Endowment Fund for the Rehabilitation of Tigrai

10/09/2026

መልእኽቲ ሰናይ ትምኒት ሓድሽ ዓመት 2019 ዓ/ም ካብ ትካል እግሪ ምትካል ትግራይ - ትእምት
~~~~~~~~~~~~~~~~
ኣብ ውሽጢ ዓድን ወፃእን ንዝርከብ መላእ ህዝብና ፣ ንጅግና ሰራዊት ትግራይን መላእ ማሕበረሰብ ትእምትን ፤ ትካል እግሪ ምትካል ትግራይ (ት.እ.ም.ት) እንኳዕ ንሓድሽ ዓመት 2019 ዓ/ም ብሰላም ኣብፀሓኩም ኣብፀሓና እናበለ ሰናይ ትምኒቱ ይገልፅ።

ብፍላይ ድማ ትካላዊ ዋንነት ትእምት ንምርግጋፅ ድሕሪ ዝተገበረ ዝተዋደደ ቓልሲ ኣብ ፅቡቕ ብርኪ ኣብ ዝርከበሉ ፤ ኣብ ፅባሕ ምስላጥ መበል 18 ስሩዕ ጉባኤ ቤት ምኽሪ ትእምት ኮይኑ ሰናይ ትምኒቱ እንትገልፅ ዝለዓለ ታሕጓስ ይስምዖ።

ትእምት ሒዙዎ ዘሎ ኩለመዳያዊ ዓቕሚ፣ ብፍላይ ድማ ኣብ ሕድሕድ ኩባንያታቱ ዝሓዞም ብቑዓት ሰብ ሞያን ውህሉል ትካላዊ ተሞክሮን ማሕበረ-ኢኮኖሚያዊ ሕውየትን ስግግርን ትእምት ኢሉ 'ዉን ትግራይ ኣብ ምርግጋፅ ዝህልዎ ግደ ኣዝዩ ልዑል ብምዃኑ ፤ መደባት ሕውየትን ስግግርን ሓንፂፁን ቕደም ሰዓብ ሰሪዑን ብዝገበሮም ምንቅስቓሳት ኣብ ደዉታ ዝነበራ ትካላት ትእምት ናብ ፍርያት ክኣትዋ ኣኽኢሉ እዩ። ነዚ ድማ መላእ ኣመራርሓን ሰራሕተኛታትን ትእምትን ኩባንያታቱን ንዝገበርዎን ዝቕፅልሉ ዘለዉን ዝነኣድ ኣበርክቶ ትካል እግሪ ምትካል ትግራይ (ትእምት )ዝለዓለ ክብሪ ኣለዎ።

ኩባንያታት ትእምት ካብቲ ዝበፅሓን ትሉም ዕንወትን ጉሕለትን መሊአን ከይሓወያ ንዓሰርተታት ኣሽሓት ሰራሕተኛታት ዕድል ስራሕ ካብ ምፍጣር ብዝሰገረ ፤ ሕግን ስርዓትን ኣኽቢረን ብምንቅስቓስ ፅፉፍ ምሕደራ ሃፍትን ንብረትን ከምኡ እውን ስርዓት ፋይናንስን ኦዲትን ንምትእትታው ኢሉ እውን ትካላዉነት ብቐፃልነት ንምርግጋፅ፤ ብበዓል ሓደራ ቦርድን ዋና ቤት ፅሕፈት ትእምትን ደገፍን ክትትልን እናተገበረለን ኣብ ምንቅስቓስ ይርከባ።

ውፅኢት ቃልስን ረዚን መስዋእትን ዝኾነ ትካል እግሪ ምትካል ትግራይ (ትእምት) ፤ ክቡር መስዋእቲ ንዝኸፈሉ ጀጋኑና ስድርኦም ኣብ ምሕጋዝ ፣ ጀጋኑ ጉድኣት ኩናት ኣብ ምሕካምን ማሕበረ-ቑጠባዊ ፀገማት ህዝብና ንክፍትሑን ዓበይቲ ስራሕቲ እናወገነ መፂኡን ኣሎን። ብቐፃልነት እውን ቤት ፅሕፈት ምግባረ ሰናይ ትእምት ኩባንያታት ትእምት ብምትሕብባር ዓቕሙ ዝፈቐዶ ከሉ ክዓምም እዩ።

ትእምት ሕዉየትን ዳግመ ህንፀትን ትግራይ ኣብ ምቅልጣፍ ፣ ማሕበረ-ቁጠባዊ ፀገማት ህዝቢ ትግራይ በብብርኩ ንክፍትሑ ካብ ምርብራብ ብዝሰገረ ፤ ፃውዒት መንግስቲ ትግራይ ተቐቢሉ ብተደጋጋሚ ሰብኣዊ ሓገዛት ብምብፃሕ እጃሙ እናበርከተ ዝመፀን ዘሎን ህዝባዊ ትካል 'ዩ።

ሕዚ ኣብ ትግራይ ኣጋጢሙና ንዘሎ ተፈጥራዊ ሓደጋ ድርቂ ስዒቡ ፤ ምግባረ ሰናይ ትእምት ምስ ኩባንያታት ብምትሕብባር ክሳብ ሕዚ ልዕሊ 𝟰𝟯𝟰𝟲 ኩንታል ዝተመጣጣነ ቀለብ እንስሳ ብድርቂ ኣዝየን ናብ ዝተጠቕዓ 𝟏𝟑 ጣብያታት ክባፃሕ ምግባሩ ናይዚ መርኣይ እዩ ።

