17/05/2020
كتب Maged Eladawy مؤسس موقغ Tindio
علي حسابه الشخصي ملخص لاهم المشاكل التي تسببت في فشل التجربة
ليه Tindio.com فشل؟
الحياة تجارب و خبرات و خوازيق بنلبسها بإستمرار. أهم حاجه بس لما تلبس في حاجه توعي غيرك علشان يتعلم منك...٤ سنين أخدنا فيهم خبرة عظيمة جداً في مجال الـ Marketplace هحاول ألخصهم هنا. (البوست ممكن يبقي طويل شويه..آسف مقدماً!)
٢٠١٦ تحديداً شهر ٤ بدأنا tindio.com
و كانت المشكلة اللى موجودة وقتها و بنحاول نحلها إن فيه ناس كتييير في مصر بتصنع و بتبيع منتجات عظيمة جداً لكن محدش يعرف عنهم حاجه. كل واحد فيهم بيبيع في مكان مختلف (فيسبوك, محلات٬ انستجرام أو موقع خاص بيه) و لو انت شخص٬ سواء جوا مصر أو برا مصر و عايز منتج معين مكنتش هتلاقيه بسهولة...بالتالي فكرة إننا نصدر منتجات مصرية للـ End-users بره مصر مكنتش هتبقي ممكنة من غير ما نحل المشكلة دي و نجمع الناس دي في مكان واحد.
الحل أو الحلم أننا نعمل Open Platform بيخلي أي حد يعمل ستور و يرفع منتجاته في أقل وقت ممكن٬ كنا طرف تالت و حلقة الوصل بين المتاجر و العملاء. كنا أحنا اللى بنشحن المنتجات من المتجر و نبعتها للعميل و بناخد الفلوس نبعتها للمتجر تاني مقابل 15% نسبة ربح على بيع المنتجات.
المشكلة الأولي - User behaviour
هلخصلكوا دي في شوية سيناريوهات بتحصل بشكل مستمر عندنا في الأوبريشن.
١. بنعمل ماركتنج كامبين على ستور معين و بنجيب أكتر من ٣٠ اوردر على الأستور ده. النتيجة ان الـ ٣٠ اوردر بيتلغوا علشان الأستور عنده حالة وفاة.
٢. العميل بيطلب منتج لمناسبة معينه و الأستور بيأكد انه هيسلم المنتج قبل المناسبة. النتيجة ان الأستور بيختفي و مش بيرد على التليفون و الأوردر بيتلغي بعد ما بنتهزأ من العميل.
٣. أوردر مدفوع بيتعمل من خارج مصر على منتج تمنه ٣٥٠ جنيه. بنكلم الأستور علشان ينفذ المنتج. بيرد أن المنتج تمنه بقا ٧٠٠ جنيه و أنه نسي يعمل ابديت للأسعار.
٤. عميل بيطلب محفظة جلد طبيعي مطبوع عليها أسمه أو صورته. الأستور بينفذ المنتج و بيطبع عليها اسمه. العميل بيختفي و مش بيستلم الأوردر. النتيجة اننا مينفعش نقول للأستور اتحمل انت الخسارة دي و للأسف بنتحملها احنا و بنعوض الأستور و المحفظة مينفعش نستعملها تاني لأنها Custom made
٥. عادتاً بنسلم الفلوس لاصحاب المتاجر بعد اسبوعين من طلب الأوردر علشان نتأكد ان العميل مش هيشتكي من مشكلة معينه في الأوردر. النتيجة ان الأستور بيبعت الأوردر مع شركة الشحن و بيكلمنا تاني يوم علطول يسألنا عن الفلوس بتاعته و بيتهمنا اننا سرقناه و موضحنالهوش اننا هنبعتله الفلوس كمان اسبوعين و بينزل يعمل فينا محضر.
٦. بنخصم ١٥٪ هامش ربح من أوردر معين. الأستور بيكلمنا يقولنا ان ١٥٪ كتيير و اننا مجرد موقع أو فيسبوك بيج و انه عايز يقفل الأستور بتاعه متجاهلاً اننا دفعنا أضعاف الفلوس دي في الماركتنج و الأوبريشن و الكاستومر سابورت.
ده أقل من ٥٪ من المشاكل اللي بنقابلها بشكل يومي..مش هتكلم عن اننا غيرنا أكتر من ٢٥ شركة شحن ولا المندوبين اللى كانوا بيضيعوا المنتجات أو يسرقوها...و كمية التعويضات اللى عوضناها للعملاء و المتاجر.
