Therapista

Therapista Therapista for Training and Consulting

23/09/2022

تفتكري لو حد حط فوق الجرح اكسيسوريز ، الجرح هيخف ؟
مكنا في طنطا تقدري تحجزي كوتشينج سيشن عن طريق التواصل على رقم 01110929016

11/07/2022

ليه مش بنعرف ننبسط في العيد ؟
هسألك سؤال تاني ، انت بتعرفي تنبسطي او تستمتعي في الأيام العادية ؟
غالبا إلي مبيعرفش يمتع نفسه في الأيام العادية ، بتعدي عليه أجمل المناسبات و مبيعرفش يتذوق متعتها.
و مش معنى اننا مش عارفين ننبسط ان مفيش حاجه تبسط ، الي بيبسطنا و يمتعنا موجود حوالينا على فكره بس احنا الي فقدنا حاسة تذوق المتع.

من أهم الأسباب الي بتفقدنا الإستمتاع في الحياة :
* الزحمة ، ان حياتنا تبقى عبارة عن زحمه مهام و اننا بنفضل نجري طول اليوم علشان نلحق نخلص المهام الي مكدسنها على نفسنا طول اليوم .
لو بتحطى مهام أكبر من مساحة يومك هتحسي بدوشه .

* السرعة ، لو ريتمك سريع في العموم و بتعملي كل حاجه بسرعة ، زيادة السرعة بتخليكي تعدي على الحاجات المبهجة و مبتشوفيهاش أصلا ، بياكلوا بسرعة فا مبيحسوش بمتعة الأكل ولا المشيه وسط مكان جميل و لا ..... لأن كل حاجه بالنسبالهم بسرعه ، تيك أواي .

* كثرة التعرض للمتع ، اه والله تخيلوا ، فيه ناس بتقعد تنط من متعة لمتعة لمتعة و تلاقيه في وقت قصير جرب كل حاجه و مبقتش فيه حاجه بتبسطه ، نفسه موعت من كتر التحلية .

* المقارنة ، لو حد بيقارن بين حاله و حال غيره ، فلان عنده و انا معنديش فلان سافر و اتفسح و انا قاعد هنا ، فلان مستواه المادي يعيشه في رفاهية و انا لأ .. إلي بيعيش بفكر المقارنه دماغه بتروح للمفقود و صعب يستمتع بالموجود .

* ان تكون دماغك مش معاك ، أيوة.. لما دماغك بتكون فاصلة عن اللحظة الحالية و مشدوده تجاه الماضى و إلي حصل فيه او المستقبل و إلي هيحصل فيه ، و لما بندور في عالم الأفكار بكثافه بنفقد تواصلنا مع اللحظة الحاليه حتى لو ممتعه مبنبقاش معاها أصلا .
الي عايز ينبسط ب ٥جنية بينبسط و إلي متعودش يستمتع لو معاه مليون جنية مش هيبسطوه ، الي عايز ينبسط بين أربع جدران بينبسط ، ،الي متعودش يستمتع حتى لو راح الساحل هيبقى مقريف.
و تكثر الأسباب حول فقدان حاسة تذوق المتع ، هكملها ان شاء الله في فيديو مع كيفية العودة للإستمتاع

مكاني في طنطا لو لقيتي نفسك محتاجه كوتشينج سيشن تقدري تتواصلي على رقم 01110929016 و إحجزي أقرب معاد يناسبك


15/05/2022

كلللل المشاكل في العلاقات سببها حاجه واحده بس
أيون سببها حاجه واحده بس ، (إحتياجات نفسيه ) غير ملباه أو تم تلبيتها بزياده .

الإحتياجات النفسيه هي :
* الإعتبار ( الاعتراف بكونك شخص له قيمه و كيان , إنك تكوني موجوده و متشافه مش هوا ولا شفافه )
* القبول ( إنك تشعري إنك مرغوب فيكي و غير مرفوضه )
* التقدير ( إنك تتلقي المدح لما تبذلي و تدي أي عطاء مادي أو معنوي )
* الطمأنينه (إنك تشعري بالأمان بإستقرار نفسي و هدوء داخلي )
* الحب ( انك تشعري إنك محبوبه و ليكي مكان في قلوب كتير من الي حواليكي )

تخيلي معايا 🤔 لو دخلتي علاقه و جوا العلاقه شعرتي بعدم أمان أو قلة إعتبار أو مهما بذلتي مبيتقدرش الي عملتيه أو شعرتي بالرفض أو رغم محاولاتك للحصول على الحب مش لاقياه .
ساعتها بتبدأ نتخبط داخليا و بنخبط في علاقتنا و بيغلب علينا المشاعر الغير مريحه و الإرهاق النفسي معظم الوقت .

