المركز المصري للتدريب والأعتماد Egyptian Training and Accreditation Center

26/04/2026

📻🔥 موعد مع الحقيقة… مش مجرد كلام!
انتظرونا في حلقة جديدة ومختلفة من برنامج
🎙️ "صورة من حياتنا – الجزء الثاني"
🗓️ الاثنين 27/4/2026
⏰ الساعة 03:40 عصرًا
📡 على إذاعة البرنامج العام
مع الإعلامية المتميزة / منى رمضان
وضيف الحلقة:
👨‍⚕️ د. محمود صقر
حلقة هتفتح ملفات مهمة عن واقعنا النفسي والاجتماعي…
هنتكلم بصراحة عن التحديات، والألم، والطريق الحقيقي للتغيير.
💬 لو مهتم تفهم… لو عايز تواجه… لو بتدور على بداية جديدة
الحلقة دي معمولة ليك!
📢 متفوتش الفرصة… وخليك جزء من الحوار
وشارك البوست علشان يوصل لكل حد محتاج يسمع الرسالة



#وعي

25/04/2026

في كل عيد لا نحتفل فقط بل نُجدّد العهد 🇪🇬

عيد تحرير سيناء ليس مجرد ذكرى بل رسالة قوة وصمود وإرادة شعب لا يعرف المستحيل.
ذكرى سطّر فيها أبطالنا أعظم معاني التضحية لتظل أرض سيناء رمزاً للعزة والكرامة.

كل عام ومصرنا الغالية بخير وأمان
وكل التحية والتقدير لأبطالنا الذين صنعوا هذا المجد
ولكل مصري يساهم يومياً في بناء هذا الوطن.

🇪🇬 تحيا مصر، قوية بشعبها، عظيمة بتاريخها 🇪🇬

22/04/2026

📻 انتظرونا اليوم في لقاء مميز جدًا…
يسعدني أكون معاكم في برنامج "صورة من حياتنا" على إذاعة البرنامج العام
🗓 الأربعاء 22/4/2026
⏰ الساعة 3:40 عصرًا
هنتكلم عن قضايا مهمة تمس حياتنا اليومية، ونقرب أكتر من واقع الصحة النفسية وعلاج الإدمان، ونرد على أسئلة كتير بتشغل بال ناس كتير.
📌 مستنيكم تشاركونا وتسمعوا الحلقة… وآرائكم تهمني جدًا ❤️

20/04/2026

💬 مش كل اللي بيبطل مخدرات بيبقى اتعالج!
كتير فاكر إن مرحلة سحب السموم هي النهاية
لكن الحقيقة؟ دي مجرد البداية!
🔥 أهم وأخطر مرحلة في علاج الإدمان هي: التأهيل النفسي وتعديل السلوك
ليه؟
لأن المشكلة مش في المخدر بس
المشكلة في طريقة التفكير، المشاعر، وردود الأفعال اللي كانت السبب في الإدمان من الأساس.
🧠 هنا بييجي دور:
فهم نفسك بجد
تعرف أسباب تعاطيك
تتعلم تتعامل مع الضغط من غير هروب
تبني شخصية جديدة قادرة تكمل
🤝 ومن أهم الأدوات في المرحلة دي: برنامج NA (زمالة المدمنين المجهولين)
البرنامج ده بيساعدك:
✔ تلاقي دعم حقيقي من ناس شبهك
✔ تحكي وتسمع من غير حكم
✔ تمشي على خطوات واضحة للتعافي
✔ تعيش حياة نظيفة يوم بيوم
✨ التعافي مش إنك تبطل…
التعافي إنك تتغير!
📌 لو عدّيت مرحلة السحب ومكملتش تأهيل… أنت كده لسه في خطر الانتكاسة
خد الرحلة للآخر… علشان ترجع نفسك مش بس تبطل مخدرات.

19/04/2026

مش كل إدمان بيبدأ من مزاج
في إدمان بيبدأ من صوت جواك
الصوت ده اللي بيقولك:
إنت مش كفاية، إنت فشلت، محدش حاسس بيك، ريح دماغك شوية، تستاهل تهرب
المخدرات عمرها ما كانت هي المشكلة الأساسية
هي كانت رد فعل على حرب مستخبية جواك محدش شايفها.
في ناس بتدمن عشان تنسى، وفي ناس بتدمن عشان تحس، بس أخطرهم اللي بيدمن عشان يسكت نفسه
الإدمان الحقيقي مش إنك اتعودت على مادة
الإدمان الحقيقي إنك بقيت خايف تقعد مع نفسك من غيرها
السؤال مش:
إنت بتتعاطى ليه؟
السؤال الأخطر:
إيه اللي جواك محتاج يستخبى للدرجة دي؟
يمكن أول خطوة في التعافي
مش إنك تبطل
لكن إنك تسمع الصوت اللي كنت بتهرب منه طول الوقت.