ኣብዚ ሓድሽ ዓመት ትካላት ትእምት ናብ መዘዉር ለዉጢ ንክኣትዋ ብሓይሊ ሰብ ፣ ቴክኖሎጂ ፣ኣሰራርሓን ኣወዳድባን፣ ኮታስ ብስራሕቲ ዙርያ መለሽ ሪፎርም ንምጥንኻር ጎና ጎኒ ዝግበሩ ዘለዉ ዓበይቲ ፃዕርታት ፤ ምግባረ ሰናይ ትእምት ኩባንያታት ብምትሕብባር ማሕበራዊ ሓላፍነቱ ብስፍሓት ክዋፃእ እዩ።

ጀጋኑ ጉድኣት ኣካልን ሓርበኛታትን ንምሕጋዝ እናገበሮም ዝመፀ ፃዕርታት ብቐፃልነት 'ዉን ቁልፊ ዋኒኑ ገይሩ ክነጥፍ'ዩ ።

ብዋናነት ትካላት ትእምት ካብቲ ብሰንኪ ኲናት ዝበፅሐን ዕንወት ወፂአን ናብ ሕውየት ክሰጋገራን ትእምት ዝሐሸ ቁመና ክህልዎ ዝሕግዙ ዝተጀመሩ ስራሕቲ ሪፎርምን ምርግጋፅ ትካላዊ ዋንነትን ተጠናኺሮም ንክቕፅሉ ኣብዚ ሓድሽ ዓመት ብትኹረት ክስራሕ እዩ።

ኣብዚ ሓድሽ ዓመት ኩሎም ንጥፈታት ትእምትን ኩባንያታቱን ብመንፅር ትግራይ ዘላትሉ ዝተፈለየ መድረኽ ተቓንዩ ንዝሓሸ ኣፈፃፅማ ልዑል ምርብራብ ይግበር ኣሎ።

ህዝቢ ትግራይ ገጢሞሞ ዘለዉ ዙርያ መለሽ ሓደጋታት በዲሁ ንክወፅእ ይገብሮም ኣብ ዘለዉ ዓበይቲ ፃዕርታት ትካል እግሪ ምትካል ትግራይ (ት.እ.ም.ት) ህዝባውነቱ ዓቂቡን መሪሕ ኮይኑን እጃሙ ብቐፃልነት ከም ዘበርክት በዚ ኣጋጣሚ ደጊሙ የረጋግፅ።

ደጊሙ ፡ ንመላእ ህዝቢ ትግራይ፣ ጅግና ሰራዊት ትግራይን መላእ ሰራሕተኛታትን ኣመራርሓን ትካል እግሪ ምትካል ትግራይ (ት.እ.ም.ት) እንኳዕ ንሓድሽ ዓመት 2019 ዓ.ም ብሰላም ኣብፀሓኩም እናበለ ትካል እግሪ ምትካል ትግራይ (ት.እ.ም.ት) ደጊሙ ሰናይ ትምኒቱ ይገልፅ።

ትእምት ንሕዉየትን ዳግመ-ህንፀትን ትግራይ !

ትካል እግሪ ምትካል ትግራይ ት.እ.ም.ት

07/09/2026

ብምትሕብባር ኩባንያታትን ምግባረ ሰናይ ትእምትን ኣዝየን ንዝተጠቕዓ እንስሳት ደገፍ ዝውዕል 2018 ኩንታል ዝተመጣጣነ ቀለብ እንስሳ ምዕዳል ቀፂሉ ኣሎ።

እቲ ሓገዝ ኣብ ወረዳታት ፅራእ ወንበርታ፣ ኣፅቢ፣ፃዕዳ እምባ፣ ሱብሓ ሳዕሲዕ፣ጉሎመኸዳ፣ እገላን ኣበርገለ የጭላን እንትኾና 2018 ኩንታል ከም ዝተዓደለ ተገሊፁ ኣሎ።

እቲ ደገፍ ኣመራርሓ ኩባንያታትን ምግባረ ሰናይ ትእምትን ናብ ገሊአን ከባብታት ናብ ባይታ ብምውራድ ኣብ ጎኒ ህዝቢ ምህላዎም ዘረጋገፁሉ ኩነታት ምንባሩ ዝተሓበረ ኮይኑ፣ ካብ መንጎኦም ዋና ፈፃሚ ስራሕ ትካል ሱር ኮንስትራክሽን ኢንጅነር ዘንፉ ኣስፋው ከም ዝበሉዎ፣ ትካላት ትእምት ናይ ህዝቢ ስለዝኾና ኣብ ናይ ህዝቢ ፀገም ቀልጢፈን ክበፅሓ ግድን ስለዝኾነ ዕላዊ ፃውዒት ድሕሪ ምቕራቡ ኩባንያታትን ምግባረ ሰናይ ትእምትን ብወከልተን ኣቢለን እቲ ሓገዝ ሒዘን ናብቲ ቦታ ከም ዘምርሓ ይገልፁ።

ብመሰረት'ዚ ናብተን ወረዳታት እንትንንቀሳቐሱ እቲ ከባቢ ፋሕሽዩን ብየመና ሙቐት ሃርሃር እናበለን፣ እንስሳት ዝብላዕ ስኢነን ተሓሊገንን እንትትርአ፤ እቶም ሓረስቶት "ከምዚ ዝበለ ከቢድ ሓደጋ ድርቂ ገጢሙና ኣይፈልጥን።..." ብምባል ልቢ ብዝትንክፍ ቃላት ነቲ ኩነታት ከም ዝገለፁሎም የብርሁ።

ብጭቡጥ'ውን ካብ ዝኸድዎም ወረዳታት፣ ኣብ ወረዳ ኢሮብ ሓንቲ ወላዲት ተዘሪኡ ካብ ዝሓረረ እኽሊ እናፈሓራ ብዓቕሊ ፅበት ንከፍተን እናሃበአን ከም ዝተዓዘቡን ሓደ ወላዲ ኣብ ጥቓ መዋህለሊ ማይ ገንኢ ( ኩልሻብ ዝመልእ ዝነበረ) ኮፍ ኢሎም እንትትክዙ ከም ዘጓነፍዎምን ብምግላፅ፣ ነዚ ከቢድ ፀገም ግን ድማ እንተሓቢርና ቀሊል ፆር ዝኾነ ኣብ ምፍታሕ ኣፈላላይ ንጎኒ ገዲፍና ክንሓብር ኣለና ይብሉ ኢንጅነር ዘንፉ።

