13/02/2026
राज ठाकरेंच्या मदतीने उभ्या राहिलेल्या 'त्या' मराठमोळ्या तरुणीच्या व्यवसायावर आता नवा वाद; शावरमा स्टॉलवर परप्रांतीय आचारी दिसल्याने नेटकऱ्यांचे प्रश्नचिन्ह
काही दिवसांपूर्वी डोंबिवली येथील एकता सावंत या मराठी तरुणीचा एक व्हिडीओ सोशल मीडियावर प्रचंड व्हायरल झाला होता. प्रशासनाकडून होणाऱ्या कारवाईला आणि त्रासाला कंटाळून तिने सोशल मीडियाच्या माध्यमातून आपल्या भावना व्यक्त केल्या होत्या. तिच्या या व्हिडीओची दखल घेत महाराष्ट्र नवनिर्माण सेनेचे अध्यक्ष राज ठाकरे यांनी तिला तातडीने मदत केली आणि तिचा व्यवसाय पुन्हा उभा करण्यासाठी भक्कम पाठिंबा दिला. मात्र, आता याच व्यवसायावरून एक नवीन वादंग निर्माण झाला असून सोशल मीडियावर जोरदार चर्चा सुरू झाली आहे.
राज ठाकरे यांच्या मदतीने एकता सावंत हिचा 'सावंत शावरमा' हा स्टॉल पुन्हा सुरू झाला. मनसेचे नेते आणि कार्यकर्ते तिच्या पाठीशी खंबीरपणे उभे राहिले. परंतु, आता या स्टॉलवर शावरमा बनवणारा आणि विकणारा कर्मचारी हा मराठी नसून परप्रांतीय (हिंदी भाषिक) असल्याचे समोर आले आहे. यामुळे सोशल मीडियावर अनेक नेटकऱ्यांनी आश्चर्य व्यक्त करत प्रश्न उपस्थित केले आहेत.
मनसे नेहमीच 'मराठी माणसाला रोजगार' आणि 'मराठी अस्मिता' या मुद्द्यांवर आग्रही असते. त्यामुळे एका मराठी तरुणीला व्यवसाय करण्यासाठी पक्षाने मदत केली, ही बाब कौतुकास्पद ठरली होती. मात्र, त्याच व्यवसायात काम करणारा व्यक्ती अमराठी असल्याने, "मराठी माणसाच्या नावाखाली परप्रांतीयांना रोजगार मिळवून दिला जात आहे का?" असा खोचक सवाल काही लोकांनी उपस्थित केला आहे. एका बाजूला मराठी तरुणांना रोजगार मिळत नसल्याची ओरड असताना, थेट मनसेच्या मदतीने सुरू झालेल्या स्टॉलवरच परप्रांतीय कर्मचारी दिसल्याने हा विरोधाभास लोकांच्या नजरेत आला आहे.
या सर्व वादावर एकता सावंत हिने तिची बाजू स्पष्ट करण्याचा प्रयत्न केला आहे. व्यवसायाची मालकी पूर्णपणे एका मराठी मुलीकडेच आहे, असे तिने सांगितले. तसेच, शावरमा बनवण्यासाठी आवश्यक कौशल्य असलेला मराठी मुलगा किंवा कामगार शोधूनही मिळाला नाही. व्यवसायाचे नुकसान होऊ नये आणि गाडा सुरळीत चालावा, यासाठी नाइलाजास्तव परप्रांतीय कामगाराला कामावर ठेवावे लागले, असे स्पष्टीकरण तिने दिले आहे. तरीही, सोशल मीडियावर या विषयावरून मत-मतांतरे आणि चर्चांना उधाण आले आहे.
