06/07/2017
النار المشتعلة مفيش شخص عاقل بيفكر يحط إيده فيها عشان يشوف حرارتها أو يشوف هيتحرق ولا لا!!
الكل بيتجنبها واللى يقرب لها بإرادته بنقول عنه ان تصرفه غير متزن أو غبي!
السبب في ده إننا مؤمنين تماما بضررها وألمها.
لو قدرنا نستحضر نفس الإيمان ده بكل الامور المضرة يبقى :
مينفعش أروح أجرب السجائر وأقول أنا بس بشوف أو دى مرة واحده أو أنا واثق انى مش هتعلق بيها!
أو مينفعش أروح أقعد فى مكان مليان بالتصرفات الخاطئة وأقول لا أنا مليش دعوة!
ومينفعش أتكلم بألفاظ غير لائقة ومعيبة وأقول ده هزار ومقصدش!
مينفعش أزوق الكلام وأغير حقيقته وأقول ده مش كذب!
مينفعش أبالغ فى مدح حد والتودد له بغير الحق وأقول ده مجاملة مش نفاق ولا مصلحة!
مينفعش أسمع كلام سئ بيتقال عن شخص وأفرح وأتبسط بده وأحب أسمع وأقول مليش دعوة أنا متكلمتش!
الإنسان لو اتحكم فى شهواته وحبه لمصلحته ووجههم صح هيكونوا معين له فعلًا على الخير..
لكن لما نبدأ نقرب من مواطن تحريك الشهوات دى وإطلاق العنان لها فى غير المسار الصحيح ونقول اننا بنجرب وكمان نتوهم إننا لم نخطئ ففى الحقيقة احنا كده بنتبع شهواتنا!
وهى اللى بتتحكم فينا مش احنا بنتحكم فيها!
والأسوأ اننا نكون متوهمين اننا بنتحكم فيها يعنى حتى منكونش على وعي بالمشكلة عشان نحلها!
الإنسان العاقل ميضرش نفسه وميحطش نفسه فى مواضع الشبهات.
العاقل ميرميش نفسه في النار.
كلام #عقلاني
#أخلاق