تخيلي معايا العكس🤔 لو إنت بتعرفي تلبي إحتياجاتك النفسية دي كللللها ايه الي هيحصل ؟
- هتعلي سعرك داخل العلاقات ( هتبقى غاليه ) .
- هتشعري بالأمان النفسي و هدووووء و ثقه و توازن .
- منحنى المشاكل في علاقاتك هيبدأ ياخد كيرف و ينزل .
- هيبقى عندك وقايه من العلاقات الإدمانيه(وقايه من إدمان وجود أشخاص معينه في حياتك )
- هتبقي بتختاري علاقاتك صح ، مش أي علاقه و السلام ، و هتدخلي العلاقات بشكل صحي ( لا تتأذى ولا تؤذي )
- هتلاحظي بنفسك فارق في مستوى صحتك النفسيه ، هيرتفع تدريجيا.

طب لو قولتلك هنبدأ كورس( عمليييي ) مليان طرق عمليه و شرح بيعلمك إزاي تلبي إحتياجاتك النفسيه دي كلها في ظل علاقاتك الشخصيه .

أول سيشن( بس) هي إلي هتكون متاحه للمشتركين في الكورس و لغير المشتركين تقدري تحضريها أون لاين (الأربعاء القادم الموافق 18 مايو ) لما تنضمي لجروب الواتس عن طريق اللينك ده
https://chat.whatsapp.com/EjWaZoaW2fRI0tFe0OqmN7

مكاني في طنطا therapista
01110929016


10/05/2022

(لا تحب على قلب فارغ )
الجملة دي كانت في كتاب وائل برهان قعدت أتأمل فيها افتكرت القهوة ، اه والله زي مبقولكوا ، و القهوة فكرتني بالحب ، هقولك ازاي ؟
الي بيحب القهوة ، حبها براحتك ، بس بلاش تشربها على معده فاضيه ، كده هتوجعك ، المهم تبطن معدتك قبل ما تنزل عليها القهوة .

نفس الشئ في الحب ، حبي جوزك، عيالك ، شغلك ، صحابك...... ، بس متخليش الحب بتاعهم ينزل على قلب فارغ، لأن ساعتها هيتحول لتعلق..
والي قلبه بيتعلق بيذوق ألوان العذاب بنفس الحاجه الي متعلق بيها مهما كانت الحاجه دي حلال .

من معاني التعلق، انك علقتي سعادتك و أمانك و راحتك على شئ ، الشئ ده بقى كل دنيتك ، روحك بتروح لو بعد عنك.

ياما جالي ناس روحهم كانت بتروح حرفيا بسبب التعلق ، و عدينا سوا برحلة التعافي ، و قلبي كان موجوع عليهم .

بطن قلبك بحب الله الأول ، فأي حب هييجي بعده هيكون بهجه لحياتك مش مصدر ألم .
هنا افتكرت آيه( قل ان كان اباؤكم و ابناؤكم و اخوانكم و أزواجكم و عشيرتكم و أموال إقترفتموها و تجارة تخشون كسادها و مساكن ترضونها أحب اليكم من الله و رسوله و جهاد في سبيله فتربصوا حتى يأتي الله بأمره )

مكانا في طنطا ، أي وقت تحتاجي سيشن فيه تواصلي على رقم 01110929016 و إحجزي أقرب معاد يناسبك .


05/04/2022

انا عايزة من ده ...
لما بسمع من حد جملة :
حاسه ان فيا حاجات ناقصه كتير و كل ما بقعد وسط الشلة بحس اني مش متقبله نفسي .

و هنا بسأل .. عن موضوع المقارنه
انت بتقارني نفسك بحد ؟
فغالبا بسمع .. بقارن نفسي بأي حد بقابله و بلاقيه عنده الي مش عندي .

هنا بتكلم معاهم ان دي حاجه اسمها مقارنه غير عادله، بمعنى انك مثلا لو في اليوم بتقابلي عشر اشخاص و بتقارني نفسك بيهم ، فا انت بتقارني بين شخص واحد الي هو نفسك بعشر اشخاص ، فا بتشوفي في نفسك عشر نواقص .

