25/01/2026
មានអ្នកនិយាយថា "ចង់ធ្វើអាជីវកម្មមកយូរហើយ តែឥឡូវអាយុ 50 ហើយ ប្រហែលជាហួសពេលហើយមើលទៅ? អ្នកដទៃគេចាប់ផ្ដើមតាំងពីអាយុ 20 ជាងមកម្ល៉េះ"
ស្ដាប់ហើយក៏បាននិយាយជាមួយបងប្រុសម្នាក់នោះថា កាន់តែយឺត កាន់តែល្អ...
យើងត្រូវបានប្រព័ន្ធផ្សព្វផ្សាយបោកបញ្ឆោតមកយូរហើយ រហូតគិតថាការក្លាយជាអ្នកជំនួញ ត្រូវតែវ័យក្មេងខ្ទង់ 20 ឆ្នាំ ដែលឈប់រៀនពាក់កណ្តាលទីពីសាកលវិទ្យាល័យ រួចមកបង្កើត App នៅក្នុងយានដ្ឋាន
តាមពិតគឺ វាមិនមែនបែបនោះទេ
មានទិន្នន័យពី Harvard Business Review ថា ស្ថាបនិក Startup ដែលទទួលបានជោគជ័យពិតប្រាកដ មានអាយុជាមធ្យម 45 ឆ្នាំ មិនមែន 25 ឆ្នាំ ដូចដែលយើងគិតនោះទេ ហើយរឿងដែលគួរឱ្យចាប់អារម្មណ៍ជាងនេះទៅទៀតនោះ គឺស្ថាបនិកដែលមានអាយុចាប់ពី 50 ឆ្នាំឡើងទៅ មានឱកាសស្ថិតនៅក្នុងក្រុម 0.1% នៃ Startup ដែលរីកចម្រើនលឿនបំផុត ច្រើនជាងស្ថាបនិកអាយុ 25 ឆ្នាំ ដល់ទៅ 1.3 ដង
មានន័យថា យឺតកាន់តែច្រើន កាន់តែមានឱកាសឈ្នះកាន់តែខ្ពស់ ស្ថាបនិកអាយុ 50 ឆ្នាំ មានឱកាសបង្កើត Startup ដែលជោគជ័យ ច្រើនជាងស្ថាបនិកអាយុ 30 ឆ្នាំ ដល់ទៅ 2.2 ដង ចំណែកឯស្ថាបនិកអាយុ 60 ឆ្នាំ ឱកាសទទួលបានជោគជ័យមានច្រើនជាងមនុស្សអាយុ 30 ឆ្នាំ ដល់ទៅ 3 ដងឯណោះ
ហេតុអ្វីបានជាមនុស្សចាស់ឈ្នះ?
ហេតុផលដំបូងដែលគ្មានអ្នកណានិយាយនោះ គឺភាពអត់ធ្មត់ និងការមើលឃើញរូបភាពធំ យុវជនតែងតែចង់បានលទ្ធផលភ្លាមៗ បើអាជីវកម្មមិនផ្ទុះក្នុងរយៈពេល 3 ខែដំបូង ពួកគេនឹងប្តូរគំនិតភ្លាមៗ ប៉ុន្តែអ្នកដែលមានបទពិសោធន៍ដឹងថា អាជីវកម្មដែលរឹងមាំត្រូវប្រើពេលវេលា
ធ្លាប់ជជែកជាមួយសហគ្រិន អាយុ 52 ឆ្នាំម្នាក់ ដែលទើបតែបើកហាងកាហ្វេ គាត់ប្រាប់ថា "កាលពីក្មេង បើគ្មានអតិថិជនចូលហាងមកក្នុងរយៈពេល 2 សប្តាហ៍ ខ្ញុំប្រហែលជាបិទហាងបាត់ហើយ ប៉ុន្តែឥឡូវនេះ ខ្ញុំដឹងថាការបង្កើតក្រុមអតិថិជនត្រូវប្រើពេលយ៉ាងហោចណាស់ 6 ខែ" ហើយតាមពិតទៅ ហាងរបស់គាត់ក៏ចាប់ផ្ដើមមានប្រាក់ចំណេញនៅក្នុងខែទី 7 ពិតមែន
បទពិសោធន៍ការងារក៏ផ្ដល់នូវបណ្ដាញទំនាក់ទំនង ដែលរឹងមាំផងដែរ នៅពេលដែលអ្នកធ្វើការមក 10 ឆ្នាំ 20 ឆ្នាំ អ្នកនឹងមានមិត្តរួមការងារ អតីតមេ អតិថិជនចាស់ ដែលអាចក្លាយជាដៃគូអាជីវកម្ម អ្នកវិនិយោគ ឬអតិថិជនដំបូងនៃអាជីវកម្មថ្មីបាន
