18/04/2023
ئایا دەزانیت ئەو یارییانەی بۆ منداڵەکەت دەکڕیت ژەهرێکی شاراوەیە و بەبێ ئاگادار بوونت منداڵەکەت ژەهراوی دەکەیت؟
وەک ئاشکرایە لە ماوەی چەند ساڵی رابردوودا کێشەی تەندروستی و نەخۆشی لە منداڵاندا بە رێژەیەکی زۆر زیادیان کردووە لە هەرێمی کوردستاندا، هۆکارێکی سەرەکیش دەگەرێتەوە بۆ قورقوشم کە کانزایەکی ژەهراوییە و دەبێتە هۆی دروستبوونی کێشەی تەندرووستی توند، بەداخەوە یارییە ژەهراوییەکان بە قورقوشم هێشتا لە هەرێمی کوردستان کێشەیەکی نادیار و نەبیستراوە.
ئەو یارییانە بە تایبەتی بۆ منداڵان مەترسیدارن، کە دەبێتە هۆی دواکەوتنی گەشەکردن و کێشەی فێربوون و کێشەی تەندروستی گەورەی دیکە، بەرکەوتنی قورقوشم بە تایبەتی بۆ منداڵانی خوار تەمەنی شەش ساڵ مەترسیدارە، کە هێشتا جەستەیان لە گەشەکردندایە.
کێشەی ئەو جۆرە یاریانە بابەتێکی نوێ نییە، ساڵانێکە هەواڵە جیهانییەکان باس لەوە دەکەن کە یاری هەرزان ئاستی مەترسیدار لە قورقوشمیان تێدایە. هۆکارەکەشی دەگەرێتەوە بۆ بەکارهێنانی جۆرێک بۆیەی هەرزان کە قورقوشم لەخۆدەگرێت یان مادەی دیکە کە قورقوشمیان تێدایە یارییەکانیان ژەهراوی دەکەن لەکاتی بەرهەمهێنانی یارییەکاندا.
یەکێک لە هۆکارەکانی بەردەوامبوونی ئەو کێشەیە لە هەرێم، بریتییە لەوەی کە هێشتا پشکی شێری ئەو بەرهەمە لە چینەوە هاوردە دەکرێن، کە ڕێسای سەلامەتی ئەو وڵاتە وەک پێویست نییە، هاوکات هۆشیاری بازرگانان و کوالیتی کۆنترۆل لە ئاستی پێویستدا نییە، میدیای کوردیش وەک پێویست بەدواداچوونی نەکردووە بۆ ئەو پرسە.
پێویستە دایک و باوکان منداڵەکانیان دووربخەنەوە لەو مەترسییانە، ئەمەش لە رێگەی دڵنیابوون لە کوالیتی ئەو بەرهەمانەی بۆ منداڵەکانیان دەکرن و دوورکەوتنەوە لە یاری هەرزان و بێ کوالیتی کە لە وڵاتانی دیکەوە هاوردە دەکرێن، بەتایبەت هاوردەکراوی چین، هەر بۆیە لێرەوە دروشمی رادەگەیەنین بە مەبەستی هۆشیارکردنەوەی تاکی کورد لەم مەترسییانە و کەمکردنەوەی کاریگەرییەکانیان.
