24/11/2021
#អចលនទ្រព្យខេត្តត្បូងឃ្មុំហាក់រីកមុខមាត់ក្រោយគម្រោងរដ្ឋធំៗចំនួន5បានបង្ហាញសកម្មភាព
ថ្មីៗនេះ ខេត្តត្បូងឃ្មុំ ដែលជាខេត្តកូនពៅរបស់ប្រទេសកម្ពុជា បានទទួលនូវគម្រោងរដ្ឋធំៗជាច្រើន ដែលទាក់ទងទៅនឹងហេដ្ឋារចនាសម្ព័ន្ធ ស្ពាន ផ្លូវថ្នល់ និងមន្ទីរពេទ្យ ដើម្បីជួយសម្រួលដល់ប្រជាជនដែលកំពុងរស់នៅក្នុងខេត្តមួយនេះ។
ថ្វីត្បិតតែជាខេត្តថ្មីមែន ប៉ុន្តែបើយើងក្រឡេកទៅមើលការអភិវឌ្ឍវិញនោះ គឺមានការរីកចម្រើនខ្លាំងមែនទែន ដែលការរីកលូតលាស់នេះហើយបានជំរុញឱ្យសេដ្ឋកិច្ចក្នុងខេត្តកាន់តែមានដំណើរទៅមុខជាខ្លាំង។ ចំពោះគម្រោងរដ្ឋធំៗចំនួន៥នោះរួមមាន៖
- ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ៖ ដែលតម្លៃជាង ៥៦លានដុល្លារ បានសម្ពោធដាក់ឱ្យប្រើប្រាស់ជាផ្លូវការនៅថ្ងៃទី២៣ ខែ វិច្ឆិកា ឆ្នាំ២០២១ នេះ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
- ផ្លូវជាតិ ៧១ C ៖ គម្រោងផ្លូវជាតិនេះ មានប្រវែង ១១៤,៦២គីឡូម៉ែត្រ ស្ថិតនៅក្នុងភូមិសាស្រ្តក្រុងសួង ស្រុកត្បូងឃ្មុំ ស្រុកក្រូចឆ្មារ ខេត្តត្បូងឃ្មុំ និងស្រុកស្ទឹងត្រង់ ស្រុកចំការលើ ខេត្តកំពង់ចាម។
- មន្ទីរពេទ្យមិត្តភាពកម្ពុជា-ចិន ត្បូងឃ្មុំ៖ មន្ទីរពេទ្យនេះមានតម្លៃជាង៥០លានដុល្លារ គ្រោងបញ្ចប់ការសាងសង់ នាចុងខែវិច្ឆិកានេះ នឹងបំរើសេវាសុខាភិបាលប្រកបដោយបរិក្ខារទំនើប ស្តង់ដារខ្ពស់។ តាមការបញ្ជាក់ពីឯកឧត្តម ស៊ុន ចាន់ថុលបានឱ្យដឹងថា៖ មន្ទីរពេទ្យដ៏ធំមួយនេះ សម្រេចការសាងសង់បាន ៩៧ភាគរយហើយ។
- មន្ទីរពេទ្យបង្អែកស្រុកក្រូចឆ្មារ៖ មន្ទីរពេទ្យនេះបានចាប់ផ្តើមសាងសង់អគារទី២ នៃមន្ទីរពេទ្យបង្អែកស្រុកក្រូចឆ្មារ ស្ថិតនៅភូមិខ្សាច់ប្រឆេះលើ ឃុំក្រូចឆ្មារ ស្រុកក្រូចឆ្មារ ខេត្តត្បូងឃ្មុំ មានទទឹង១៨ម៉ែត្រ បណ្តោយ៦២ម៉ែត្រ កម្ពស់៤ជាន់ និងមានទំហំដូចគ្នានឹងអគារទី១ ដែលបានបើកការដ្ឋានសាងសង់កាលពីថ្ងៃទី២៧ ខែកក្កដា ឆ្នាំ២០២០ និងសម្រេចលទ្ធផលសាងសង់បានប្រមាណ៩០%។
- ផ្សារដារ៖ ជាផ្សារគំរូព្រំដែនកម្ពុជាទី១ ដែលស្ថិតនៅក្នុងឃុំដារ ស្រុកមេមត់ ខេត្តត្បូងឃ្មុំ និងនៅមាត់ច្រកទ្វារព្រំដែនទ្វេភាគីដារ ជាប់នឹងព្រំដែនខេត្តតៃនិញ ប្រទេសវៀតណាម ដែលចំណាយការសាងសង់អស់ទឹកប្រាក់ប្រមាណ ២លានដុល្លា។ ផ្សារមួយនេះ នឹងផ្តល់នូវសក្ដានុពលខ្ពស់ក្នុងការបង្កើតការងារ បង្កើនប្រាក់ចំណូលសម្រាប់ប្រជាជននៅតាមព្រំដែន និងដើម្បីបង្កើនពាណិជ្ជកម្មទ្វេភាគីរវាងប្រទេសកម្ពុជា និងប្រទេសវៀតណាម ក៏ដូចជានឹងក្លាយជាផ្សារគំរូមួយ ក្នុងការដោះដូរទំនិញខេត្តដែលជាប់ព្រំដែនប្រទេសជិតខាង។
បើនិយាយពីវិស័យអចលនទ្រព្យវិញក៏មិនអន់ដែរ គឺមានអ្នកអភិវឌ្ឍជាច្រើនបានសម្រុកចូលទៅ ដោយមានជាការពុះដីឡូតិ៍ និងសាងសង់លំនៅដ្ឋានជាដើម។ តាមការឱ្យដឹងពីអ្នកពុះដីឡូតិ៍នៅក្នុងតំបន់នេះបានឱ្យដឹងថា ចំពោះតម្លៃដីឡូតិ៍មានចាប់ពី ៥០០០$ ហាក់នៅឆ្ងាយពីខេត្ត ប៉ុន្តែបើចាប់៧០០០$ ជាងឡើងគឺនៅក្បែរនឹងខេត្ត ជាប្រភេទដីប្លង់រឹង។
ប៉ុន្តែនៅត្រង់ចំណុចនេះ ខ្ញុំសូមសំណូមពរទៅបងប្អូនដែលចង់វិនិយោគទៅលើវិស័យអចលនទ្រព្យ រាល់ពេលដែលធ្វើការទិញ-លក់ សូមពិនិត្យឱ្យបានម៉ត់ចត់ទៅលើក្រុមហ៊ុនលក់ និងពិនិត្យទៅលិខិតឯកសារ ពាក់ព័ន្ធផ្លូវច្បាប់នានា ដើម្បីចៀសវាងមានបញ្ហាក្នុងករណីណាមួយកើតមានឡើងនៅពេលខាងមុខ។
From : FACEBOOK
