https://www.facebook.com/105863539102813/

Rafi Thayyil. Pgv, Peringave, Kondotty (2026)

10/01/2025

ഒരു രാജ്യം രണ്ട് നീതി.

മുസ്ലിം സമുദായത്തിന് നേരെ വർഗീയ പ്രചരണം നടത്തുന്ന പി. സി ജോർജ് എന്നയാൾക്കെതിരെ ഒരു ചെറുവിരലനക്കാൻ ഭരണകൂടത്തിന് സാധിക്കാതെ പോകുന്നത് കഷ്ടം തന്നെ. ബോബി ചെമ്മണ്ണൂറിനെതിരെ പെണ്ണൊരുത്തി പരാതി നൽകി മണിക്കൂറുകൾ കൊണ്ട് നിയമ നടപടി പൂർത്തിയാക്കിയ അതേ രാജ്യത്തെ അതേ പോലീസ് തന്നെയാണ് മുസ്ലിം വർഗീയത പറഞ്ഞ ഈ സംഘി കുട്ടനെ തുറന്നു വിടുന്നതെന്നും നമ്മൾ ഓർത്തെടുക്കണം. വർഗീയത വരുമ്പോൾ അതും മുസ്ലിംകൾക്ക് എതിരെയാകുമ്പോൾ മാത്രം പോലീസ് നിഷ്ക്രിയമാകുന്നത് എന്തുകൊണ്ടാണെന്ന് മനസ്സിലാവുന്നില്ല.

ഇവിടെ ആഭ്യന്തരമന്ത്രി ഉണ്ടോ എന്നതാണ് ഇപ്പോഴത്തെ സംശയം.

✍️റാഫി തയ്യിൽ. പെരിങ്ങാവ്

06/01/2025

ഇന്നലെ ഞായറാഴ്ച. ഒരു പാട് തിരക്കുകൾ ഉണ്ടായിരുന്നു. പക്ഷേ മുന്നേ തന്നെ പറഞ്ഞു വെച്ചത് ആയത് കൊണ്ട് എല്ലാം മാറ്റി വെച്ച് ഇന്നലത്തെ പകൽ മുഴുവൻ പാലിയേറ്റിവിന് വേണ്ടി മാറ്റി വെച്ചു. സുഹൃത്തുക്കളെയും കൂട്ടി കളക്ഷൻ നടത്തി. കൂടെ മകൻ മുനവ്വിറുമുണ്ടായിരുന്നു. വീട്ടിൽ നിന്ന് രാവിലെ ഏഴ് മണിക്ക് ഇറങ്ങി രാത്രി പത്ത് മണിയോടടുത്ത് തിരിച്ചെത്തുമ്പോൾ അവനും ഹാപ്പി ഞമ്മളും ഹാപ്പി.

ജീവിക്കുന്ന കാലത്തല്ലേ, മരിച്ചിട്ട് ഇതിനൊന്നും കഴിയില്ലല്ലോ.
മക്കളും കുടുംബവും കയ്യൊഴിഞ്ഞാലും പാലിയേറ്റിവ് വളണ്ടിയർമാർ വരുമെന്ന് ഉറപ്പുണ്ടല്ലോ.

15/12/2024

പ്രിയപ്പെട്ടവരേ,

നിങ്ങളുടെ വീട്ടിലെ കല്യാണം, സൽക്കാരം, വീട് കുടിയിരിപ്പ് തുടങ്ങിയ എല്ലാ പരിപാടികൾക്കും എന്നെയും എന്റെ കുടുംബത്തെയും ക്ഷണിക്കാൻ മറക്കരുത്. കാരണം നമ്മൾ സുഹൃത്തുക്കളല്ലേ, അല്ലെങ്കിൽ കുടുംബക്കാരോ അയൽവാസികളോ അല്ലേ. അത് കൊണ്ട് നിർബന്ധമായും ഞങ്ങളെ ക്ഷണിക്കാൻ മറക്കരുതേ .