14/04/2026

22/03/2026

رئيس مجلس إدارة مستشفي الطريق للطب النفسي وعلاج الإدمان: 2.5 مليون مدمن في مصر

17/03/2026

"تخيل إنك شايف كل حاجة حواليك… بس ولا حاجة فيهم حقيقية."

واحد جرب L*D علشان “يغيّر مود”…
لقي نفسه في عالم تاني خالص.

الحيطان بتتحرك…
الأصوات بقت مرعبة…
والناس حواليه بقت أشكال مشوهة…

المشكلة؟
إنه مش عارف يهرب… لأنه جوه دماغه.

🚨 L*D مش مجرد مخدر… دي تجربة بتكسر الواقع نفسه.

⚠️ بيعمل إيه فيك؟

▪️ هلاوس سمعية وبصرية (تشوف وتسمع حاجات مش موجودة)
▪️ فقدان الإحساس بالوقت (الدقايق تبقى ساعات)
▪️ نوبات هلع ورعب مفاجئة
▪️ فقدان السيطرة على التفكير والتصرفات
▪️ ممكن تشوف نفسك أو غيرك بشكل مرعب
▪️ Flashbacks (ترجعلك نفس الهلاوس بعد أيام أو شهور!)

💣 أخطر حاجة؟
إنك ممكن تعمل حاجة تأذي نفسك أو غيرك…
وأنت فاكر إنك “شايف الحقيقة”.

📉 في حالات كتير، المخ مش بيرجع زي الأول بسهولة…
وبعض الناس بيفضلوا يعانوا من اضطرابات نفسية لفترة طويلة.

💬 اللي بيبدأها فضول… ممكن ينهيها خوف طول العمر.

📢 شارك البوست… يمكن توصل الرسالة لشخص فاكرها “تجربة لطيفة”.

*D
#مخدرات
#الهلاوس
#الادمان

16/03/2026

مخدر ثمنه رخيص… لكن ممكن يدمّر حياة كاملة.
في شوارع كتير بقى يظهر نوع من المخدرات الرخيصة اسمه الشادو.
شباب كتير بيجربه لأنه رخيص وسهل الحصول عليه… لكن الحقيقة إن خطورته أكبر بكتير مما يتخيلوا.

⚠️ مخدر الشادو غالبًا بيكون خليط من مواد كيميائية مجهولة ومخدرات صناعية، وبيتعمل بطرق عشوائية جدًا، وده معناه إن الشخص اللي بيتعاطاه مش عارف أصلًا إيه اللي داخل جسمه.

أخطر أضرار مخدر الشادو:
▪️ هلاوس سمعية وبصرية
▪️ اضطرابات نفسية حادة
▪️ فقدان السيطرة على السلوك
▪️ سلوك عدواني خطير
▪️ تشنجات وفقدان الوعي
▪️ تدمير الجهاز العصبي
▪️ احتمال الوفاة المفاجئة

الخطورة الأكبر إن المخدرات المصنعة والخيطة زي الشادو ممكن تحتوي على مواد سامة أو كيماويات خطيرة لأن تصنيعها بيتم خارج أي رقابة طبية.

🚨 عشان كده كتير من الحالات اللي بتتعاطى المخدرات المصنعة بتدخل في نوبات هياج شديدة أو انهيار عصبي مفاجئ.
💬 التوعية بالمخدرات ممكن تنقذ حياة.
شارك البوست يمكن يوصل لشخص قبل ما يقع في الطريق ده.
#الشادو
#مخدرات


