16/07/2026
Qabsoo fi Basumaasummaa!
Tibbana ajandaan basaasummaa maaliif ijoo miidiyaa hawwaasaa ta'uu danda'e.
Gidduu kana Jaawar Mohaammad namoota hedduu miidiyaa hawwaasaa irratti bobbaasuun waayee basaasummaa Girmaa Xurunaa fi hojii tika ABO'n saaxila jechuun girri girrii guddaa uumeera.
Dhimmi kun miidiyaa hawwaasaa gubbaan haasa'amuu eegaluun waggoota lakkoofsisus tibbana garuu ajandaa olaanaa ta'ee dhiyaate. Dhimma kana ilaalchisuun xiinxala gadi fagoo hawwaasni keenya hubachuu qaba jedhee yaadu haala gadii kanaan qindeesseera.
...
Jaarmiyaan Siyaasaa tokko basaasaan alatti hojii siyaasaa milkaa'aa hojjechuun itti ulfaata. Kaayyoof akeeka isaa galmaan gahuuf, uummata qabsaa'uuf sana kaayyoo ganamaa biraan gahuuf basaasaan dirqama isa barbaachisa. Kana waan ta'eef hawwaasni keenya ilaalcha basaastummaan badaadha jedhuun dhuunfatamuu akka hin qabne barruu kana gubbaan isinii ibsuun yaala.
Basaasaan yoo uummata isaaf dhibbantaa 70 ol hojjete, aara galfii fi eegduu olaanaa hawwaasa sanaa ta'uu danda'a. Biyyi tokko basaasa malee jiraachuu hin dandeessu. Har'a addunyaa irratti Israa'el guddoo fakkaattee kan ilaalamtuuf hojii basaasummaa namoota qubaan lakkaa'amaniin dalagamuun akka ta'e hubachuu barbaachisa.
Diina hamaa jettee kan yaaddu hogganoota Iraan, Hamaas fi kaan ajjeesuu keessatti gaheen basaastota Israa'el olaanaa ture. Kanarraa kan hubannu Oromoon basaasaa jabaa qabaachuun sirriitti isa barbaachisa. Guutummaa dhumaan hojii basaasummaa balfuu fi balaaleffachuu utuu hin taane, basaastota jajjabaa kan uummata Oromoof hojjetan oomishachuu fi isaaniif eegicha addaa taasisuu barachuuf shaakaluu qaba. Siyaasumatu hojii tikaa fi basaasummaatiin galma yaade qaqqabe. Odeeffannoo diinni kee sirratti karoorsaa jiru, kan diinnikee siif saganteesse manaaf gola diina seenee saaxiluu kan danda'u Basaasaadha. Kanaaf basaastonni dhaabbilee fi jaarmiyaa siyaasaa keessatti barbaachisu.
Biyya kanatti inumaa basaasummaan sadarkaa hoteelota keessattillee qacaramanii akka jiran niin beeka. Kana jechuun hojjettoota hoteelichaa eenyu maal irra akka oole kan tiksu, mancaatii qabeenya kan hordofu abbootiin qabeenyaa hoteelaaf bakka hojii isaaniitti bifa iccitaawaa ta'een basaasaa nii qacaru.
Kanaaf jaarmiyaan siyaasaa tokko basaastota qaba jechuun kan balaaleffatamu ta'uu hin qabu. Garuu yakki basaastotni geessisan ammoo balaaleffatamuu danda'a. Kana yoo jennu miidhaa basaasaan sun uummata irraan gahe madaaluun basaasaa balaaleffachuu akkasuma bu'aa isaatiin ammoo galateeffachuutu barbaachisa.
Mee waa'ee basaasummaa waliin haa ilaallu. Gochi basaasummaa fi tikee seenaa dhala namaa keessatti iddoo guddaa kan qabuu fi baroota baay'ee dura kan eegaledha. Hiika, seenaa, fi faayidaa isaa gadi fageenyaan beekuuf kitaabota dhimma akkanaa irratti katabaman dubbisuun barbaachisaa ta'a.
Basaasa jechuun Nama iccitii fi odeeffannoo dhoksaa biyya, dhaabbata, ykn qaama biraa tokkoo dhoksaadhaan sassaabee qaama isa ergetti dabarsuudha. Kun callisee kan ta'u miti, muuxannoo fi beekumsa addaa barnootaaf uumamaan argame walitti ida'uun kan raawwatudha.
Namni hundi basaasaa miti, basaasaa hundis nama miti. Kana jechuun bara kana si basaasuuf roobotiin illee bobbaafamuu akka danda'an hubachuu barbaachisa.
Kun ta'e Tika (Intelligence) jechuun; Hojii ykn dhaabbata odeeffannoo nageenyaa, siyaasaa, fi diinagdee biyyaalessaa sassaabu, xiinxalu, fi nageenya biyyaa eeguuf hojjetuudha.
