02/07/2026
امبارح كان أول قبض لحمزة ابني في حياته
دخلته مع التيم في الشيفت المسائي , يحضر توزيع المرتبات
وكلامي مع التيم
-حطيت الراتب بتاعه في ظرف مع قطعة شيكولاتة حاله حال باقي التيم ..♥️
-ندهت عليه اديته الظرف “الراتب” وشكرته على مجهوده
وخليت التيم بالكامل يسقف ليه ودا بنعلمه مع أي شخص شاطر من التيم بشكل عام .!
-بقوله
دا أول راتب حقيقي من تعبك ومجهودك , لازم تفضل فاكر اليوم دا كويس .!
حمزة
بقاله 11 يوم شغال معايا في الجيم قبضه 200 جنيه
تخيل بقى عمل إيه لما روح البيت ..!
-أمه
بتقولي جي الفرحة مش سيعاه ماسك الظرف في إيده ورايح جاي
عمل بيهم إيه ..!
•طلع 10 جنيه لله
•راح اشترى لإخواته الصغيرين “يونس , فريدة” كيكة , شيبسي
•هنا أخته بتعمل إكسسوارات خرز “اشترى منها” بـ 50 جنيه
قالها واحدة لبابا , وواحدة لماما , وواحدة لياسين .
-حمزة
صرف 100 جنيه “نص المرتب”
بس الـ 100 جنيه اللي صرفهم بفطرته كراجل مسؤول عن العيلة
هو اللي بيشكل بشكل أساسي تكوينه كراجل .!
-أنا طبعا
لا قولتله حوشهم ولا بلاش تشتري حاجة
بالعكس أنا كنت هزعل لو عمل عكس كدا
-إحساس حمزة
وهو بيشتري حاجة من مرتبه لأهله
هيفضل أحسن , أجمل إحساس , ميزة ربنا ميز بيها الرجالة
زي الأب بعد مفرمة الشغل والتعب يقبض الفلوس
ممكن يستخسر في نفسه بس يروح عادي يشتري لأولاده وبيته علشان يشوفهم مبسوطين .!
-للأسف
تربية الرجالة واحدة من أصعب الأمور المعقدة
لا ينفع فيها حنية مفرطة ولا طيبة زايدة
ولا راحة مطلقة ولا يتحكم في تربيتهم مشاعرك .!
علشان كدا اتعلم التربية قبل ما تخلف , خد بالنصيحة دايما ..♥️
ملحوظة
حمزة مش قادر يمسك نفسه من الضحك
في سن حمزة اللحظة دي بتبقى فيها كمية مشاعر بتجيب ضحك
بيفكرني بنفسي وأنا بكتب الكتاب إيدي في إيد حمايا الله يرحمه ومن كتر الضحك مش قادر أردد ورا الشيخ
الضحك كان من فرحتي .