እቲ ከቢድ ሓደጋ ድርቂ ንሕዚ ኣብ እንስሳት እኳ እንተተርኣየ ስዒቡ ናብ ሰብ ምእታዉ ዘይተርፍ ስለዝኾነ ነዚ ብምእማት ኣብ ዘላቒ መፍትሒ ብምትኳር ስትራቴጂክ መፍትሒ ከም ዝጠልብ ይገልፁ።

ዋና ኣካያዲ ስራሕ ፋብሪካ ሲሚንቶ መሰቦ ኢንጅነር ክብርኣብ ተወልደ ብግደኦም፣ ኣብቲ ዝኸዱዎ ከባብታት እንስሳት ተሓሊገን ብምውዳቕ ዘይለዓላሉ፣ እኽሊ እናቦቆስካ ንተን እንስሳ ዝወሃበሉን እቲ ከባቢ ጠላዕ ሓጋይ ምበር ክረምቲ ዘይመስለሉን፣ ሓመድ ጥራሕ ኮይኑ ከም ዝረኣዩ ይገልፁ። ነቶም ገባራት እንትነዘራርቦም "ነሓሰ ካብ ዝኣቱ ማይ ዳርጋ ኣይነጠበን፤ ኣብ ከቢድ ፀገም ኢና ጥሒልና ዘለና" ብምባል እናሓዘኑ ከም ዘዋግዑዎም የብርሁ።

ብምዃኑ እቲ ኩነታት ከቢድ ከም ዝኾነ ዝገለፁ እቶሞ ኢንጅነር፣ እተን ትካላት ኣብ ከቢድ ሃሰያ ዋላ ይሃልያ፣ ልዕሊ ፀገም ህዝበን ቀዳምነት ዝህበኦ ውራይ ከም ዘየሎ ብምርድዳእ ህፁፅ ምላሽ ንምሃብ ሓበራዊ ውሳነ ከምዝወሰናን እቲ ደገፍ በዚሑን እኹል ኮይኑን ዘይኮነስ ኣብ ጎኒ ህዝቢ ከምዘለዋ ብእዋኑ ንምብፃሕ ከም ዝኾነ ኣረዲኦም።

ንገባራት አዘራሪቦም እንታይ ከም ዝበሉ እንትገልፁ፣ ዝናብ ክረምቲ ካብ ዘቋርፅ ፀኒሑ እዩ፤ እቲ ከባቢ እንታይ ከም ዝመስል "ምርኣይ ምእማን እዩ" ከም ዝበሃል ርኢኹምና ኣለኹም። ምምፃእኹም እናመስገንና ምልስ ድማ በሉና ብምባል ከም ዘዋግዑዎም ይሕብሩ።

ዋና ኣካያዲ ስራሕ ፋብሪካ መድሓኒት ኣዲስ ዓድግራት ኣይተ ሃይለ ገ.ሚካኤል፣ ብመንግስቲ ትግራይ ኣዝየን ብድርቂ ዝተጠቕዓ ወረዳታት ከም ዘለዋ ሓገዝ ከም ዘድሊ ፃውዒት ምስቀረበ፣ ኩባንያታትን ምግባረ ሰናይን ትእምት ብምውሳን ዋላ እኹል ኣይኹን ኣብ ጎኒ ህዝብና ኣለና ንምባል ዝግበር ዘሎ ሓገዝ እዩ ይብሉ።

እተን ትካላት ኮነ ተባሂሉ ትሉም ብዝኾነ መንገዲ ዕንወት ክበፅሐን ከም ዝተገበረ ዘዘኻኸሩ እቶም ኣካያዲ ስራሕ፣ እንተኾነ ግና ትካላት ትእምት ብህዝቢ ተጣይሸን ንህዝቢ ምሕጋዝ ቀንዲ ዕላመአን ብምዃኑ ካብ ዘለወን ደገፍ ከም ዝገበራን፣ እቲ ሓገዝ ጊዝያዊ ምዃኑ ብምርዳእ ኣብ ዘላቒ ዝተደረኸ መፍትሒ ምርብራብ ወሳኒ ኮይኑ፣ እቲ ፀገም ክሳብ ዝስገር ባህሊ ምትሕግጋዝና ብምጥንኻር ካብቲ ብተደጋጋሚ ዝሃስየና ዘሎ ሓደጋ ድርቂ ንምውፃእ መሰረታዊ መዋፅኦ የድሊ ይብሉ።

መተሓባበሪ ሃፍቲ እንስሳ ወረዳ ፀራእ ወንበርታ ኣይተ ግርማይ ገ.ሂወት ድማ፣ ኣብቲ ወረዳ ሓደጋ ድርቂ ምሰጋጠመ፣ ዘድሊ ቀለብ እንስሳ ከም ዘነፀሩ ብምሕባር፣ ትእምት ዝገበሮ ሓገዝ ካብ ልቢ ብምምስጋን፤ ፀገም መድሓኒት እውን ስለዘሎ ደገፍ ከምዘድልይ ሓቢሮም።

ተጠቀምቲ ሓረስቶት ብወገኖም፣ ከምዚ ዝበለ ድርቂ ኣብ ሙሉእ ዕድሜና ገጢሙና ኣይፈልጥን ክብሉ ድሕሪ ምግላፅ፣ ብትእምት ዝመፀና ሓገዝ እናመስገንና ካልኦት እውን ዝከኣሎም ብምሕጋዝ ካብዛ ቀጣን ጊዜ ንክንወፅእ ከም ትእምት ብህፁፅ ክበፅሑልናን እጃሞም ከበርክቱን ንላቦ ኢሎም።