ثانيا : طبيعي هتلاقي عندهم الي مش عندك ، بس تقدري تقوليلي ايه عندك انت و مش عندهم ؟

ودي بقى ممكن نفردلها امثله للصبح..
* لو صاحبتك ممتازه في خدمه العملاء، فا انت شاطره في التجاره.
*و لو فلانه أروبه في الانجلش فا انت عبقريه في math
*ولو هي جوزها حمش و شخصيته قويه ، فا انت جوزك حنين و كريم و مديكي مساحه حريه مش عندها.

نحن لا نقدر قيمه الموجود لأن قلوبنا تبحث عن المفقود.

المقارنه بتصيبك بحاجتين:
إما بالشعور بالدونية إلي هي( أنا حاسس إني قليل جمبهم ،حاسس بالنقص)
أو الشعور بالفوقيه إلي هي بلغه إبليس( أنا خير منه ) أنا الجامد التنين الي مفيش مني.

و هنا افتكرت آيه ( ولا تمدن عينيك إلى ما متعنا به ازواجا منهم ) تعش في غنى عن الشعور بالدونيه أو الفوقيه.

مكانا في (طنطا) إذا إحتاجتي أي وقت سيشن تقدري تتواصلي على رقم 01110929016 و إحجزي أقرب وقت يناسبك


21/03/2022

إيه هو العفو الرخيص ؟
هو إلي لما بيكون المؤذي مستمر في إيذائه ليكي و انت ساكته و قابله الي بيعمله فيكي تحت إسم ( أنا مسامحاه ) و بيبقى جواكي يا بتحسي بالغلب ( انك مغلوبه على الوضع ده ) او بتحسي بغيظ (ساكته اه بس من جواكي بتغلي ) او أي مشاعر غير مريحه ، فا مش هو ده خاااالص العفو ولا المسامحه .
لأن العفو الحقيقي بيكون فيه الجاني وقف أذى أو إنت الي وقفتي أذاه ليكي و من جواكي تشعري بهدوء و سلام و مفيش جواكي مشاعر الكره او الغيظ تجاه الشخص ده .

الناس الي بتعفو العفو الرخيص بيبقوا ساكتين لأسباب كتير منها :
* إنها بتبقى مش عايزه تعترض عن الي بيحصل خوفا من الطرف الاخر، بتخاف يطولها منه المزيد من الأذى لو وقفت و اتكلمت و قالت لا للي بيحصل .
* او انها بتبقى متعلقه بالشخص ده فا مش عايزاه يبعد عنها فا بتسكت خوفا من الهجر .
* او بيبقى صعبان عليها المؤذي ، أيوه زي ما بقولك كده ، تقولك أصل عنده ظروف مخلياه يعمل كده او تربيته طلعته كده ....
* و فيه الي بتعيش كمضحيه، تقولك أستحمل البهدله مش مشكله علشان العيال او علشان لقمة العيش عند فلان او ....

عرفتم ليه اسمه العفو الرخيص لأنه بنبقى بايعين نفسنا فيه بالرخيص ..
طيب نعمل ايه لو اس حد فينا في منطقة العفو الرخيص ده ؟
إبدأي حطي حدود ، لكي لا يطولك المزيد من الأذى ، حاولي بشتى الطرق توقفي قدر الإمكان الأذى الي بيوصلك منه ، عن طريق بقى التعبير عن احتياجاتك ، او الإعتراض بحزم ، او الهجر المؤقت لحد ما يتوقف عن الأذى ، طرق كتييير و لكل منا طريقته الخاصه المجديه في وضع الحدود .
إكتبوا في كومنت عرفتي إزاي تحطي حدود لناس حواليكي ؟ و منكم نستفيد .
فيديوهات الفتره دي هننزلها عن ( ما يزعموه عن التسامح ) .

دا رقمنا 01110929016 اذا اي وقت قررتي تاخدي استشاره نفسيه او زواجية او تربويه .
احنا في طنطا ، و بنقدم بردو إستشارات أون لاين .

19/02/2022

إمتى بنمشي و نسيب العلاقه ؟
الفترة الي فاتت كانت الموضه الي طالعه بوستات و فيديوهات بتحث على إنهاء العلاقات ، زي فلان ضايقك يبقى علاقه توكسيك.. سييييييب ، فلان عمل كذا يبقى نرجسي .. سيييييب ، بينا و بين حد خلافات يبقى علاقه مرهقه .. سييييب ، فلان عطس ، فلان هرش سييييب .
الموضوع مش بالسطحيه دي إطلاقا

طيب إمتى نمشي ؟
لما يكون في أشخاص( مهمة) في حياتنا و بينا روابط و عشره لكن بينا خلافات بنمشي بعد حاجه إسمها ( إستنفاذ الوسع ) بمعنى ، انك تكوني عملتي( كل ) الي في وسعك لإبقاء هذه العلاقه ،و حطي تحت ( كل ) دي خط .

