SMF Online Media

04/10/2026

04/10/2026

മഹല്ലുകളിൽ സി.എ. ഓഡിറ്റ് നിർബന്ധം: എസ്.എം.എഫ്

മതിലകം: സൊസൈറ്റി രജിസ്ട്രേഷൻ ആക്റ്റ് പ്രകാരം രജിസ്റ്റർ ചെയ്തിട്ടുള്ള മഹല്ല് മദ്രസ വഖഫ് സ്ഥാപന ഭാരവാഹികൾ വാർഷിക വരവ് ചെലവ് കണക്കുകൾ നിർബന്ധമായും , കേരള സൊസൈറ്റീസ് രജിസ്ട്രേഷൻ ആക്റ്റ് വകുപ്പ് 18 പ്രകാരം 1949 ലെ ചാർട്ടേർഡ് അക്കൗണ്ടൻ്റ് സ് ആക്റ്റ് പ്രകാരമുള്ള ചാർട്ടേർഡ് അക്കൗണ്ടൻ്റിനെ കൊണ്ട് ഓഡിറ്റ് ചെയ്യിപ്പിക്കുകയും, ഓഡിറ്റ് റിപ്പോർട്ട്, വാർഷിക വരവ് ചെലവ് കണക്കുകൾ, ബാലൻസ് ഷീറ്റ് എന്നിവ രജിസ്ട്രാർക്ക് സമർപ്പിക്കുകയും നിർബന്ധമാണെന്നും, എന്നാൽ രണ്ട് ലക്ഷം രൂപയിൽ താഴെ വാർഷിക വരുമാനമുള്ളവർ ഭരണ സമിതിയംഗമല്ലാത്ത അംഗങ്ങളിൽ നിന്നും ഒരാളെ ഓഡിറ്ററായി നിയോഗിച്ച് കണക്കുകൾ ഒഡിറ്റ് ചെയ്താൽ മതിയാകുന്നതാണെന്നും എസ്.എം.എഫ് സി.ഇ.ഒ ബഷീർ കല്ലേപ്പാടം പറഞ്ഞു. സി.എ. ഓഡിറ്റനുസരിച്ച് മഹല്ലുകളുടെ ബുക് ഓഫ് അക്കൗണ്ട്സുകൾ സുതാര്യമായും, നിയമപരമായും എഴുതി സൂക്ഷിക്കണമെന്നും , അല്ലാത്തപക്ഷം നിയമാനുസൃതമായ പിഴയടക്കുവാൻ ഭരണ സമിതികൾ വിധേയമാകേണ്ടി വരുമെന്നും അദ്ദേഹം ഓർമ്മിപ്പിച്ചു.

പുതിയകാവ് ഉൽഫത്തുൽ ഇസ്ലാം മദ്രസ ഹാളിൽ നടന്ന എസ്.എം.എഫ് മതിലകം റൈഞ്ച് വാർഷിക കൗൺസിലിൽ നിയമബോധവത്കരണം നടത്തുകയായിരുന്നു അദ്ദേഹം.

03/10/2026

മഹല്ലുകൾ അംഗങ്ങൾക്ക് ഫോട്ടോ പതിച്ച തിരിച്ചറിയൽ കാർഡ് നൽകണം: എസ്.എം.എഫ്

ചാവക്കാട്: കേരള സൊസൈറ്റീസ് രജിസ്ട്രേഷൻ ആക്ട് 2025-ലെ ചട്ടങ്ങൾ വകുപ്പ് 20 പ്രകാരം മഹല്ലിലെ എല്ലാ അംഗങ്ങൾക്കും ഫോറം നമ്പർ 7 അനുസരിച്ചുള്ള ഫോട്ടോ പതിച്ച തിരിച്ചറിയൽ കാർഡ് നൽകേണ്ടത് അനിവാര്യമാണെന്നും, ഇതിൽ വീഴ്ച വരുത്തുന്ന ഭരണസമിതികൾക്ക് നിയമാനുസൃതമായ പിഴ ഉൾപ്പെടെയുള്ള നടപടികൾ നേരിടേണ്ടിവരുമെന്നും സുന്നി മഹല്ല് ഫെഡറേഷൻ (എസ്.എം.എഫ്) സംസ്ഥാന ചീഫ് എക്സിക്യൂട്ടീവ് ഓഫീസറും സമസ്ത ലീഗൽ സെൽ കൺവീനറുമായ ബഷീർ കല്ലേപ്പാടം പറഞ്ഞു.
എസ്.എം.എഫ് ചാവക്കാട് റൈഞ്ച് കമ്മിറ്റി ചാവക്കാട് ഖുർആൻ സ്റ്റഡി സെന്ററിൽ സംഘടിപ്പിച്ച വാർഷിക കൗൺസിലിൽ കേരള സൊസൈറ്റീസ് രജിസ്ട്രേഷൻ ആക്ട് 2025, ചട്ടങ്ങൾ 2026 എന്ന വിഷയത്തിൽ ക്ലാസെടുക്കുകയായിരുന്നു അദ്ദേഹം.

