15/07/2024
മഴക്കാലമാണ്. വൈദ്യുതി അപകടങ്ങൾ വർധിച്ചുവരുന്ന സാഹചര്യത്തിൽ സുരക്ഷാ മാനദണ്ഡങ്ങൾ പാലിക്കുന്നതിൽ ജാഗ്രത പുലർത്തേണ്ടതുണ്ട്. വീടുകളിലെ വയറിങ്ങുകളിലുള്ള ലീക്ക്, ഭിത്തികളിലെ ഈർപ്പം, അലക്ഷ്യമായി കൈകാര്യം ചെയ്യുന്ന എക്റ്റൻഷ്യനുകൾ, കൃത്യമായ എർത്തിങ്ങ് സിസ്റ്റത്തിൻ്റെ അഭാവം തുടങ്ങി നിരവധി കാര്യങ്ങൾ ശ്രർദ്ധിക്കേണ്ടതുണ്ട്. കുട്ടികളും പ്രായമുള്ളവരുമുള്ള വീടുകളിൽ മാത്രമല്ല സാധാരണ ഗതിയിൽ ഏതൊരു വീടുകളിലും ഇവയൊക്കെ ശ്രദ്ധയോടെ കൈകാര്യം ചെയ്യേണ്ട കാര്യങ്ങളാണ്. പലപ്പോഴും അജ്ഞതയെക്കാൾ നമ്മളുടെ അശ്രദ്ധയും ഉദാസീനതയുമാണ് അപകടങ്ങൾ ക്ഷണിച്ചു വരുത്തുന്നത്.
ഈ കൊച്ചു കേരളത്തിൽ മാത്രം 265 വൈദ്യുത അപകടങ്ങളാണ് രണ്ടായിരത്തി ഇരുപത്തിമൂന്നു മുതൽ ഇന്നേവരെയുള്ള ചുരുങ്ങിയ കാലയളവിൽ റിപ്പോർട്ട് ചെയ്തത്. അതിൽ 121 പേരുടെ ജീവൻ നഷ്ടമായി. അനധികൃത വൈദ്യുത ജോലികൾക്കിടെ 10 പേരും ഉപഭോക്തൃ പരിസരത്തെ എർത്ത് ലീക്കേജ് കാരണം 17 പേരും വൈദ്യുതി ലൈനിനു സമീപം ലോഹനിർമ്മിതമായ തോട്ടിയും ഏണിയുമുപയോഗിക്കുമ്പോൾ ഷോക്കേറ്റ് 15 പേരും വൈദ്യുത വേലിയിൽ നിന്ന് ഷോക്കേറ്റ് 2 പേരും മരണമടഞ്ഞിട്ടുണ്ട്.
ഉത്സവങ്ങളോടനുബന്ധിച്ച് ദീപാലങ്കാരം നടത്തുമ്പോഴാണ് 7 പേർ വൈദ്യുതാഘാതമേറ്റ് മരിച്ചത്. വൈദ്യുത സുരക്ഷാ മാനദണ്ഡങ്ങൾ പാലിച്ചിരുന്നുവെങ്കിൽ ഒഴിവാക്കാമായിരുന്ന അപകടങ്ങളാണ് ഇതിലേറെയും.
വൈദ്യുത വയറിങ്ങിന്റെ തുടക്കത്തിൽത്തന്നെ ആർ.സി.സി.ബി (ഇ.എൽ.സി.ബി) ഘടിപ്പിക്കുന്നതിലൂടെ വൈദ്യുത ലീക്കേജ് കാരണമുള്ള അപകടം ഒഴിവാക്കാം. വൈദ്യുത ഉപകരണങ്ങളുടെ ലോഹഭാഗങ്ങളില് ഇൻസുലേഷൻ തകരാറുകൊണ്ടോ മറ്റോ അവിചാരിതമായി വൈദ്യുത പ്രവാഹമുണ്ടായാല് ആ ഉപകരണം പ്രവർത്തിപ്പിക്കുന്ന വ്യക്തിക്ക് വൈദ്യുതാഘാതമേൽക്കാൻ വലിയ സാദ്ധ്യതയുണ്ട്. ഇത്തരം സന്ദർഭങ്ങളിൽ ആ ഉപകരണത്തിലേക്കും സർക്യൂട്ടിലേക്കുമുള്ള വൈദ്യുതി പ്രവാഹം ഉടനടി നിർത്തി വൈദ്യുതാഘാതം ഒഴിവാക്കുന്നതിനുള്ള സംരക്ഷണോപാധിയാണ് ആർ.സി.സി.ബി. നമ്മുടെ നാട്ടിൽ പൊതുവെ ഇ.എൽ.സി.ബി (Earth Leakage Circuit Breaker) എന്നറിയപ്പെടുന്നത് യഥാർഥത്തിൽ ആർ.സി.സി.ബി എന്ന ഉപകരണമാണ്.