ហេតុផលសំខាន់មួយទៀតគឺរឿងលុយកាក់ មនុស្សវ័យកណ្តាលតែងតែមានប្រាក់សន្សំ ឬទ្រព្យសម្បត្តិដែលអាចយកមកប្រើជាដើមទុនបាន ដោយមិនចាំបាច់ទៅសុំលុយពីគ្រួសារ ឬស្វែងរកអ្នកណាមកដាក់ទុនឱ្យឡើយ ធ្វើឱ្យមានសេរីភាពក្នុងការសម្រេចចិត្តច្រើនជាង
រឿងដែលយុវជនមិនមាន គឺភាពស្ងប់ចិត្ត មនុស្សវ័យកណ្តាលមិនចាំបាច់ធ្វើឱ្យមើលទៅឡូយ ឬបង្ហាញអ្វីឱ្យអ្នកណាម្នាក់ឃើញឡើយ ពួកគេច្រើនតែចាប់ផ្ដើមអាជីវកម្មដោយសារតែមើលឃើញឱកាសពិតប្រាកដ ឬដើម្បីដោះស្រាយបញ្ហាដែលគេបានជួបប្រទះពិតៗ មិនមែនដោយសារចង់ល្បី ឬចង់មានលឿននោះទេ
ទិន្នន័យពី Global Entrepreneurship Monitor បង្ហាញថា 70% នៃអាជីវកម្មដែលចាប់ផ្ដើមដោយសហគ្រិន អាយុ 50 ឆ្នាំឡើងទៅ នៅតែបន្តដំណើរការបានបន្ទាប់ពីរយៈពេល 5 ឆ្នាំ បើប្រៀបធៀបនិង 28% នៃអាជីវកម្មដែលចាប់ផ្ដើមដោយអ្នកជំនាន់ក្រោយ
នេះមិនមែនមានន័យថា យុវជនមិនពូកែទេ ប៉ុន្តែមានន័យថាមនុស្សចាស់មានភាពនឹងនរ និងរឹងមាំយូរអង្វែងជាង ពួកគេមិនប្រញាប់ប្រញាល់ ក្នុងការប្រើលុយ និងស្គាល់ពីការរៀបចំផែនការរយៈពេលវែងនោះទេ
អ្នកប្រហែលជាស្គាល់ Colonel Sanders ដែលចាប់ផ្ដើមអាជីវកម្ម KFC នៅពេលអាយុ 62 ឆ្នាំ បន្ទាប់ពីគាត់ត្រូវបិទហាងអាហារចាស់ ដោយសារតែមានផ្លូវថ្មីដែលធ្វើហើយ ធ្វើឱ្យគ្មានអតិថិជនចូលហាង ជំនួសការចូលនិវត្តន៍ដោយស្ងប់ស្ងាត់ គាត់បែរជាបើកឡានទៅស្នើសុំរូបមន្តមាន់បំពងពីហាងមួយទៅហាងមួយទៀត
ឬ Ray Kroc ដែលចាប់ផ្ដើមពង្រីក McDonald's នៅពេលអាយុ 52 ឆ្នាំ បន្ទាប់ពីធ្វើជាអ្នកលក់ម៉ាស៊ីនក្រឡុក Milkshake អស់ពេញមួយជីវិត គាត់បានទៅជួបហាង McDonald's របស់បងប្អូន McDonald ហើយឃើញនូវ Busniss Model ដែលគួរឱ្យចាប់អារម្មណ៍ ទើបសុំទិញសិទ្ធិមកពង្រីកនៅទូទាំងអាមេរិក
ក្នុងយុគសម័យ ឆ្នាំ 2005 ដល់បច្ចុប្បន្ន ក៏មាន Arianna Huffington ដែលបង្កើត The Huffington Post ក្នុងអាយុ 54 ឆ្នាំ ឬ Dr. Carmen Hijosa ដែលប្រើពេលជាង 10 ឆ្នាំ ក្នុងការស្រាវជ្រាវ និងអភិវឌ្ឍស្បែកសិប្បនិម្មិតពីស្លឹកម្នាស់ រួចមកបើកក្រុមហ៊ុន Ananas Anam ក្នុងអាយុ 60 ឆ្នាំ
ហេតុអ្វីបានជាពិភពលោកចាប់ផ្ដើមមើលឃើញតម្លៃរបស់សហគ្រិនរវ័យចំណាស់?