ነባሪ ወረዳ ፅራእ ወንበርታ ኣይተ ደስታ ኪዳኑ ኣብ ሂወትና ከምዚ ዝበለ ኣጋጢሙና ኣይልጥን። እቲ መሬት ትሪኡዎ ኣለኹም ዘረባ ኣየድልዮን ባዕሉ ይዛረብ ኣሎ። ዘይሩ ዘይሩ ትእምት ቀዲሙ ስለዝበፅሐልና ምስግናና ወሰን የብሉን፤ ካልኦትውን ሓግዙ ኢሎም።

ነበርቲ ወረዳ ፅራእ ወንበርታ፣ ጣብያ ዒራ ቁሸት ዕንጉለታ መድህን ተ.ገርግስ ይበሃሉ። ዝዓበራ ከፍቲ እናኾብኮቡ ይጓዓዙ ኣለዉ። ናበይ ምዃኖም ሕቶ ምስቀረበሎም ብሰንኪ ከቢድ ሓደጋ ድርቂ ከፍቶም ዝብላዕ ከምዝሰኣና ብምሕባር ናብ ዝሐሸ ከባቢ የምርሑ ከም ዘለዉ ብምግላፅ ኣርሒቅካ ምኻድ ፅቡቅ ኣይኮነን ግና ከፍትና ኣብ ኢድና ካብ ዝሞታ ኢና ንጓዓዝ ዘለና ክብሉ ይገልፁ።

እቲ ሓገዝ ቀለብ እንስሳ ንወረዳታት ራያ ጨርጨር፣ ራያ ዓዘቦ፣ ወጀራት፣ ሕንጣሎን እንደርታን ስዒቡ ድማ ወረዳ ኢሮብ 2332 ኩንታል ዝተመጣጠነ ቀለብ እንስሳ ከም ዝተዓደለ ይዝከር።

ብሓፈሻ ብምትሕብባር ኩባንያታትን ምግባረ ሰናይ ትእምትን 30 ሚልዮን ብር ብምምዳብ ልዕሊ 4346 ኩንታል ብድርቂ ኣዝየን ናብ ዝተጠቕዓ 13 ጣብያታት ከም ዝተኸፋፈለ ንምፍላጥ ተኻኢሉ።

03/09/2026

ብተደጋጋሚ ዝኽሰት ዘሎ ሓደጋ ድርቂ ንምክልኻልን ዘላቒ መፍትሒ ንምቕማጥን ክም መንግስትን ህዝብን ኣብ ኽባብያዊ ፀጋታት ትኹረት ሂብካ ምስራሕ ወሳኒ ምዃኑ ኣካያዲ ስርሕ ፋብሪካ ስሚንቶ መሰቦ ኣይተ ክብረኣብ ተወልደ ገሊፆም፡

ኣይተ ክብረኣብ ነዚ ዝገለፁ ኣብ ዞባ ምብራቕን ዞባ ማእኸልን ብድርቒ ዝተጠቐዓ ወረዳታትን ጣብያታትን እናተዘዋወሩ ኣብ ዝተመልከትሉ እዋን ኾይኑ ብሰንኪ ሓደጋ ድርቂ ኣብተን ኸባብታት ኣንፀላልዩ ዘሉ ሓደጋ ኣዝዩ ኸቢድን ጊዜ ዘይህብን ምዃኑን ኣብሪሆም።

እቲ ሓደጋ ድርቂ ኣብ 14 ወረዳታት ትግራይ ማለት ውን ኣብ 41 ጣብያትት ብዝኸፈአ መልክዑ ኣጋጢሙ ከም ዘሎ ዝሓበሩ ኣይተ ክብረኣብ ኩባንያታት ትእምት ነቲ ዘሎ ኹነታት ኣብ ግምት ብምእታውን ብቢሮ ሕርሻን ሃፍቲ ተፈጥሮን ብዝተገበረ ፃውዒትን ኣብ ከቢድ ሓደጋ ዝርከባ እንስሳት ብሂወት ንምትራፍ ብዝተኽኣለ ዓቕሚ ዝተመጣጠነ ቐለብ እንስሳ ኣብ ምቕራብ ይርከባ ኢሎም።

ይኹን እምበር እቲ ሕዚ ብኩባንያት ትእምት ዝቐረበ ሓገዝን ስፍሓት እቲ ኣጋጢሙ ዘሎ ሓደጋ ድርቅን እንትረአ ዝመጣጠን ከም ዘይኾነ ብምሕባር ብቐፃልነት እናተርኣየ እቲ ሓገዝ ዝቕፅለሉ ኹነታት ምፍጣርን ብቐንዱ ድማ ዝፀንሐ ባህሊ ምትሕግጋዝ ህዝቢ ትግራይ ተጠናኺሩ ክቕፅልን በቲ ሓደጋ ዝተጥቕዑ ሓረስቶትን እንስሳትን ናብቲ ተስፋ ዝገብርሉ መፃኢ እዋን ኢደይ ኢደይ ኢልካ ምስጋር ከም ዘድሊ ኣገንዚቦም

እዚ ከምዚ እናሃለወ ግና እቲ በቢ ዓመቱ ብዝተፈላለየ መልክዑ ዝኽሰት ዘሎ ሓደጋ ድርቂ ዘላቒ መፍትሒ ምቕማጥን ዘላቒ ውሕስና ምርግጋፅ ከም ዝኾነ ብምሕባር ነዚ ድማ በቢ ኸባቢኡ ብከንቱ ዓመት ሙሉእ ዝፈሱ ወሓዝቲ ሩባታትን ብምግዳብ ካልኦት ጠሊ ናይ ምዕቃብ ስርሓቲ ብስፍሓት ምስራሕ ከም ዘድሊ ኣገንዚቦም።

ነዚ ድማ ከም መንግስቲ፥ ህዝቢ፥ ትካላት ትእምትን ካልኦት ወሃብቲ ደገፍ ኣክላትን ተዋዲደን ዝዳሎ ዝተማእኸለ መሪሕነት ከም ዘድሊ ሓቢሮም ዮም። ከም ፀብፃብ ድወት።

02/09/2026

ትእምት ብኣንደበት ተጠቀምቲ ሓረስቶት
~~~~~~~~~~~~~~~~~~~~

