07/05/2026
Friol acollerá os días 9 e 10 de maio a VII edición do Friulio Castrexo-Romano coa participación de proxectos emprendedores locais
O Concello de Friol celebrará os próximos días 9 e 10 de maio a VII edición do Friulio Castrexo-Romano, unha cita xa consolidada no calendario cultural e turístico da comarca, que volverá converter a vila nun punto de encontro para a recreación histórica, a artesanía, a gastronomía e a dinamización económica local.
Nesta edición, tres proxectos vinculados ao Polo de emprendemento e apoio ao emprego de Friol contarán cun espazo propio no evento para dar a coñecer e comercializar os seus produtos entre os asistentes. A súa presenza no Friulio representa unha oportunidade para visibilizar o talento emprendedor do territorio e achegar á veciñanza e visitantes iniciativas empresariais nacidas no rural.
Esta colaboración é froito da alianza establecida entre a Asociación A Castronela, entidade que organiza o evento xunto co Concello de Friol, e o Polo de emprendemento e apoio ao emprego de Friol, un servizo de apoio ao emprendemento situado na primeira planta do Centro Sociocultural de Friol, na Rúa Deputación.
A través desta iniciativa búscase reforzar a conexión entre o tecido asociativo, as institucións locais e os proxectos emprendedores, promovendo espazos de encontro que favorezan o desenvolvemento económico e social do municipio.