എന്നാൽ ,

മാന്യമായി സത്കരിക്കാനും ഇടപെടാനും കഴിയില്ലെങ്കിൽ ഞങ്ങളെ വിളിക്കാതിരിക്കുക. നിങ്ങൾ വിളിച്ചിട്ടാണ് ഞങ്ങൾ നിങ്ങളുടെ വീട്ടിൽ വരുന്നത്. അല്ലാതെ പട്ടിണി കിടന്ന് കഷ്ടപ്പാട് കൊണ്ട് തെണ്ടാൻ വന്നതല്ല . അത് കൊണ്ട് തന്നെ ഇരന്നു വാങ്ങി തിന്നാനാണെങ്കിൽ ഞങ്ങളെ ക്ഷണിക്കാതിരിക്കുക. കാരണം എന്റെ ഭാര്യക്കോ മക്കൾക്കോ കുടുംബത്തിനോ ഇത് വരെ ഭിക്ഷ തെണ്ടി കൊണ്ട് പോയി കൊടുത്തിട്ടില്ല. അങ്ങനെ ഒരു വിധി വരാതിരിക്കാൻ പ്രാർത്ഥിക്കാം.

ഒന്ന് കൂടി വ്യക്തമായി പറയാം,
ഇരന്നു വാങ്ങി തിന്നുന്ന ബഫെ ആണെങ്കിൽ ദയവു ചെയ്ത് ഞങ്ങളെ വിളിക്കാതിരിക്കുക!

(ചില അനുഭവങ്ങളും വിഷമങ്ങളും കാരണം)

പേരെടുക്കാൻ ആയിരങ്ങളെ വിളിക്കുന്നതിനേക്കാൾ നൂറു പേരെ വിളിച്ചു മാന്യമായി സത്കരിച്ചു മനസ്സ് നിറച്ചു വിടുക!

✍️റാഫി തയ്യിൽ. പെരിങ്ങാവ്

06/12/2024

ബാബരി മരിച്ചതല്ല,
കൊന്നതാണ് ...

ഇന്ത്യൻ മതേതരത്വത്തിന്റെ മരണം.
ഡിസംബർ 6 - 1992

കൊന്നത് RSS തന്നെ. കൂട്ടുപ്രതികളിൽ കോൺഗ്രസ്സുമുണ്ട്. വെറുതെയങ്ങ് വീണുടഞ്ഞതല്ല ആ താഴികക്കുടങ്ങൾ. തകർത്തതാണവർ. ആരെന്ന ചോദ്യത്തിനുത്തരം നരസിംഹ റാവുവെന്ന തേർഡ് ക്ലാസ്സ്‌ വർഗീയ വാദിയുടെ പേര് കൂടി ചേർക്കപ്പെടണം. പാകിസ്ഥാനോട്‌ യുദ്ധം ചെയ്തു ജയിച്ചു വന്ന, ശ്രീലങ്ക ഉൾപ്പെടെ അയൽ രാജ്യങ്ങളിലേക്ക് സഹായവുമായി പോയിട്ടുള്ള ഭാരതത്തിന്റെ ധീര പട്ടാളക്കാർ നോക്കു കുത്തികളായത് അല്ലെങ്കിൽ നോക്കു കുത്തികളാക്കിയത് നരസിംഹ റാവുവിന്റെ ഭരണ കൂടമാണ്. അത് കൊണ്ട് തന്നെ ബാബരിയെ ഓർക്കുമ്പോൾ RSS എന്ന പ്രത്യക്ഷ വർഗീയത മാത്രമല്ല കോൺഗ്രസ്സിന്റെ ഒളിഞ്ഞിരിക്കുന്ന വർഗീയതയും കണ്ടില്ലെന്ന് നടിക്കാനാവില്ല. വികസനം പറയാനില്ലാത്ത ബിജെപി സർക്കാർ ഒരു ബാബരി കൊണ്ടവസാനിപ്പിക്കുന്നതല്ല ഈ വർഗീയ ബോധം. കുഴിച്ചും മാന്തിയും ഇവിടെ ഇനിയും പള്ളികളും ദർഗകളും തകർത്തു കൊണ്ടേയിരിക്കും. അജ്മീർ ദർഗയുടെ മേൽ അവകാശ വാദമുന്നയിക്കുമ്പോൾ മോദിയെന്ന നിങ്ങളുടെ നേതാവ് കഴിഞ്ഞ കൊല്ലം അവിടെ പുതപ്പിച്ച ആ പട്ടിന്റെ തൂവാല എടുക്കാൻ മറന്നു പോകരുതെന്ന് ഓർമ്മപ്പെടുത്താം. കഴിഞ്ഞ കാലങ്ങളിൽ എല്ലാറ്റിനും മൗനമായി പിന്നിൽ തന്നെ കോൺഗ്രസ്സുമുണ്ടായിരുന്നു. ഇനിയും അങ്ങനെ തന്നെ ആയിരിക്കുകയും ചെയ്യും. പള്ളിയുടെ മിനാരങ്ങൾ തകർത്തു കഴിഞ്ഞപ്പോൾ അത് വരെ മൗനിയായ റാവുവെന്ന വർഗീയ വാദി ഈ രാജ്യത്തോട് പറഞ്ഞ ഒരു വാക്കുണ്ട്. അത് ഇങ്ങനെ വായിച്ചെടുക്കാനാവും. പളളി തകർത്ത അതെ സ്ഥലത്ത് പള്ളി പുന:ർനിർമ്മിച്ചു നൽകും. അന്ന് വാഗ്ദാനം നൽകിയ കോൺഗ്രസ്‌ ഇന്നും ഈ രാജ്യത്തുണ്ട്. അയോധ്യയുടെ ആ മണ്ണും അവിടെ തന്നെയുണ്ട്. പക്ഷെ, പള്ളി മാത്രം എവിടെയെന്ന് അറിയില്ല. ഒരു സുപ്രഭാതത്തിൽ ചിലർ ചേർന്ന് തകർത്തതല്ല. അഞ്ചു നൂറ്റാണ്ടോടടുത്ത കാലം മുസ്ലിംകൾ ആരാധിച്ചു വന്ന പള്ളിക്കകത്ത് ഒരു വിഗ്രഹം സ്വയംഭൂവായതുമല്ല. ചിലർ കൊണ്ട് വന്ന് വെച്ചതാണ്. അത് കോൺഗ്രസ്സ് ഭരിക്കുന്ന കാലത്ത് തന്നെ. അവിടെ ആരാധനക്ക് തുറന്നു കൊടുത്തതും കോൺഗ്രസ്സ് തന്നെ. പിന്നീട് വർഗീയ സംഘട്ടനം നടത്തി കൊണ്ട് രഥയാത്ര നടത്താൻ അനുവാദം കൊടുത്തതും കോൺഗ്രസ്സ്. പിന്നീട് പള്ളി പൊളിക്കുമ്പോൾ ഞാനൊന്നുമറിഞ്ഞില്ലെന്ന് പുറം തിരിഞ്ഞിരുന്നതും അതേ കോൺഗ്രസ്സ്.

