16/06/2026
🎭⚓ O BNG propón consolidar o martes de Entroido e o 24 de xullo, Día da Dorna, como festivos locais en Ribeira
Levamos ao pleno unha proposta para establecer de maneira permanente estas dúas datas como festivos locais, porque representan dúas das celebracións máis arraigadas da nosa vila e tamén supoñen un importante impulso para a economía local.
A Dorna por ser parte da nosa identidade, cultura popular e unha celebración que proxecta o nome de Ribeira dentro e fóra de Galiza, atraendo milleiros de persoas e xerando actividade económica para a hostalaría, o comercio e os servizos. Manter o 24 de xullo como festivo permite que a veciñanza poida vivir plenamente o día grande dunha festa que sente como propia.
O martes de Entroido, consolidado durante décadas no calendario local é tamén unha data moi participativa, que mobiliza asociacións, familias e centos de persoas arredor das murgas, disfraces e actividades populares. Ademais, supón un apoio importante para a hostalaría nun momento do ano especialmente complexo.
Na proposta que facemos tamén propoñemos que os actos festivos da patroa se concentren na segunda fin de semana de setembro para consolidar Santa Uxía a nivel comarcal. Esta iniciativa está pensada no interese xeral da veciñanza, nas tradicións e tamén no beneficio económico para Ribeira.
🗣️ Luís Pérez Barral: “Non estamos escollendo simplemente dous días festivos, estamos decidindo que modelo de vila queremos apoiar. Nós apostamos por un calendario que permita que a xente desfrute das festas, xere actividade económica e fortaleza a identidade como pobo”.
Máis info: https://wp.me/p4MwrF-3n5
