16/02/2015
*****
ਚੰਡੀਗੜ੍ਹ, 13 ਫਰਵਰੀ-ਚੰਡੀਗੜ੍ਹ ਪੁਲੀਸ ਦੇ ਭਾਰੀ ਸੁਰੱਖਿਆ ਪ੍ਰਬੰਧਾਂ ਅਧੀਨ ਅੱਜ ਸ਼ਹਿਰ ਦੇ ਚਾਰ ਮੁੱਖ ਮਾਲਜ਼ ਵਿੱਚ ਸਿਰਸੇ ਵਾਲੇ ਰਾਮ ਰਹੀਮ ਦੀ ਵਿਵਾਦਿਤ ਫਿਲਮ ਦਿ ਮੈਸੇਂਜਰ (ਐਮਐਸਜੀ) ਰਿਲੀਜ਼ ਹੋਈ। ਫਿਲਮ ਨੂੰ ਕੇਵਲ ਡੇਰੇ ਦੇ ਚੇਲੇ ਹੀ ਦੇਖਣ ਆਏ। ਇਕ ਅੰਦਾਜ਼ੇ ਅਨੁਸਾਰ ਚਾਰ ਮਾਲਜ਼ ਵਿੱਚ ਇਸ ਫਿਲਮ ਦੇ ਅੱਜ ਚੱਲੇ 65 ਸ਼ੋਅ ਦੌਰਾਨ 14,000 ਤੋਂ ਵੱਧ ਵਿਅਕਤੀਆਂ ਨੇ ਫਿਲਮ ਦੇਖੀ।
ਪੁਲੀਸ ਨੇ ਸਵੇਰੇ ਹੀ ਚਾਰੇ ਮਾਲਜ਼ ਦੇ ਦੁਆਲੇ ਨਾਕਾਬੰਦੀ ਕਰਕੇ ਪਾਰਕਿੰਗਾਂ ਵੀ ਖਾਲੀ ਕਰਵਾ ਲਈਆਂ ਸਨ। ਬਠਿੰਡਾ, ਸੰਗਰੂਰ, ਡੱਬਵਾਲੀ, ਸ੍ਰੀ ਮੁਕਤਸਰ ਸਾਹਿਬ ਆਦਿ ਤੋਂ ਫਿਲਮ ਦੇਖਣ ਆਏ ਡੇਰੇ ਦੇ ਚੇਲੇ ਪੁਲੀਸ ਰੋਕਾਂ ਕਾਰਨ ਆਪਣੀਆਂ ਗੱਡੀਆਂ ਮਾਲਜ਼ ਤੋਂ ਦੂਰ ਖੜ੍ਹੀਆਂ ਕਰਕੇ ਪੈਦਲ ਹੀ ਫਿਲਮ ਦੇਖਣ ਪੁੱਜੇ। ਵੱਡੀ ਗਿਣਤੀ ਵਿੱਚ ਚੇਲੇ ਫਿਲਮ ਦੇ ਦ੍ਰਿਸ਼ਾਂ ਵਾਲੀਆਂ ਟੀ-ਸ਼ਰਟਾਂ ਪਾ ਕੇ ਪੁੱਜੇ। ਪੁਲੀਸ ਵੱਲੋਂ ਮਾਲ ਦੀ ਨਾਕਾਬੰਦੀ ਕਰਕੇ ਪਾਰਕਿੰਗਾਂ ਵੀ ਖਾਲੀ ਕਰਵਾਉਣ ਕਾਰਨ ਮਾਲਜ਼ ਵਿੱਚ ਲੱਗੀਆਂ ਹੋਰ ਫਿਲਮਾਂ ਅੱਜ ਮੰਦੀ ਦਾ ਸ਼ਿਕਾਰ ਰਹੀਆਂ ਕਿਉਂਕਿ ਪੁਲੀਸ ਦੇ ਸਖ਼ਤ ਪ੍ਰਬੰਧਾਂ ਕਾਰਨ ਆਮ ਲੋਕਾਂ ਨੇ ਹੋਰ ਫਿਲਮਾਂ ਦੇਖਣ ਲਈ ਮਾਲਜ਼ ਵਿੱਚ ਆਉਣ ਤੋਂ ਸੰਕੋਚ ਹੀ ਕੀਤਾ। ਪੁਲੀਸ ਨੇ ਮਾਲਜ਼ ਨੂੰ ਜਾਣ ਵਾਲੀਆਂ ਸੜਕਾਂ ’ਤੇੇ ਵੀ ਰੋਕਾਂ ਲਾਈਆਂ ਸਨ।
ਡੇਰਾ ਪ੍ਰਬੰਧਕਾਂ ਵੱਲੋਂ ਜਿੱਥੇ ਚੇਲਿਆਂ ਲਈ ਟਿਕਟਾਂ ਬੁੱਕ ਕਰਵਾਈਆਂ ਹਨ ਉਥੇ ਉਨ੍ਹਾਂ ਲਈ ਗੱਡੀਆਂ ਦੇ ਪ੍ਰਬੰਧ ਵੀ ਖੁਦ ਕੀਤੇ ਜਾਪਦੇ ਹਨ। ਡੇਰਾ ਚੇਲੇ ਗੱਡੀਆਂ ਭਰ ਕੇ ਚੰਡੀਗੜ੍ਹ ਫਿਲਮ ਦੇਖਣ ਪੁੱਜੇ।
