28/11/2023
⛔️⛔️⛔️ გთხოვთ, გამოიჩინოთ განსაკუთრებული სიფრთხილე, რადგან უკვე ყველა ზღვარს სცილდება ზოგიერთი ისტორიის (ქეისების) შემდგენელისა და საბუთების გამყალბებლების საქციელი ❗️
ბევრი ადამიანი მწერს უკვე, ვწერ თუ არა ისტორიებს (ქეისებს) და აქვე ვამბობ რომ არ ვწერ და არც არასოდეს დავწერ. ვინაიდან, ჩემთვის ფიზიკურად შეუძლებელია ერთმა ადამიანმა მოვიგონო იმდენი და ისეთი დამაჯერებელი ისტორია, რომ ამხელა სისტემა დავაჯერო ტყუილში. შეიძლება ზოგადი რჩევა მივცე, რასაც ისედაც ვაკეთებ თითქმის ყოველდღიურად მესინჯერში, მოხალისეობრივად.
ახლა რაც შეეხება მთავარ სათქმელს: თითქმის ყოველ დღე მოდიან ადამიანები ინტერვიუზე IPO-ში, ვისაც მომენტალურად ეტყობა, რომ ისტორია არის ისტორიის (ქეისი) შემდგენელის მიერ დაწერილი, შემდეგ ნასწავლი. ხშირად არც ისტორიაა ლოგიკურად დალაგებული სამწუხაროდ და არც ნასწავლია ისე, რომ აპლიკანტი თავდაჯერებული იყოს. თავისუფლად შემიძლია დავყო აპლიკანტები იმის მიხედვით, თუ ვის დაუწერა ისტორია ერთი და იგივე ადამიანმა.
რა არის ამ ისტორიების ძირითადი პრობლემები?
1. ისტორიების შინაარსი ძირითადად ერთი და იგივეა და შეცვლილია მხოლოდ ლოკაციები და სახელები.
2. არაა დალაგებული ლოგიკურად და ამოვარდნილია რეალობიდან.
3. არადამაჯერებელია არაპროფესიონალისთვისაც კი.
4. რამდენიმე კითხვა სჭირდება ოფიცერს იმისათვის, რომ დაადგინოს ტყუილი ან მინიმუმ არ დაიჯეროს ისტორია.
5. პირდაპირ ვამბობ, გაგებაში არაა უმრავლესობა ,,მწერლისა" რა ხდება ინტერვიუზე, თავად ალბათ ერთხელ არიან ნამყოფები და ისეთ აბსურდულ რჩევებს იძლევიან, რაც არც რელევანტურია, არც შესაბამისი და კიდევ უფრო მეტ ეჭვს ბადებს.
განსაკუთრებით ეხება საქმე რელიგიურ, პოლიტიკურ, სექსულური და რელიგიური უმცირესობების ქეისებს და ვალებს. 150-მდე ინტერვიუს გამოცდილება მაქვს უკვე და უმრავლესობა შედგენილი ქეისებისა, ვერ აკმაყოფილებს მინიმალურ სტანდარტებს, რაც საჭიროა იმისათვის, რომ ოფიცერი დარწმუნდეს საერთაშორისო დაცვის მოთხოვნის დაკმაყოფილების საჭიროებასა და აუცილებლობაში.
ასევე ძალიან მნიშვნელოვანია, საბუთების გამყალბებლების საკითხი. ძალიან ხშირად შეუიარაღებელი თვალითაც ჩანს, რომ დოკუმენტი ყალბია და აპლიკანტები ამტკიცებენ რომ ეს ყველაფერი რეალურია. როგორ წარმოგიდგენიათ, რომ ამხელა სისტემა მოატყუოთ 50 ევროდ გაცემული ცნობით, რომელსაც ფოტოშოპის კვალი ეტყობა და რომელიც რატომღაც მხოლოდ მას მერე მოიპოვეთ, რაც კითხვარი შეავსეთ. არანაირად არ განვიკითხავ აპლიკანტებს, ვინაიდან, ადამიანები ვიცი რა მდგომარეობაში არიან და გამოსავალს ეძებენ, ხოლო გაჭირვებული ადამიანებით სარგებლობენ ისინი, ვისაც ჩემი პირადი აზრით, შუბლის ძარღვი გაწყვეტილი აქვს. ასევე ცნობებია გაცემული იმ ადამიანებისგან, ვინც უკვე აღარაა იმ ორგანიზაციაში ან პარტიაში, რომელმაც გასცა ცნობა. მაგალითად გასულ კვირას, აპლიკანტს ჰქონდა ნაციონალური მოძრაობის ცნობა, დათარითებული 2023 წლის შემოდგომით, რომელსაც ხელს აწერდა ნიკა მელია, როგორც ნაც. მოძრაობის ლიდერი. როცა ის ნიკა მელია არაა, ოფიციალურად არის ნიკანორ მელია და აღარც ნაც.მოძრაობის თავმჯდომარე აღარაა... ასევე შეცდომა იყო სამედიცინო ცნობის საბუთში და აცდენილი იყო იმ თარიღს თითქმის ერთი წლით, რაც ისტორიაში ეწერა. აქ რაღაზე უნდა ვილაპარაკო წარმოდგენა არ მაქვს...
ყველამ თქვენი საქმის ცხადია თქვენ იცით და არც არავის ვარიგებ ჭკუას, ჩემზე ჭკვიანები მილიონობითაა დედამიწაზე, მაგრამ რასაც ვუყურებ ყოველდღიურად, გაჩუმებაც არ შემიძლია.
მთავარი კითხვა რაც შეიძლება გაგიჩნდეთ არის შემდეგი: კი, მაგრამ ხომ იღებენ ადამიანები მათ მიერ გაცემული ისტორიებით და საბუთებით პოზიტივს?
ჯერ ერთი, უმეტესობა მათგანი ახლობლებს სთხოვს რომ რეკომენდაცია გაუწიონ და მოიტყუონ თითქოს მათ პოზიტივი მათი დახმარებით მიიღეს. ჩვეულებრივ ღიად აკომენტარებენ ხოლმე რომ მივიღე პოზიტივი და ეს ადამიანი დამეხმარაო, რაც არის ხოლმე ხშირად ტყუილი.
ასევე არის შემთხვევები, როდესაც ნამდვილად იღებენ პოზიტივს, თუმცა აქ არის რამდენიმე ფაქტორი. აპლიკანტის განსაკუთრებული უნარები, რომელიც ისედაც მოახერხებდა პოზიტივის აღებას... ოფიცრის დამოკიდებულება ან IPO-ს პოლიტიკა, რომელიც ასევე არაა კავშირში შეთხზულ ისტორიასთან... და ბოლოს შემთხვევითობა, ამ ცხოვრებაში ყველაფერი ხდება, მილიონი ადამიანი მეათე სართულიდან რომ გადმოხტეს, ყველა არ მოკვდება, თუმცა ამის გამო მეათედან არავინ ხტება...
ახლა რაც შეეხება შეთავაზებას: თუ თქვენ შეგიდგინეს ისტორია ან გაქვთ თქვენი რეალური ისტორია, შეგიძლიათ მომწეროთ პირადში მოკლე აღწერა და გირჩევთ რაზე გაამახვილოთ ყურადღება და რის დასამტკიცებლად მოემზადოთ ინტერვიუზე. ხშირად შეუსაბამ საკითხს ამტკიცებენ, რაც ზედმეტია და არასაჭირო. ეს ყველაფერი ცხადია მოხალისეობრივად და ყველანაირი ანაზღაურების გარეშე.
დიდი მადლობა.
გისურვებთ წარმატებებს.
❤️
