12/11/2021
الموضوع يخص المهتمين بتطوير و تحويل العربيات الكلاسيكية من نظام البنزين لنظام العمل بالكهرباء.
مبدئيا ، بمراجعة ردود الأفعال و مناقشة الأعضاء علي الموضوع ، ظهر أن الناس بين مش عارف أو خايف الموضوع يكون غالي أو فعلا ناس مصالحها ضد استبدال الموتور و قطع غيار العربية القديمة بجديدة كهرباء ..
و خلونا نتكلم بموضوعية بخصوص المواصفات الفنية السيستم اللي ينفع علي العربية بناء علي مقاسها و ووزنها و مواصفاتها ..
أولا :
ايه هي مكونات و اسعار مكونات السيستم :
١ السيستم بإختصار :
١- الموتور
النوع المطروح 15KH 69V ( LVAC )
سرعته القصوي من ٨٠ الي ٩٠ كيلو في الساعه لمسافة قصوي حسب مواصفات البطارية .. نوع المحركات ذات الجهد المنخفض دي أسعارها معقولة بتتراوح في حدود ٦٠٠ دولار بين الشركات المختلفة.
الوزن حوالي ٥٥ كيلو و ال RPM من ٣٠٠٠ الي ٦٠٠٠
و التبريد بالهواء ( يعني مفيش دورة مياة )
طيب اللي يسأل هل في مواتير ممكن تكون سرعتها توصل أعلي من كده ؟
اه ينفع ، النوع 20kw of LVAC بقدرة أعلي بتوصل سرعته القصوي من ٩٠ الي ١٠٠ كيلو في الساعة.
طيب لو عاوز سرعات أعلي ؟! ينفع طبعا ولكن لا ينصح بها بعد الرجوع الموردين و المختصين .. ليه
لإن وزن العربية بيقل كتير ، ثانيا لإن السرعات اللي أعلي من ١٢٠ كيلو في الساعه بيستخدمو انواع مواتير عالية الجهد PMSM 320v 40KW و أسعاره بتكون أغلي من السيستم كله بمرتين تلاته .. و ملوش اي داعي في حالة العربية البيتلز .. يبقي علشان كده أفضل نستخدم مواتير LVAC منخفضة الجهد بسرعه ممكن توصل ل ١٠٠ كيلو في الساعه.
٢- الكنترول
و ده عقل العربية .. الكمبيوتر بتاعها و كل الاجزاء و الضفيرة بتتوصل بيه
سعره تقريبا بيوصل ٧٠٠ دولار
٣- فتيس السرعه بالكابل و ده بيوصل بالكنترول سعره حوالي ٦٠ دولار و كذلك اكسيلاتير ٦٠ دولار كمان
٤- كونفيرتر بيعلي الجهد كتغذية الموتور حوالي ٧٠ دولار
٥- نظام فرامل هوائي بيوصل بالكنترول ٧٠ دولار
٦- تابلوه وظائف ( مؤشرات التابلوه ) ١٠٠ دولار
ممكن يزيد عليهم نظام الباور للعجلات و تكلفته ٢٥٠ دولار و نظام التكيف ٣٥٠ دولار ، و دي حاجات اختياري ممكن تتعمل أو متتعملش .. بالإضافة لشوية أدابتورات و الشاحن و خلافه.
نظام النقل للعربية مبيتغيرش .. و في واصلة بتركب بين الموتور و الاكس.
نيجي بقي لأهم مكون للنظام .. ألا و هي البطارية ..
٧- البطارية يا شباب المطروحة69V 105ah هي بسعة تخزينة تكفي ١٠٠ كيلو مسافة مقطوعه و دي سعرها حوالي ٢٥٠٠ دولار
طيب عاوزين مسافات اكتر من كده هل ينفع ؟!
اه طبعا ، بس كله بسعره .. يعني البطارية 96v 210ah المسافة المقطوعة توصل ٢٠٠ كيلو ، بس سعرها بيوصل ٤٨٠٠ دولار و البطارية 96v 315ah بتقطع مسافة ٣٠٠ كيلو و سعرها بيوصل ٨٠٠٠ دولار.
لو جمعنا السيستم علي بعضة هتلاقي أن إجمالي تكلفة السيستم سعره بيوصل ٥٠٠٠ دولار تقريبا ..
انا نزلت البيانات بالتفصيل بمواصفاتها .. نقدر ندور بنفسنا علي الاسعار و تشوفو بنفسكم و تفكروا شوية بدل هوجة التخوين علي الباطل و قلة الدراية.
الناس اللي بتسال عن شركات و لينكات ، لو بحثت عن الموتور بمواصفاته مثلا هتلاقي مئات الشركات بتعمله ... كل التفاصيل هتكون متاحة بعد ما نخلص موضوع إعادة التصميم وتقييم النموذج باذن الله
و للحديث بقية إن شاء الله ..
Mohamed Hussien
. In this episode of Austin Garages, Steve heads over to Bloodshed Motors to check out an all-electric muscle car. He meets with Mitch Medfo...
