03/11/2026
جانب مهم من تربيتنا لأولادنا هي تربيتهم على تقدير عطاء الناس لهم ، بل والامتنان والشكر ، وأول الناس دي الي المفروض يقدروا حقها ويشكروها ويشوفوا تعبها هو أنتِ
فرق كبير بين المعايرة وبين إنهم يشوفوا تعبك عشانهم وتعلميهم يقدروا دا ويلمسوه :))
دور ماما السوبر ومن الي مابتتعبش ، الي بتقدر تعمل كل حاجة وبتقف ٢٤ ساعة على رجليها بلا كلل أو تعب ، دا دور سيء أوي ، بيعلمهم إن دي حقوق مكتسبة ، مش باب ربنا جعل برك فيه بعد الإيمان بالله
كان البشمهندس أيمن بيقول في محاضرة إن العائلات الملكية بيعملوا يوم كدا راحة للخدم وأفراد العائلة هما الي بيقوموا بكل شيء من الكوي والتطبيق والغسيل والكنس والمسح
عشان أولا يتعلموا فمش معنى إن في حد بيقوم بدالهم بالأدوار دي إنهم يكونوا عاجزين عن فعلهم
وثانيا عشان يقدروا تعب الناس ويرحموهم :)))
كتير من الأمهات بتشتكي إن ولادي مش مقدرين تعبي !
بس السؤال الأهم ، هل أنتِ أصلا مقدراه ؟
هل أنت شيفاه ؟ هل علمتيهم يقدروا تعبك ويشكروا ماما ويبوسوا ايدها ويشوفوا وجودها نعمة كبيرة أوي ؟
هل خلتيهم يجربوا كل المهام عشان يعرفوا إن ماما مش معاها عصايا سحرية بتعمل بها شغل البيت ؟
دكتور عبدالرحمن ذاكر كان بيقول لما بكون في النادي وبسأل بنت ماما بتشتغل ايه ، وتقول مش بتشتغل ، كان بيحزن
لإن رد البنت دا نتاج الرأسمالية الي بقينا فينا
فلو ماما بتطبخ كل يوم لنا في البيت فهي بلا عمل لكن لو خرجت تشتغل طباخة في مطعم ، فهي عاملة وغير عاطلة
لو ماما بتعلمنا في البيت فهي بلا عمل ، بس لو خرجت تشتغل معلمة برا فهي عاملة وغير عاطلة وهكذا
لازم الولاد يشوفوا قد ايه بتتعبي ، أولا من خلال
١. المشاركة ، متشيليش شغل البيت كله على كتفك دا مش دلع ، دا كدا بيتعلموا عدم المسئولية والبرود والتناحة
لازم شغل البيت يتقسم وكل واحد يختار ٣ مهام كل يوم يعملهم وتسيبي مساحة كافية للتدريب والتعليم وبعدها يتسحب منهم الامتيازات لو ملتزموش
٢. لما تبقي تعبانة قللي عن نفسك المهام ، متبقيش تعبانة وجايبة اخرك ويقولك يا ماما مش بحب البامية عاوز ملوخية فتقومي تعملي ملوخية ! أنت محترمتيش تعبك عشان هما يحترموه
٣. لما تتعبي في شيء اتكلمي قدامهم
عارف ياحبيبي أنا النهاردة وأنا بعملك الأكل الي بتحبه كنت حاسه إني مش قادرة أوي لإن الأكل بياخد مني وقت ومجهود والجو حر والمطبخ من الحرارة بيكون حر جدا ولكن عشان عيونك قلت لا لازم أعمله
٤. خليه يقول شكرا من أول ما يبدأ يتكلم لما تجيبي شيء
ويبوس ايدك ويحضنك ، لما تبقي تعبانة قوليله تعالى هات لماما حضن عشان تعبانة
كل دا هيعلمهم يحترموا تعبك ويقدروه 💜🍀