#الادمان

15/03/2026

جرعة صغيرة جدًا… ممكن تكون آخر جرعة في حياتك.
في السنوات الأخيرة بقى اسم الفنتانيل يظهر كتير في أخبار الوفيات بسبب الجرعات الزائدة… وده لأننا بنتكلم عن واحد من أخطر المخدرات الأفيونية في العالم.
💊 إيه هو الفنتانيل؟
الفنتانيل دواء أفيوني صناعي قوي جدًا بيُستخدم طبيًا لتسكين الألم الشديد، خصوصًا لمرضى السرطان أو بعد العمليات الكبيرة.
لكن المشكلة إن قوته عالية جدًا، وجرعات صغيرة جدًا منه ممكن تسبب جرعة زائدة قاتلة.
⚠️ تشير الدراسات إن الفنتانيل أقوى من المورفين بحوالي 50 إلى 100 مرة، وده اللي بيخليه شديد الخطورة لو تم تعاطيه خارج الإشراف الطبي.
⚠️ أضرار تعاطي الفنتانيل
▪️ توقف أو بطء شديد في التنفس
▪️ فقدان الوعي
▪️ دوخة شديدة
▪️ غثيان وقيء
▪️ بطء ضربات القلب
▪️ إدمان سريع وقوي
▪️ خطر الجرعة الزائدة والوفاة
🚨 أعراض الجرعة الزائدة
▪️ صعوبة أو توقف التنفس
▪️ ازرقاق الشفاه أو الأظافر
▪️ فقدان الوعي
▪️ بطء شديد في ضربات القلب
لو ظهرت الأعراض دي… لازم تدخل طبي فوري لأن دقائق قليلة ممكن تفرق بين الحياة والموت.
💬 التوعية بالمخدرات ممكن تنقذ حياة.
شارك البوست يمكن يوصل لشخص محتاج يعرف الحقيقة.
#الفنتانيل


#مخدرات

14/03/2026

المورفين بدأ كمسكن للألم… لكن ممكن ينتهي بإدمان يدمّر الحياة.
كتير من الناس فاكرة إن المورفين مجرد دواء عادي في المستشفيات، لكن الحقيقة إن سوء استخدامه أو تعاطيه بدون إشراف طبي ممكن يحوّله لأحد أخطر المواد المسببة للإدمان.

💊 إيه هو المورفين؟
المورفين نوع من الأدوية الأفيونية القوية بيُستخدم طبيًا لتسكين الألم الشديد، خصوصًا بعد العمليات الجراحية أو في حالات السرطان. لكنه بيأثر مباشرة على مراكز الألم والمتعة في المخ.

⚠️ المشكلة بتبدأ لما يتحول الاستخدام لإساءة استعمال.
أخطر أضرار تعاطي المورفين:
▪️ اعتماد جسدي ونفسي شديد
▪️ بطء شديد في التنفس
▪️ نعاس وفقدان التركيز
▪️ انخفاض ضغط الدم
▪️ غثيان وقيء مستمر
▪️ فقدان القدرة على اتخاذ القرار
▪️ احتمال الجرعة الزائدة التي قد تؤدي للوفاة

🚨 ومع الاستمرار في التعاطي، الجسم بيطلب جرعات أكبر عشان يوصل لنفس التأثير… وهنا يبدأ طريق الإدمان الحقيقي.
أعراض الجرعة الزائدة:
▪️ بطء أو توقف التنفس
▪️ فقدان الوعي
▪️ ازرقاق الشفاه أو الجلد
▪️ نبض ضعيف جدًا

⚠️ الجرعة الزائدة من الأفيونات مثل المورفين ممكن تكون مميتة لو لم يتم التدخل الطبي فورًا.
💬 لو تعرف حد بيعاني من إدمان المسكنات أو الأفيونات… طلب المساعدة هو أول خطوة للعلاج.
#الادمان
#مخدرات
#المورفين

