13/11/2025
فى كل الرسايل
1- إيه أسهل سفاره أخد منها شنجن ؟
مفيش حاجة أسمها سفاره سهله لو ورقك مش سليم
مفيش حاجة أسمها سفاره سهله لو ورقك مش مظبوط
لكن أسهل سفاره كمتطلبات أوراق هى هولندا عشان مش بتطلب شهادة تحركات ومش بتطلب برنت تأمينات من شغلك ومش بتطلب كشف حساب لاخر 6 شهور بتطلبه لاخر 3 شهور بس
لو أنت أول مرة تقدم شنجن قدم شنجن في السفارات السياحيه زى اسبانيا و فرنسا و ايطاليا وهولندا
وأبعد عن البلاد الأسكندنافيه زى الدنمارك . السويد . النرويج . لان دى بلاد مهجر وشغل ولجوء ..
و أبعد كمان عن البلاد الصغيره جدا زي لاتفيا مثلا لأن مش منطقى حد أول مرة يروح أوروبا وهيسيب كل بلاد اوروبا الكبيره ويروح بلاد صغيره .
2- أنا أترفضت فى الشنجن بيأثر عليا لما أقدم تانى ؟
لا
- أنا أترفضت فى الشنجن لازم أستنى 6 شهور عشان أقدم تانى ؟
لا قدم من تانى يوم
- أنا أترفضت فى الشنجن بيختموا على الباسبور ؟
لو مقدم من دول الخليج أيوه بيختموا ع الباسبور
لو فى مصر لا بطلوا يختموا على الباسبور حاليا
وكدة كدة الرفض بيكون متسجل علي السيستم اصلا
- انا اترفضت فى الشنجن لازم اقدم من نفس السفاره إللى اترفضت فيها ؟ لا
- انا اترفضت فى الشنجن التظلم أى كلام وتحصيل حاصل ؟
لا ساعات بينفع
- انا باسبوري ابيض مش هتقبل ابدا فى الشنجن ؟
لا تتقبل عادى لو ورقك مظبوط
- انا خدت شنجن ومسافرتش بيها هترفض لو قدمت تاني ؟
لا ملهاش علاقه
- انا معايا شنجن ساريه ينفع ادخل بلغاريا البوسنه وبيلاروسيا او صربيا من مصر مباشره ؟؟
لا طبعا ..
لازم تدخلهم من بلد شنجن ولازم الشنجن تكون مالتى انترى مش سنجل
- ينفع اخد صلاحيات كبيره للفيزا الشنجن ومالتى انترى من اول أو تانى مره ؟
ينفع بس بشرط انك تركز مع السفارات السياحيه الكبيره في غرب اوروبا زي فرنسا وهولندا لانهم بيدوها مالتي من اول مره .. وبعد كدة بقي تنشن علي سفاره منهم وتفضل تقدم فيها كل مرة كل مره عشان ايديهم فرطه في عدد الايام وكل ما تاخد منهم فيز اكثر كل ما يدوهالك بصلاحيات ومدة اكبر فى كل مرة ..
- خطه الرحله مطلوبه منى من ضمن الاوراق ؟
لا مش مطلوبه بس لو عملتها هيبقى احسن عشان هتثبت أنك مخطط للرحله كويس وعارف هتزور اماكن ايه يعنى بتثبت للسفاره انك واحد رايح سياحه وفاهم .. لكن هى مش مطلوبه نهائى ..
- انا رايح فرنسا مثلا لكن ترانزيت ايطاليا كدة انا هختم فين في فرنسا ولا ايطاليا ؟؟
هتختم فى اول بلد هتخدلها من الشنجن اللى هى بلد الترانزيت ومش هتختم تانى ابدا فى البلد الوجهه النهائيه
3- اقدم في انهى وقت عشان فرصتى تبقى ازيد فى السفاره ؟؟ على حسب انت وضعك ايه :
* لو طالب / طالبه يبقى من المنطقي انك تقدم في الاجازات سواء في الصيف او الكريسماس .. لكن مينفعش مثلا تقول هسافر اوروبا في شهر 11 مثلا او في شهر 4 .. مش من المنطقي انك تسيب دراستك ومحاضراتك وامتحاناتك وتروح تتفسح في اوروبا يعني !
* لو شغال و طالع مع الاولاد يبقي برضو الافضل انه يكون في الاجازات لان السفاره هتقول ولادك هيسافروا معاك ازاي وعندهم دراسه وامتحانات !
* لو شغال وطالع لوحدك يبقي الافضل يكون في الاوف سيزون بعيد عن ضغط السفارات ..
* لو طالع مع المدام شهر عسل يبقي الافضل تشوف فين وقت ال sale وتطلع في الوقت ده .. علي اساس ان المدام هتعمل شوبينج وكدة ودة سبب قوي للزياره ..
4- انا قرايبى في اوروبا ينفع يبعتولى دعوة ولا هترفض بيها ؟؟
الدعوة بتقوي موقفك لو ورقك اساسا قوى .. وبتضعف موقفك لو ورقك أساساً ضعيف
الدعوة اثبات ان في شخص تاني قادر علي رعايتك والانفاق عليك اثناء سفرك لكن مش اثبات ابدا انك هترجع مصر تانى او لأ ..