---------------------------------
المشكلة الثانية - Cost of Order
بشكل يومي بنحاول Approaches كتيرة علشان نجيب اوردرات للأستورز اللى موجودة عندنا. سواء
Social media ads
Search Engines Ads
Promoting the products on other websites.
و طبعا لازم ندفع فلوس في اي طريقة بنجربها. معدل هامش ربح كل أوردر تقريبا ٣٠ جنيه. تكلفة انك توصل للأوردر ده تقريبا ٢٥-٣٥ جنيه٬ ده غير تكلفة الأوبريشن و خدمة العملاء. بكل ثقة أقدر أقولك اننا بنخسر حتي لما حاولنا نقلل تكلفة كل اوردر على قد ما نقدر. مقدرناش نوصل للمعادلة اللى تقولنا ان تكلفة الأوردر أقل من هامش الربح...
---------------------------------
المشكلة الثالثه - Easy come easy go
كنا فاكرين إننا لما نخلي المصممين أو البائعين يفتحوا متجر عندنا بسهولة في دقايق من غير عقود أو إمضاءات أو ورق رايح وورق جاي أو اننا نشترط ان المنتجات تكون عندنا في المخزن٬ دي هتكون ميزة...سهولة إنشاء ستور في الموقع عندنا خلت البائع ميحسش بقيمة المتجر...و بالتالي ناس كتير كانت بتجرب...تفتح متجر...ترفع منتجين أو ٣ و تختفي....و ده كان السبب ان فيه متاجر كتير عندنا مش Active و ملهاش لازمه الحقيقه
---------------------------------
المشكلة الرابعة - Quality Control
ازاي يبقي عندك موقع فيه أكتر من ٧٠٠ متجر و ٨٠٠٠ منتج و تتأكد من جودة كل منتج من المنتجات دي. خصوصاً إن دي منتجات بتتعمل بالطلب..مش قدامك علشان تقيمها.. و في نفس الوقت انت Open Platform معندكش مخازن تخزن فيها المنتجات دي...أكتر من ٦٠ في الميه من المنتجات اللى عندنا كانت بتوصل للعميل و العميل بيكلمنا و بيقولنا ان الاوردر فيه مشكله. المحفظة فيها خدش...السلسة مش زي الصور...التي شيرت الكواليتي بتاعته مش زي الصور...الشنطة الجلد الطبيعي ريحتها وحشه....في الحالة دي بنعمل مرتجع من العميل للأستور و بنخسر احنا فلوس الشحن اللى هي أكتر من هامش ربحنا اساسا. الكلاينت بيبقي عنده Bad Impression عن الموقع أو البراند بتاعنا . حاولنا كتير نقنع الناس إننا مجرد وسيط مش بائع لكن الناس ديما شايفاك انت الواجهه...انت الموقع اللى هوا اشتري منه...صعب تقنعهم بأي حاجه تاني.
---------------------------------
المشكلة الخامسة - Comfort Zone
لما تعمل موقع أو موبايل أب و تطلب من الأستورز يدخلو منتجاتهم عن طريق الموقع بتاعك في مقابل انك هتقدملهم خدمات زي الشحن٬ الدعم الفني أو تبيعلهم أكتر. هل تتوقع ان ال Stores هيستخدموا السيستم او الموقع بتاعك؟ الإجابه طبعاً لأ. معظم الأستورز مش بتحب تخرج من الـ Comfort zone بتاعتها اللى هي الفيسبوك أو انستجرام..حتي بعد ما عملنا UX Improvements كبيره علشان نتأكد ان الداشبورد سهلة و مفيهاش أي مشاكل. كانو ديما مش عايزين يتعاملو مع أي سيستم هم مش متعودين عليه. هتلاقي منتجات كتير Out of stock منتجات كتير اسعارها قديمه بسبب أننا مقدرناش نقنع اليوزر انهم يخرجوا برا الComfort Zone و انت كمان لما تيجي تصمم تطبيق أو سيستم خاص بيك..لازم تبقي عارف ان اقناع غيرك انه يستخدم التطبيق بتاعك أصعب من تنفيذ التطبيق نفسه...
