19/04/2025
جت فتره كان عليا اقساط و ديون كتيره اووي , ولسوء الحظ كمان, كنت شغال في مسرحيه جوز و لوز مع الاستاذ احمد بدير ووقفت
نفسيتي بقت في الارض و خصوصا ان اصحاب الاقساط طول النهار و الليل بيخبطو علي البيت عندي و بقيت بتهرب منهم
رفعت السماعه كلمت صديقي فتوح احمد و انا كنت عارف قبلها انه شغال وقتها في تلت اعمال و قلت له :" الوضع كذا و كذا و حكيتلو علي الي انا فيه , وياريت لو تشوفلي اي حاجه اشتغلها حتي لو كومبارس مجاميع.
بالفعل اداني عنوان بلد فلاحين بيصورو فيها , وركبت و رحت في اربع ساعات , ويارتني مارحت., رحت لقيت ممثلين لسه طلبه في المعهد هم الابطال., المشكله اني انا عارفهم و هما عارفني عشان كنت اكبر منهم ولما سالوني بتعمل ايه هنا ؟ نفسي صعبت عليا و اتكسفت اقولهم اني جاي كومبارس
اخدت بعضي و مشيت رغم احتياجي للفلوس , عرض عليا صديقي محمود البزاوي وكان معاهم في المسلسل توصيله للقاهره وركبت العربيه معاه
واحنا في العربيه اتكلمنا عن ظروفي و كده , هو قالي انا رايح دلوقتي احضر الجنرل بتاع مسرحيه الزعيم و بعدها ربنا يسهل, الجنرل ده بيبقي قبل الافتتاح علي طول.,
رحت انا و محمود و تابعنا عرض الجنرل و قولت له " ما ينفعش اشتغل معاكم في المسرحيه دي ؟" قالي "انت مجنون يا سليمان خلاص ده الجنرل و الافتتاح كمان كام يوم , اكيد ما ينفعش. قولت له طب اسلم بس حتي علي استاذ عادل امام
اول ما شوفتو جريت عليه و قولتلو علي ظروفي , وقولت له انا لو اشتغلت معاك كاني طلعت اعاره ياريت تطلعني الاعاره دي , قعد يضحك و سالني "انت كنت بتاخد كام؟ قولت له 400 في الشهر لمده 3 شهور الصيف, لقيتو نده واحد من الانتاج و قاله "خده مضيه خمس سنين علي 1500 في الشهر
انا سمعت الرقم و اقعدت اعيط حرفيا ,عمري ما اقدر انسي الموقف ده للزعيم
وداعا عم سليمان عيد 💔
