20/04/2021
رجعنالكم تاني بكل يوم معلومه
البوست دا استكمالا لبوست العفشه و بأختصار قدر المستطاع
عيوب العفشة وكيفية ضبطها :
1: علبة الدركسيون
علبة الدركسيون من اهم المكونات اللى بتكون موجودة فى العفشة لانها لو بايظة وكل عفشتك سليمة هتحس كأنك راكب مراجيح وتسمع تخبيط فى اى مطب
وعشان تتاكد ان علبة الدركسيون عندك سليمة :
1: هز الدركسيون وعينك على العجل لو لقيت مع اى حركة بسيطة للطارة الكاوتش بيتحرك يبقى كدة علبة الدركسيون سليمة ولا يوجد بها بوش ,غير كدة يبقى العلبة مبوشة ويلزملها طقم اصلاح
2: ممكن يكون العلبة مافيهاش بوش بس العلبة نفسها من جوة بدأت تروسها تتاكل وتضعف ودية بتبقى اسمها حشوة علبة الدركسيون وبتضطر تغيرها لما تسمع صوت خبط مع اى ارض غير ممهدة وغربلة فى الطارة , و بتحصل كمان بعد سرعة 80 كيلومتر
3: ممكن تكون الاسكاترة بتسرب زيت الباور فتؤدى الى تقل فى التارة وصعوبة تحريكها وفى هذه الحالة يتم حل الاسكاترة وعمل طقم إصلاح لها وتغيير الجوانات والأويل سيلات الداخلية التى تحجز الزيت
قطمة الدركسيون (عامود الدركسيون) :
عبارة عن العامود الموصل للحركة من التارة إلى الاسكاترة وهو يتكون من ماسورة معدنية ويتوسطها 2 أو 3 صليبة لنقل الحركة الدائرية للماسورة مع تعديل اتجاه الماسوة حتى تصل الحركة الى الاسكاترة
وعند تلفها يكون فيه بوش بسيط جدا عند تحريك التارة أو تشعر بنقرة شديدة عند تحريك التارة وفى هذه الحالة يتم تغيير صليبة الدركسيون التالفة
2: التيش الداخلى والخارجى (بارات الدركسيون) :
التيش عبارة عن زراع صغير فى اولة بيضة متحركة تنتهى بمسمار برغى يتم تركيبة فى نهاية كل جانب من الجريدة المسننة التى بداخل الاسكاترة وفى الجهة الاخرى من التيش مسمار أخر يتم تركيبه فى التيش الخارجى والذى يشبه بالضبط التيش الداخلى ووظيفة هذه الاتياش هى نقل حركة الجريدة المسننة الى العجل (كاوتش السيارة) حيث ان البيضة التى تكون فى نهاية التيش الخارجى (بارة طرف الدركسيون) يتم تركيبها بصامولة فى الشمعدان الذى تثبت فى العجلة
ودول لما بيبوظوا بتحس بصوت خبط فى العجلة نفسها اللى بيبقى التيش بتاعها بايظ , دة غير ان التوجية بيبقى خفيف جدا لما تيجى تكسر شمال مثلا , وعلى السرعات العالية فوق ال 100 مثلا بتلاقى العربية خفيفة فى التوجيهة
3: المقص
ودة عبارة عن عمود فى اخرة كاوتشة وفى اولة كاوتشة (جلبة المقص) يجب ان تكون سليمة والا هتحس بأى مطب دة غير عومان العربية والمقص دة بيتوصل بالشمعدان وواصل باجنب العربية
وفى حالة ان تكون جلب المقصات مقطوعة أو غير سليمة يتم تغييرها فى حالة أن يكون الجسم المعدنى للمقص سليم أما اذا كان هناك إعوجاج فى المقص بسبب تعرض السيارة لصدمة أو خبطة فيتم تغيير المقص بالكامل
4 : (مسمار الميزان) :
من اهم العناصر الاساسية فى ظبط السيارة وبيتم استخدامة فى الفصل مابين اجزاء العفشة وعيوبة انك بتلاقى العفشة خفيفة مع مطبات الهواء بالذات
5 : الكبالن:
1 الكوبلن الخارجى ( راس الكوبلن ) :
رأس الكوبلن الخارجى هى التى تنقل الحركة الى العجل من اللأكس اللى بياخد حركته من الكوبلن الداخلى اللى واصل فى الفتيس وبتمشى فى حركات امامية وخلفية وعلوية وسفلية لكى تستمر فى نقل الحركة من الفتيس الى العجل عند كسر الدركسيون فى الملفات وبهى تتكون من مجموعة من البلى جوا جسم الكوبلن ويجب ان تظل محتفظة بالشحم داخلها
واعراضها انك لما تيجى تكسر شمال او يمين بتسمع صوت زى طقطقة ودة معناة ان مكان البلى بدأ يبقى فية بوش ومابقاش محكم
