AutoExpert

12/01/2026

الفيديو من اربع سنوات

بعيد نشره اليوم بعد شكوى منتشرة جدا عن صاحب سيارة بعد حادث مصاريف اصلاح التوكيل اكتر من ضعف ثمنها

طبعاً المتداول ان التوكيل حرامى وكلام من هذا القبيل انما لو تعرفنا على الموضوع بشكل صحيح هانعرف ان الأمر طبيعي جدا

الدقيقه الثالثه تحديداً بتجاوب عن الموضوع

ما يجب ان تعرفة قبل تعرض سيارتك لحادث

كتير بيحصل صدمة من قيمة المقايسة الخاصة بالاصلاح فى التوكيلات .. وبناخد بشراء قطع غيار مستعملة مضطرين .. الفيديو بيشرح بعض النقاط الهامة .. وتساعدك فى اتخاذ ...

25/05/2025

لو تم تسهيل دخول السيارات ذات المنشأ الأمريكي للسوق المحلية.. سيحدث تغيير كبير وجذري فى خريطة مبيعات السيارات في مصر

09/03/2025

غالباً مستنى تخفيضات اكتر واكتر
وأكيد بتسمع عن السعر العادل
السعر ده ممكن يكون عند ناس كتير هو سعر الدولار لما كان ٨

وكالعادة نفس اسلوب خليها تصدى

طيب امتى هانشترى؟!

لما الاسعار تزيد تانى وتولع تانى وتالت
خصوصا ان العملة مازالت غير مستقرة واى شئ وارد

29/01/2025

حسبة بسيطة
سيارة فى امريكا تمنها 50 الف دولار
هناك شكوى عامة من ارتفاع الاسعار ولو هاتقسط السيارة فسعر الفائدة كبير وهاتكون فى حدود 6% فى السنة يعنى لو على 5 سنوات اجمالى الفوائد 30 % " رقم ضخم " كان الله فى العون

تعالى فى مصر نحسبها
نفس السيارة سعرها فى السوق هايوصل 100 الف دولار بعد اضافة الرسوم والضرائب وخلافة ومع التقسيط بسعر فائدة يتراوح ما بين 17 و 22 % يعنى فى خمس سنوات حوالى 100 % كمان

دى حسبة بسيطة بس عشان لما تحسب وتقارن تكون عارف الوضع عامل ازاى وواصل لفين!!!

30/11/2024

تفتكر لو هنقارن مصاريف تشغيل وصيانة بينهم
ورتبنا من الأقل تكلفة لأعلى تكلفة
هنا السوق بيقول
- مرسيدس
- اودى
- BMW

لكن الواقع والعلم والارقام هايرتبوا بشكل مختلف كدة
- BMW
- مرسيدس
- اودى

لما تحضر دوراتنا التدريبية هاتعرف تشترى صح و تصون عربيتك صح

نفس الامر موجود فى عربيات كتير فى السوق

لما تفهم بشكل علمى الموضوع بيفرق كتير!!

28/11/2024

نحاول نفهم مع بعض احنا فين بالضبط بالارقام:

اجمالى قيمة الشركات المصرية المقيدة بالبورصة المصرية فى كل القطاعات من بنوك, سياحة, صناعة, تجارة, اتصالات, تشييد , ادوية, خدمات غير مصرفية, تعليم وغيرهم
كل دة على بعضة 44 مليار دولار

ركز معايا وقارن القيم التالية لبعض الشركات بشكل منفرد
فى الامارات:
- اعمار 23 مليار دولار
- اتصالات 40 مليار دولار

شركة سامسونج 270 مليار دولار
نيتفلكس 381 مليار دولار

تسلا 1000 مليار دولار
ابل 3470 مليار دولار

ارامكو السعودية 1770 مليار دولار

يعنى اتصالات الاماراتية قيمتها توازى شركاتنا كلها "منها CIB , اوراسكوم, طلعت مصطفى, المصرية للاتصالات , ابوقير للاسمدة , موبكو , الشرقية للدخان, السويدى وغيرهم كتير"

بلاش كل دة, ايلون ماسك اشترى تويتر فقط بأجمالى قيمة 44 مليار دولار
يعنى تويتر بس تعادل قيمة شركاتنا المقيدة فى سوق المال بالكامل

حقيقى لما الاحظ كل الاحتفالات الضخمة فى اعلامنا المبجل بكل قنواتة وصحفة وخلافة باعادة تشغيل النصر للسيارات بيهاجمنى سؤال واضح صريح:
الناس دى مستنية اية؟
متوقعين نتايج عاملة ازاى؟ اذا كان اللى شغال ميسواش عايز تصحى الميت يقوم يجرى ويعمل شغل؟

