23/05/2026
ആനയാകുമ്പോൾ തെറ്റുന്നത് സ്വാഭാവികമാണ്. സാധാരണ ഒരു ജീവിയെപ്പോലെയല്ല അത്, ഒരിക്കൽ ഇടഞ്ഞാൽ തിരികെ പിടിച്ച് കെട്ടാൻ സമയവും പ്രയത്നവും ഒരുപാട് വേണ്ടിവരും. 🙏🏻
എന്നാൽ ഈ അടിയന്തിര സാഹചര്യത്തെപ്പോലും സ്വന്തം റേറ്റിങ്ങിനും എക്സ്ക്ലൂസീവ് വാർത്തകൾക്കും വേണ്ടി ഉപയോഗിക്കുന്ന ചില മാധ്യമങ്ങളോടും ഓൺലൈൻ ചാനലുകളോടും ഒന്നുമാത്രമേ പറയാനുള്ളൂ,വാർത്തകൾക്ക് പുറകെ നിങ്ങൾ ഓടിക്കോളൂ, അത് നിങ്ങളുടെ ജോലിയുടെ ഭാഗം തന്നെയാണ്, പക്ഷേ അല്പം മനുഷ്യത്വം കൂടി ഉള്ളിൽ സൂക്ഷിക്കണം. കൺമുന്നിൽ ഒരു കാർ ആന എടുത്തുയർത്തി നിലത്തടിക്കുന്നത് കണ്ടിട്ടും, അതിനുള്ളിലുള്ള വ്യക്തിക്ക് എന്തെങ്കിലും അപകടം പറ്റിയോ എന്ന് നോക്കാനോ അവരെ ഒന്ന് പുറത്തെത്തിക്കാനോ ശ്രമിക്കാതെ, ക്യാമറയും മൊബൈലും പൊക്കിപ്പിടിച്ച് ആനയുടെ പുറകെ ഒരു കരുണയുമില്ലാതെ ഓടിയ നിങ്ങൾ ശവംതീനികളേക്കാൾ കഷ്ടമാണ്.😏😡
ആ ആനയെ പിന്നാലെ ഓടി വീണ്ടും വീണ്ടും പ്രകോപിപ്പിച്ചു നിർത്തുന്നതിൽ നമ്മുടെ നാട്ടിലെ മുഖ്യധാരാ പത്ര മാധ്യമങ്ങൾക്കും, ഓൺലൈൻ ചാനലുകൾക്കും, റീച്ചിന് വേണ്ടി എന്തും ചെയ്യുന്ന യൂട്യൂബർമാർക്കും വലിയ പങ്കുണ്ട്. ഒരുപക്ഷേ ഇത്രയും ജനക്കൂട്ടവും ക്യാമറക്കണ്ണുകളും അതിന്റെ പുറകെ ഓടിക്കൂടിയില്ലായിരുന്നുവെങ്കിൽ ഇതിന് മുൻപേ ആ ആനയെ തളക്കാൻ സാധിച്ചേനെ. നിങ്ങൾ എടുത്ത വീഡിയോകൾ സമയം കിട്ടുമ്പോൾ നിങ്ങൾ തന്നെ ഒന്ന് എടുത്തു കണ്ടുനോക്കുക; നിങ്ങളുടെയൊക്കെ അലർച്ചയും ബഹളവും ശബ്ദവും കേട്ടാണ് ആ ആന വീണ്ടും വീണ്ടും പ്രകോപിതനാകുന്നത്. നിങ്ങൾക്ക് അത് ഒരു നേരത്തെ ബ്രേക്കിംഗ് ന്യൂസ് മാത്രമായിരിക്കാം, പക്ഷേ ആ ആനക്കാരന് അത് അവന്റെ ജീവിതമാണ് എന്ന് മനസ്സിലാക്കാൻ ശ്രമിക്കുക.🙏🏻🙏🏻🙏🏻
പിന്നെ കിട്ടിയ അവസരം മുതലാക്കാൻ നടന്ന്, പാപ്പാൻ പ്രേമം തലയ്ക്ക് പിടിച്ച് പരസ്പരം ചളിവാരിയെറിഞ്ഞ് നടക്കുന്ന വിവിധ 'ആർമി' ഗ്രൂപ്പുകളിലെ അംഗങ്ങളോട് ഒരു വാക്ക്. അല്ലെങ്കിലേ ഈ പ്രസ്ഥാനത്തെയും ആനസംസ്കാരത്തെയും ഇല്ലാതാക്കാൻ ഒരുപാട് ആളുകൾ കച്ചകെട്ടി മുന്നിലുണ്ട്. അവർക്ക് നിങ്ങളായിട്ട് ദയവുചെയ്ത് വടിവെട്ടിക്കൊടുക്കരുത്. പരസ്പരം പഴിചാരി തരംതാഴാതെ, ഈ രംഗത്തെ പ്രതിസന്ധികളെ തിരിച്ചറിഞ്ഞ് ഒത്തൊരുമയോടെ നിൽക്കുകയാണ് വേണ്ടത്. മനുഷ്യത്വം മറന്നുള്ള വാർത്താ വേട്ടയും റീച്ച് മോഹങ്ങളും ദയവുചെയ്ത് അവസാനിപ്പിക്കുക.🙏🏻