ഉത്സവാഘോഷങ്ങളുടെ ഭാഗമായി ദീപാലങ്കാരം നടത്തുമ്പോഴും ജാഗ്രത വേണം. ഗുണമേന്മ കുറഞ്ഞ പ്ലാസ്റ്റിക് ഇൻസുലേറ്റഡ് വയറുകളും അനുബന്ധ ഉപകരണങ്ങളും ഉപയോഗിക്കുന്നത് അപകടംക്ഷണിച്ചുവരുത്തും. ലോഹനിർമിതമായ പ്രതലങ്ങളിൽ സുരക്ഷാ മാനദണ്ഡങ്ങൾ പാലിച്ചുമാത്രമേ ദീപാലങ്കാരം നടത്താവൂ.
വയറിൽ മൊട്ടുസൂചി/സേഫ്റ്റി പിൻ കുത്തി കണക്ഷനെടുക്കുന്നതും വയർ ജോയിന്റുകൾ ശരിയായ തരത്തിൽ ഇൻസുലേറ്റ് ചെയ്യാതിരിക്കുന്നതും അപകടകരമാണ്. കെ.എസ്.ഇ.ബിയുടെ വൈദ്യുത പ്രതിഷ്ഠാപനങ്ങൾക്ക് സമീപം അലങ്കാര പ്രവർത്തനങ്ങൾ നടത്തുന്നതിനുമുമ്പ് അതത് സെക്ഷൻ ഓഫിസിൽ നിന്ന് അനുവാദം വാങ്ങേണ്ടതുണ്ട്. ഇലക്ട്രിക്കൽ ഇൻസ്പെക്ടറേറ്റിന്റെ അംഗീകാരമുള്ള കോൺട്രാക്ടറെ മാത്രമേ ദീപാലങ്കാര പ്രവൃത്തികൾക്ക് ചുമതലപ്പെടുത്താവൂ.
വൈദ്യുത ലൈനുകൾക്ക് സമീപം ഒരു കാരണവശാലും ലോഹനിർമ്മിതമായ തോട്ടിയോ ഏണിയോ ഉപയോഗിക്കരുത്. 130 ലേറെ പേർക്കാണ് കഴിഞ്ഞ 5 വർഷത്തിനിടയിൽ ഇത്തരത്തിൽ ഷോക്കേറ്റ് മരണം സംഭവിച്ചത്. വൈദ്യുതോപകരണങ്ങളിൽ നിന്ന് ഷോക്കേറ്റുള്ള അപകടം ഒഴിവാക്കാൻ നിർബന്ധമായും വയറിങ്ങിന്റെ തുടക്കത്തിൽ ആർ.സി.സി.ബി ഘടിപ്പിക്കണം. അതു പോലെ തന്നെ പ്രധാനമാണ് ഉത്സവാഘോഷങ്ങൾക്കും മറ്റ് ഇവൻ്റുകൾക്കും ജനറേറ്റേറുകൾ ഉപയോഗിക്കുന്നതും. മതിയായ സുരക്ഷ സജീകരണങ്ങൾ ഒരുക്കാതെയും അലക്ഷ്യമായും അശ്രദ്ധയോടെയും നമ്മൾ വരുത്തുന്ന തെറ്റുകളാണ് വലിയ ദുരന്തങ്ങളിലേക്ക് കൊണ്ടെത്തിക്കുന്നത്.
