27/06/2016
Fomento de plantacións de castiñeiro para froito
Prazo: Ata 23/07/2016
Esta orde ten por obxecto establecer as bases que regulan as axudas para o establecemento de sistemas agroforestais, para o fomento de plantacións de castiñeiro para froito en réxime de concorrencia competitiva.
Serán elixibles as actuacións localizadas en todo o territorio da Comunidade Autónoma de Galicia, a excepción das parroquias densamente poboadas dos grandes concellos de Galicia.
A intensidade de axuda para estas actuacións será do 80 %, e a axuda calcularase sobre o custo real subvencionable do investimento determinado, IVE excluído, no correspondente proxecto técnico.
As actuacións que poderán ser obxecto de subvención son as seguintes:
-Gastos de plantación forestal
Estes gastos incluirán os necesarios para o tratamento da vexetación preexistente, a preparación previa do terreo, adquisición de planta, protección da planta mediante protectores, os titores e outros materiais necesarios, así como os de plantación propiamente dita.
-Primas de mantemento
Está destinada ao coidado, mantemento, enxertía, no caso de ser necesario, e demais traballos posteriores á plantación do castiñeiro para froito que son necesarios para o logro da plantación realizada. Esta prima de mantemento, que se subvenciona con cargo ao PDR, é para tres anualidades alternas e a primeira debe coincidir co ano seguinte ao pagamento final da obra de plantación.
Beneficiarios:
As sociedades de fomento forestal, os propietarios particulares de forma individual, as sociedades ou agrupacións de propietarios particulares legalmente constituídas e inscritas no Rexistro de Asociacións da Xunta de Galicia, as cooperativas agrarias, os pro-indivisos, os de varas, abertais, de voces, de vocerío e fabeo, as comunidades de bens, as entidades locais, outras persoas xurídicas ou as comunidades de montes veciñais en man común (CMVMC).