ممكن تقولي طب ليه أصلا أبذل الجهد ده ؟ ما نشيل ده من ده مع أول كام خلاف و نرتاح .
أقولك ليه :
لأن إحنا بنعمل ده لأهميه العلاقه دي ، بنعمل ده مع المهمين في حياتنا فممكن أثناء سعيك العلاقه يتبدل حالها و تبقى من العلاقات الصحية و الطرف الأخر يتغير للأفضل معاكي .

أما لو بعد ما (إستنفذتي الوسع ) لإبقاء العلاقه ساعتها لما بتيجي تمشي و تبعدي مبتبقيش ندمانه ولا بتقولي يا ريتني كنت صبرت شويه.

و نصيحه مني للطرف الآخر لما تلاقي الي قدامك بيبذل من جهده و صبره و مشاعره لإبقاء هذه العلاقه وإنت لا تبالي متتكلش على صبره لأنه لما بيستنفذ الوسع معاك و بيقرر يمشي، بيمشى بلا رجعه و مبيبصش وراه ، و صعب ترجعه.

أصلحوا ذات بينكم 💑




إذا إحتاجتي أي وقت سيشن تقدري تتواصلي على رقم 01110929016 و إحجزي أقرب معاد يناسبك .

و إفتكري إن اللايك للبيدج أهم من اللايك للبوست علشان فيه مواضيع كتير تهمك هنتكلم فيها سوا .

10/01/2022

س : هو ينفع نفك التعلق من غير ما نحس بوجع البعد ؟
ج : علشان ابقى واضحه معاكم ، مفيش فك تعلق من غير شعور بالألم ، لكن فيه جملتين عايزه اطبطب عليكي بيهم ..

* إفتكري ان التعلق نفسه مؤلم و عذاب مستمر ، لكن فك التعلق فيه ألم مؤقت بعدها فيه شعور بالراحه النفسيه و التحرر ، فا ألم بألم بقى نستحمل شويه وجع التعافي المؤقت أفضل من وجع التعلق المستمر .
* أثناء رحلة التعافي الألم بيقل تدريجيا بعد ال peak ، بمعنى ان الشعور بالألم و احنا بنتعافى بيبدأ يزيد شويه بشويه لحد ما يوصل للذروه و هوب بياخد الزوحليقه و ينزل و معدله يقل تدريجيا و نرتاح بقى .

س: هل كل فك تعلق معناه اننا نقطع علاقتنا بالشخص تماما ؟
ج: فيه نوعين من الأشخاص الي ممكن يحصل التعلق بيهم ،

ناس احنا مينفعش نقطع علاقتنا معاهم رغم اننا متعلقين بيهم ، زي مثلا لو متعلقه بجوزك او بإبنك او صاحبتك ، فهل يعقل اننا نبعد عنهم ؟ لا خالص ، احنا كل الي محتاجينه هنا اننا ننتقل في العلاقه دي من التعلق العاطفي المرضي الي الحب الصحي، يعني الشخص هيفضل موجود في حياتنا لكن بنحبه حب صحي لا أكثر ولا أقل .

و فيه بقى نوع تاني من الاشخاص الي ممكن يحصل تعلق بيهم ، زي شخص هجرك و مش عايز يكمل ، او شخص معاكي و بيؤذيكي بكل الطرق ، او شخص بيستغل علاقتكم لإشباع احتياجاته الجنسيه، هنا بقى انت محتاجه تبعدي عنه تماما ، مهما كانت الجاذبيه الي بتشدك ناحيته، و عارفه ان دا مؤلم ، لكن هنعرف ازاي نتعامل مع الألم ده .