---------------------------------
المشكلة السادسة - Technology First or Business First
أكبر غلطة إننا كا مؤسسين كنا فاكرين ان اي حاجه نقدر نحلها بالتكنولوجي. و إننا لما بدأنا Tindio.com
ركزنا على التكنولوجي أكتر و إن يبقي عندنا موقع كويس٬ user interface سهلة٬ موبايل ابلكيشن كويس. و قضينا تقريبا ٧ شهور أو اكتر علشان نبني مشروع من غير ما نجربه أو من غير ما نعمل MVP
أكتشفنا ان التكنولوجي مش كل حاجه٬ بالعكس هي أقل مشكلة. و إننا كان ممكن نجرب بموقع يتعمل في ٥ دقايق و ان الـ Operations & Business Model اهم بكتيير جداً. مكنش عندنا شريك فاهم في البزنس و ده للأسف خسرنا كتير. متبدأش اي مشروع غير لو انت فاهم كويس البزنس, متأكد ان عندك اوبريشن قوي و أخيرا فكر في التكنولوجي اللى هتساعدك توصل للي أنت عايزه.
---------------------------------
المشكلة السابعة و الأخيرة - Your availability VS Business continuity
لما بدأنا المشروع كنا متفرغين ليه بالكامل و مكنش عندنا استيعاب لإن النوع ده من المشاريع ربحه بيبقي على المدي البعيد...بعد سنة بالظبط نفذت كل طاقتنا و بدأنا نتوجه لإننا نشتغل علشان نقدر نصرف على مشروعنا...و بالفعل اشتغلنا و ده اللى خلانا نستمر ٤ سنين بدون أي استثمار لكنه كلفنا تباطؤ في حل المشاكل اللى بتواجهنا...
الحل كان في اننا نلاقي استثمار خارجي من السنة الأولي و ده كان هيساعدنا نتفرغ ليه على مدار السنين القادمة و هنحل المشاكل اللى بتواجهنا أسرع.
---------------------------------
ملخص - Conclusion
1. الـ eCommerce مجال كويس جداً لو المنتج بتاعك وواثق في جودته و واثق انك تقدر توصله بسرعه بدون اي مشاكل.
2. الـ Marketplace مش أنجح موديل لو انت بتدور على ربح على المدي القريب. متسوقش أو تبيع منتج غيرك إلا لو هامش الربح يغطي التكلفة و ده صعب جداً يتحقق.
3. مجال الـ Handmade & Custom products في مصر محبط جداً بالرغم من ان فيه ناس عظيمة جداً. منصحش انك تشتغل فيه غير لو انت الشخص اللى بيصنع المنتجات دي.
4. أهتم بالمشكلة و البزنس و الأوبريشن قبل ما تهتم بالتكنولوجي
5. لازم تبقي عارف مشروعك ربحة على المستوي القريب ولا البعيد. لو على المستوي القريب يبقي لازم تحاول تكسب منه من Day 1 و إلا مش هتقدر تغطي مصاريفك و بالتالي مش هتكمل فيه. في الأول تجاهلنا ان هامش ربحنا قليل و كان عندنا أمل ان لما عدد الاوردرات تكبر الربح هيزيد... و كانت النهاية حتمية
6. اللى بيتطبق في أوروبا و امريكا مينفعش يتطبق في مصر أو الوطن العربي و العكس صحيح (User Behaviour is different)
و أخيراً...مش بخلي مسئوليتي عن ما حدث ولا بلوم البائع أو المشتري بالعكس انا بلوم نفسي اني لم أجد حلول مناسبة للمشاكل دي.
لو كنت شوفت بوست شبه ده من ٤ سنين لحد بينقل خبرته اكيد كنت هتعلم منه و يمكن كنت وفرت وقت و مجهود و فلوس في فكرة تانيه تناسب امكانياتي أكتر. لو عندك خبرة في مجال معين...متبخلش علينا الله يخليك!
انا عرضت جزء من المشاكل اللى كانت بتقابلنا و معرضتش طريقة حلنا ليها علشان الكلام ميزيدش عن كده..أحنا كنا بندرك كل مشكلة عندنا أول بأول و بنشتغل علشان نلاقي حلول لكن في النهاية الـ Flow بتاع التحديات اللى كانت بتقابلنا كان أكبر من قدرة إستيعابنا ليها و الحلول اللى بنقدمها وده ميمنعش أبدأ ان في يوم من الأيام ممكن شخص ينجح فيما فشلنا فيه...أقرأوا التعليقات كويس...فيها دروس عظيمة...لكم كل التوفيق!