അത് കൊണ്ട് തന്നെ വീണ്ടും പറയുന്നു ഓരോ ഡിസംബർ ആറും ചർച്ച ചെയ്യപ്പെടുമ്പോൾ RSS മാത്രമല്ല, കോൺഗ്രസ്സും പറഞ്ഞു കൊണ്ടിരിക്കണം.

✍️റാഫി തയ്യിൽ. പെരിങ്ങാവ്

18/11/2024

ആർത്തലച്ചു വന്ന മരങ്ങളും മലകളും പാറക്കൂട്ടങ്ങളും തകർത്തെറിഞ്ഞ വയനാടിന്റെ മണ്ണിൽ ഒരുപിടി കനിവിനായി കേഴുന്ന മനുഷ്യർക്ക് മുന്നിൽ പ്രതീക്ഷയുടെ തിരിനാമ്പ് കൊളുത്തി കടന്നുപോയ ഇന്ത്യയുടെ പ്രധാനമന്ത്രി. നൈസാ മോളെ ഒക്കത്തെടുത്ത് നിങ്ങൾ പറഞ്ഞത് കളവായിരുന്നു. ഈ നാടിന്റെ വേദനയെ നിങ്ങൾ പുച്ഛിക്കുകയായിരുന്നു. രാഷ്ട്രീയ വിദ്വേഷത്തിന്റെ നിറം ചാർത്തുകയായിരുന്നു. അര സഹസ്രം ആളുകൾ പൊലിഞ്ഞു പോയിടത്ത് എഴുതിക്കൊടുത്ത തിട്ടൂരം വായിച്ച് കെ വി തോമസ്. നിങ്ങളോട് ഒന്നേ പറയാനുള്ളൂ. കേരളവും ഇന്ത്യയിലാണ്. രാഷ്ട്രീയ പക കൊണ്ട് ജയിച്ചടക്കാൻ നിങ്ങൾക്ക് സാധിക്കില്ല. അവരെ ചേർത്തു പിടിക്കാൻ ഈ മലയാള നാട് ഒന്നായുണ്ട്. ഏതെങ്കിലും കാവി പടയുടെ ഔദാര്യം കാത്തുനിൽക്കാതെ ഞങ്ങൾ തിരിച്ചുപിടിക്കുക തന്നെ ചെയ്യും. പ്രളയ കാലത്ത് തന്നതിനെല്ലാം വിലയിട്ട് എണ്ണി വാങ്ങിയ രാജാവിൽ നിന്ന് അതിലപ്പുറം പ്രതീക്ഷിച്ചു പോയതാവാം മലയാളി ചെയ്ത തെറ്റ്. കോവിഡും പ്രളയവും അതിജീവിച്ച ഈ മലയാളമണ്ണ് ഇതും തിരിച്ചു പിടിക്കും.