Basaasummaa jechuun ammoo Gocha dhoksaa kan odeeffannoo siyaasaa, waraanaa, saayinsii, ykn daldalaa qaama biraa irraa eeyyama malee sassaabuuf raawwatamudha. Kana jechuun akka hubannoof tolutti qaamoleen sadan kun wal haa tumsan yookaan dhaabbata tokkoon hogganamuu haa danda'an malee hiiki isaanii garaa gara.
Basaasaan qaama odeeffannoo sassaabu san yoo ta'u, basaastummaan ammoo odeeffannoo sassaabuu jennee hiikkachuu dandeenya. Tika jechuun ammoo qaama qabsoo yookaan mootummaa tokko aangoorrattis ta'e bulchiinsa irratti eegu ta'uu danda'u. Kun birokiraasii mootummaaf dhaabbati tokko ittiin dhimma bahu irratti hundaa'a. Mootummaan dimokiraataawaas ta'e abbaan irree hunduu tika mataa isaanii nii qabu.
Tika jechuun mandhee icciitaa jaarmiyaasaa siyaasaa biyya tokkooti. Akkuma kana Tiki kan mormaas, kan mootummaas wal quba qabaachuun waan haaraa ta'ee nama siyaasa gaggeessu tokko biratti haasa'amuu hin malle.
Basaasummaan seenaa dhala namaa waliin walqabatee kan eegale yoo ta'u, erga ilmi namaa gurmaa'ee waliin jiraachuu fi waraana eegalee kaasee hojiirra oole. Haa ta'u malee, akka galmee seenaatti gochi kun iddoowwan akka Ijipt Durii (Ancient Egypt)**, **Mesopotamiyaa (Iraaq ishee ammaa)**, **Chayinaa Durii**, fi **Giriik Durii** keessatti eegaluu isaatu himama.
Akka maddeen odeeffannoo jedhanitti basaasummaan waggaa 400 dura hojiirra oole. Fakkeenyaaf, Ijipt durii keessatti Fara'onootni basaastota fayyadamanii biyyoota naannoo isaanii jiran haleelaa turuutu eerama.
Kitaabni "The Art of War" jedhu barreessaan Chayinaa Sun Tzu jaarraa 5ffaa dura barreesse keessatti, kutaan guutuun tokko waa'ee faayidaa fi bifa basaasummaa qofa irratti xiyyeeffata.
Basaasummaan biyya tokkoof ykn dhaabbata tokkoof faayidaa murteessaa qaba. Isaan keessaa nageenya Biyyaalessaa Eeguu; Sodaa Diinaa Dursee odeeffannoo baasuun Ittisuu. Weerara waraanaa ykn shororkeessummaa diinni raawwachuuf deemu dursee beekuun akka ofirraa ittisan gargaaruu keessatti shoora olaanaa qaba.
Kana malees fira diinaa addaan baasuun, biyyoonni kam amanamoo akka ta'anii fi kam akka isaan miidhuuf jiran addaan baasanii beekuuf fayyada.
Akkuma kana Hooggantoonni biyyaa odeeffannoo qabatamaa fi dhoksaa irratti hundaa'uun murteewwan dhimma alaa fi keessaa irratti murteessan akka kennan gargaara.
Basaasummaa Industirii keessatti; Biyyoonni ykn dhaabbattonni gurguddoon iccitii teknoolojii, qorannoo saayinsii, fi tooftaalee daldalaa dorgomtoota isaanii dhoksaadhaan argachuuf itti fayyadamu. Kun immoo baasii qorannoof ba'u hambisuun dorgommiitti akka caalan godha.
Kun ta'e tibbana Dirribsaa Daamxee fi Jaawar Mohaammad waa'ee basaasummaa Girmaa haalaan saaxilaa akka turan quba qabdu. Jaawar yeroo mootummaa kana tumsaa, Abiyyiin ala midhaan gadi nuu hin lixu jechaa ture hojii sirrii akka ta'etti ibsa. Kana malees odeeffannoo caasaa biltsiginnaa keessaa argachuu yeroo garaa garaa kan miidiyaan nutti himu hojii qajeelaa fi inumaa hojii sammuu akka ta'etti nuu seenessa. Qaamni biraan garuu akka isaa kana odeeffannoo jaarmiyaa biraa butuun akka yakkaa fi hojii badaa ta'etti dhiyeessuun qabatamaatti yaada isaa kana guutuun akka hin fudhanne nu taasisa.