هل معنى كدة ان مفيش فايدة ونقعد ساكتين؟؟!!
ابدا كل شئ ممكن ونقدر بس "ادى العيش لخبازة"

الموضوع مش عافية ولا بالدراع

07/11/2024

الدليل الدقيق فى التعامل مع الطريق

لو انت من سكان القاهرة او هاتبقى منهم او بتفكر.. لازم تعرف مهارات التعامل مع الطريق.. وبالمناسبة مش اللى انت متعود علية او تعرفة
هاتتحرك سايق عربيتك.. لازم تعرف طبيعة الطريق والسائقين والمركبات حواليك.. هاتقولى انا خبرة.. انا كمان كنت زيك.. بس حاليا بتعلم من جديد

اولا لازم تدرك جيدا الحرب خدعة.. والتحرك فى الشارع عندنا حرب حقيقية.. اوعى عدوك يعرف مسارك, اتجاهاتك, خطك المستقبلية.. لو اتعرفت يبقى انت صعبت على نفسك المعركة وطولت فترتها.. وممكن تطلع منها خسران.. وعلية:
اوعى تستخدم الاشارة.. فاجئ اللى وراك او اللى جاى فى وشك.. اخطفها خطف.. قبل عدوك على الطريق ما ياخد بالة او يستعد..
لو نسيت وحذرت اعدائك واستخدمت الاشارة.. هاتسمع صوت موتور العربية اللى وراك وهو بيعلى عشان يجرى ويعدى قبلك و بعدة عدو تانى ايدة على التنبية بيحذرك انة هايعدى يعنى هايعدى.. اوعى تفتكر الموضوع بسيط.. انت الغلطان وكشفت خططك استحمل بقى!!.. المرة الجاية اخطفها هاتعدى بسهولة

رايح مكان مفيش فية ركنة بسهولة.. متشلش هم.. الركنة الصح دى بتاعة المبتدئين مش انت
انت كمقاتل على الطريق لازم يكون ليك وضعك.. وكل ماتخلص مرحلة هاتترقى وتطلع اللى بعدها.. ابتدى بركنة صف تانى لما تتمكن اركن صف تالت ورابع وخامس.. اركن حتى لو الطريق هايقف.. انت بس مش فاهم انك لو مشيت غيرك هايقف وهاينزل يقضى مصالحة وانت بس اللى هاتتعطل على ما تقف صح..

لما تتمكن هتلاقى المكفاءة اللى تستحقها.. عارف يافطة " ممنوع الوقوف " اللى بتشوفها قدام جراج او مدخل او مخرج او فى اى حتة فى الشارع؟
الجملة مش كاملة عشان اليافطة نفسها صغيرة
الجملة الكاملة فقط يعرفها المحترفون الذين يستحقون وهى " ممنوع وقوف اى حد غيرك" ايوة زى ما بقولك انت مختلف وتستحقها ,, اليافطة دى عشانك انت .. اركن وانزل وسيبها.. مالكش دعوة.. دى مش مشكلتك بتاتا.. انت ضيف عندهم .. خالص مشاويرك بسرعة وتعالى.. بس متتأخرش عن 5 ساعات عشان لو قافل جراج ولا حاجة اليوم مايروحش على الناس.. وتذكر دائما.. انت الاهم! والباقى يولع!

سامع او عندك فكرة عن اشارات المرور.. لو شوفتها برة فمحتاج اقولك ان مفيش زيها فى مصر .. اللى انت بتشوفها عندنا حاجة تانى.. زى فرح ابن العمدة.. كهارب لغرض الزينة.. احمر واخضر واصفر.. الوان بغرض البهجة وبث الفرح فى النفوس.. ايوة هتلاقى مبتدئين بيوصفولك كلام بقى مش جايب تمنة.. زى ان احمر لازم تقف وبتاع.. كلام لا اصل او دليل لة فى مصر..جرب بنفسك وانت تعرف

فى مرحلة ما هتلاقى نفسك بتتعرف على اتجاهات الشوارع, المداخل والمخارج, المطالع والمنازل.. كل دة كلام يهم المبتدئين
انت كمحترف مالكش دعوة, اللى قدامك بتاعك.. اتجاة الشارع هو اتجاهك.. لازم تبقى عارف قيمة نفسك.. انت مش قليل

كمان مايمنعش تاخد سائق توكتوك قدوة ليك.. تشوف بيعمل اية وتعمل زية.. هاتكتشف انك كنت بتضيع وقت ومجهود خرافى على كلام فاضى..
هايفرق اية مطلع كوبرى من منزلة.. المهم انت عايز اية اطلع على المنزل وانزل من المطلع والباقى شكليات مش مهمة