14/03/2026

مش كل قصص الإدمان بتبدأ من الشارع
أوقات كتير بتبدأ من إنسان طبيعي جدًا
عنده بيت وشغل وزوجة وحياة مستقرة
لكن قرار غلط واحد ممكن يغيّر كل حاجة
القصة اللي هتقرأها دلوقتي
هي حكاية حقيقية بيحكيها صاحبها بنفسه
عن إزاي المخدرات قدرت تاخد منه كل حاجة
شغله
بيته
وزوجته
واحترامه لنفسه
دي مش مجرد قصة
دي رسالة لكل حد فاكر إنه مسيطر
⬇️ اقرأ القصة كاملة
انا كنت فاكر اني مسيطر
فاكر اني بعرف اشرب وقت ما احب وابطل وقت ما احب
كنت بقول لنفسي دي مجرد حاجة تخليني أهرب شوية من الضغط
لكن الحقيقة اني كنت بهرب من حياتي كلها
كنت متجوز وعندي بيت وشغل ثابت
مراتي كانت بتستحملني وبتقف جنبي
وفي الاول كنت بستخبى
كنت بقول لنفسي محدش هياخد باله
لكن المخدرات مبتستخباش
بتبان في العين
في الكلام
في الشغل
ابتدى التأخير
وبعده الغياب
وبعده المشاكل
المدير مرة نبهني
ومرة تانية خصم مني
ومرة قال لي فوق لنفسك قبل ما تضيع
لكن انا كنت كل مرة اوعد وابطل يومين
وبعدين ارجع تاني
لحد اليوم اللي اتنادت فيه على المكتب
اتقال لي بالحرف احنا عرفنا انك بتتعاطى ومينفعش تكمل معانا بالشكل ده
خرجت من الشغل يومها وانا حاسس ان الارض اتسحبت من تحت رجلي
بس بدل ما افوق
شربت اكتر
بقيت اصحى الصبح مش عارف اقف على رجلي غير لما اشرب
وبقيت اسهر الليل كله
الفلوس خلصت بسرعة
والاحتياج كبر
ابتديت ابيع حاجات من البيت
في الاول حاجات صغيرة
بعدين حاجات اغلى
كنت بقول لنفسي هرجعها لما اشتغل تاني
بعت موبايل
وبعت ساعة
وبعدها بدأت حاجات من العفش تختفي
مراتي كانت حاسة ان في حاجة غلط
كانت تسألني فلوس البيت راحت فين
وانا كنت اكذب
مرة قالتلي انت اتغيرت
انت بقيت شخص تاني
لكن انا كنت بهرب من الكلام
لحد ما مراتي اكتشفت
كان يوم صعب عمري ما هنساه
دخلت البيت لقيتها واقفة في الصالة
حاطة قدامها حاجات كانت مستخبية عندي
كانت بتبصلي بنظرة عمري ما شوفتها قبل كده
نظرة خوف ووجع وكسرة
قالتلي انت بتبيع حاجات البيت علشان المخدرات
ماعرفتش ارد
فضلت ساكت
قالتلي انا مش قادرة اعيش كده
وخدت هدومها ومشيت
ساعتها البيت بقى فاضي
فاضي بطريقة تخوف
لا صوت
لا كلام
لا حد مستنيني
لا شغل
ولا زوجة
ولا حياة
بعدها حياتي باظت اكتر
بقيت اقعد لوحدي بالساعات
اشرب واغرق اكتر
اخواتي حاولوا معايا كتير
كانوا ييجوا يقعدوا معايا ويقولولي فوق لنفسك
وكل مرة كنت اوعدهم اني هبطل
وكل مرة ارجع تاني
لحد ما في يوم حصلت مشكلة كبيرة
كنت في الشارع وكنت في حالة سيئة جدا
دخلت خناقة مع ناس من غير سبب
والكلام وصل لاخواتي
في نفس الليلة لقيتهم داخلين عليا البيت
كانوا شايفين قدامهم انسان ضايع
اخويا قاللي كفاية كده
احنا مش هنسـيبك تضيع
كنت رافض
كنت بقول لهم انا كويس سيبوني
لكن الحقيقة اني ماكنتش كويس خالص
اخدوني بالعافية وركبوني العربية
كنت معترض ومش فاهم هما بيعملوا كده ليه
لحد ما لقيت نفسي داخل مستشفى علاج ادمان
كنت شايف ساعتها انهم ظلموني
لكن بعد شوية فهمت الحقيقة
انهم كانوا بينقذوني
لان المخدرات كانت خدت مني كل حاجة
خدت شغلي
وخدت بيتي
وخدت مراتي
وخدت احترام الناس ليا
والاصعب انها كانت هتاخد حياتي كلها
النهارده انا في طريق التعافي
الطريق مش سهل
بس على الاقل بقيت شايف الحقيقة
ان المخدرات مبتدمرش بس اللي بيشربها
المخدرات بتدمر حياة كاملة حواليه
ولو كنت فهمت ده بدري
مكنتش خسرت كل ده.

واستنونا الجمعة الجاية في قصة جديدة من قصص الطريق
قصة حقيقية جديدة تكشف جانب تاني من حكايات الإدمان والتعافي.