08/10/2026
Ráðgjafar- og greiningarstöð hélt kynningu og þjálfun um námsefnið Sambönd og samskipti fyrir ungmenni (Relationships Decoded for Adolescents) dagana 5. og 6. október.
Fjórir fyrirlesarar komu frá Bandaríkjunum til að kynna efnið og þjálfa fagfólk í notkun þess. Um 70 þátttakendur sóttu kynninguna fyrri daginn og um 50 tóku þátt í þjálfuninni þann síðari.
Námsefnið er ætlað ungmennum með ódæmigerðan taugaþroska, meðal annars einhverfu og/eða þroskahömlun. Það fjallar um sambönd, samskipti, mörk, samþykki, öryggi, netnotkun og félagslega færni. Markmiðið er að auka skilning og öryggi ungmenna í samskiptum.
Fyrri daginn fengu foreldrar, aðstandendur og fagfólk kynningu á efninu og fræðilegum grunni þess. Seinni daginn fékk fagfólk hagnýta þjálfun í notkun þess, meðal annars með kennsluáætlunum, sjónrænum stuðningi og verkefnum sem hægt er að laga að þörfum ólíkra einstaklinga og hópa.
📚 Unnið er að íslenskri þýðingu á efninu fyrir 12–20 ára ungmenni og er áætlað að hún verði tilbúin í kringum áramót. Efnið má kynna sér hér: https://relationshipsdecoded.com/
Námsefnið fyrir fullorðna frá 20 ára aldri er þegar aðgengilegt á íslensku á vefnum Stopp ofbeldi: https://stoppofbeldi.mms.is/fraedsluefni/sambond-og-samskipti-relationship-decoded/
Ráðgjafar- og greiningarstöð þakkar fyrirlesurum og þátttakendum fyrir dagana tvo!
