء على الارهاب وكان اولى القرارات اللي اخدها ترمب اول ماتم تنصيبه انه منع دخول ٧ دول اسلامية امريكا ولسة القائمة هتزيد
٥- كسب الولاء
ترمب من الحزب الجمهوري اللي أسسه ابراهام لينكولين اللي بيعتبر رمز من رموز امريكا عند الامريكيين ( والمفروض ان لينكولين هو اللي قضى على التمييز العنصري :D - ماعلينا )
طول ٨ سنين حكم اوباما ( اللي كان من الحزب الديموقراطي، اللي منه هيلاري كلينتون برضو ) قدر الحزب الجمهوري وترمب يكسبو ولاء ناس كتير جدا من الامريكيين، ده لأن بدأوا يغيروا في خططهم واستراتيجيتهم وسياساتهم اللي جذبت كتير اوي من الامريكيين للتصويت ليهم.
في الاخر لازم نطلع من الـ Case Study المنيلة بنيلة دي بحاجة مهمة جدا :D
التسويق هو انك تصب تركيزك كله على عملاءك، هما مين؟ مشاكلهم ايه؟ محتاجين ايه؟ الـ behavior بتاعهم ايه؟ هتجذبهم ليك ولمنتجك او خدمتك ازاي؟
العملاء ياخوانا..
#كرياتوفا