ኩባንያታትን ምግባረ ሰናይ ትእምትን ኣብ ዞባታት ደቡብን ደቡብ ምብራቅን ዝርከባ ወረዳታት ራያ ዓዘቦ፣ራያ ጨርጨር፣ ወጀራት፣ሕንጣሎን እንደርታን 1802 ኩንታል ዝተመጣጠነ ቀለብ እንስሳ ተዓዲሉ እዩ።

ኣብ ዞባ ምብራቕ ወረዳ ኢሮብ ኣብ ዝርከባ ሓሙሽተ ጣብያታት ኣዝየን ብድርቂ ንዝተሃሰያ ኣራዕ፣ ወርዓትለ፣ዓሊቴና፣ ዓገረለኹማን ሓረዘ ሰብዓታን 530 ኩንታል ብተወከልቲ ኩባንያታትን ምግባረ ሰናይ ትእምትን ርኽክብ ድሕሪ ምፍፃም ተዓዲሉ እዩ። ነዚ ኣመልኪቶም ተጠቀምቲ እንታይ ይብሉ?

" ኣብዚ ከባቢ ከምዚ ዝበለ ድርቂ ኣጋጢሙና ኣይፈልጥን። ንመጀመርታ ጊዜ ኢና ከምዚ ዝበለ ሓደጋ ንርኢ ዘለና። ኣብ ጣብያና 1200 ዝኾና እንስሳ ተደሪቐን ኣለዋ። እቲ ሓገዝ ነዚአን እኹል ኣይኮነን፤ ግና ትእምት ናብዚ ጥራሕ ዘይኮነ ናብ መላእ ትግራይ ክሕግዝ እንተሎ ድሩትነት ዓቕሚ ይህልው። ብዝኾነ ትእምት ናይ ህዝቢ ትካል ስለዝኾነ ፀገምና ንምቅላል ብዓቕሙ ክሕግዝ ምምፅኡ ኣዚና ነመስግን።

ካልኦት ድማ እጃሞም ከበርክቱ ንላቦ። እቲ ፀገም ከጠንክረና ስለዝግባእ ክንሰግሮ ኢና። ነቲ ሓገዝ ዝገበረልና ትእምት ድማ ደጊምና ካብ ልቢ ነመስግን።" ዋና ኣመሓዳሪ ጣብያ ዓገረልኹማ ኣይተ ምስግና በርሀ።

" ከፍቲ ይሞታና ኣለዋ። እቲ ሓደጋ ከቢድ እዩ። ኣብዚ ከቢድ ሓደጋ ዝሓገዘናን ህዝባዊ ሓላፍነቱ ዝተዋፀአን እምበር ወዲ ህዝቢ ትካል እዩ_ትእምት። ኩሉ ክፈልጦ ዘለዎ ግና ህልውናና ኣብ ሕቶ ምልክት እዩ ወዲቑ ዘሎ። ትእምት ኣብዛ ቁርፂ ዝኾነት እዋን ቁርፀኛ ተግባር ብምፍፃሙ ደጋጊምና ነመስግን። ኣብ ደገ ይኹን ኣብ ውሽጢ ዝርከቡ ወገናት ኣሰር ትእምት ይስዓቡ እብል።" ኣይተ ኣድሓኖም ገብሩ ነባሪ ጣብያ ዓገረለኹማ ቁሸት ዓሰፋት ተጠቃሚ ሓረስታይ

"ኣብ ሂወትና ኢሮብ ከምዚ ደሪቑ ኣይፈልጥን። ካልእ ይትረፍ በለስ ንዕንገለሉ ዝነበርና ሎሚ ዓመት ጉድ ርኢና። ኣብ ሃፍቲ እንስሳ ንነጥፍ ዝነበርናን ካብተን እንስሳ እናማረፅን ንርባሕ ዝነርና ኮታስ ብዙሕ ዝለመድና ሕዚ እንስሳና ኣብ ከቢድ ሓደጋ ወዲቐን ይርከባ። ቀለብ እሞ ካበይ ይምፃ?
እንተ ትእምት ናይ ህዝቢ ትካል ስለዝኾነ መርኣያ ህዝባውነቱ ብተግባር ኣረጋጊፁ ኣሎ። ዋላኳ እቲ ሓገዝ ዝምስገን እንተኾነ፣ ካልኦት ከምቲ ትእምት ተበግሶ ወሲዱ ብዓቕሙ ዝደገፈና ካልኦት'ውን ይሓግዙና።" ኣይተ ኣብርሃ ወልዱ ቁሸት ከረዳ ተጠቃሚ ሓረስታይ

