09/01/2026
الميثاق ده مش كلام مكتوب وخلاص ده الأساس اللي اتبنى عليه البودكاست كله، وده الوعد اللي بنقدمه مع كل حلقة.
في 3 ورقات إحنا مؤمنين إن ريادة الأعمال مش سباق استعراض ولا بوستات نجاح متفلترة، لكنها لعبة قرارات ومخاطرة وجرأة وكل اختيار ليه ثمن.
إحنا هنا علشان نحكي اللي محدش بيحبه يتحكي.
عن البدايات المتلخبطة عن الغلط اللي علم وعن النجاح اللي جه بعد محاولات كتير مش باينة.
في 3 ورقات مفيش وصفات سحرية ولا وعود سريعة. اللي عندنا قصص حقيقية من أرض الواقع اتلعبت فيها الورق على المكشوف.
ضيوفنا مش جايين يدو دروس ولا يحكوا بطولات. جايين يشاركوا تجربتهم زي ما عاشوها بالقرارات الصح والغلط والمواقف اللي فرقت.
إحنا بنؤمن إن الضحك مش نقيض الجدية وإن الكوميديا أقرب طريق للفهم وإن الصراحة هي الأساس لأي حوار له معنى.
3 ورقات مساحة آمنة وصريحة لكل شاب بيفكر يبدأ أو مكمل في طريقه أو لسه بيحاول يفهم اللعبة بتمشي إزاي.
ده ميثاقنا وده التزامنا نحكي الحقيقة نحترم عقلك ونسيبلك تختار ورقتك.