സർവസ്സ്വവും നഷ്ടപ്പെട്ട ഒരു നാടിന്റെ മുന്നിൽ പ്രതീക്ഷയുടെ നാമ്പുകൾ കൊളുത്തിയത് എന്തിനാണ് പ്രഭോ ...
മറ്റു സംസ്ഥാനങ്ങൾക്ക് നൂറുകണക്കിന് കോടികൾ കൊടുക്കാമെങ്കിൽ ഈ കേരളത്തിന് കൊടുക്കാത്തതിന്റെ മാനദണ്ഡമെന്തെന്ന് അറിഞ്ഞാൽ നന്നായിരുന്നു.
പാർട്ടി ഫണ്ടിൽ നിന്നുള്ള ഔദാര്യമല്ല, ജനങ്ങൾ നൽകുന്ന നികുതിപ്പണത്തിൽ നിന്നുള്ള അവകാശമാണ് ചോദിക്കുന്നത്.
ആരുടെയും തറവാട് വിഹിതത്തിൽ നിന്ന് കേരളത്തിന് എന്തെങ്കിലും വേണമെന്നല്ല ചോദിച്ചത്.

കണക്ക് ചോദിക്കാതെ ഒരു കാലവും കടന്നു പോയിട്ടില്ല

എക്കാലവും അങ്ങനെ തന്നെ.
ഇക്കാലവും ...

✍️റാഫി തയ്യിൽ. പെരിങ്ങാവ്

16/11/2024

ഞാൻ സൊല്ലട്ടുമാ!

ഒരിക്കൽ ഒരു കച്ചവട സംഘം കാട്ടിലൂടെ യാത്ര ചെയ്യുകയായിരുന്നു. ഒരു മലഞ്ചെരുവിലെത്തിയപ്പോൾ അവർ ഒരു സന്യാസിയെ കണ്ടു. അയാൾ അവരോട് പറഞ്ഞു ... ... ...

അവരെന്തെങ്കിലും പറഞ്ഞോട്ടെ,
നമുക്കെന്താ ...

നമ്മുടെ കഥകൾ തന്നെ ഒരു പാടുണ്ട്. പിന്നെന്തിന് മറ്റൊരു കഥയും തേടി പോകണം ?

✍️റാഫി തയ്യിൽ. പെരിങ്ങാവ്

18/10/2024

വെള്ളവും വളവും കൊടുത്തു വളർത്തിയ പാർട്ടിയെ അധികാരം കിട്ടാത്തതിന്റെ പേരിൽ തള്ളി താഴെയിട്ട ഒരാളെ തന്നെ പാർട്ടി സ്ഥാനാർഥിയാക്കി ഇടത് മുന്നണി എന്ത് സന്ദേശമാണ് ഈ സമൂഹത്തിന് നൽകുന്നത്. കൊടി പിടിച്ചും അടി വാങ്ങിച്ചും നടന്ന സഖാക്കൾക്കൊന്നുമില്ലാത്ത എന്ത് മേന്മയാണാവോ ഇയാൾക്കുള്ളത് ? രണ്ടാം സ്ഥാനത്ത് ബിജെപി നിൽക്കുന്ന ഒരു മണ്ഡലത്തിലാണ് വോട്ട് വിഭജനത്തിന് ആക്കം കൂട്ടുന്ന ഈ നിലപാടുമായി പോകുന്നതെന്ന് ഓർക്കുന്നത് നല്ലതാണ്. ഒരു പക്ഷെ ബിജെപി അവിടെ ജയിക്കാനിടവന്നാൽ അതിന്റെ പൂർണ്ണ ഉത്തരവാദിത്തം സരിനെന്ന അധികാര മോഹിക്കും അയാളെ കൊണ്ട് നടക്കുന്ന ഇടതു പക്ഷത്തിനുമായിരിക്കുമെന്നതിൽ തർക്കമില്ല.

✍️റാഫി തയ്യിൽ. പെരിങ്ങാവ്

03/10/2024

വിചിന്തനം നല്ലതാണ് !!!

