31/10/2025
تعرف إن تكلفة الاجتماعات الغير فعالة في الشغل بتوصل لـ 400 مليار دولار في أمريكا بس؟
والمفاجأة إن 71٪ من الاجتماعات دي مش فعّالة أصلًا !
ده بحث أجراه Dr. Steven Rogelberg من جامعة UNC Charlotte ومؤلف كتاب "The Surprising Science of Meetings" واللي بحثه تم نشره في Harvard Business Review
كل اجتماع غير فعال مش بس بيضيع وقت… ده بيكلف فلوس، بيأثر على الإنتاجية، وبيدمر الحماس عند الناس
طيب ليه ده بيحصل؟
١. مفيش هدف واضح للاجتماع:
الناس بتدخل الاجتماع مش عارفة “إحنا هنا ليه؟” وبيخلص الاجتماع من غير أي قرار أو خطوة تنفيذية.
٢. الدعوات العشوائية:
نص اللي في الاجتماع مالهمش علاقة مباشرة بالموضوع، فبيضطروا يقعدوا يتفرجوا أو يتكلموا في مواضيع جانبية.
٣. الإدارة الضعيفة للاجتماع:
الاجتماع بيخرج عن السيطرة، مفيش وقت محدد لكل نقطة، ومفيش تسهيل للنقاش. وده نتيجة إن مفيش facilitator للاجتماع يكون معاه سلطة تنظيم الاجتماع بالشكل اللي يحقق الهدف منه.
٤. مفيش follow-up:
حتى لو طلعنا بأفكار أو قرارات، مفيش متابعة أو مسؤوليات واضحة، فكل حاجة بتتبخر بعد الاجتماع, وبالتالي مفيش شيء يلزم أي طرف بأخذ أي إجراء أو action
الحل؟ خلي الاجتماعات “أذكى” مش “أكتر”::
1- حدد هدف واضح ومكتوب قبل الاجتماع — لو الهدف مش واضح، متعملش الاجتماع أصلاً.
2- اعزم الناس اللي ليهم علاقة مباشرة بس.
3- استخدم Facilitator أو قائد اجتماع بيعرف يدير الوقت والنقاش.
4- اختم الاجتماع بـ قرارات واضحة ومسؤوليات محددة.
5- ابعت ملخص وتنفيذ بعد الاجتماع خلال 24 ساعة.
قوللي من وجهة نظرك ايه أحسن وأسوأ اجتماع حضرته وليه ؟