" ኣብ ጣብያና 444 ከፍቲ ፣744 ጠለበጊዕ ሞይተን እየን። ዝተረፋ ድማ ኣብ ሓደጋ እየን ዘለዋ።ምንም ሓገዝ ኣይተገበረን።ትእምት ፈላሚ እዩ። ስለዚ እቲ ፀገም እናኸፍአ ይኸይድ ስለዘሎን ዓመት ሙሉእ ንምዝላቕ ስለዘኸብድን ኣብ ዓርሰ ሙርከሳ መሰረት ዝገበረ ስራሕ ወሳኒ እኳ እንተኾነ መርኣያነት ትእምት ብምውሳድን ንጊዚኡ ዋላ ይኹን ካልእ ደገፍ የድልየና ኣሎ እሞ ከምቲ ትእምት ዝሓገዘና ካልኦት ወገናት ክሕግዙና ንፅውዕ። " ክኢላ ሕርሻ ጣብያ ዓገረለኹማ፣ ወ.ሮ ንግስቲ ተኽለ

"እዚ ሓገዝ ቀለብ እንስሳ ሒዝኩም ብምምፃእኩም ዋላ ውሱን ይኹን ተስፋ እዩ ንዓና። ንትካል እግሪ ምትካል ትግራይ (ትእምት) ድማ ቀፃልነት ይሃልዎ ብምባሎ ነመስግን። ካልኦት ድማ ኣሰር እዚ ህዝባዊ ትካል ይስዓቡ እየ ክብል ዝደሊ እምበር። " ወ.ሮ ኣዝመራ ኣብርሃ ጣብያ ዓሊቴና

02/09/2026

"...ኢሮብ ጥዑም እዩ። ክረምቲ ክትመፆ እንተለኻ ብሓምለዋይ ሕብሪ ወቂቡ። ቀላያት ብማይ መሊኦም እናሓመስካን እናሰሓቕካን ትሓልፎ ዝነበረ፣ ዓዲ ብላዕ ስተ፣ ተቐባሊ ጋሻን ውቀብን ከባቢ ሕዚ (26 ነሓሰ 2018) ጠላዕ ሓጋይ መሲሉ ክትረኽቦ እንተለኻ ልብኻ ይትንክፍ።

ከፍቲ ዓሕ እምባሕ እናበላ እንትጫድራ ፍስሃ ወ ሰላም ይዓስለካ ነይሩ። ሕዚ እቲ ከባቢ ሓመድ ተኸዲኑ፤ እተን እንስሳት ይትረፍ ክዘላን ክጫድራን ንምኻድ ተፀጊመን ዐይመን እንትትረኽበን ምሒር ትሓዝን።

እቲ ፅቡቕ ድባብ ብድርቂ ተተኪኡ እንትረኽብዎ ጓሂ ይፈታተነካ፤ ፈተና ግና የጠንክረካ እዩ" ይብሉ ብኩባንያታትን ምግባረ ሰናይ ትእምትን ብድርቂ ንዝተጠቕዓ እንስሳ ዝኸውን 530 ኩንታል ዝተመጣጠነ ቀለብ እንስሳ ኣብ ኢሮብ ብሓገዝ እንተበርክቱ _ ተወካሊ ኩባንያታት ትእምት ማኔጂንግ ዳይሬክተር፣ መስፍን ሜታልስ ኤንድ ኢንጅነሪንግ ኢንጅነር ተሰማ ግደይ ።

እዚ ህዝቢ ኣብ መኸተ እናሃለወ ካሊእ ፀገም ተፈጥሮ ገጢሙዎ ኣሎ፤ ፀገም ዝፃወር ህዝቢ ብምዃኑ ከም ዝሰግሮ እምነቶም ዝገለፁ ኢንጅነር ተሰማ፣ ኩባንያታት ትእምትን ምግባረ ሰናይ ትእምትን ፃውዒት ሓገዝ ምስተገበረለን ዋላ ኣብ ፀገም ይሃልዋ ልዕሊ ህዝቢ ስለዘየለ ነቲ ፃውዒት ተቐቢለን ንፈለማን ንጊዚኡን እዚ ሓገዝ ሒዘን ከም ዝተረኸባን ብቀፃሊ ኣብ ጎኒ ህዝበን ከም ዝኾና ይገልፁ።

እቲ ፀገም ንጊዚኡ ብከምዚ ዝበለ ሓገዝ ዋላ እንተመፀ ብዘላቕነት ከመይ ንሰግሮ ኣብ ዝብል ብቀፃሊ ምስራሕ ከም ዝጠልብ የገንዝቡ። ህዝቢ ኢሮብ ፀገም ተፃዋራይ ምዃኑን ነቲ ገጢሙዎ ዘሎ ከቢድ ፀገም ካብ ተሞክሮ ሂወቱ ብምብጋስ ከምዝሰግሮን የቐምጡ።