പ്രിയപ്പെട്ട മനാഫിനോട്
,
നിങ്ങളുടെ നല്ല പ്രവർത്തനങ്ങൾ ഈ നാട് രണ്ട് കൈയും നീട്ടി സ്വീകരിച്ചു.
നന്മയൂറുന്ന വാക്കുകൾ ഇവിടെ സ്നേഹപൂർവ്വം ഉൾക്കൊണ്ടു.
കരുണ മുറ്റിയ മനസ്സിനെ ഈ നാട് നെഞ്ചോട് ചേർത്തു . നിങ്ങളുടെ നിശ്ചയ ദാർഢ്യമില്ലായിരുന്നെങ്കിൽ അർജുൻ ഒരു പക്ഷെ ഇന്നും ആ നിലയില്ലാ കയത്തിലെ മൺ കൂനക്കടിയിൽ അന്തിയുറങ്ങേണ്ടി വരുമായിരുന്നുവെന്ന് ഈ ലോകത്തിന് ബോധ്യമുണ്ട്. നിങ്ങളുടെ ഓട്ടപ്പാച്ചിലുകളില്ലായിരുന്നെങ്കിൽ മാധ്യമ ശ്രദ്ധ പോലും ഇത്രമേൽ അവിടേക്ക് പതിയുമായിരുന്നില്ലെന്ന് ഈ നാടിന് തികഞ്ഞ അറിവുമുണ്ട്.
പക്ഷെ,
ഇപ്പോൾ നിങ്ങൾ അധഃമനായിരിക്കുന്നു. വെറുക്കപ്പെട്ടവനായിരിക്കുന്നു.
നിങ്ങളോട് സൗഹൃദപൂർവ്വം പറഞ്ഞോട്ടെ, നിങ്ങൾ പിൻവാങ്ങണം. ന്യായീകരിച്ചു വില കളയരുത്. സ്വീകരണ കേന്ദ്രങ്ങളിൽ കയറിയിറങ്ങരുത്. പേര് കൊത്തിയ ഒരു ഫലകം കൊണ്ട് വീട്ടാനാവുന്നതല്ല ഈ നാടിന് നിങ്ങളോടുള്ള കടപ്പാട്. ഇവിടുത്തെ കോടാനുകോടി ജനങ്ങളുടെ മനസ്സിൽ ഉറച്ചു പോയ പേരാണ് മനാഫ്. അത് എക്കാലത്തും അങ്ങനെ നില നിൽക്കട്ടെ. ഇനിയും ചിലർക്ക് വേണ്ടി വായിട്ടലച്ച് ചാനലുകൾക്ക് റീച്ച് കൂട്ടാൻ ചർച്ചകൾക്ക് നിന്ന് കൊടുക്കരുത്. ഒരൊറ്റ വാക്ക് ഞാൻ അർജുൻ എന്ന എന്റെ സഹോദരന് വേണ്ടിയാണ് ഇത്രയും ചെയ്തത്. അവനെ തിരിച്ചു കിട്ടി. ഇനി വിവാദങ്ങൾക്കില്ല. എന്ന് പറഞ്ഞു പിൻവാങ്ങാം. നിങ്ങളെ ഈ ലോകം എന്നും നന്ദിയോടെ ഓർക്കും. നന്ദിയോടെ മാത്രം.