ولازم يتغير عشان مع الوقت ممكن يفرك ويؤدى الى كسر الكوبلن
العيب الثانى ممكن يكون مجرى بلى الكوبلن نفسة بقى خفيف فيسبب رعشة اثناء السرعات او عدم احكام دقة التوجية عند الدخول فى المنحنيات الخفيفة
2- الكوبلن الداخلى : بيوصل من الفتيس لأكس الكوبلن اللى بينقل الحركه للكوبلن الخارجى الكوبلن الداخلى مهم جدا و بيتكون من جسم الكوبلن و 3 صلايب و الكوبلن بيتحرك فقط فى اتجاهين امامى وخلفى وعمرة طويل
ومشاكل الكوبلن دة تظهر بوجود صوت خبط حديد×حديد اثناء التحرك الى الامام او الخلف , او عند الدخول فى ارض غير ممهدة
امتى تعرف انة بايظ : الكوبلن بيطلع بيتم الكشف على ال 3 صلايب لو لقيت الصليبة خفيفة او مبوشة بيتم تغيرها
- الاكس : ( عمود التوصيل ):
الاكس دة مهم جدا لانة اللى بيقوم بربط الكوبلن الداخلى بالكوبلن الخارجى وتثبيتهم فى الفتيس لاتمام عملية نقل الحركة
والاكس دة بيبقى فية جزء مشرشر لازم يكون سليم فى نهايتة واولة
لازم يكون مش واخد خبطة او مش معوج عشان مايتسببش فى رعشة
الاهم بقى لازم يكون نفس المقاس وكل ماتور ولية المقاس الخاص بية , ولازم يكون فية 5 ملى بوش فى كل ناحية لضمان سلاسة فى الاداء وعدم حدوث رعشة
الاكس مش بيجى لوحدة لازم يكون معاة كوبلن خارجى وداخلى
6 : الطنابير :
طبعا الطنابير مهمة جدا لانها دية اللى بيتركب فيها العجلة ولازم تكون مظبوطة ولا يوجد بها ريجة ( عالى وواطى )
واى تلف بيؤدى الى رعشة على السرعات , رجة مع الفرامل بعد سرعة 80 كم , عدم ثبات بدال الفرامل اثناء الضغط علية
7: المساعدين والسوست والبطاحات :
المساعد من اهم العناصر الاساسية فى العفشة لانة بيخلى العربية ماتميلش جامد لو بتاخد ملف , بتحافظ جدا على شاسية العربية , نعومة وراحة عند المطبات غير كدة يبقى المساعد بايظ
السوستة بتبقى هية اللى رافعة العربية وبتخفف الحمل عن المساعد + تخفيف الاحساس بالمطب
فلو لقيت جنب اوطى من جنب يبقى كدة السوست لازم تتغير
البطاحة : بتبقى راكبة فوق المساعد ومتصلة بجسم السيارة وعبارة عن كاوتشة ورولمان بلى بيخلى المساعد يلف مع كسر العجل سواء يمين او شمال
فلما تسمع صوت تزييقة فى الكسرات اكشف عليهم
8 : بيض المقص
بيض المقص بيبقى متركب على طرف المقص نفسة ناحية الخارج وبيبقى راكب علية الجنب بتاع السيارة
لو البيضة دية باظت بتسمع صوت خبط وانت ماشى على ارض غير ممهدة وخبط مع الطلعة
9: المقص (الركبة - الواجهة- الشمعدان ) :
المقص دة اللى بيكون متوصل بشاسية السيارة وشايل العفشة كلها
ودة بيبقى عامل زى المثلث وفية كاوتش فى اخر الطرف والبلية اللى اتكلمنا عليها
10 :بلية الطنبورة :
طبعا عارفين ان بلية الطنابير مهمة جدا لانها بتقوم بتنعيم حركة السيارة
والبلية دية موجودة داخل السرة اللى بيبقى فيها مسامير العجل
وعشان تتجرب بيتم وضع السيارة على جهاز الموتسيكل ويقوم هذا الجهاز بتدوير العجلة سريعا ثم البدأ فى سماع اذا كانت البلية اصبحت خشنة او تصدر صوتا عالى مع سرعة الدوران
ويتم تغير البلية عن طريق وضعها على مكبس وإلا هتتكسر
11: ا كاوتشات التراب :
يوجد فى كل جنب 4 كاوتشات للتراب
اتنين للكبالن وواحدة لعلبة الاسكاترا وواحدة لبيضة المقص
الكاوتش دة مهم جدا عشان لو مقطوع او اى حاجة بيدخل تراب للكوبلن او لحشو العلبة ويؤدى إلى تسرب الشحم من داخل القلة فيؤدى الى تلفهم بسرعة
اتمنى اكون افدتكم و اسف على الأطاله ........................ تحياتى