እቲ ፀገም ኣብ ኢሮብ ጥራሕ ስለዘይኮነ ሰፊሕ ምዃኑ፣ እተን ኩባንያታት ኣብ ካልእ ከባቢ እውን እናሓገዛ ከም ዝመፃን ካብ ኢሮብ ቀፂሉ ናብ ካሊእ ከባቢ እውን ንሓገዝ ከም ዝንቀሳቐሳን ብምሕባር፣ ትእምት ናይ ህዝቢ ትካል ስለዝኾነት ህዝቢ ንምሕጋዝ አዕሪፋ ከም ዘይትፈልጥን ዓቕሚ ብዝፈቕዶ መሰረት ንምሕጋዝ ንድሕሪት ከም ዘይትብልን ኣረጋጊፆም።

እቲ ፀገም ከቢድ ስለዝኾነ ከቢድ ፃዕሪ ከምዝኾነን ትእምት በይና እትወፆ ስለዘይኮነ ሓበራውን ዝተዋደደን ፃዕሪ ከም ዝሓትት ዝሓበሩ ኢንጅነር ተሰማ፣ ብህልኽ፣ ብወነን ብሕራነን ነቲ ገጢሙና ዘሎ ከቢድ ፀገም ክንሰግሮ ይግባእ ይብሉ።

ተወካሊ ምግባረ ሰናይ ትእምት ኣይተ የማነ ገ.መድህን ብግደኦም፣ ቢሮ ሕርሻን ሃፍቲ ተፈጥሮን ትግራይ መፅናዕቲ ብምክያድ ፃውዒት ሓገዝ ምስኣቕረበ ነቲ ፃውዒት ብምቕባል ትእምት ካብ ዘለዋ ውሱን ሃፍቲ ንምሕጋዝ ድልውቲ ብምዃን ብ30 ሚልዮን ብር ዝተመጣጠነ ቀለብ እንስሳ ካብ ፋብሪካ ሂወት ብምዕዳግ ብድርቂ ኣዝየን ዝተጠቕዓ እንስሳ ዝኸውን ደገፍ ከም ዝዓደገትን ናብ መላእ ትግራይ ይከፋፈል ከም ዘሎን ይገልፁ።

ቅድም ክብል ኣብ ዞባታት ደቡብን ደቡብ ምብራቕን 1802 ኩንታል ከም ዝተዓደለ ድማ ኣዘኻኺሮም እዮም ተወካሊ ምግባረ ሰናይ ትእምት ኣይተ የማነ ገ.መድህን።

ኣብ ዞባ ምብራቕ ድማ ነዚ ሕዚ ኣብ ወረዳ ኢሮብ ዝተዓደለ 530 ኩንታል ሓዊሱ 1908 ኩንታል ኣብ ጉለመኸዳ፣ ፅራእ ወንበርታ፣ኣፅቢ፣ፃ/እምባ፣ ስቡሓ ሳዕሲዕ ከም ዝቕፅል ዝሓበሩ ኣይተ የማነ፣ ኣብ ዞባ ማእከል ድማ ወረዳታት ኣበርገለ የጭላን እገላን 2018 ኩንታል ቀለብ እንስሳ ንምዕዳል መደብ ከም ዝተትሓዘ ይሕብሩ።

02/09/2026

ናብ ወረዳ ኢሮብ ብምግባረ ሰናይን ኩባንያታትን ትእምት ብድርቂ ንዝተጠቕዓ እንስሳ ዝተገበረ ሓገዝ እንትራገፍ
👇👇👇👇

02/09/2026

ኣብ ወረዳ ኢሮብ ብምግባረ ሰናይን ኩባንያታትን ትእምት ብድርቂ ንዝተጠቅዓ እንስሳ ደገፍ ዝውዕል 530 ኩንታል ቀለብ እንስሳ ንህዝቢ እንትዕደል

01/09/2026

ኣብ ዞባ ምብራቕ ወረዳ ኢሮብ ናብ ዝርከባ ሓሙሽተ ጣብያታት ኣዝየን ብድርቂ ዝተጠቕዓ እንስሳ ዝውዕል 530 ኩንታል ደገፍ ቀለብ እንስሳ ዝፀዓና መካይን ተወከልቲ ኩባንያታትን ምግባረ ሰናይ ትእምትን ንኣመራርሓ እቲ ከባቢ ርኽክብ እንተካይዱ

31/08/2026

ብኩባንያታትን ምግባረ ሰናይ ትእምትን ናብ ወረዳ ኢሮብ ብሰንኪ ድርቂ ንዝተጠቕዓ እንስሳ ዝተገበረ ደገፍ፣ 530 ኩንታል ዝተመጣጠነ ቀለብ እንስሳ ዝፀዓና መካይን ሎሚ ካብ ከተማ መቐለ እንትብገሳ ዝተገበረለን መሰነይታ ብምስሊ

30/08/2026

ትእምት ብሓደጋ ድርቂ ንዝተጠቕዓ እንስሳት ዝውዕል 318 ኩንታል ዝተመጣጠነ ቀለብ እንስሳት ንወረዳ ሰብዓ እንደርታ ዓዲሉ።

ሕፅረት ቀለብ እንስሳ ቀንዲ ፀገም ሓደጋ ድርቂ ብምኳኑ ሓገዝቲ ኣካላት ብቀዳምነት ዝተመጣጠነ ቀለብ እንስሳ ክልግሱ ሓረስቶት ጠሊቦም።

ኣብ ጣብያ ደርጋዓጀን ኣብ ዝተሳለጠ ርኽክብ ሓገዝ ተረኺቦም መልአኽቶም ዘመሓላለፉ ኣመሓዳሪ ዞባ ደቡብ ምብራቕ ትግራይ ኣይተ ከላሊ ሓጋዚ ፡ ሓረስታይ ሓደጋ ድርቂ ኣጋጢሙ ኢሉ ኢዱን እግሩን ኣጣሚሩ ሓገዝ ከይተፀበየ ኣብ ዓርሰ ምርኮስኡን ዓርሰ ምትሕግጋዙን ኣትኲሩ ክሰርሕ ምዒዶም።

