28/12/2025
📘 شلون تقرا بيانات القاطع الكهربائي (MCB)؟
🔹 1. التيار المقنن (Rated Current - In)
هذا هو التيار اللي القاطع يتحمله بشكل مستمر بدون ما يفصل أو يطفر.
راح تشوفه مكتوب هيج: 10A – 16A – 32A – 63A.
لازم تختاره مطابق لتيار الدائرة اللي راح يشتغل عليها.
🔹 2. نوع منحنى الفصل (Tripping Curve)
هذا الحرف اللي يجي قبل قيمة التيار، مثل: B10، C16، D32. كل حرف يدل على حساسية مختلفة:
النوع B: كلش حساس، يفصل إذا التيار صار من 3 إلى 5 مرات التيار المقنن. زين للإضاءة والأحمال الخفيفة.
النوع C: يفصل إذا التيار صار من 5 إلى 10 مرات التيار المقنن. مناسب للمكيفات، مضخات المي، والمحركات الصغيرة (الماتورات).
النوع D: يفصل على تيارات كلش عالية (10–20 مرة). هذا للمحركات الكبيرة والتطبيقات الصناعية الثقيلة.
🔹 3. جهد التشغيل (Rated Voltage - Ue)
الجهد اللي الدائرة تشتغل بيه (سواء خط واحد أو ثلاث خطوط).
مكتوب مثلاً: 230V / 400V.
🔹 4. عدد الأقطاب (Poles)
هاي تبين عدد الفازات/الأسلاك اللي القاطع راح يفصلها.
مكتوبة بهالشكل: 1P – 2P – 3P – 4P.
🔹 5. قدرة قطع تيار القصر (Short Circuit Breaking Capacity - Icu)
هاي أهم معلومة! تحدد أقصى تيار قصر (شورت سيركت) القاطع يكدر يفصله بدون ما يتلف أو ينكسر.
مكتوبة مثلاً: 6 kA – 10 kA.
بالبيوت السكنية أغلب الأحيان 6kA كافية، أما المصانع والمعامل فتحتاج 10kA وأكثر.
🔹 6. التردد (Frequency)
تردد الشبكة الكهربائية.
مكتوب عادةً: 50/60 Hz.
⚡ الزبدة والمختصر المفيد
من تقرا قاطع مكتوب عليه هيج C16 – 6kA – 230V – 1P، يعني:
C: قاطع نوع C (حساسية متوسطة).
16: تياره 16 أمبير (التيار المقنن).
6kA: قدرة القطع مالته 6 كيلو أمبير.
230V: يشتغل على جهد 230 فولت.
1P: أحادي الطور (يفصل خط واحد).
منقول للفائدة