ជុំវិញពិភពលោកចាប់ផ្ដើមផ្លាស់ប្តូរហើយ Global Entrepreneurship Monitor រាយការណ៍ថា អត្រានៃការក្លាយជាសហគ្រិនទូទាំងពិភពលោក បានផ្លាស់ប្តូរទៅក្រុមអាយុ 55-64 ឆ្នាំ ហើយសកម្មភាពនៃការធ្វើជាសហគ្រិនក្នុងក្រុមអាយុ 50 ឆ្នាំឡើងទៅ បានកើនឡើងជាង 50% ចាប់តាំងពីឆ្នាំ 2008 មក
នៅអាមេរិក ច្រើនជាង 50% នៃម្ចាស់អាជីវកម្មខ្នាតតូច មានអាយុលើសពី 50 ឆ្នាំ ហើយរឿងដែលគួរឱ្យចាប់អារម្មណ៍នោះគឺ 40% នៃសហគ្រិនដែលមានអាយុលើសពី 50 ឆ្នាំ ចាប់ផ្ដើមអាជីវកម្មដើម្បីដើរតាមក្ដីស្រម៉ៃ មិនមែនដោយសារតែភាពចាំបាច់ផ្នែកហិរញ្ញវត្ថុនោះទេ
បញ្ហាធំបំផុតមិនមែនជាសមត្ថភាព ឬឱកាសក្នុងការទទួលបានជោគជ័យទេ ប៉ុន្តែវាគឺជា Mindset របស់ខ្លួនយើង និងសង្គមជុំវិញខ្លួន យើងត្រូវបានគេបញ្ចូលរូបភាពរបស់ CEO វ័យក្មេងពាក់អាវ Hoodie មកជាយូរហើយ រហូតគិតថានោះគឺជាស្តង់ដារ
ប៉ុន្តែតាមពិតទៅ អាជីវកម្មភាគច្រើនដែលរឹងមាំយូរអង្វែង និងបង្កើតប្រាក់ចំណេញពិតប្រាកដ ត្រូវបានបង្កើតឡើងដោយមនុស្សដែលមានបទពិសោធន៍ យល់ពីទីផ្សារ ស្គាល់អតិថិជន និងមានភាពអត់ធ្មត់គ្រប់គ្រាន់ក្នុងការបង្កើតរបស់ល្អៗដោយសន្សឹមៗ ប៉ុន្តែច្បាស់លាស់
រឿងដែលមនុស្សវ័យកណ្តាលតែងតែបារម្ភ គឺរឿងបច្ចេកវិទ្យា ប៉ុន្តែការពិតគឺ បច្ចេកវិទ្យាគ្រាន់តែជាឧបករណ៍ប៉ុណ្ណោះ រឿងដែលសំខាន់ជាង គឺការយល់ដឹងពីអាជីវកម្ម ការផ្ដល់សេវាកម្មដល់អតិថិជន និងការដោះស្រាយបញ្ហាពិតប្រាកដ ដែលរឿងទាំងនេះកើតចេញពីបទពិសោធន៍ ច្រើនជាងអាយុ