റൈഞ്ച് പ്രസിഡന്റ് ടി.കെ. അബ്ദുസ്സലാം അധ്യക്ഷത വഹിച്ചു. ഹാഫിസ് ഫാരിസ് മംനൂൻ ഫൈസി സ്വാഗതം പറഞ്ഞു. ജില്ലാ സെക്രട്ടറി കെ.ബി. അബ്ദുൽ ഖാദർ മതിലകം ഉദ്ഘാടനം ചെയ്തു. ജില്ലാ സെക്രട്ടറി ഗഫൂർ അറക്കൽ, റൈഞ്ച് ജനറൽ സെക്രട്ടറി മൊയ്നുദ്ധീൻ കാരയിൽ, വി.എം. സാഹിദ് എന്നിവർ സംസാരിച്ചു.

റൈഞ്ചിന് കീഴിലെ വിവിധ മഹല്ല്, മദ്രസ, വഖഫ് സ്ഥാപനങ്ങളുടെ രജിസ്ട്രേഷൻ, ആവശ്യമായ രേഖകളുടെ പരിപാലനം, നിയമാനുസൃത റെക്കോർഡുകളുടെ ക്രമീകരണം എന്നിവ സംബന്ധിച്ച് പ്രത്യേക അദാലത്ത് സംഘടിപ്പിച്ച് രേഖകൾ കുറ്റമറ്റതാക്കാനും വാർഷിക കൗൺസിൽ തീരുമാനിച്ചു.
റൈഞ്ചിലെ വിവിധ മഹല്ല്, മദ്രസ, വഖഫ് സ്ഥാപന ഭാരവാഹികൾ കൗൺസിലിൽ പങ്കെടുത്തു.

02/10/2026

*ഒരു മനുഷ്യ സ്നേഹി കൂടി വിടപറഞ്ഞു.*

*ഇന്നലെ മരണപ്പെട്ട പ്രിയപ്പെട്ട കൊക്കാട്ടുതറയിൽ നൗഷാദ് സാഹിബ്‌ അക്ഷരാർത്ഥത്തിൽ ഒരു മനുഷ്യസ്നേഹി ആയിരുന്നു.*

സമൂഹത്തിൽ അവശത അനുഭവിച്ച ഒട്ടേറെ മനുഷ്യർക്ക് ആശ്വാസം പകർന്ന വ്യക്തിത്വം. പള്ളിപ്പാട്ടുമുറി മുസ്‌ലിം ജമാഅത്ത് പ്രസിഡന്റ് പദവിയിൽ ഇരിക്കെ ഒട്ടേറെ ജനോപകാര പ്രവർത്തനങ്ങൾക്ക് നേതൃത്വം നൽകി, മറ്റുള്ള മഹല്ലുകൾക്ക് കൂടി മാതൃകയായി. മഹലിന്റെ കീഴിലുള്ള സ്ഥലങ്ങളിൽ വീടുകൾ നിർമ്മിക്കുകയും ചെറിയ വാടകയ്ക്ക് സാധാരണക്കാരായ ആളുകൾക്ക് അത് നൽകുകയും ചെയ്തുകൊണ്ട് മഹല്ല് സംവിധാനത്തിന് ഒരു സ്ഥിര വരുമാനവും സാധാരണക്കാർക്ക് ഒരു ആശ്വാസവും നൽകിയ പുതിയ പദ്ധതിയ്ക്ക് തുടക്കം കുറിച്ചു. സാധാരണക്കാരായ ആളുകൾക്ക് പലിശരഹിതമായ വായ്പ സംവിധാനവും അദ്ദേഹം തുടക്കമിട്ടു എന്നാണ് മനസ്സിലാക്കുന്നത്.

