01/07/2026
Í gærkvöld hlaut ég þá alþjóðlegu og ánægjulegu viðurkenningu að vera valin Community Voice í flokki Honorary Awards hjá TechWomen4Boards.
Viðurkenningin var afhent í gala-dinner í London.
Ég verð að viðurkenna að það er bæði sérstök og gleðileg tilfinning að fá viðurkenningu fyrir það sem hefur í raun alltaf verið drifkrafturinn í mínum störfum og má kannski kalla tilgang minn eða kjarna minn, að hjálpa vinnustöðum og einstaklingum að vaxa, dafna og finna sína leið.
Í rökstuðningi fyrir viðurkenningunni er meðal annars vísað til vinnu minnar við að styðja fólk í starfsþróun og að hanna eða endurhanna sinn starfsferil, sem og að efla stjórnendur og leiðtoga, leiðbeina og fræða um sjálfsforystu og hvetja til sí- og endurmenntunar.
Einnig er nefnt það sem ég hef gert í sjálfboðavinnu og pro bono fyrir einstaklinga, félagasamtök og önnur samfélagsverkefni.
Það gladdi mig sérstaklega að sjá að sjálfsforysta og símenntun voru nefnd sem rauði þráðurinn í mínu framlagi og hvernig ég gef af mér.
Ég hef lengi trúað því að sjálfsforysta sé lykilhæfni fyrir framtíðina.
Í heimi þar sem breytingar verða sífellt hraðari skiptir ekki lengur bara máli hvað við kunnum, heldur hversu vel við þekkjum okkur sjálf, tökum ábyrgð á eigin vegferð og höldum áfram að læra, þróast og aðlagast.
Þess vegna legg ég einmitt alltaf svo ríka áherslu á símenntun.
Í gegnum Dokkan er ég einmitt að vinna að því að styðja vinnustaði og einstaklinga við að byggja upp þá hæfni sem þarf til að vaxa og dafna, ekki bara á vinnumarkaði framtíðarinnar heldur einnig í samfélagi framtíðarinnar.
Engin viðurkenning verður þó til í tómarúmi. Á bak við hana eru ótal samtöl, samstarfsverkefni, námskeið, fyrirlestrar, áskoranir og ekki síst allt það fólk sem hefur treyst mér fyrir sinni vegferð í gegnum árin.
Ég er innilega þakklát fyrir þessa viðurkenningu og fyrir allt það fólk sem hefur gefið mér tækifæri til að læra með sér og læra af sér.
Þessi viðurkenning hvetur mig til að halda áfram því sem skiptir mig mestu máli og ég hef svo gaman að: að leiðbeina um sjálfsforystu, styðja stjórnendur og leiðtoga og hjálpa vinnustöðum og einstaklingum að búa sig undir framtíðina.
Ég trúi því að þegar við sameinum öfluga sjálfsforystu og markvissa símenntun skapist ekki aðeins betri einstaklingar og sterkari vinnustaðir, heldur líka betra samfélag.
Takk fyrir traustið, samstarfið og öll tækifærin sem hafa leitt mig hingað. Ég tók við þessari viðurkenningu með miklu þakklæti, og enn meiri innblæstri til að halda áfram á sömu braut.