មនុស្សជាច្រើនចាប់ផ្ដើមអាជីវកម្ម បន្ទាប់ពីត្រូវបានគេបញ្ឈប់ពីការងារ ឬបង្ខំចិត្តចូលនិវត្តន៍ ប៉ុន្តែនេះអាចជាពរជ័យ ច្រើនជាងបណ្ដាសា ព្រោះថា Bernie Marcus បានបង្កើត The Home Depot បន្ទាប់ពីត្រូវបានគេដេញចេញពីការងារក្នុងអាយុ 50 ឆ្នាំ ថ្ងៃនេះ The Home Depot គឺជាបណ្តាញហាងលក់ឧបករណ៍ជាងដែលធំបំផុតមួយនៅលើពិភពលោក
ការមានពេលវេលាទំនេរក្រោយចូលនិវត្តន៍ អាចជាឱកាសល្អក្នុងការធ្វើរឿងដែលយើងធ្លាប់ស្រមៃចង់ធ្វើអស់មួយជីវិត ដោយមិនចាំបាច់បារម្ភពីរឿងចំណូលប្រចាំខែ ឬថិតថេរក្នុងអាជីព
ពាក្យណែនាំសម្រាប់អ្នកដែលគិតថាខ្លួនឯង "ចាប់ផ្ដើមយឺតពេល"
ទី១ កុំប្រៀបធៀបខ្លួនឯងជាមួយអ្នកដទៃ ជាពិសេសអ្នកដែលមានអាយុតិចជាង ព្រោះអ្នកមានចំណុចខ្លាំងដែលពួកគេមិនមាន ចាប់ផ្ដើមពីរឿងដែលអ្នកដឹង រឿងដែលអ្នកពូកែ ឬបញ្ហាដែលអ្នកយល់ច្បាស់
ទី២ ប្រើបណ្ដាញទំនាក់ទំនងដែលអ្នកមាន មនុស្សដែលអ្នកធ្លាប់ធ្វើការជាមួយ អតិថិជនចាស់ មិត្តរួមឧស្សាហកម្ម ទាំងនេះគឺជាធនធានដែលមានតម្លៃខ្លាំងណាស់ ដែលយុវជនមិនមាន
ទី៣ កុំព្យាយាមយកឈ្នះយុវជនដោយល្បឿន ប៉ុន្តែត្រូវយកឈ្នះដោយគុណភាព ភាពជឿជាក់ និងការមើលវែងឆ្ងាយ
បើអ្នកដឹងថាឱកាសជោគជ័យរបស់អ្នកនឹងកើនឡើងតាមអាយុ តើអ្នកនៅតែគិតថាខ្លួនឯងចាប់ផ្ដើមយឺតពេលទៀតដែរឬទេ?
ប្រសិនអ្នកមានបទពិសោធន៍ បណ្ដាញទំនាក់ទំនង ដើមទុន និងភាពអត់ធ្មត់ច្រើនជាងយុវជន តើអ្នកនៅតែខ្លាចក្នុងការសាកល្បងធ្វើអាជីវកម្មផ្ទាល់ខ្លួនទៀតដែរឬទេ?
ជួនកាលក្ដីស្រមៃរបស់អ្នកមិនទាន់យឺតពេលទេ ប៉ុន្តែវាទើបតែដល់ពេលដែលស័ក្តិសម ហើយជួនកាលអាយុ 45, 50, ឬ 60 មិនមែនជាចំណុចបញ្ចប់ទេ ប៉ុន្តែវាគឺជាចំណុចចាប់ផ្ដើមពិតប្រាកដ
ព្រោះនៅក្នុងពិភពលោកដែលគ្រប់គ្នាប្រញាប់ប្រញាល់ មនុស្សដែលចិត្តត្រជាក់ និងមានបទពិសោធន៍ អាចនឹងក្លាយជាអ្នកដែលឈ្នះនៅទីបញ្ចប់