ትእምት ኣብ ሰለስተ ወረዳታት ዞባ ደቡብ ምብራቕ፡ ዕስራ ዓዲ ወጀራት፣ ሕጣሎን ሰብዓ እንደርታን ኣብ ቐዳማይ ዙር 1200 ኩንታል ቀለብ እንስሳ ምሃቡ ብምጥቃስ ዝርካቡ ሃፍቲ ብዝተማእኸለን ፍትሓውን ተጠቃምነት ክህልዎ ኣተሓሳሲቦም።

ከም ዞባ ካብ 80 ገጠር ጣብያታት 27 ጣብያታት ክሳዕ ሐዚ ምንም ዝናብ ከምዘይረኸባ ብምሕባር፡ ትእምት ፣ መንግስቲ፣ ቢሮ ሕርሻን ሃፍቲ ተፈጥሮን ተዋዲዶም ንዝገበርዎ ሓገዝ ኣመስጊኖም፤ ተወለድቲ ሰብ ሃፍቲ፣ ገበርቲ ሰናይ ህይወት ሰብን እንስሳትን ኣብ ምድሓን ክረባረቡ ፀዊዖም።

ዝኾነይኹን ፖለቲካዊ ኣፈላላይ ከይዓገተና ነቲ ሃይማኖት ፣ ፆታ ፣ ፖለቲካ ዘይፈሊ ሓደጋ ድርቂ ንምምካትን ህይወት ሰብ ንምድሓንን ከም ተጋሩ ብሓድነት ተሓጋጊዝና ምውፃእ የድልየና ኢሎም።

ኣባል ማእኸላይ ኮሚቴ ህወሓትን ሓላፊ መምርሒ ርክብ ህዝቢ ትእምትን ተጋደላይ ፈናን ኣብርሃ ብወገኖም፡ ትካል ትእምት ፍርያት ቃልሲ ህዝቢ ትግራይ'ዩ ብምባል ፀገም ህዝቢ ኣብ ምፍታሕ ኣብ ቁርፂ እዋን ቀዳማይ ተፀዋዒ ትካል ምኳኑ ነፂሮም።

ትእምት ብ30 ሚልየን ብር ምስ ህይወት ሜካናይዜሽን ሕርሻ ብዝኣሰሮ ውዕሊ መሰረት ብሓደጋ ድርቂ ንዝተጠቕዓ እንስሳት ትግራይ ዝውዕል 4347 ኩንታል ዝተመጣጠነ ቀለብ እንስሳ ብምሕጋዝ ንዞባታት ደቡብ፣ ደቡብ ምብራቕን ምብራቕን ትግራይ ኣብ ምክፍፋል ከምዝርከብን እዚ ድማ መግለፂ ህዝባውነቱ ምኳኑ ገሊፆም።

ሳዕቤን ሓደጋ ድርቂ ኢል-ኒኖ ክሳብ ዝንክይ እቲ ሓገዝ ተጠናኺሩ ከምዝቕፅል'ውን ኣረጋጊፆም።

ምክትል ኣመሓዳሪትን ሓላፊት ዘፈር ቁጠባን ወረዳ 70 እንደርታ ኣኸዛ ኣብርሃ ፥ ኣብ 11 ጣብያታት እታ ወረዳ ከቢድ ሓደጋ ድርቂ ከምዘንፀላለወ ብምምልኻት ብትእምት ንዝተውሃበ 318 ኩንታል ቀለብ እንስሳ ኣመስጊነን።

ካብ ተፀባይነት ወፂእኻ ስራሕቲ ዓቀብቲ ጠሊ፣ መስኖ ብምጥንካር ዓርሰ ምርኮሳ ምርግጋፅ ከምዘድሊ ንሓረስቶት ዝሓበራ እተን ሓላፊት ዝተገበረ ሓገዝ ምስ መጠን በዝሒ እንስሳት እቲ ኸባቢ ተመጣጣኒ ብዘይምኳኑ ተጠናኺሩ ንኽቕፅል ተላብየን።

ተጠቀምቲ እቲ ሓገዝ ዝኾኑ ሓረስቶት ብወገኖም ደርጋዓጀን ሰፊሕ ሕርሻ፣ እንስሳትን ሃፍቲ ተፈጥሮን ዘለዎ ጣብያ ዋላኳ እንተኾነ ብሰንኪ'ቲ ድርቂ እንስሳት ዝበልዕዎ ስኢኖም ከምዝርከቡ ገሊፆም።

ካብ ባዕሎም ሓሊፎም ንኻሊእ'ውን ዝተርፉ ዝነበሩ እቶም ሓረስቶት መዳበርያ ተጠቂሞም ዝዘርእዎ ግራውቶም ብስእነት ዝናብ ሕሩስ ኮይኑ ተሪፉ ግዳይ ተደራረብቲ ክሳራታት ምኳኖም ገሊፆም። ትእምት ንዝገበረሎም ሓገዝ ብምምስጋን ሓገዝ ቀለብ እንስሳ ናብ ሰብኣዊ ሓገዝ ሰብ'ውን ክሰጋገር ተላብዮም ክብል ድወት ፀብፂቡ።

Endowment Fund for the Rehabilitation of Tigrai - ትእምት

10/09/2026

07/09/2026

03/09/2026

02/09/2026

02/09/2026

02/09/2026

02/09/2026

01/09/2026

31/08/2026

30/08/2026

Address

Telephone

Website

Alerts

Contact The Business

Shortcuts

Share

Category

Listing takedown request