Jaawar tarii ergama addaa dhokataa ta'e qabaachuu mala. Kana malees ABO fi biltsiginnaan hariiroo gaarii tolfannaan saaxila basaasummaa waan jedhuun jaarmiyaa kana rukutuuf xiyyeeffate ta'a. Walumaa gala qaamoleen wal abaxxaraa jiran Jaawaris ta'e Girmaa Xurunaa faayidaa mataa isaanii ykn bu'aa, dhaabaaf jaarmiyaa isaaniif jecha akka wal abootaa jiran beekuun barbaachisaadha.
Kaayyoo fi ergamni holola tibbanaa miijanamuu barbaachisa. Jaawar Mohaammad qabsoo Qeerroo Bilisummaa Oromoo keessatti gama miidiyaatiin gahee olaanaa bahateera. Akkuma kana ammoo Qeerroo Bilisummaa Oromoo caccabsuu keessattis nama hangafaati. ABO'n Qeerroo ijaaruu innu barreeffama isaa tibbanaan amaneera. Dubbii kana garuu waggootaaf Jaawar waakkataa kan ture, ofii isaa abbaa Qeerroo akka ta'etti ibsamaa ture.
Haa ta'u malee akkuma barreeffama Jaawar tibbana sagaleen isin dhageessifne Jaawar Qeerroo Bilisummaa Oromoo san dhiisee cabsatee Qeerroo biraa ijaaruuf yaalii bal'aa taasisaa akka ture innuu himeera.
Odeeffannoo OMN yeroo san gabaasaa ture kan caasaan Qeerroo Oromiyaatti bobbaafaman waraabanii Vidiyoof suuraan deggaranii ergaafii turanidha. Jaawar gama odeeffannoo qabsoo Oromoo akka tumsuuf odeeffannoo argame gara Jaawaritti ergaa OMN haa gabaasuu nuun jedhamaa ture. Yeroo sanatti ABO'n OMN miidiyaa Oromooti jechuun amanamummaa olaanaa qabaataafii ture. Jaawarinis ABO balaaleffatu argee hin beeku. Hogganni nu Qeerroo bobbaasaa ture guyyaa tokkoof illee ABO balaaleffatee hin beeku.
Jaawar garuu hadiiduma sochiin jabaataa deemee dhageettiin isaa tabba bahaa deemeen ABO jaarmiyaa Qeerroo laateef san diinonfachuu eegale.
Gabaasa Qeerroo Bilisummaa Oromoo guutummaatti OMN irraa uggure. Lolli Jaawar ABO duuka utuu hin taane nu gaggeessitoota Qeerroo Bilisummaa Oromoo waliin ta'e. Haaloo kanaa Qeerroon hundi wal dubbisuun odeeffannoo irraa kutuun danda'ame.
Lola sanaan booda ONN hundaa'uuf danda'e. ONN bakka OMN bu'ee akka sochii Qeerroo gabaasuuf yaadame. Kun gama kaaniin akka sabaatti kasaaraa guddaaf nu saaxile. OMN irrattis, ONN irrattis maallaqni gama lamaan akka bahu taasifame. Qisaasama maallaqaa hamaafis uummata keenya saaxile.
Haaloo kanaa qabatee turee Jaawar tibbana dhimma Qeerroo kana ofii akka waan badii hin qabnetti barreeffachuuf dhiyeessuu yaale.
Akeekaaf Kaayyoo Jaawar asitti shakkuu nurra jira. Jaawar gama tokkoon sochiin waraana bilisummaa Oromoo mootummaa muddaa waan jiruuf, caasaa WBO keessa qabsaa'aa fakkaatee hulluuqee seenuu barbaada.
Yoo akka itti jiru kanaan gaggeessitootaaf namootni siyaasaa ABO WBO gaggeessan Jaawaritti kan siqatan ta'e kisaaraa guddaaf saaxilamuu malu. Jaawar harki isaa takkaa caasaa siyaasaa seene taanaan hanga balleessee dhabamsiisuutti biraa hin deebi'u.
Akkuma namuu beeku kanneen Oromoo Ithoophiyaa irraa eegan keessaa Jaawar nama amanamaa waan ta'eef, sochii Oromiyaa ijaaruu jala ifaaf mul'ataan dhaabbata. Kanaaf ammas qabsichi gaafa fiixee irra gahuuf jedhu dursee dura goree kabbabee dhaabuuf gaggeessitoota qabsichaa qabachuuf, dursee akka hogganaatti mul'atee harka isaa dura qabuuf ifaaja.
Kanaafis barreeffamoota shira kanaan dura bahuu qaban tibbana amanamaa fakkaachuuf saaxilaa waan jiru fakkaata. Jaawar ABO fi WBO gidduutti abidda hamaa qabsiisuun, dhibdee gidduu isaanii jiru bareechee afuufee bobeessuutti jira. Abidda kanaan humni Oromiyaa ijaaruuf deemu lamaan kunneen haalaan akka wal irraa fagaatan barbaada.