س : نفسي يبجي اليوم و أنسى الشخص الي كنت متعلقه بيه ، هو ينفع انساه؟
ج : التعافي مش معناه النسيان ، تجربتك دي جزء من حياتك ، جانب من ذكرياتك ، لكن التعافي معناه انك فاكره الشخص و التجربه لكن مشاعرك تجاهه محايده، وانك جالك وقت بقيتي متصالحه مع التجربه نفسها حتى لو مش مسامحه الشخص نفسه .
By : Sahar Elsawy_ سهر الصاوى

لحجز الاستشارات النفسيه و الزواجيه و التربويه التواصل على رقم 01110929016



01/01/2022

هي جايه ترن الجرس و تقولك حاجه و تمشي .
هي مين دي ؟
دي المشاعر الغير مريحه زي ( الحزن ، الغضب ، الخوف ، الشعور بالذنب ،.... ) كل شعور من دول عامل زي الضيف ، انت الي بإيدك تخليه ضيف خفيف و بإيدك تخليه ضيف رخم و تقيل و مزعج .

المشاعر الغير مريحه ليها وظيفه معينه ، هي جايبالك رساله و بتبقى عايزاكي تفتحي الرساله دي و تقرأيها و تفهميها و تاخديaction علشان تعيدي التوازن جواكي .
و لما انت بتعملي ده ، هي خلاص بتروح لحال سبيلها و تمشى بعد ما خلصت مهمتها ، و شكرا .

فيه ناس بقى بتعمل ايه ..
* بتعمل كل الملهيات و المشتتات الي تداري بيها و تردم على مشاعرها ، هنا صوت المشاعر دي بيعلى و حدتها هتزيد و مده و جودها هتطول ، و بتبقي انت مش عارفه ايه الي بيحصل الله ، ما أنا بخرج و أسافر و اغير جو و بلهي نفسي و لسه المشاعر دي مبتفارقنيش.

* و فيه ناس بتكتم و بتكبت مشاعرها ، لا بتتكلم و لا بتفضفض ولا بتعبر عن الي جواها ، و دي اكتر ناس بتتعب جسديا لأن لما بنكتم مشاعرنا جسمنا بيشتكي أوي .

* و فيه ناس بتنكر مشاعرها يقولك ( انا زي الفل ، ولا اي حاجه تهزني ، ولا فارقلي ) و هو مشاعره بتاكله من جوه .

* و فيه ناس بتعمل كومبو المشاعر ، يعني مثلا اذا شعر بالغضب ، بدل ما يفهم الرساله الي الغضب جايبهاله، بيروح ياكل بشراهه و بعد ما يخلص اكل يشعر بالذنب ، ولو السكر علي عنده تلاقيه شعر بخوف على نفسه ( هنا كومبو المشاعر غضب ، شعور بالذنب ، خوف ) طب ليه بنعمل في نفسنا كده؟
من الاخر كده ، المشاعر الغير مريحه مش هتمشي الا لما ، تقبليها _ تفهميها _ تتصرفي بالفعل المناسب ليها .


دلوقتي تقدري تحجزي استشاره نفسيه او تربويه او زواجيه عن طريق الاتصال على رقم 01110929016



26/12/2021

هنكسر أطباق 💥
تفتكري ينفع تبدأي السنه الجديدة وانت جواكي مشاعر مش مريحه متراكمه بقالها كتير ؟
* ضحتي كام مره و الضحكه كانت طالعه بالعافيه لأنك كاتمة مشاعر تانيه جواكي .
* سافرتي و خرجتي كام مرة علشان تلغوشي على شعور مؤلم جواكي و لما رجعتي من الخروجه او حتى وانت في الخروجه المشاعر دي فضلت جواكي .
* كام مرة مره جسمك تعب و اشتكى بسبب كبت المشاعر .

آن الأوان للسيشن دي ، الي هتفرغي فيها مشاعرك بالكتابه على الأطباق و بعدها كل حد فينا هيكسر طبقه .

و دا هيكون في اخر السيشن، أما في بدايه السيشن هنعدي بمحطات:

اولا : هنفهم ايه هي المشاعر الغير مريحه دي ، و إمتى بتتحول لمشاعر سلبيه ؟

ثانيا : هنفك شفرة كل شعور و نعرف ايه الرساله الي جاي يقولهالنا، أصل كل شعور جاي يقولك خدي اكشن ( فعل ) معين ، هنفهم ايه الرساله و ايه الفعل الي تاخديه لما المشاعر دي تبقى موجوده ( الغضب ، الوحده ، الخوف ، الحزن ، الشعور بالذنب ،الاحباط ، الضغط النفسي ، الملل )

ثالثا : هسمع منكم خلال السيشن الي عايز تتكلم عن مشاعرها .
رابعا : تفريغ المشاعر عن طريق الكتابه على الأطباق و طبعا هنكسرها .

