07/12/2023
【難得的開頭】
最近網上見到有一個非常聰明嘅宣傳， 就係將一架波子擺喺一個好大嘅透明氣囊裏面， 外邊根本掂唔到架車，然後泊喺沙田第一城。全世界都知沙田第一城鎖車隊係全港最強嘅鎖車隊， 呢架波子咁樣泊喺度但係冇人可以落到手鎖車， 的確係大快人心，整個網絡即時起哄。之後呢架「氣囊波子」陸續喺香港唔同嘅地方出現， 大家開始諗呢個係咪一個宣傳活動， 好多人仲以為賣緊戶外泊車保護套。
呢個頭開得非常之好，攪到好多人好有興趣想知發生咩事。
最後， 有組織承認呢一個活動， 原來佢係一個汽車保險公司平台，叫做HoldCover。「HoldCover 車保就係咁全面」係呢個廣告嘅tagline。佢嘅主要賣點係：最強保障、超高透明度、有彈性、唔使俾人呃。咁樣，問題就嚟嘞！
1. 好多牌子都鐘意玩食字，但係要玩得有意義，我唔知HoldCover 做有冇特別意思（除咗「hold」住啲燕梳嘅 cover，我聯想唔到其他嘢住），但係「WholeCover」唔係更加簡潔易明咩？起碼夾返「包住成架車」呢個畫面先。
2. 車主買保險嘅心路歷程佢係捉到嘅：怕保唔夠、怕細節內嘅魔鬼、怕硬食既定條款、怕比人呃。車主係好需要一間可靠嘅保險公司嘅，但係你唔係一間保險公司，你只係一個平台，比人買唔同保險公司嘅產品。咁你點樣令其他保險公司兌現你嘅承諾呢？
3. 成個活動嘅 Awareness 係好高，但係個公司牌子嘅 Brand Awareness 就真係差啲。你問人知唔知呢單嘢，我諗好多人都知，再問係咩牌子做宣傳，應該就冇乜人噏得出。其實有辦法嘅，不過等負責廣告嘅去諗嘞。
做宣傳有好橋係難得嘅，但係一定要比人記得你係邊個。消費者從來都係非常聰明，睇完聽完你嘅宣傳內容一定會有問題、有懷疑，唔好諗住你講完個市場就會接受，要估算埋佢哋嘅疑慮，幫佢哋 overcome。我都希望成個campaign有個滿意嘅結局，千祈唔好變爛尾劇。
（picture: HoldCover's post on facebook)
#三保 #全保 #為你簡化流程 #重塑保險新體驗 #沙田第一城 #鎖車
