27/06/2023
مساء الفل😍😍
علم من اعلام العيد هو الشوي بكل اشكاله فحم او في الفرن يعني يبقي كباب او فيليه او ستيك كلها اشكال الشوي… و الستيك بيبقي من اطري قطعيات اللحمه لانه بيبقي من ضهر العجل و كمان اطري مكان بيبقي سلسله الضهر اللي بتبقي التندرليون او الفلتو و الحقيقه من اهم الملاحظات اللي لازم تاخد بالنا منها ان اللحمه لو حلوه ليها شخصيتها .. بتبقي مش محتاجه نحط حاجات كتير عشان تثبت وجودها بالعكس كل ما قللنا التوابل كل ما ظهر اكتر طعم اللحمه..
و المطبخ الشرقي من الحاجات المهم فيها التوابل و البهارات و بالرغم من كده اللحوم و خصوصا المشويه بنحط ملح و فلفل و شويه ميه بصل و دول الاساس ..ممكن بقي نزود شويه تحابيش من عندنا لزوم بصمه كل واحد فينا للوصفه ..
اما بقي المطبخ الامريكي بيعتمد علي ملح و فلفل و اوريجانو و روز ماري لمعظم قطعيات اللحمه و بس كده …تعالوا النهارده نعمل ستيك و هو من الحاجات اللي ليها شخصيتها و كمان شكل من اشكال الشوي و المهمه في العيد
و جزء مهم من قطعيات اللحمه …
و تقدري تشوحيه في طاسة تقيلة، وتكون سخنة جدًا ننزل فيها معلقه زيت و م زبده او حتي من غير و نعتمد علي الصوص اللي حانحط عليها بعد كده و نسيب اللحمه تاخد لون من كل الجهات، و اللحمه محتاجه تكون متبله بملح و فلفل بس و ممكن رشه زعتر روز ماري في الطاسه و فص توم معاها ولما تحمر كويس تكملي تسويتها في الفرن والوقت اللي هتحتاجه للتسوية هيعتمد بشكل كبير على سُمك قطعة الستيك.
وعلي درجه التسويه اللي بتحبيها …
خطوة مهمة جدًا لنجاح الستيك هي إنك تريحي اللحمة بعد التسوية عشان العصارة اللي جواها تعيد توزيعها جوة قطعة اللحمة، ولما نقطعها، نلاقيها طرية ومليانة بالعصارة وjuicy.
ممكن تقدمي الستيك مع أي صوص من اختيارك أو مع الزبدة المنكهة بأي بهارات أو أعشاب تحبيها. يعني ممكن زبده عليها زعتر و تبقي صوص علي الستيك او زبده و م فلفل اسود مجروش و ده بيدي اللحمه كمان طعم حلو جداااا والف هنااااا😍😍
