28/08/2026
-
إمتى الانسحاب من بيزنس ما يكون حكمة ؟!
-
الانسحاب من بيزنس ما يكون حكمة إذا كان السبب في الخسارة هو سبب #لن يمكنني مواجهته
-
كمثال
في بداية مشروع التغليف بتاعي - العيلة عندي كانت بتصرخ ازّاي كيلو الستريتش مثلا بيتكلّف نقل 10 جنيه - دا كده عمره ما هيكسب
-
ف قعدت اسايسهم شويّة - لعلّهم يزهقوا ويبطّلوا كلام في الموضوع ده - لكن - ما زهقوش
-
ف قلت لهم - أنا لو سمعت كلامكم هاقفل المشروع - ف سكتوا
-
السؤال هنا
مش كان من الحكمة تنسحب من المشروع طالما عرفت إنّه بيخسر ؟!
-
ولا حكمة ولا حاجة !!
-
السؤال هو
هوّا ليه الكيلو بيتكلّف 10 جنيه نقل ؟!
-
والإجابة هي - عشان كنت بروح العاشر أجيب 200 كيلو ستريتش بتكلفة 2000 جنيه للنقلة
-
بينما - العربيّة تقدر تشيل 2000 كيلو ستريتش ب 2000 جنيه للنقلة بردو
-
يعني
الحقيقة إنّ تكلفة الكيلو في النقل هي جنيه واحد - مش 10
-
هوّا دلوقتي بيتكلّف 10 جنيه عشان أنا لسّه في البداية - بينما - الحقيقة إنّ تكلفته الفعليّة هيّا 1 جنيه
-
ف حسبت على هذا الأساس وسعّرت على هذا الأساس ولقيت الموضوع يبقى كسبان الحمد لله - ف كمّلت
-
طيّب - وفرق ال 9 جنيه ده يروح فين ؟!
-
دا بقى الصبر اللي انا محتاج اصبره في الأوّل على المشروع - لحدّ ما شهر بشهر ال 200 كيلو يبقوا 300 - 500 - 1000 - 2000
-
وممكن بعد كده أجيب 5 طنّ في عربيّة جامبو بتكلفة 3000 جنيه
ف يبقى الكيلو نزل من 1 جنيه - ل 60 قرش !!
-
في الحالة دي - ف ما فيش حكمة في الانسحاب
-
لكن
-
تخيّل مثلا إنّ اللي حصل كان إنّ مصنع معيّن قدر يستورد الخام من شركة كبيرة بشكل مباشر - ف بقى قادر يستورد الخام أرخص 10 جنيه في الكيلو
-
السؤال هنا - هل أنا أقدر أعمل زيّ ما المصنع دا بيعمل
-
يعني مثلا - أنا بصنّع في الشهر 50 طنّ - والمصنع دا فجأة قدر يرفع إنتاجه ل 500 طنّ - بيستوردهم مرّة واحدة من سابك مثلا - ف بقى قادر يجيب الطنّ أرخص منّي 10 آلاف جنيه مرّة واحدة - يعني فرق سعر 10 جنيه في الكيلو
-
السؤال هنا
هل انتا بعد سنة أو سنتين هتقدر ترفع إنتاجك من 50 طنّ ل 500 طنّ - عشان يعني نقول لك أصبر سنة زيّ ما انا صبرت على النقل
-
هتقول لي - ولا بعد 5 سنين حتّى هاقدر أرفع من 50 ل 500
-
ف !! في الحالة دي - هقول لك إنّه فعلا الانسحاب هوّا الحكمة
-
ال 10 جنيه بتاعة النقل - مش زيّ ال 10 جنيه بتاعة الخام
دي تقول لك كمّل - ودي تقول لك انسحب
-
ف الانسحاب ليس عارا - وليس حكمة دائما
-
هوّا معادلة - واحد زائد واحد يساوي اتنين
-
سؤاله هو - هل انا أقدر اتعامل مع المتغيّر الجديد اللي حصل - لو الإجابة أيوه - يبقى نكمّل
-
لو الإجابة لأ - ودي حاجة أكبر من قدراتنا - يبقى رحم الله امرءا عرف قدر نفسه - ومن الشجاعة أن تجبن ساعة - ويكون الانسحاب في الحالة دي هو الشرف
-
وبالتوفيق للجميع لكلّ خير
-
