06/05/2020
الفنان هشام سليم طلع في لقاء اتكلم فيه عن ابنه اللي اتصحح جسدياً بعد ماكان بجسم بنت وعاش ١٨ سنه في جسد أنثي لحد ما امتلك الشجاعه انه يروح يواجه أهله ويقولهم انه حاسس انه مش أنثي
استوقفني الحقيقه دور هشام سليم ك "أب" وازاي أتعامل مع الموقف و ساند أبنه وبيحاول يدعمه نفسياً ومعنوياً لحد مايوصل للحياة اللي يبقي راضي عنها
ومن ضمن الكلام المؤثر اللي قاله..
" انا مش طالب من الناس تقبل أبني أو ترفضه, انا بس طالب منهم الرحمة عشان دة شئ مش بأيديهم و محدش بيخلق نفسه, أنا طالب منهم الرحمة عشان اللي زي أبني ممكن يعيشوا طول عمرهم مُعذبين "
———————
وانا بتفرج علي اللقاء مرت قدامي قصة "حنان الطويل " بطلة الكوميديا اللي سابت جوانا علامه و قدرت في الفترة البسيطة اللي دخلت فيها الفن تحفر أسمها في عالم الفن وتبقي من أشهر فنانات الكوميديا
قصة حنان الطويل للأسف قصة مآساوية لأقصي درجة, حنان اتولدت "طارق" وفي العشرين من عمره قرر أنه ياخد قرار التصحيح الجنسي ويبقي حنان بعد ماكان رافض نفسه كذكر
واجهت تنمر وأذي من أهلها ومن الناس واتحملت اللي محدش يقدر يتحمله سواء من أذي بالكلام أو الفعل
لجأت للمسرح وبقت تهرب من مشاكلها والصعوبات اللي بتواجهها بأنها تمثل وتضحك الناس وكمان كانت بتغني وفنانه متعدده المواهب
نجحت جداً في الفن وأدوارها سايبه علامة جوانا لحد وقتنا هذا
وللأسف أتعرضت لهجوم عنيف جداً من كل المحيطين بيها سواء الأهل أو الناس وأنتهي بيها الأمر أنها تدخل مستشفي أمراض عقلية وبعد فترة أنتحرت ونهت حياتها بأيديها عشان ترتاح
يُقال أن أخر جملة كانت قالتها قبل ماتنتحر
" بحثت عن السعادة ولم أجد غير الشقاء "
———————
ملف التصحيح الجنسي والميول الجنسية لو أتفتح مش هيخلص في مقال أو بوست عادي, دة محتاج حلقات كتيرة عشان تقدر تفهم الناس وتغير الوعي
لكن اللي أقدر أقوله ألتمسوا الأعذار للناس وسيبوا الخلق للخالق
سيبوهم في حالهم ولو مش هتقدروا تساعدوهم يبقي بلاش تضروهم وتزودوا من وجعهم وأذاهم النفسي لدرجة توصلهم للإنتحار
محدش مننا مسموحله نهائياً يعدم أي شخص تاني علي أفعاله ويحكم عليه و ينصب ليه حبل المشنقة ويقوم بدور ربنا بالنيابة عنه
ودايماً أحمدوا ربنا وأشكروه أنه محطكوش انتوا في الوضع دة والاختبار دة, جايز جداً مكنتوش هتقدروا تكملوا في الحياة بالوضع دة
وهعيد تاني جمله الفنان هشام سليم " انا مش طالب من الناس تقبلة أو ترفضة أنا بس طالب منهم #الرحمة عشان هو ممكن يعيش طول عمره يتعذب "
" نحن نُعاقب ببعضنا البعض دون أن ندري, ونسوق الجميع الي قبورهم دون أن نشعر, فالبعض بالأفعال والأخر بالكلمات "
أدعو لحنان الطويل بالمغفره ..
#منقول