കേരളത്തിലെ പൊതുവിദ്യാലയങ്ങളിൽ ഉച്ചഭക്ഷണ വിഭവങ്ങൾ കഞ്ഞിയും പയറുമായിരുന്ന കാലത്താണ് അദ്ദേഹം പാനൂർക്കര ഗവൺമെന്റ് യുപി സ്കൂളിന്റെ പിടിഎ പ്രസിഡണ്ടായി കടന്നുവരുന്നത്. ആ വർഷങ്ങളിൽ ഞാനവിടെ ഡെയിലി വേജായി പ്രവർത്തിച്ചിരുന്നതാണ്. അദ്ദേഹത്തിന്റെ ശ്രമഫലമായി ഉദാരമതികളുടെ സഹകരണത്തോടെ സ്കൂളിലെ കുട്ടികൾക്ക് ഉച്ചഭക്ഷണത്തിന് ചോറും കറികളും സജ്ജീകരിക്കാൻ സാധിച്ചു. അതുകൂടാതെ സ്കൂൾ അങ്കണത്തിൽ വിപുലമായ ഒരു പാർക്കും അദ്ദേഹത്തിന്റെ നേതൃത്വത്തിൽ തയ്യാറാക്കി. പൊതു വിദ്യാഭ്യാസ ശാക്തീകരണത്തിന് സർക്കാർ തലത്തിലുള്ള ആലോചനകൾ നടക്കുന്നതിനു മുമ്പ് ഒരു തീരദേശ ഗ്രാമത്തിലെ പൊതുവിദ്യാലയത്തെ ഉയർത്തിക്കൊണ്ടു വരുന്നതിനു വേണ്ടിയുള്ള വേറിട്ടതും വ്യത്യസ്തവുമായ കർമ്മ പദ്ധതികളുടെ തുടക്കക്കാരൻ കൂടിയാണ് പ്രിയപ്പെട്ട നൗഷാദ് സാഹിബ്.

സമൂഹത്തിന്റെ സ്പന്ദനങ്ങൾ തൊട്ടറിഞ്ഞ് സഹായത്തിന്റെ കരസ്പർശം തീർത്ത, സഹജീവി സ്നേഹത്തിന്റെ ഉദാത്ത മാതൃക. തന്റെ പ്രദേശത്തെ കുഞ്ഞുങ്ങളുടെ അക്ഷര വിദ്യാഭ്യാസത്തിനുവേണ്ടി തന്റെ പേരിലുള്ള മൂന്ന് സെന്റ് സ്ഥലം അങ്കണവാടി കെട്ടിടം നിർമ്മിക്കുന്നതിന് വേണ്ടി സൗജന്യമായി വിട്ടു നൽകിയ മഹാമനസ്.

*സുന്നി മഹല്ല് ഫെഡറേഷൻ ജില്ലാ ജനറൽ സെക്രട്ടറിയായി പ്രവർത്തിച്ച വേളയിൽ തന്റെ മഹല്ലിൽ കൊണ്ടുവന്ന വ്യത്യസ്തവും നൂതനവുമായ പദ്ധതികൾ മറ്റിടങ്ങളിലേക്ക് കൂടി വ്യാപിപ്പിക്കുന്നതിന് വേണ്ടിയുള്ള ആത്മാർത്ഥമായ പരിശ്രമങ്ങൾ അദ്ദേഹം നടത്തിയിരുന്നു.*

ചെറുപ്പകാലം മുതൽ വിവിധങ്ങളായ രാഷ്ട്രീയ പ്രസ്ഥാനങ്ങളിലൂടെ കടന്നുപോയ അദ്ദേഹം ഏറ്റവും അവസാനം മുസ്‌ലിം ലീഗ് രാഷ്ട്രീയ പ്രസ്ഥാനത്തോട് ചേർന്നുനിന്നു.

ഞാനിപ്പോൾ താമസിക്കുന്ന വീടും സ്ഥലവും അദ്ദേഹത്തിന്റെയും മർഹൂം അബൂബക്കർ അണ്ടോളിൽ അവർകളുടെയും കയ്യിൽ നിന്നാണ് ഞാൻ വാങ്ങിയത്. ഒരു റിയൽ എസ്റ്റേറ്റ് ഇടപാട് എന്നതിനപ്പുറം ഒരു കുഞ്ഞനുജനോടുള്ള കരുതലൽ ആ ഇടപാടിലൂടെ ഞാൻ അനുഭവിച്ചതാണ്.

