06/05/2018
SAFARRADA CAAFIMAAD EE DALKA TURKIGA
Sida la wada ogyahay, dalka Turkigu wuxuu ka mid noqday dalalka ay soomaalidu baryahaan dambe ay u aadaan daryeel caafimaad, laakiin nasiib xumo dadkaasi qaar badanoo ka mid ah waxay la kulmaan isfahan la'aan iyo filanwaa taasoo ku keeni karto niyadjab khaassatan haddii aysan horay khibrad ama fikrad uga haysan dalka turkiga iyo daryeelka caafimaadka ay ka heli karaan.
Dalka turkigu wuxuu kaalinta 4-aad kaga jiraa liiska dalalka loo aado safarrada caafimaadka, waxaa ka horeeyo dalalka kala ah: India, Brazil iyo Malaysia, waxayna hadda aad ugu ololeynayaan in kalinta 2-aad ama 3-aad ay galaan, taas ayaana keentay waxyaabo badan oo horay caqabo u ahaa inay fududeeyeen.
Bukaannada ugu badan ee Turkiga u doonto caafimaadka waxay ka yimaadaan dalalka yurub iyo carabta, inkastoo daryeel kala duwan loo doonto laakiin waxyaabaha ugu badan ee loo aado waxaa ka mid ah: Beerista bidaarta, Qalliimada indhaha, Badalista dhuuxa lafta ee dadka kansarka dhiigga ku dhacay, Bacriminta dumarka ee aan uurka qaadin, Qalliimada qurxinta jirka, qalliimada lafdhabarta iyo dhaawacyada iyo cilladaha ku dhaca lafaha iyo ilkaha.
Isbitaallada dalka turkiga ku yaallo waa kuwa dowladdu leedahay ama taakuleyso oo qiimahoodu jaban yahay, looguna talagalay shacabka iyo wixii dowladda dhinaceeda ka socdo, wayna adag tahay inaad daryeel ka heshaa haddii aad ajnabi tahay illaa inay dowladdu ku wadato mooyee iyo kuwo khaas (private) loo leeyahay oo badanaa ajaanibta lagu daaweeyo. daryeelka laga helo isbitaallada dowladda iyo kuwa khaaska waa isku mid oo kalama yareestaan.
Turkigu waa dal muslim ah, Soomaaliduna laga jecel yahay, noloshuna ay macquul ka tahay, daryeelka caafimaadkane aad u sarreeyo laakiin dhibka ugu wayn waa dhinaca luqadda maadaama shacabku ay luqadda Turkishka kaliya adeegsadaan.
Dhibaatada luqadda waxay keentay in soomaalidu markay turkiga tagaan ay raadiyaan qof u tarjumo ama isbitaallada geeyo, halkaasne dhib kale ayay kala kulmaan sababtoo ah waxaa dalka jooga markii laga reebo ardayda iyo ganacsatada oo aan waqti haynin, mukhallasiin soomaali ah oo isbitaallo qaar ah ku xiran oo dad badan lug gooyay, qarashkii saxda ahaa ee wax loogu qaban karayne 2 illaa 3 jibaar ka qaatay.
Marka iyadoo intaas jirto, maxaa talo ah:
# Qodobka 1-aad: Inta aadan safrin ka hor xog-aruurin samee, daryeelka aad u baahan tahay iyo isbitaalka aad ka heli kartid, adigoo fikrad ka haysta meesha aad u socotid, safarka ku dhaqaaq, laakiin haddii aad iska tagtid, waa lagu lug goynayaa, waqtigane wuu kaa dhamaanayaa, qof walba oo aad la kulantidne wuxuu ku oranayaa isbitaalka ugu fiican anaa aqaano, adigane bukaan ayaa tahay, k**a bixi kartid isjiidjiidkaas.
# Qodobka 2-aad: Ogow isbitaallada turkiga ee khaaska ah waxay u badan yihiin "Speciazlied hospitals" taas macnaheedu waxay tahay in isbitaalka oo dhanba inuu ku shaqo leeyahay qeyb caafimaadka ka mid ah, tusaale haddii indhaha lagaa haayo, waxaad helaysaa isbitaallo indhaha u gaar ah kaliya, sidoo kale lafaha, kansarka, bidaarta IWM. isbitaalladaan waxay ku fiican yihiin inay leeyihiin "internationa patients department" oo ah xafiis loogu talagalay ajaanibta, taasoo aad ka helaysid tarjumaan free ah, laakiin isibtaallada guud "General Hospitals", waxaa dhici kara inaad ku wareertid weliba markaa dalka ku cusub tahay, midda kale isbitaallada takhasusaatka goonida leh waxay ku fiican yihiin in dhakhtarkii aad uga baahnayd in si dhakhso ah aad ku heshid, waqti horane ay wax kuu dhamaadaan.
# Qodobka 3-aad: Waa midda ku saabsan qarashka, Isbitaallada khaaska ah ee la tacaamula ajaanibta "international patients" waxay ka wada siman yihiin inay fikrad kaa siin karaan qarashka kugu bixi doona iyo waxa laguugu qabanayo adigoo aan safrin, taasi waxay kaa caawinaysaa inaad sii tabaabushaysatid, laakiin waxaad u baahan tahay inaad u martid dad aad isku hubtid oo dalka turkiga joogo ama dad aqoon u leh system-ka caafimaadka.
Intaas ka dib, haddii aad u baahan tahay talo dheeraad ah ama faahfaahin ku saabsan safarrada caafimaad ee dalka turkiga fariin noogu dhaaf boggaan ama na gala soo xiriir emailkaan: [email protected]
Fadlan qormadaan la gareey qofkii u baahan.