الحضور بأولويه الحجز
ميعاد السيشن 1/1 الساعه 1 ظهرا حتى 4 عصرا ، و هيكون فيه سناكس فري علشان الي يجوع 😋
اخر موعد للحجز الخميس 30/12 يعني فاضل 📆 ايام بس
By :sahar elsawy _سهر الصاوي
01110929016

05/11/2021

بعد ما شلت عنه كل حاجه. مش بتعبه في اي حاجه انا اللي بوصل المدرسه و التمارين و بذاكر للأولاد و بعمل شوبينج البيت. بعد كللللل ده اكتشف انه بيكلم واحده غيري 💔💔

* مهي دي بدايه المشكله.
الراجل راحته مش انك تشيلي عنه مسئولياته بالعكس. هيحس ساعتها انه فاضي "single"
و عنده مساحه كبيره محتاجه تتملي. و انتي مشغوله عنه بالمسئوليات. و الصيادات كتييييير للاسف
الراجل محتاج يشيل مسئوليتك و مسئوليه الولاد معاكي و يحس ان ليه دور اساسي في حياتك و حياتهم.

محتاج يحس انه مهم و محتاجاله مش مستغنيه عنه.
دخليه في تفاصيلك و تفاصيل الولاد. الحلوه قبل الوحشه. مش بس في المشاكل يعني 😉
بكده هيحس انه مهم و موجود و دا احتياج ضروري للراجل.

📩 رسايل الواتس اب بينكم مش معموله للطلبات بس. و يا ريت بلاش البوستات الجاهزه. مستفزه اوي و ملهاش معنى .

و متنسييييييش انتي زوجه قبل ما تبقى ام ؛ يعني لما يشيل معاكي وفري شويه وقت علشان تهتمي تاني بنفسك و تعملي ليكم quality time متسيبوش روتين الحياه يأثر على علاقتكم ببعض؛ رتبي ادوارك صح 👌

تقدري تتواصلي على رقم 01110929016 علشان تحجزي اقرب وقت يناسبك ، اذا حبيتي تحجزي استشاره زوجيه او تربويه او نفسيه .



24/10/2021

لازم ينضرب علشان يتعدل !!
استني بس انت فاهمه غلط ، الضرب له أضرار هقولك بعضهم :
* الضرب بيخلي الطفل جواه مشاعر كره تجاه الشخص الي بيضربه ( سواء كنت ام او اب او مدرس او الكابتن الي بيمرنه و بتضربه هيكرهك من كل قلبه )

* الضرب بيخلي الطفل عنيف و عدواني تجاه الأشخاص و الأشياء ( يعني هتلاقيه بيستقوى على الأطفال الي حواليه او على اخواته و يضربهم و يشتمهم و عنده ميول انه يخرب حاجات في البيت او ألعاب او الي ييجي في سكته )

* اول ما عود الطفل يشد شويه هيتجرأ على الشخص الي بيضربه ، ممكن يرزقه او توصل لأكبر من كده و يمد ايده بالضرب على امه او ابوه و طبعا في المراهقه هنا بتحصل بلاوي و محدش بيقدر عليه .

* مع الوقت الضرب بيعمل عند الطفل لا مبالاه، جسمه هياخد على الضرب و بردو مش هيعمل الحاجه الي انت عايزاها و هتسمعي الجملة الشهيره بتاعه ( على فكره موجعتنيش )

* أخطر ضرر للضرب 🚫🚫 انه بيخلي الطفل ميدافعش عن نفسه اذا اتعرض للتحرش، أقولك ليه .. الطفل الي بينضرب بيوصله رساله ان جسمه مستباح، و ان اي حد مسموحله يعمل فيه الي هو عايزه ، ساعتها بيشوف ان اي ايد تتمد عليه عادي، ما هم بيمدوا ايدهم عليه في البيت بالضرب فأي حد يمد ايده على جسمه بالتحرش عادي ( من الاخر متعود ان جسمه منتهك ) و انه ملوش حرمه ولا خصوصيه.
يا تري ايه قرارك لما قريتي البوست ؟؟

- سهر الصاوي

وقت ما تحتاجي استشاره تربويه او زواجيه او نفسيه اتصلي على رقم 01110929016 و احجزي أقرب معاد يناسبك.

Address

El Fateh Street
Tanta

Website

Alerts

Be the first to know and let us send you an email when Therapista posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Therapista:

Shortcuts

Share

Category