18/02/2023
"السِت أم كلثوم في أغنية «لسه فاكر» قالت جملة عظيمة في العلاقات الـ Toxic اللي بتبقى قايمة على أستنزاف أحد الأطراف للطرف التاني فقالت :
«كانت الأيام في قلبي دموع بتجري وأنت تحلالك دموعي وهي عُمري»
ملقتش تعبير جبار أكتر من «دموعي هي عُمري» في وصف أستنزاف المشاعر وإن قد إيه في طرف ممكن يضحي ويقدم «أيام عُمره».. للي قدامه عشان بس بيحبه !! والأسوء إن اللي قُدامه يقف من بعيد كده يتفرج عليه وهو بيقدمله عُمره على طبق من دهب وياخده يرميه في الزبـ ـالة !!
لكن السِت هنا في مرة من المرات القليلة اللي كانت فيها قوية وقادرة تتغلب على مشاعرها كملت وقالت :
«ياما هانتلك وكانت كل مرة تمحي كلمة من آمالي فيك وصبري .. كلمة كلمة لما راح الهوى ويا الجراح واللي قاسيته في ليلي أتنسى ويا الصباح»..
هنا السِت في مشهد درامي من الدرجة الأولى وقفت بكل صلابة عشان تبين إن لكل فعل رد فعل وإن مش دايمًا الإنسان هيفضل يضحي ويقدم من غير مقابل ولا حتى تقدير
وإن حتى المشاعر والحُب دا مرحش بين يوم وليلة لكن كل مرة كانت في حِتة بتنقص في حِتة بتقولها إنها لازم تمشي ..«ما راح الهوى ويا الجراح».. مبقاش في حاجة تقدمها تاني فقررت تسيب الهوى والجراح وتمشي
وأخيرًا بتختم السِت بجملتها العظيمة :
"لما تسألني أقولك كان زمان
لسه فاكر كان زمان .." 🖤🎶
