14/01/2026
Læsi krefst fagmennsku en ekki skyndi- og töfralausna
Ummæli nýs barna - og menntamálaráðherra um menntamál hefur valdið mikilli ólgu og óánægju í skólasamfélaginu.
Sú óánægja snýst ekki um andstöðu við breytingar heldur um síendurtekna tilhneigingu til að einfalda flókin viðfangsefni og setja fram lausnir sem hvorki byggja á fagþekkingu né rannsóknum.
Læsi er grundvallarforsenda alls náms, sjálfstæðrar hugsunar og virkrar þátttöku í samfélaginu. Kennsla í læsi er þó hvorki einföld né sjálfgefin. Hún byggir á flóknu samspili málþroska, kennslufræði, mats og íhlutunar. Rannsóknir sýna með skýrum hætti að árangur í læsi næst ekki með skyndiaðgerðum, átaksverkefnum eða hugmyndum sem kynntar eru sem „nýjar lausnir“ án þess að byggja á þekkingu og gögnum.
Það sem skilar raunverulegum árangri er markviss og skipulögð kennsla sem byggir á gagnreyndum og vel rannsökuðum kennsluaðferðum. Slík kennsla er skýr, kerfisbundin og stigvaxandi, byggir á stöðugu mati á framförum nemenda og krefst þess að kennarar hafi aðgang að faglegri þekkingu og stuðningi. Framfarir í læsi byggja á skipulagðri kennslu sem styðst við fagþekkingu og rannsóknir.
Það eru engar töfralausnir í að kenna læsi!
Að bæta læsi krefst samfelldrar, vandaðrar kennslu sem byggir á gagnreyndum og vel rannsökuðum kennsluaðferðum, fagþekkingu og rannsóknum – ekki pólitískum skyndilausnum.