സ്നേഹ പൂർവ്വം കുടുംബാംഗങ്ങളോട് ,

അർജുൻ എന്ന നമ്മുടെ, അല്ല നിങ്ങളുടെ സഹോദരൻ നിലയില്ലാ കയത്തിലെ മൺ കൂനക്കടിയിൽ കിടന്നത് രണ്ടര മാസത്തോളമാണ്. ആദ്യ മണിക്കൂറുകളിൽ അവിടെ നിശ്ചലമായിരുന്ന റെസ്ക്യൂ സംവിധാനങ്ങളെ ബൂസ്റ്റ്‌ ചെയ്ത് ചാനൽ ക്യാമറകളെ അവിടേക്ക് എത്തിക്കാൻ കാരണക്കാരനായത് മനാഫ് എന്ന വ്യക്തിയാണ്. മനാഫ് നിങ്ങൾ പറയുന്നത് പോലെ സാമ്പത്തിക ലാഭം ലക്ഷ്യമാക്കി പ്രവർത്തിച്ചുവെങ്കിൽ അതിനെ കുറിച്ച് അന്വേഷണത്തിന് ആവശ്യപ്പെടണം. ബൈക്ക് മനാഫിന്റെ വീട്ടിൽ ആണെന്ന് നിങ്ങൾ പറയുന്നു. അത് അർജുന്റെത് അല്ലെന്ന് മനാഫ് പറഞ്ഞു കേട്ടിട്ടില്ല. അത് തിരിച്ചു വേണമെന്ന് ആവശ്യപ്പെടണം. വിട്ടു കിട്ടിയില്ലെങ്കിൽ പോലീസിൽ പരാതി നൽകണം. പണപിരിവ് നടത്തി എന്ന് നിങ്ങൾ പറയുന്നു. പണം കൊടുത്ത ഒരാളും ഇത് വരെ ആ അവകാശ വാദമുന്നയിച്ചിട്ടില്ല. പിന്നെ നിങ്ങൾ പറയുന്ന മറ്റൊരു കാര്യം തിരച്ചിൽ വഴി തിരിച്ചു വിട്ടു എന്നാണ്. അത് എഴുപത്തി രണ്ട് ദിവസവും പറയാതെ അർജുനെ കിട്ടിയതിന്റെ ശേഷം മാത്രം പറയുന്നത് വ്യക്തമാകുന്നില്ല. എന്തൊക്കെയായാലും ഈ നാട് നിങ്ങളെ അത്രമേൽ സ്നേഹിക്കുന്നുണ്ട്. പൊതു ചർച്ചകളിൽ നിന്ന് മാറി നിന്ന് നിങ്ങൾ വിശ്വാസ്യത വീണ്ടെടുക്കണം. നിയമ സംവിധാനങ്ങളോടൊപ്പം നിന്ന് ഇതിലെ പുഴുക്കുത്തുകൾ പുറത്തിടാൻ നിങ്ങൾ തയ്യാറാകണം. നിങ്ങളെ ഒറ്റക്കാക്കില്ല. ന്യായ വാദങ്ങൾക്ക് ഞങ്ങളുണ്ട് കൂടെ.

സർക്കാരിനോട് വിനയപൂർവ്വം,

അർജുൻ വിഷയത്തിൽ മനാഫും കുടുംബവുമായി ഉടലെടുത്ത അസ്വാരസ്യങ്ങൾ പരിഹരിക്കാൻ സമഗ്രമായ അന്വേഷണം വേണം. മനാഫ് പണപ്പിരിവ് നടത്തിയിട്ടുണ്ടെങ്കിൽ അത് കണ്ടെത്തി പുറത്ത് കൊണ്ട് വരണം. ബൈക്ക് വിട്ടു കൊടുക്കാൻ വിസമ്മതിക്കുന്നുണ്ടെങ്കിൽ FIR ഇട്ട് കേസ് എടുക്കണം. കുടുംബം സ്വാർത്ഥതക്ക് വേണ്ടി പറയുകയാണെങ്കിൽ അവർക്കെതിരെയും ശക്തമായ നടപടി വേണം. ഇതിന്റെ പിന്നിൽ ഏതെങ്കിലും രാഷ്ട്രീയ, മത വിഭാഗ വർഗീയ കക്ഷികൾ ഉണ്ടെങ്കിൽ അതും സമഗ്ര അന്വേഷണത്തിലൂടെ വെളിച്ചത്ത് കൊണ്ട് വരണം.

എല്ലാവരോടും ബഹുമാനപുരസ്സരം,

നമ്മൾ സ്നേഹിച്ചത് അർജുനെയാണ്. അവനെ നമുക്ക് എന്നെന്നേക്കുമായി നഷ്ടപ്പെട്ടു. ഇനി നമുക്ക് അവനുവേണ്ടി പ്രാർത്ഥിക്കാം. ഗോസിപ്പുകൾക്കും ചാനൽ ചർച്ചകൾക്കും വിട നൽകാം. അർജുനെക്കാൾ വലുതല്ലല്ലോ മറ്റൊന്നും.

എല്ലാം നല്ലതിനാവട്ടെ. സത്യം ജയിക്കട്ടെ ...