اوعى تنسى الونس.. ايوة الونس.. زى ماقولتلك الحركة على الطريق هى معركة.. والمعركة يلزمها راحة.. يعنى ممكن تلاقى عربيتين قدامك بيولعوا لبعض سجاير.. بعدها تلاقى واحد واقف فى مدخل طريق بيكلم المدام لو عايزة حاجة وهو راجع.. اتنين من طيارى طلبات بيتناقشوا فى عنوان عميل فى نص الطريق.. كل دة عادى انت بس اللى بتاخد على خاطرك بسرعة

بفكرك كل مرة تسأل فيها نفسك امتى حال المرور يتعدل؟
يبقى انت راسب وعندك دور تانى وتالت ورابع

السؤال الصح : امتى انجح واعقل واعمل زيهم؟
وقتها فعلا
مبروك عليك يا مواطن

22/10/2024

كلّما تقدمنا خطوة.. نرجع خطوات
الشركات كما هو واضح بالتقرير لا تستطيع العمل وفقاً للتعريفة القديمة فى ٢٠٢٢

قررت لجنة إصدار شهادات تجديد تصاريح الطاقة الكهربائية التابعة لجهاز تنظيم مرفق الكهرباء وحماية المستهلك المصري عدم تجديد تراخيص شركتين عاملتين في مجال شحن

21/09/2024

خدها منى كمهندس سيارات
واطمن الموضوع بدون تكلفة

مفيش حاجة اهم من قراءة كتالوج عربيتك

قبل اى سؤال تكتبة او توكيل , مركز خدمة تعمل عندة صيانة

كتالوج العربية فية اجابة عن 95 % من استفساراتك..
ونصيحة كمان
شبكات التواصل الاجتماعى مش مكان تاخد منة معلومة صحيحة, موثقة, و هاتخسر كتير اوى لو فاكرها مفيدة

محتوى مجال السيارت على شبكات التواصل بعيد كل البعد عن العلم والدقة واغلبة محتوى تجارى بس!!

22/08/2024

بفكركم تانى سبب حادث امس..
لازم نفوق وننهى المأساة
لا العربيات النقل فنياً ينفع تمشى على طريق
ولا السائقين مؤهلين للتعامل مع الطريق
الحوادث عندنا ليست صدفة اطلاقاً

https://www.facebook.com/share/SCtp7gfDphfDcugo/?mibextid=QwDbR1

من ايام قلائل نشرنا تحليل فنى لحادث كوبرى مدينة نصر " بجوار النادى الاهلى" واشرنا فية الى خطورة توجد رادارات على منازل الكبارى بالشكل الحالى

اليوم ننتقل لنقطة غاية فى الخطورة تتم بشكل سلس جدا ودون اى تعقيدات

الصورة لسيارة نقل قديمة.. عندما تظهر بوادر ضعف المحرك عليها فأن الحل اليسير فى مصر هو بمنتهى البساطة استبدال المحرك بأخر مستعمل

الجميع يرتاح لهذا الحل.. بدلا من عمليات اصلاح مكلفة.. سيتم التخلص من محرك قديم واستبدالة بأخر من موديل حديث " استيراد الخارج " لتحصل على محرك اقوى بمراحل وغالبا مع ناقل حركة متطور

شرط المرور هنا ان يكون المحرك بورق " افراج جمركى " ويتم الترخيص بمنتهى السهولة

تعالو نتكلم بالعلم والارقام..
تفتكر لو استبدلت محرك يتراوح من 160 الى 190 حصان بأخر ضعف القدرة الحصانية دون الوضع فى الحسبان اى تعديلات على انظمة الفرامل

هل تتخيلون فرق عشرات الاعوام من التطوير فى وسائل الامان المصاحبة للقدرات المرتفعة للمحركات ونواقل الحركة بين سيارة قديمة وجديدة
بمنتهى البساطة نأخذ محرك ذو قدرة حصانية وعزم مرتفعين جدا ويتم وضعهم مع منظومة فرامل بالكاد تكفى اقل من نصف هذة القدرة .. وبفرض انها تعمل بكفاءة " مجال عملى ودراستى يؤكدان العكس تماما"

ماذا نظن اننا فاعلون؟!!!

نطلق عربات كبيرة الحجم بيننا فى الشوارع والطرق وهى لا تملك القدرة على الفرملة بشكل مناسب يتوافق مع هذة القوة الضخمة ولا نتوقع وقوع حوادث مميتة؟!!

نتحمل جميعا مسئولية ونتائج عدم وضع العلم اساس لأى قرار قد يبدو بسيط ولكنة فى الحقيقة فى غاية الخطورة

امرنا غريب مش كدة؟!!
__________
تابع قناتنا على يوتيوب واعرف اكتر عن عربيتك
https://www.youtube.com//videos