എപ്പോൾ കണ്ടാലും സുദീർഘമായി സംസാരിക്കുകയും പുതിയതായി എന്തെങ്കിലും ഒരു അറിവും പ്രായോഗിക വൽക്കരണത്തിലേക്ക് അത് എത്തിക്കാനുള്ള പദ്ധതികളും നമ്മുടെ മനസ്സിലേക്ക് കോരിയിട്ടായിരിക്കും അദ്ദേഹത്തിന്റെ സംസാരം അവസാനിപ്പിക്കുക. പ്രദേശത്തിന്റെ വിദ്യാഭ്യാസ, സാമൂഹിക, സാംസ്കാരിക, സാമ്പത്തിക പുരോഗതിയ്ക്ക് ഒട്ടേറെ കാഴ്ചപ്പാടുകൾ അവതരിപ്പിച്ച അത് നടപ്പാക്കാൻ വേണ്ടി നിതാന്തമായ ഇടപെടൽ നടത്തുകയും സമാന ചിന്തയുള്ളവരുടെ ഒരു ചങ്ങല സൃഷ്ടിക്കാൻ ശ്രമിക്കുകയും ചെയ്തു.

പ്രധാനമായും മത മേഖലയായിരുന്നു അദ്ദേഹത്തിന്റെ പ്രവർത്തനമേഖലയെങ്കിലും നാനാജാതി മതസ്ഥരുടെയും സ്നേഹവും ബഹുമാനവും അദ്ദേഹത്തിന് ലഭിച്ചിരുന്നു എന്നത് ഇന്നലെ രാവിലെ മുതൽ ആ വീട്ടിലേക്ക് ഒഴുകിയെത്തിയ മനുഷ്യരുടെ സാന്നിധ്യം ബോധ്യപ്പെടുത്തി.

സഹോദര സമുദായ സംഘടനകൾ പോലും ആദരാഞ്ജലികൾ അർപ്പിച്ചുകൊണ്ട് അദ്ദേഹത്തിന്റെ മരണത്തിൽ ദുഃഖം രേഖപ്പെടുത്തിയത് ആ മനുഷ്യൻ എത്രത്തോളം പൊതുസമൂഹത്തിന്റെ ഇടയിൽ സ്വീകാര്യമായിരുന്നു എന്നതിന്റെ തെളിവു കൂടിയാണ്. മയ്യിത്ത് നിസ്കാരത്തിന് ഒരുമിച്ചുകൂടിയ വലിയ പുരുഷാരം അദ്ദേഹത്തിന്റെ അവസാന യാത്രയും ജനങ്ങളുടെ സ്നേഹ സാന്നിധ്യത്തിൽ ആയിരുന്നു എന്നതിന്റെ തെളിവാണ്.

മനുഷ്യ സ്നേഹിയും ഉദാരമതിയും ആയിരുന്ന നൗഷാദ് സാഹിബ് നമ്മളിൽ നിന്നും അകന്നു പോകുമ്പോൾ അദ്ദേഹത്തെ സ്നേഹിക്കുന്നവർക്ക് ചെയ്യാൻ കഴിയുന്ന ഏറ്റവും വലിയ സ്മരണ അദ്ദേഹത്തിന്റെ ജീവിതത്തെ പിന്തുടരുക എന്നതാണ്. മനുഷ്യർക്ക് തണലായി, സമൂഹത്തിന് ധൈഷണിക നേതൃത്വമായി, പുതിയ കാഴ്ചപ്പാടുകളുടെ ഉപജ്ഞാതാക്കളായി ഒരുപാട് നൗഷാദ് സാഹിബ് മാർ സമൂഹത്തിൽ ഉണ്ടാകട്ടെ എന്ന് ആത്മാർത്ഥമായി ആഗ്രഹിക്കുന്നു.

പ്രിയപ്പെട്ട നൗഷാദ് സാഹിബിന് നാഥൻ മഗ്ഫിറത്തും മർഹമത്തും നൽകട്ടെ, ആമീൻ

✍️റഷീദ് പാനൂർ