23/10/2020
📌البوست الطوييييييل
✍️ (البوابة)
هذا البوست مبني على تجارب شخصية و بعض القراءات و البحث و هتكلم عن البوابة من حيث الوظيفة و أجزائها و مشاكها
* أولا وظيفة البوابة
انها تدخل الهواء للمانيفولد عشان يتخلط بالبنزين و يدخل غرفة الحرق بناء على دوسة البنزين او على السلانسية
* ثانيا أجزاء البوابة
1- جسم البوابة
2- حساس الأيدل.....هو ولا حساس ولا حاجة هو أسمه
IAC (Idle air control valve)
يعني صمام تحكم الهواء في السلانسيه
و هو اصلا stepper motor , يعني موتور بيلف في خطوات و وظيفته أنه يدخل هواء او لأ بناء على أوامر كمبيوتر العربية
3- حساس صمام البوابة
TPS ( Throttle position sensor)
و ده حساس بحق و حقيقي وظيفته انه يبلغ كمبيوتر العربية صمام البوابة مفتوح اد ايه، يعني انت دايس بنزين كتير و لا قليل جامد ولا بالراحة
4- صمام البوابة البترفلاي ، هو في العادي بيبقى مقفول و دي الحاله اللي بتكون فيها العربية على السلانسيه يعني واقف مش بتتحرك و مش دايس بنزين او وانت ماشي و ممور الفتيس و برده مش دايس بنزين
و لما بندوس بنزين الصمام ده بيتفتح حسب ما بندوس و يدخل هواء اكتر حسب ما احنا عاوزين .
5- مدخل و مخرج هواء حساس الأيدل(صمام الأيدل)
لما صمام البوابة بيكون مقفول ده طريق الهواء عشان يوصل للموتور و العربية تفضل دايرة
6- المكان اللي متوصل فيه سلك دواسة البنزين و ينقل الحركة من الدواسة لصمام البوابة
7- الجوان و وظيفتة انه يحكم دخول الهواء في مكان اتصال عمة الهواء بالبوابة عشان ما فيش تراب يدخل جوا البوابة اللي منها للمانيفولد و الموتور
و الجوان ده مهمته انه يمنع اي هواء يدخل للمانيفولد من مكان اتصال البوّابة بالمانيفولد
*ثالثا مشاكل البوابة
👈طيب قبل ما ندخل في المشاكل نتكلم بسرعة عن ازاي البوابة بتشتغل.
لما العربية بتكون دايرة و مش بتتحرك صمام البوابة بيكون مقفول و صمام الأيدل(حساس الأيدل) بيكون مفتوح شوية عشان الهواء يعدي من عنده و يوصل للموتور عشان العربية تفضل دايرة
الشوية اللي صمام الأيدل ده فاتحهم دول بيتغيروا حسب احتياج العربية و أوامر الكمبيوتر، يعني مثلا لو أنا شغلت التكيف و ده حمل على العربية و الكمبيوتر عاوز يعوض الحمل ده فعاوز يرفع الrpm فيقوم مدي امر لصمام الأيدل يفتح شويه كمان عشان يعدي هوا أكثر فيرفع ال rpm ،والعكس بيحصل لما تقفل التكيف ، امر للصمام انه يقفل شوية و يقلل الهواء اللي داخل عشان يقلل الrpm،، و هكذا،كل ده و العربية في السلانسيه.
👈طيب اما نبدأ ندوس بنزين ايه اللي بيحصل،يبدأ صمام البترفلاي يفتح و يدخل هواء اكتر على حسب ما بندوس في نفس الوقت صمام الأيدل بيقفل خالص هو كده مالوش لازمة وده رد علي السؤال الى كان مطروح للمناقشة فى البوست السابق لانه لو فضل مفتوح هيبقى فيه هواء زياده داخل و الكمبيوتر مش عارف فالعربية تتبرجل، و في نفس الوقت حساس صمام البوّابة(TPS) عمال يبلغ كمبيوتر العربية عن مكانه و بناء على الكلام ده كمبيوتر العربية يعمل شوية حسابات يعرف بيها انت دوست بنزين بالراحة و لا جامد بعد كده يدي أوامر للرشاشات بكمية البنزين اللي تدخلها للموتور و هكذا
المشاكل بقى ،هقسم معاكم المشاكل على حسب. ( تقسيمي الشخصي)
1- إن العربية تبطل لوحدها او تبطل لما تشيل رجلك من على البنزين .
طيب العربية بتبطل--ده بفرض ان المشكلة من البوابة مش عيب تاني-- عشان مفيش هواء داخل للموتور يعني صمام البوابة مقفول و صمام الأيدل مقفول هو كمان و بالتالي مافيش هوا بيدخل،،،،،، ،بس و انا دايس بنزين العربية تمام أول ما اشيل رجلي تبطل..عشان طول ما أنا دايس بنزين صمام البترفلاي مدخل هواء على طول و بيقفل لما اشيل رجلي
غالبا البوّابة دي بتكون بقالها كتير ما اتنظفتش و ممكن يكون صمام الأيدل معلق على وضع القفل و مع التنظيف يرجع يشتغل تاني و ممكن يكون محتاج يتغير
2- إن ال rpm يعلى و يعلق على العالي، الrpm بيعلى يعني فيه فيه هواء زياده داخل للموتور خارج حسابات الكمبيوتر و ده ممكن يكون من
*تلف سلك البنزين فبيعلق و صمام البوّابة ما بيقفلش كويس و يفضل يدخل هواء فهنغير السلك
*تلف صمام البوّابة نفسه ما بيرجعش مكانه او بقى بيسرب هواء( اعتقد كده ان في الحالة دي البوابة كلها بتتغير)
* صمام الأيدل وقف و هو مفتوح زيادة عن اللزوم(اعتقد ان ده نادر الحدوث)، يتم تنظيفة و تجربته و يتغير لو ما فيش فيه أمل
* الجوان اللي بين البوابة و المانيفولد ما بقاش محكم و بيسرب هواء للموتور، غير الجوان --و ده حصل معايا شخصيا و لففني حوالين نفسي أسبوعين--
طيب ال 4 عيوب اللي فاتوا دول على طول تشوفهم بالترتيب كده
سلك البنزين
جوان قاعدة البوّابة
صمام الأيدل
صمام البوابة
3-العربية بتبرجل و انا ماشي و مش بتستجيب لدوسة البنزين او بتسحب بمزاجها
الTPS حساس صمام البوّابة هو السبب لانه بيبلغ بيانات غلط للكمبيوتر فكل الحسابات ما تبقاش مضبوطة
مثلا انا دوست بنزين جامد عشان العربية تجري ال TPS بدل ما يبعت ان البوّابة مفتوحة على الآخر بعت انها مفتوحة شوية صغيرين بالتالي الكمبيوتر بعت للرشاشات تدخل كمية بنزين قليلة متناسبة مع فتحة البوابة الصغيرة
فيبقى أنا دايس جامد و هي بطة بلدي
طبعا الكلام ده كله نفكر فيه لو استبعدنا كل مسببات الاعطال الأخرى من بنزين سيئ و بوجيهات و بطارية....ألخ
ملحوظة
صمام الأيدل بيبوظ من إهمال تغيير فلتر الهواء و من ترسبات بخار الزيت اللي داخل له من الموتور و الحاجتين مع الوقت الطويل.