؟؟
يعني السفاره يهمها تشوف كشف حساب بنكي ليك حتي لو معاك دعوة .. عشان تعرف انت عندك حياه مستقره في مصر ولا لأ .. عندك حياه واقعيه ومستقره ولا عايز تهرب
السفاره يهمها تشوف عندك وظيفه كويسه ولا لأ .. حتي لو معاك دعوة .. عشان تعرف انت عندك حياه مستقره في مصر ولا عايز تهرب وتخلع ..
لو الدعوة موجودة مع وجود كشف حساب قوي ليك + وظيفه قويه ليك ساعتها الدعوة هتقوي موقفك
لو الدعوة موجودة لكن بدون كشف حساب قوي ليك + وظيفه قويه ليك ساعتها بتكون اكبر اسباب الرفض
وكل دعوة وليها شروط .. صاحب الدعوة بيروح البلديه او مكتب الاجانب في بلده اللي عايش فيها وهو معاه كشف حسابه عن اخر 3 شهور وعقد شغله وعقد بيته .. وبعدين يختم الدعوة ويبعتهالك
5- انا اخدت فيزا شنجن من المانيا ينفع اروح سويسرا الاول وبعدين اروح المانيا ؟؟
* انا اخدت فيزا شنجن من فرنسا ومش عايز اروحها خالص في رحلتي لاوروبا ينفع ؟؟
* انا خدت فيزا شنجن من هولندا وتذكره هولندا غاليه ولقيت تذكره لليونان ارخص ينفع اروح اليونان الاول عشان مستخسر التذكره دي تروح عليا ؟؟
قانونا وعلى الورق مفيش ما يمنع أبدا طول ما فيزتك الشنجن من النوعيه C أنك تدخل من اي مكان في الشنجن براحتك إن شالله تدخل من لاتفيا حتى
ولكن و فعلياااا العمليه ليها شويه قوانين بتحكمها و حسب موظف الجوازات وحسب السفاره لما ترجع ..
ودي الإحتمالات الممكنه :
1- ممكن موظف الجوازات لو شاف معاك حجوزات فنادق للبلد اللي خدت منها الفيزا بمدة أطول من المدة بتاعه الحجوزات للبلد اللى هتروحها الأول يقولك أتفضل فى البلد بتاعتنا براحتك البيت بيتك
2- ممكن موظف الجوازات يمنعك من دخول بلده طالما مخدتش التأشيرة منها وكمان ممعاكش اي حجوزات فنادق او طيران تثبت أنك هتروح البلد اللى أخدت منها التأشيرة بعد ما تعدى من بلده الأول
3- ممكن موظف الجوازات يرضى ويقبل أنك تدخل من بلد غير من البلد إللى خدت منها التأشيرة حتى لو مش معاك أى حجوزات أصلا لأى بلد
بس اما ترجع بقي من الرحله العظيمه دي وتحب تقدم علي نفس السفاره تلاقي بدل ما تاخدها مالتي في المرة التانيه ومدة صلاحيه اطول تلاقي نفسك خدتها سنجل وبمدة اقصر من الاول
أو تلاقى نفسك بدل ما كنت مقدم فى المرة الأولى بكشف حساب بنكي مش مضبوط وعدت وربنا سترها معاك تلاقيهم رخموا معاك في تاني مرة علي كل سحتوت مكتوب في الحساب وعلي كل مستند بتقدمه
الحل بسيط جدا .. حاجه من اتنين :
1- تخلي معاك حجوزات مؤكدة للبلد اللي خدت منها التأشيرة و تذكره باص او قطار من والي البلد اللي خدت منها التأشيرة والبلد اللي هتدخل منها الاول ..
ويا سلام لو معاك ترافل بلان للبلد اللى خدت منها التأشيرة وتوريها للظابط في البلد اللى هتدخل منها الاول
وكمان زيادة ف التأكيد لو هتعمل شوبينج خلي معاك فواتير محلات أو مشتريات من البلد اللى خدت منها التأشيرة عشان تقدمها للسفاره لما ترجع المرة الجايه
2- تسافر على طيران ترانزيت غير تابع لأي دوله من دول الشنجن زى طيران الخليج او الطيران التركى مثلا
يعني تروح اليونان ترانزيت دبى مثلا ,, ترانيت تركيا ,, الخ الخ الخ وبكدة تختم من الدوله اللى خدت منها التأشيرة
في منشور جه من وزاره السياحه مؤخرا انك لازم تدخل من البلد اللي ادتك التاشيرة فده خلي بالك منه وحاول تتواصل معاهم عشان تفهم
6- اقدم علي الفيزا قبل معاد سفري بقد ايه ؟؟ والحد الاقصي للتقديم قبل معاد سفرى قد ايه ؟؟
التقديم قبل السفر ب 90 يوم حد أقصى من تاريخ سفريتك إللى هتكتبه ف الابلكيشن .. يعني لو مثلا هتسافر في شهر 6 يبقي الحد الاقصي ليك يكون في شهر 3 .. لكن مينفعش تكون هتسافر في شهر 6 مثلا وتقول أنك عايز تقدم من دلوقتى . مينفعش
اما بقي انسب معاد للتقديم فبيكون قبل سفريتك بشهر كامل ..
السفارات عموما بتاخد من 14 ل 21 يوم عمل عشان ترد عليك بالموافقه او الرفض ..
يعني شهر هيكون كافي اوي للتقديم عليها قبل معاد سفريتك