✍️റാഫി തയ്യിൽ. പെരിങ്ങാവ്

27/09/2024

ചിന്തകൾ നല്ലതാണ്.... ❓

നിലമ്പൂരിലെ സഖാക്കളെ കുറിച്ച് വാ തോരാതെ സംസാരിക്കുന്ന പി.വി അൻവർ ജനൽ വഴി അകത്തേക്ക് കല്ലെറിയാനുള്ള ശ്രമമാണ് നടത്തുന്നത്. ചില വീഴ്ചകളിലെങ്കിലും രക്ഷപെടാനുള്ള വ്യഗ്രത വാർത്താ സമ്മേളനങ്ങളിൽ മുഴച്ചു കാണാം. പറഞ്ഞതിൽ സത്യമില്ലെന്നല്ല. മിഥ്യകളിലേക്കെത്താനുള്ള കുറുക്കു വഴികളായി സത്യത്തെ ഉപയോഗിച്ചു എന്നതാണ് അൻവർ ചെയ്യുന്നത്. സംസാരങ്ങളിൽ പിണറായി മുഖ്യമന്ത്രിയാകണം. തനത് നിലവാരത്തിൽ സംസാരിക്കണം. പാർട്ടി നിലപാട് പറയാൻ അവിടെ സെക്രട്ടറിയും ഉത്തരവാദിത്വമുള്ളവരുമുണ്ട്. RSS നെതിരെ പറയാൻ മാത്രം നിങ്ങളുടെ ചങ്കൂറ്റം വളർന്നിട്ടില്ലെന്ന് സമൂഹം അടക്കം പറയുന്നുണ്ട്. അൻവർ കോൺഗ്രസ്സുകാരനാണെന്ന് നിങ്ങൾ പറയേണ്ട വാക്കല്ല. അജിത് കുമാറിനെ കുറിച്ചും സുജിത് ദാസിനെ കുറിച്ചും പറയാത്തത് വെറുതെ അല്ലെന്ന് ജനം പറഞ്ഞു കേൾക്കുന്നുണ്ട്. അൻവർ നിഷ്കളങ്കനാണെന്ന് ഇവിടെ ആർക്കും അഭിപ്രായമില്ല. അയാളുടെ ബിസിനസ്സിലും ഇടപാടുകളിലും കോട്ടം തട്ടിയപ്പോഴാണ് നാവുയർന്നത് എന്നും സമൂഹത്തിന് നന്നായി ബോധ്യമുള്ളതാണ്. വെടക്കാക്കി തനിക്കാക്കാനുള്ള എളിയ ശ്രമം മാത്രമാണ് ഇപ്പോൾ അൻവർ നടത്തിക്കൊണ്ടിരിക്കുന്നത്. പക്ഷെ അൻവർ നിങ്ങൾ ആളും തരവും നോക്കാതെയിറങ്ങിയത് കൊണ്ട് തന്നെ വലിയ വില നൽകേണ്ടി വന്നേക്കും.

ഒരു പുതിയ പാർട്ടി പിറവിയെടുക്കുന്നതും കാത്ത് പ്രതീക്ഷയോടെ ഇവിടെ കാണും...