Kana malees uummatni waa'ee ABO abdii akka kutatu, siyaasa keessaa namni shororkaayee harka isaa akka sassaabbatuuf hojjetaa jira. Adeemsi shira saaxiluu bareedaa ta'ee, adeemsi Jaawar hordofe qabatamaan miijanamuu fi uummatni ija qalbiin ilaaluu gaafata.
Waan hundaa keessa akka hangafummaatti kan of dhiyeessu, siyaasni tasa kan hin galleef, namni bu'aa ijaaramuu hin beekne Jaawar caasaa ijaarsa qabu gidduu seenee wal shakkii babal'isuun dabaree dabaree akka diigamuuf hojjechuun balaaleffatamuu qaba.
Akka sabaatti kan nu ijaaru, qaama mootummaas ta'e mormitoota keessa ilmi Oromoo cimaan jiru hundi walitti dhufuu akka qabudha. Namni keenya waa'ee basaasummaa akka balaaleffatuuf hojii tikaa irraa akka qoollifatu taasisuun dhumarra bittinuu nutti fiduu mala.
Qabsoon keenya Biltsiginnaas ta'e ABO keessa tika amanamaa, basaasa jabaa galfachuu qofaan galma gahuu akka danda'u wal akeekuu danda'uu feesisa. Yeroo kamii tikaaf basaasaan kan nu fayyadu malee yeroo hunda basaasaan diina uummataa fakkeeffamee dhiyeessuun waa'ee siyaasaa wal'aalutti nu geessa.
Hojiin tikaa gola diinaas kan firaas seenee waan jiru barabaree baruu waan ta'eef tiki mootummaa fi tiki ABO wal quba qabaachuun hangas afarfamee haasa'amuu fi, waanuma wal quba qabaniif sadarkaa jibbiinsaatti adeemsisuu kan malu miti.
Hojii isaaniitu akka wal baran, akka wal beekan isan taasisa. Hojii tikaa keessatti qooddannaan waan jiruuf qaamoleen lamaanuu odeeffannoo qaama faallaa isaanii argachuuf kan keessoo isaanii dirqmaanii iddoo walii qoodan qabu. Qaruxummaan garuu odeeffannoo maayii hin baafne kan jaarmiyaa ofii himanii, kan qaama faallaa garuu odeeffannoo dhaabicha ykn mootummaa san kuffisu argachuu danda'uudha.
Herrega kanaan yoo ilaalle tibbana saaxila tikaa fi basaasummaa jedhamee barreeffamootni Dirribsaa Daamxee fi Jaawar Mohaammadiin katabamaa ture cimina ABO fi Girmaa Xurunaa tabbatti ol baasee mul'ise.
Girmaan tika Wayyaanee waliin hojjechuu danda'a. Sababaan hojiin isaa tika ykn basaasummaa waan ta'eef diina isaa biratti amanamaa fakkaachuun waanuma jiru. Faallaa kanaa garuu herrega buufannaa irratti Girmaan gara mootummaa caalchisee akka ABO'n badu dalage taanaan balaaleffatamaadha. Tikummaan isaa guutummaatti mootummaaf dhuunfatame jennee ilaalla.
Ammoo Wayyaaneen Girmaan ittiin maqaa dhahamu kun kuftee daaraa ta'uun mirkana. ABO'n garuu qabsoon isaa haa butamu malee har'ayyuu jira. Kana yoo ilaallu hojiin tikummaa fi basaasummaan Girmaa Wayyaanee irratti haalaan hojjechuu isaa nu tilmaamsisa. Sababaan aangoorraa wayyaanee kuffisee, qabsoon Qeerroo ol bahee waan mul'ateef ABO'n hojii basaasummaa kanaan milkaa'e jennee dubbachuu nii dandeenya jechuudha.
Walumaa galatti basaasummaan yoo haala gaarii ta'een dhimmi itti bahame qabsoo bilisummaa Oromoo keessatti, waraana fi hojii dhuunfaa keessattuu barbaachisaa ta'uu qophii kanaan dhaamuu feena.
Ergamni holola basaasummaa fi shira Girmaa Xurunaa jedhamee haasa'amu dhugummaas sobas qabatee adeemaa akka ture hunduu hubachuu qaba. Hojiin shiraa bamoota hedduu nurkaa nyaateera. Hedduun akka lubbuu dhaban, namni nagaan akka du'u godhee jira. Kana balaaleffachuun barbaachisaa dhuma. Haa ta'u malee ABO akkamuma basaasaa qabaate, akkamuma tika hundeeffate jechuun garuu wal'aalummaatti nu geessa.
Jaarmiyaan jaallannu ABO's ta'e waraana bilisummaa Oromoo basaasa guddaan akka isa barbaachisu wal qayyabachiisuu, walii ibsuun gaariidha
Sagalee Bilisummaa Oromoo Haqaa