✍️റാഫി തയ്യിൽ. പെരിങ്ങാവ്

26/09/2024

കോട്ടകൾ കുലുങ്ങില്ല. കുലുക്കാൻ മാത്രം പ്രാപ്തിയുള്ളവരാരും ഇല്ലെന്നല്ല. അത്രമേൽ കഴിവുറ്റവർ ജീവിച്ചിരിപ്പുണ്ടായിരുന്നില്ല. അൻവർ പറഞ്ഞു തുടങ്ങിയയിടത്ത് പാർട്ടിക്ക് എന്ത് വേണമെങ്കിലും പറയാം. പക്ഷെ ഒന്നോർക്കുക. അൻവറിന്റെ വാക്കുകൾ ഉൾകൊള്ളുന്ന ഒരു ജന സാമാന്യമുണ്ട്. അവരോട് മറുപടി പറയാനുള്ള ബാധ്യത ഈ സർക്കാരിനും പാർട്ടിക്കുമുണ്ട്. ശരിയും ശരികേടുകളും വേർ തിരിച്ചു കൊടുക്കേണ്ടത് നിങ്ങളാണ്. ആഭ്യന്തര മന്ത്രി പരാജയമാണെന്ന് ആദ്യമായി പറഞ്ഞു കേട്ടതല്ല. ആദ്യ പിണറായി സർക്കാർ വന്ന കാലം തൊട്ടേ ഇത് പറഞ്ഞുകൊണ്ടിരിക്കുന്നുണ്ട്. ആഭ്യന്തരം ഭരിക്കുന്നത് RSS ആണെന്ന്. ഇന്നത് അൻവർ പറഞ്ഞു എന്നേയുള്ളൂ. മുഖ്യമന്ത്രി ധാർഷ്ട്യം അവസാനിപ്പിക്കണം. മനുഷ്യത്വം പുൽകണം. എന്തൊക്കെ ന്യായീകരിക്കാൻ ശ്രമിച്ചാലും ഇവിടെ കേട്ടു തുടങ്ങിയ പലതും ജനങ്ങൾ പറയാനാഗ്രഹിച്ചതാണ്. ജനങ്ങൾക്ക് ബോധ്യമുള്ളതാണ്. അവർക്ക് കഴിയാത്തത് അൻവർ പറഞ്ഞപ്പോൾ അവർ അയാൾക്കൊപ്പം നിന്നു. ഇനി അയാൾ കോൺഗ്രസ്‌ ആയാലും ലീഗ് ആയാലും അയാളിൽ സത്യമുണ്ടെന്ന് പാർട്ടിക്കും സർക്കാരിനും ബോധ്യപ്പെട്ടില്ലെങ്കിലും ജനങ്ങൾക്ക് ബോധ്യമുണ്ട്. പാർട്ടി നേതൃത്വം അഹങ്കാരം വെടിഞ്ഞ് ജനപക്ഷത്ത് നിൽക്കണമെന്ന് അപേക്ഷ, പ്രതീക്ഷ ...
ഉണ്ടായിരുന്ന ബംഗാളും ത്രിപുരയും പോയി ഇനി ബാക്കിയുള്ള ഈ കച്ചിത്തുരുമ്പ് കൂടി ... ❓😭😭😭
ഏതായാലും ഇത് ഒരു കൊടുങ്കാറ്റായി മാറുമെന്ന് തീർച്ച.
ബാക്കിയുള്ളത് ശുഭ പ്രതീക്ഷ ...

✍️റാഫി തയ്യിൽ. പെരിങ്ങാവ്

25/09/2024

ഓനെ എടുത്ത ശേഷം നിങ്ങൾ ലോറിയും മരവും പുഴയിലെറിഞ്ഞോളൂ!

ലോറി ഉടമ #മനാഫ് പറഞ്ഞ വാക്കുകളാണിത്. വർഗീയത പറഞ്ഞു വിഭാഗീയത വളർത്താൻ ശ്രമിച്ചവർക്ക് മുന്നിൽ പറഞ്ഞു കൊണ്ടേയിരിക്കണം. ഇതാണ് കേരളം. ഇങ്ങനെയാണ് കേരളം. അർജുൻ മരിച്ചു പോയിരിക്കാമെന്ന് ബോധ്യം വന്നിട്ടും അവനെയും കൊണ്ടല്ലാതെ ഞാൻ നാട്ടിലേക്ക് വരില്ലെന്ന് ആ അമ്മക്ക് വാക്ക് കൊടുത്ത് തന്റെ പ്രിയപ്പെട്ടവന് വേണ്ടി കഴിഞ്ഞ എഴുപത്തൊന്ന് നാളും വിശ്രമമില്ലാതെ ഓടി നടന്ന ഓഫീസുകളിൽ മുട്ടിയുണർത്തിയ സ്നേഹത്തിന്റെ സൗഹൃദത്തിന്റെ പേരാണ് #മനാഫ്.
കലഹം കൂട്ടിയവർ ഓണവും പെരുന്നാളും മറ്റ് ആഘോഷങ്ങളും കഴിച്ചു. പക്ഷെ, നേരായുറങ്ങാതെ വയറുനിറച്ചുണ്ണാതെ കരഞ്ഞും നിലവിളിച്ചും കലഹിച്ചും നടന്ന മനുഷ്യന്റെ പേരാണ് #മനാഫ്.

മനാഫ്, നിങ്ങളെ വർഗീയ വാദിയാക്കിയ കള്ളക്കടത്തുകാരനാക്കിയ വെറുപ്പിന്റെ ഉപാസകരോട് ഗുഡ്ബൈ ...

ആഹ്ലാദമല്ല, ആശ്വാസമാണ്
അർജുൻ നിങ്ങൾക്ക് പ്രണാമം.

✍️റാഫി തയ്യിൽ. പെരിങ്ങാവ്

Rafi Thayyil. Pgv

10/01/2025

06/01/2025

15/12/2024

06/12/2024

18/11/2024

16/11/2024

18/10/2024

03/10/2024

27/09/2024

26/09/2024

25/09/2024

Address

Telephone

Website

Alerts

Contact The Business

Shortcuts

Share

Category